第4章——作田人Khiā家記事
9. 桌á kap椅á

桌á kap椅á

Toh-á kap Í-á

庄腳人ê桌，大約有神明桌、八仙桌、kí桌（尪架桌）、食飯桌、圓桌、事務桌、冊桌á，大部份是木材ê柴桌kap竹á桌。

1. Tiāⁿ看--tio̍h ê桌á

Tiāⁿ Khòaⁿ--tio̍h ê Toh-á

1-1. 食飯桌

Chia̍h-pn̄g-toh

食飯桌通常khǹg tī灶腳，灶腳有夠大間to̍h ē-sái-tit排4隻椅條，nā是無夠闊to̍h 1-pêng倚壁，3-pêng khǹg椅á，cha-po͘人食tāi-seng，cha-bó͘人食押尾，gín-á人phâng去低椅á食，免驚位無夠。

食飯桌有柴料kap-choh，mā有桂竹á ut，有ê是活動合á桌。「食飯皇帝大」，請人客定tio̍h ài坐桌，古早厝邊隔壁tn̄g-tio̍h鬧熱攤，需要厝邊頭尾kā人借椅桌，chit種四四角角ná八仙桌ê食飯桌，kài方便搬徙。

1-2. 圓桌

Îⁿ-toh

圓是圓滿，是團圓，圍爐ê烘爐mā是圓--ê，紅圓mā是圓--ê，喜宴尾出菜色是丸á湯mā是圓--ê，m̄-koh庄腳人厝內to̍h是真少圓桌？是厝間siuⁿ狹，厝間無夠？四角桌ē-tàng倚壁khǹg，圓桌oh排thia̍p可能是原因。圓桌tio̍h配圓椅頭á，bē-tàng排長條形椅條，偏偏椅條是庄腳人siāng kài方便ê坐椅，這mā是一種因素。

1-3. 三腳圓桌

Saⁿ-kha Îⁿ-toh

桌枋桌腳組合ê組合圓桌，車床車工造型chiâⁿ súi，圓形桌緣mā有雕花樣，桌枋下面有角材釘四角形kap桌腳面頂四角枋相kap，chiah用活動柴栓（sng）chhòaⁿ tiâu固定，bā-bā在在。桌腳形體是一支toh-thiāu（桌柱）tàu三支貓á腳，貓á腳chiah koh tàu三支桌koaiⁿ，桌柱桌koaiⁿ lóng是車床車成葫蘆腰形，榫頭榫khang接榫kap-choh，無用釘tèng，chit款三腳圓桌有人講是日本（式）圓桌，搬徙方便。

1-4. 四腳圓桌

Sì-kha Îⁿ-toh

四腳圓桌是本島式圓桌，無雕刻花樣，樸素好用，桌腳是雙「X」形ē-tàng合倚，號做鉸刀腳，是合á桌，搬徙方便。

1-5. 事務桌

Sū-bū-toh

事務桌本是食頭路人ê辦公桌á，適合坐椅á寫字看冊做文書khang-khòe，真方便。厝內人客間、總舖間khǹg一隻事務桌，m̄-nā ē-tàng看冊、寫字，thoah-á khǹg重要書類、稅單、墨盤毛筆，桌頂khǹg東khǹg西，mā表示阮tau有人bat字。Bat字bat漢字，ē-hiáu寫字寫水筆字ê庄腳人，是受人尊重--ê。

1-6. 冊桌á

Chheh-toh-á

厝--裡有讀冊gín-á to̍h需要桌椅讀冊寫字，hi-nó͘-khih事務桌貴som-som，簡單雜木á柴冊桌á，已經滿足歡喜，想hit-tang-sî國校6年初中3冬lóng是hit隻桌面無平ê柴桌陪我讀冊寫字，另外koh tio̍h khǹg番á油燈、茶kó͘、茶甌。

有桌to̍h ài有椅，厝內有椅有桌，食飯、讀冊、寫字，開講phò-tāu、作穡、歇睏，chiah有tàng坐有tàng khǹg物。椅á形體chiâⁿ chē款式，有koân有低、有大有細、有長有短、有大板有細liau，有木材kap-choh、用桂竹á ut、用籐pīⁿ。

2. Tiāⁿ看--tio̍h ê椅á

Tiāⁿ Khòaⁿ--tio̍h ê Í-á

2-1. 椅頭á

Í-thâu-á

無椅phēng ê柴椅號做椅頭á，有人講椅鼓頭á，有koân有低，kap-choh師傅鑿榫kap-choh，圓形--ê khah chē，koân椅頭á搬徙輕省方便，食飯、開講、看戲、看王祿á，thiap腳peh koân提物，gín-á食飯做飯桌，甚至顛倒khǹg ē-tàng做鼓架。

細隻圓椅頭á是gín-á siāng kah意，giâ來giâ去kài liú-lia̍h，坐leh thit-thô，坐leh食物，坐leh看阿母作穡，坐leh niau-niau看，等待阿爸ê嘴食物。Tn̄g tio̍h cha-bó͘ gín-á人來teh定掛phoa̍h鍊金手指，一句「交椅坐，腳thiap椅，好命無地比。」好話ê祝福，to̍h知細隻圓椅頭á ê重要好路用。Siáⁿ-mih是好命？坐金交椅，腳thiap椅to̍h是。

2-2. 椅條

Í-tiâu

椅條有人講椅liâu，長liau形柴椅，chhoa̍h-chhoa̍h thóng出椅條面ê榫頭，是固定ân-thán ê智慧，m̄免加一支橫koaiⁿ，方便giâ tiàm肩胛頭。椅條路用chiâⁿ-chē，食飯坐桌，phò-tāu看戲，坐兩ê三ê kheh 4-5-ê，寒天giâ來北pêng護龍gîm-chîⁿ腳nà日花á，坦橫做馬騎，面對面講話耍thit-thô，boeh theⁿ boeh倒，熱--人秋凊kài好勢。

挨粿teh粿漿，kah黃麻刀khau黃麻皮，kah索á機絞黃麻索，thiap koân做khang-khòe，chhāi khiā掛銅鑼khoaiⁿh khoaiⁿh khoaiⁿh khoaiⁿh真好勢。

天公生拜天公，nn̄g liâu椅條thia̍p八仙桌桌腳，to̍h是雙層桌。

2-3. 生Kiáⁿ椅／四角椅頭á

Seⁿ-kiáⁿ Í/Sì-kak Í-thâu-á

平平闊面厚枋四角椅面，椅腳椅koaiⁿ粗大ân-thán，紅色漆料，tēng-tauh真chāi，che是老祖媽時代ê嫁妝。Chit種pūn-chhiâng老祖媽新娘嫁妝四角椅頭á，平常時做椅á坐，ka倒péng to̍h是生kiáⁿ椅，產婦騎馬long tiàm椅koaiⁿ，雙手la̍k tiàm椅腳tèⁿ力生kiáⁿ。當然是khǹg-tiàm新娘房，是新娘有身大身大命時ê坐椅，比較khah安全，tn̄g tio̍h khioh gín-á做月內，月內人m̄-thang吹風曝日，tio̍h bih-tiàm房間內洗tn̄g食雞酒，khǹg碗箸鍋盤面桶to̍h真四序方便。

2-4. 孔雀椅

Khóng-chhiak-í

Chit種有椅phēng形體chiâⁿ súi ê圓面椅á，號做孔雀椅，伊ê椅phēng彎曲，tàu兩支直koaiⁿ，sió-khóa sêng孔雀開屏，椅底sió-khóa lap-o koh有lak khang，符合人體工學，chiâⁿ好坐，是庄腳人siāng-kài飄撇ê坐椅。

2-5. 太師椅

Thài-su-í

富戶人家太師椅是雕花鑲寶石，庄腳人ê太師椅是椅phēng koân-koân ê籐椅，好坐koh涼爽。

2-6. 籐椅

Tîn-í

籐條ut架，籐篾á pīⁿ底kap椅phēng，厝內khǹg一隻，老歲á人siāng kah意坐椅，ká-ná坐太師椅。

2-7. 交椅

Kau-í

「娶bó͘大姊，坐金交椅。」金交椅to̍h是雕花鑲寶石ê太師椅。庄腳作田人ê太師椅有竹交椅有籐交椅，不過慣勢kā竹交椅講做交椅，kā籐交椅講做籐椅。交椅椅phēng koân-koân ē-tàng半theⁿ，koh有椅手ē-tàng khòe手，坐--起-來有sîng老爺太師爺，爽快ni-ni。

2-8. Theⁿ椅

Theⁿ-í

竹ut theⁿ椅記智chiâⁿ深，阿爸有一隻，枝骨椅面枕頭拖椅全部桂竹，椅面是竹管phah平密chiuh-chiuh金滑金滑，足好theⁿ leh歇睏，熱--人時常theⁿ kah睏--去。Theⁿ椅六支腳，有椅手有椅phēng，椅phēng是活動設計，ē-tàng調整koân低，調koân to̍h是一隻坐椅，調chhu-chhu chhoa̍h-chhoa̍h ē-tàng theⁿ，調平平koh kā下面兩腳拖椅拖--出-來 to̍h是一頂眠床，ē-tàng倒leh睏，熱天秋凊涼爽無地比。

註：Theⁿ是Lah-jih老師ê腔口，Theⁿ椅to̍h是the椅。

2-9. 竹椅

Tek-í

竹椅á kap椅頭á kāng款有koân有低，koân椅頭á比koân竹椅khah有路用，低竹椅比低椅頭á khah好坐，所以細隻竹椅á khah chē人使用。

細隻竹椅á是cha-bó͘人、細漢gín-á siāng愛：cha-bó͘人giâ柴刀斬柴，in草in，洗衫，撚黃麻，kā gín-á洗身軀，灶khang hiâⁿ火；gín-á辦公伙á，giâ去看王祿á，坐leh niau-niau看，食飯。灶khang hiâⁿ火需要khǹg一隻細隻竹椅，號做灶腳椅á。

2-10. 抱Kiáⁿ椅

Phō-kiáⁿ-í

Chit種竹椅設計有夠巧氣，四腳落地是一隻四角竹椅頭á，kap he古早貴som-som祖媽時代ê四角椅頭á kāng款，做椅á坐，月內房做桌á用。

Nā ka偃倒to̍h是一隻抱kiáⁿ椅a̍h是講新婦á椅，滿月後ê幼嬰á kap 4-5歲gín-á lóng ē-tàng坐，面頭前有竹圓kho͘-á ē-sái-tit耍，有桌á面ē-sái-tit khǹg食物thit-thô物，siuⁿ幼ê嬰á tio̍h seh mòa被á，tn̄g tio̍h放屎尿清洗方便，是老母io kiáⁿ siāng讚ê助手。

抱kiáⁿ椅，椅phēng椅手tau--leh親像老母抱gín-á，隨在你耍，m̄驚poa̍h倒，大支坦倒椅腳落地在在，m̄驚péng--過，老母自然安心做khang-khòe，抱kiáⁿ椅，抱kiáⁿ椅，祖媽ê智慧已經失落真久。

抱kiáⁿ椅kap搖kô。

【新婦á椅】

Sin-pū-á Í

食飽坐抱kiáⁿ椅是真歡喜，m̄-koh坐久起ià-siān，tio̍h人抱leh惜，抱落來土腳thit-thô，田庄cha-bó͘人lóng mā無閒chhih-chhih，tn̄g tio̍h鬧熱時，煮食拜拜，tn̄g tio̍h割稻曝粟，一時無閒kah無時間hō͘ gín-á食奶，iau了koh再iau，哭了koh再哭，阿兄阿姊去讀冊，to̍h是無人chhap--伊，hiau-hēng--ō͘，哭kah無聲soah頭khi-khi坐leh tok-ku，覆leh睏，抱kiáⁿ椅soah pìⁿ-chiâⁿ新婦á椅。

Sim-pū-á（新婦á）是『童養媳』，受人苦毒得bē tio̍h疼惜。

3. 註解

Chù-kái