張學謙教授序

《作田人博物館導覽》推薦序

張學謙（國立台東大學）

2013年，阮kah蕭平治老師chham台東ê康樂國小合作，同齊起造文物數位典藏館。這个計畫m̄-nā欲典藏咱ê文物，嘛向望欲透過地方文物，予學生囡仔，uì認捌文物開始，來瞭解咱ê歷史、文化kah社會。

文物kah歷史仝款，會當予咱認bat過去，釘根現代，勇敢行向未來。咱對歷史學家路巴kah肯德里克（Lubar & Kendrick）hia學習「看文物，想歷史」ê方法。In教咱對文物看歷史ê五種方法： 一、故事：文物有伊家己ê故事。 二、結合：文物kā人連結做伙。 三、意義：文物有真濟種ê意義。 四、重現：文物kā過去重現出來。 五、變遷：文物反映歷史ê變遷。

有歷史記智ê人生是彩色--ê，若無咱ê人生會變做烏白--ê。咱收集ê文物、古物仔，是看會著ê歷史記智。古物仔bē講話，阮典藏ê古物，就是請蕭平治老師透過台語文，呈現古物仔ê功能kah意義。

真歡喜平治兄kā伊寫ê古物仔作品，整理出版做《作田人博物館導覽》。伊示範咱按怎「看文物，想歷史」，伊ê冊kā咱講文物ê故事，文物按怎kah人結合，以及文物ê意義kah變遷。

這本冊真完整呈現農業社會ê文物，內底有古物仔ê相片，嘛有活跳ê台語文，予咱會當透過咱ê母語，閣較進一步深刻認bat咱ê民間社會所蘊藏ê智識寶庫。這本冊m̄-nā有保存記錄古文物ê價值，嘛顯明台語文對文化保存ê重要。就算是看會著ê文物，嘛需要語言文字ê幫贊，才有法度完整呈現佇眾人ê面頭前。

Phàng見ê物件，愛kā揣轉來，流失ê語言，閣較愛kā復興。平治兄kā phàng見ê文物揣轉來，用相片做一个記錄，閣用文字kā流失ê語言留落來。恭喜平治兄出冊，嘛感謝伊長期以來，佇台語文花園用心leh掖種、沃肥、灌溉，予咱ê台語文lú來lú大欉，台語文ê發展嘛lú來lú交易。