《台文通訊精選》

 | | | 轉寄

真雅餐廳

作者 多城客 2007.01.28

Tī多倫多ê市中心，óa近多倫多大學ê書院街(College Street)，有一間餐館叫做真雅餐廳。你若是tùi書院街向西行去，經過多倫多大學了後無外久ê所在，tō會看著一間有畫台灣地圖khang-páng ê餐廳，hit間tō是真雅餐廳。伊ê英文名叫做Simple Elegance，tō是簡單koh好食ê意思。

這間餐廳無真大間，內底ê佈置樸素樸素，壁頂有吊一kōaⁿ肉粽，一看tō知影是一間台灣菜館。

餐館ê老板朱先生是一位虔誠ê基督徒。伊真心適，愛講滾笑，笑著古錐古錐。伊生著福相福相，腹肚大大ê，人緣koh真好，真好kap人鬥陣。朱老板有真重ê台灣意識，頭殼tēng-khok-khok，若是kap人開講講著台灣ê政治，伊tio̍h理論真chē，紅ko赤面，嚨喉聲愈來愈大聲。

朱太太名叫阿英，老板娘兼做大廚，非常感心。伊講話幼聲幼聲，sai-nai sai-nai，對人親切好禮，不時笑瞇瞇，對待人客非常大方，煮ê菜m̄-nā好食koh大碗滿墘。若是tú著熟似人客，m̄免吩咐，伊tō會先chìⁿ一盤正味ê台灣菜丸phâng出來sa-bí-sù。

餐館ê菜是正港ê台灣料理，肉粽、肉丸、肉包、擔麵、鹵肉飯、貢丸湯、肉羹種種，據在你點。當然叫菜炒飯ê mā會使，若是無tī菜單頂面，你想著愛beh食ê，kā叫mā無要緊。另外，in ê火鍋koh khah 出名。

來chia ê人客，啥物人攏有，有東方人也有西方人，有台灣人也有中國人。有真chē是tī多倫多大學讀冊ê台灣gín-á。有ê是bat去過台灣ê白人，tùi chia行過也會sô入來。其中有三個khah特別ê人客，in tòa tī 這個附近定定來，in tō是百外年前去台灣傳道，對台灣有真大貢獻ê馬階牧師ê查某孫，in講來這間餐館假若是轉去台灣，感覺非常親切。

有一日，一個台灣來ê少年學生入來餐館，伊看著菜單感覺真奇怪，因為菜單英文字ê記號，有ê戴一頂草笠á，有ê東西橫一橫，有ê一撇撇tùi倒旁去，有ê撇tùi正旁來。伊sa攏無，tō問老板講：「Che敢是越南字？」，朱老板笑笑á kā應講，「你實在m̄-bat 字，che tō是咱ê台灣字！」，這個少年家聽了koh khah sa無。

原來che是這間餐廳非常特別ê所在，in是全世界第一間有印羅馬字台灣話菜單ê餐館。In ê菜單有英文字、漢字kap羅馬字。其實羅馬白話字tùi 1860年tō開始tī台灣ê教會使用ah 。真雅餐廳m̄-tāⁿ是teh做生理，in也tī hia tiām-tiām teh做傳播台灣語文福音ê khang-khòe。親愛ê朋友，恁若有機會來多倫多ê 時，m̄-thang bē記得，一定ài撥工去這間世界第八奇蹟ê台文餐廳kā交關。