呂興昌教授序
有良知有主體意識ê文化人──讀蕭平治《作田人博物館導覽》
呂興昌
佮平治兄熟姒二十二冬，無定定做伙，m̄-koh因為面冊ê致蔭，阮soah袂輸逐工攏有咧見面，致到伊台灣頭台灣尾咧拍拚ê台文推動(chhui-tōng)事工，我差不多攏一清二楚；伊金口一下開，專題一齣一齣演，keyboard開始揤(chhi̍h)，台文一碗一碗出；煞尾，鬧熱chheⁿ-chhau 實體ê冊就一本一本仔發行，咱人台灣年己亥新正喜氣閃熾，一睏仔三本做伙現身：《台灣俗語鹹酸甜第四冊》、《Lajih身世kap親人》、《作田人博物館導覽》！
過年前，平治兄無棄嫌，叫我針對《作田人博物館導覽》寫幾字仔紹介ê話，我就趁新正年頭，將我ê感想記幾項仔落--來，佮台文界ê有志互相罔破豆(phò-tāu)，請大家指教。
頭起先ê感想就是：平治兄又閣做出一項台灣文學/文化ê創舉啦！1997年伊開始寫「台灣俗語鹹酸甜」，彼時進前，已經有真濟疼惜台灣疼惜台語ê有心人，知影台灣俗語tī台灣文學/歷史/思想各方面ê重要意義，所以出版袂少研究、詮釋(chhoan-sek)台灣俗語ê專冊，可惜chia--ê冊，全部，無一个例外，攏是用「華語」或者是「日語」咧解說「台語」俗語！這種書寫對理解「台語」俗語ê一般功能來講確實有伊ê貢獻，總是(chóng--sī)，若是對「台語」主體性來論，就有失真ê偏差。平治兄掠着這个重點，直接用台語來討論台語俗語ê鋩鋩角角(mê- mê-kak-kak)，書寫ê形式佮內容成做一體，主體性攏袂走閃，媠氣閣siak-phah。
這種書寫ê精神佮風格嘛表現 tī 伊翻寫周鎮《台灣鄉土鳥誌》內底。伊tī話頭〈還我台灣鳥仔ê本名〉有講：「根據周鎮先生ê講法，百年來，台灣鳥仔名，受著三擺ê蹧躂，第一擺tī 1937~1945年代，日本人為著推展「皇民化運動」，台灣鳥仔ê本地名，煞攏用日語發音…上蓋bē o-ló--tit ê就是終戰後ê『國語』運動，台灣鳥仔名徹底改名換姓，台灣正港ê 傳統鳥仔名，攏總放sak m̄用，甘願採用外來名，就是m̄叫咱家己祖公祖媽留--落來ê名字。第三擺就是最近…由出版界偷渡中國鳥名來咱台灣，目前已經有46種ê鳥仔名hō͘人統一…解嚴後台灣本土化ê口號喝kah chiah大聲，對台灣鳥ê母語卻m̄知影thang保惜保持，除了無知以外，就是欠缺家己ê 自信、自覺kap愛家己文化ê良知。」共一个思考理路，《作田人博物館導覽》這本冊，正正就是beh將沓沓仔咧失落ê古早物件、禮俗，咱祖公祖媽按怎共怹號名、按怎佮怹接接(chih-chiap) ê生活聲嗽抾(khioh)倒--轉來，hō͘ 咱成做一个有良知有主體意識ê文化人。
紲落來ê感想就是，導覽是引chhōa人欣賞ê意思，欣賞啥貨？欣賞你bat ê，hōo你bat閣較深bat閣較濟；欣賞你不bat ê，hō͘ 你看見誠有意思ê新天地。所以這本導覽不但(m̄-nā) 閣一擺hō͘ 我行轉去囡仔時代ê庄腳生活，而且共(kā) hia--ê漸漸袂記得或者是原本不知ê物件，用餾-- ê抑是重再學習ê方式叫叫--轉來，有重溫舊夢ê歡喜，嘛有吸收新知ê爽快。親像〈駛田篇〉紹介牛拖犁ê相關物件，有：gû-phīⁿ-khian（牛鼻圈）、gû-tiàu-lêng（牛吊龍）、gû-taⁿ（牛擔）、gû-khan-heng（牛牽胸）、kha-chhia-soh（跤/枷車索）、āu-ta̍t-á（後達仔）、gû-soh（牛索）、gû-sut-á（牛捽仔）、kha-chhia（跤車）、Lin-long-á（鈴啷仔）、Gû-chhùi-lom/lam（牛喙籠）。犁ê部位名稱有：Chhiú-hoāⁿ-á（手扞仔）、Lê-chō（犁座）、Lê-thâu kap lê-piah（犁頭kap犁壁）、Lê-hn̂g kap lê-kau（犁轅kap犁鉤）。犁田ê家私有：Koah-pē（割耙）、Chhiú-pê（手耙）/thih-pē（鐵耙）、La̍k-ta̍k（磟碡）、Chhiah-pe（鍤桮）、Pùn-chhiám（糞扦）、Phún-to（翸刀）、Thih-cha̍h（鐵鍘）、鐵鍘犁、Ngiáu-á（撓仔）、Ngiáu-á-lê（撓仔犁）、Tî-thâu（鋤頭）、Ku̍t-á（掘仔）、Thih pê-put（鐵耙柫）、Loa̍h-tâng（捋筒）/Loa̍h-kóng（捋管）/ Loa̍h-pê（捋耙）、Chúi-chhia（水車）/Liông-kut-chhia（龍骨車）、Hò͘-táu（戽斗）、Phòng-phuh（泵浦）/ Chúi-hia̍p-á（水拹仔）等等大約31項，其中有三分一我原底知名不知啥物物件，甚至連名都不捌聽過。比論講「磟碡」，tī歷史文獻佮文學作品裡早就熟姒kah有賰，嘛知影伊ê用途，可惜雖罔農村出身，m̄-koh細漢ê時厝裡無這種農具，致使活kah七老八老猶不知影伊生作圓抑扁；其他像「牛吊龍」、「牛牽胸」、「跤/枷車索」、「後達仔」、「跤車」、「犁轅」、「犁鉤」、「鐵鍘」、「撓仔」、「撓仔犁」chia--ê名佮物(mi̍h)，tī我記持內底就齊(chiâu)無影跡，所以平治兄用相片展示怹ê形影、閣用簡明ê台文將chia--ê形影解說kah誠鬥搭(tàu-tah)，hō͘我食到老學到老，增加真豐沛(phong-phài) ê台語chai-bat(知識)佮生活智慧。
最後，平治兄是一位台文推動者，伊強調台文書寫m̄通孤靠漢字，tī白話字(羅馬字)猶無法度全面拍破漢字中心主義ê台灣社會進前，漢羅濫寫算是上利便ê書寫方式，che，tī台文界已經是真普遍ê常識佮共識，嘛實踐超過二十外冬矣，總--是，一般kan-na會曉華語讀寫ê人，絕大多數攏猶需要再教育，予怹理解beh寫、讀台語文，無請羅馬字來鬥相共(tàu-saⁿ-kāng)是做袂鬥搭--ê。所以平治兄無論寫啥物議題，濟少攏會順紲機會教育--一下。像〈嫁娶篇〉紹介文房四寶ē時按呢講，「古早人，bat字ē-hiáu寫毛筆字/水筆字，是chiâⁿ受人i-nāi kap尊重」。伊註解：「烏墨是墨條，白墨是粉筆，bat字是bat漢字。因為長久接受漢字教育，jīn-bat漢字chiâⁿ做有學問ê人才，殊不知ē-hiáu羅馬字chiah是重要，書寫台語文，若無Lô-má-jī，定著ē閃避真濟無法度用漢字表達ê台語台灣話。」無m̄着，「閃」正正就是硬beh用全漢字書寫ê大症頭，親像頂面引文「jīn-bat漢字」ê「jīn-bat」，過去大多數台文界ê朋友攏會寫作「認識」，m̄-koh不是台文箍仔ê人看着「認識」二字，讀「jīn-sek」凡勢佔較大面；所以平治兄採用「jīn-bat」無用「認識」，我推想(chhui-sióng)是為着bŭaihông讀作「jīn-sek」所致。Che，我家己嘛有一屑仔經驗thang佮平治兄交陪--一下。以早，「知識」我攏讀作「tì-sek」，後--來，佮台灣長老教會ê朋友做伙，知影怹攏讀「chai-bat」，我足欣賞這个話音，真概念te̍kê詞soah成做足有力ê「chai」佮「bat」；尾仔，凡若拄着這二字，為着bŭai hông讀作「tì-sek」，我就bŭai用漢字「知識」，規氣攏用羅馬字「chai-bat」，或者是先羅後漢ê「chai-bat(知識)」！
以上三點粗淺ê感想，若有無妥當ê所在，敬請平治兄佮台文先進進多多指正。
2019/02/20