《台文通訊精選》

 | | | 轉寄

Siàu念李友義

作者 劉清白 2008.05.11

李友義先生，我ê好朋友kap同志，今年八月初參加世台會tī巴西車禍過身。

友義兄tī真chē所在，是台獨運動者ê模範，mā是我ê Role Model。其中對我來講，上突出ê 是伊對台獨運動「積極參與」(Active Participation) ê使命感，家己khiā出來實行「成功不必在我」ê行動方針，kap伊「鬥士兼紳士」ê人品。

三十幾冬來，若是kap台灣前途有關ê活動，無論大小，一定有伊一份。同鄉會ê活動親像烘肉、郊遊、旅行、演講會、音樂會，kap針對國民黨ham 中國ê遊行、示威、抗爭等等，攏會看著友義。舊年tī台獨聯盟台灣總部歡送一位同志出國食新頭路ê暗會tú著伊，hit日伊tùi臺中趕飛機轉來美國，kan-na會tàng停三十分鐘，伊mā趕來。今年三月轉去台灣參加世界台灣人大會，伊kan-na會tàng 請假 四日，伊mā趕來。六月底ê金美齡演講會，友義負責音響控制，但是真 少人知影伊hit日腰脊骨疼kah 真厲害，伊mā趕來。除了因為公事出城，不管外無êng，伊一定會來參加台獨聯盟支部聚會。Che tō是友義兄「積極參與」ê精神。每一遍參加台灣人ê聚會， 我tú著第一位熟sāi ê朋友，攏會先問講﹕「你好，你好，友義敢有beh 來？」。無意中ná像感覺有伊tī leh，我就比較khah有完全感，有伊tī leh，定著是來tio̍h所在。幾nā遍，我攏想beh chhōe pīn-tōaⁿ ê藉口，但是若想著伊，tō家己感覺pháiⁿ勢。

烏名單ê期間，友義無算後果，出面擔任領頭ê角色，前後擔任同學會長，同鄉會長，協志會長，同鄉聯合會長，人權會長等等重要ê職務。烏名單解除了後，敢出風頭ê人khah chē, 伊搖身一變，tī ta̍k項活動中khiā tī底線發傳單、排桌椅、piàⁿ畚圾、運雜貨，任勞任怨，kan-na ǹg望活動辦hō͘成功，實踐伊「成功不必在我」ê作事原則。

三十幾冬來，友義堅持一致ê原則，據理力爭，tī我ê記池中，m̄ bat聽伊惡意teh批評任何同鄉，m̄ bat聽伊kap人大聲計較。討論問題解決辦法ê時，伊攏mā會tàng khiā tī對方ê角度，用協調ê方式來求得上適當ê答案。我想che是伊有chē chē ê朋友，受真chē人尊重ê因素之一。 今年七月初七，台獨聯盟北加州支部tī Fresno聚會、郊遊、野餐。雖然友義ê腰脊骨感覺無啥爽快，而且隔頂日tio̍h-ài趕轉去舊金山灣區參加婚禮，伊kap牽手良惠oan-nā歡歡喜喜開三點鐘ê車來參加，專工kā Fresno同鄉做一場非常精彩ê演講﹕「台灣kap中國ê軍備比較」，內容蓋新， 圖文並茂，hō͘ Fresno同鄉大開眼界。伊隨時chah tī身軀邊ê註冊商標﹕「謙卑ê笑容」koh khah hō͘阮留著深刻ê印象。Hit暗大家mā做伙慶祝伊ê 63歲生日。

最近二、三冬來，友義時常走台灣，公司派伊轉去台灣訓練雷達技術ê人才。幾個月前，講著退休ê代誌，我問伊﹕「退休了拍算beh按怎？」，伊免想著講﹕「決定beh轉去台灣，趁這陣猶有氣力，koh替台灣人做一kóa代誌」，我tio̍h滾笑講﹕「按呢我著欠人做伙讀台文通訊囉」，伊tio̍h講伊oan-nā會chhiang-chāi(時常)轉來。

最近看著一片電影﹕「Down to Earth」，導演用笑詼ê方式，表達主角因為車禍過身，入天門 了後發現伊ê時間未到，但是已經siuⁿ慢ah，顧天門ê經理人教伊kā spirit附tiàm別人ê身軀，hō͘伊轉去人世間完成伊ê願望。我m̄知影St. Peter tī天門迎接友義ê時陣，按怎向友義確認伊ê時間，但是我想友義一定會用紳士ê方式據理力爭﹕「台灣猶未獨立建國，台灣社會koh chiah-nih需要我這款專業ê人才，是按怎這陣叫我轉來？」若會tàng親像電影ê結果，敢m̄是真好？

友義雖然離開阮，但是伊ê精神永遠存在。以後，每一個月一遍tī北加州開台獨聯盟支部會議ê 時，我m̄免koh問﹕「友義敢有beh來？」，因為，我知影，伊一定會來。