《台文通訊精選》

 | | | 轉寄

好問題，好答案

作者 阿秀 2008.05.18

加台會kap「台文通訊」十週年慶祝會最後一場演講請著金美齡女士。金女士參與台灣獨立建國ê運動已經真久，有人真早tō bat伊，知影伊tī日本所做ê chē chē代誌，但是mā有真chē人是通過小林善紀ê「台灣論」這本冊，才知影金美齡這個人。伊ê理念真明，mā真敢講話。特別tī新政府上台了後，有人認為台灣人已經出頭天，但是伊要求獨立建國ê聲音，不但無無去，而且lú來lú大聲。

金美齡這擺演講ê題目是「台灣精神ê再生」，真適合今年夏令會ê主題「台灣文化ê再生」，因為「台灣精神」是「台灣文化」ê地基，地基ài chāi才會tàng起厝。

金女士真gâu講話，伊ê演講並無嚴肅，tùi伊tú著ê代誌講起，講伊ê翁婿、伊ê gín-á,但是真chē清楚ê理念就tùi故事ê內底一直流出來。

金美齡目前是日本真出名ê政治評論家，有伊家己ê電視節目。伊參與tī日本主流社會。Tùi伊ê演講，咱感受著伊ê能力、自信kap強勢。Tī伊演講了後，開放hō͘同鄉問問題，有一個真súi ê問題，有一個真súi ê答案，hō͘我印象真深。

陳柏壽牧師問起：

『我有一點希望你會tàng了解，che是全世界頭一擺「台文通訊」kap同鄉會聯合夏令會。你可能會記得伊藤邦幸（Ito Mika）先生kap聰美姊ê代誌。聰美姊為著「台灣青年」這份刊物，無出名，恬恬奉獻。為著beh紀念聰美姊ê精神，才有今á日ê「台文通訊」。希望你知影，阮tī草根所做ê語言運動，阮真appreciate你反抗ê精神，雖然kap聰美姊有無仝ê人生觀。Tī chia只是beh hō͘你了解，你所參加ê這個會，kap你有真深ê關係，有無仝ê人生態度，但是有相仝ê目標。』

金美齡女士回答：

『真多謝！黃聰美ê代誌我永遠bē bē記得。Tī「台灣青年」有一篇文章是我ê先生周英明寫--ê。就是聽著伊ê故事，發現這個人恬恬無出名，一直支持「台灣青年」這本雜誌，支持台灣獨立聯盟這個組織，伊家己連一領大衣tō m̄甘買，但是每個月、每年就是奉獻，一直到伊過身，大家才知影伊是台灣ê女性黃聰美。我ê先生將伊ê故事寫出來，大家讀著大家tō流目屎。

無m̄-tio̍h,che是咱台灣精神一個真súi ê例。但是咱按呢無夠，這種人真可貴，但是in是silent majority。當你無出聲，就是表示對目前政權ê同意。這個時代，咱bē使silent，咱ài發聲。

每一個人有伊無仝ê選擇，有人妥協，有人堅持，有人行中間路線，方法無仝，條條大路通羅馬。每一個人ê角色無仝，互相尊重學習，咱才會贏。』 真好ê問題，真好ê答案。

我想這擺金美齡ê演講，hō͘咱ê婦女朋友學習真chē。伊有智慧，有信心，堅持理想，照伊家己ê方式生活。伊tī日本出名是這幾冬ê代誌，總--是伊非常認真，hō͘家己進步，機會來ê時才掠會tio̍h。 是啊！金美齡是真好ê模範，但是咱mā無bē記得另外一個模範，恬恬無出名ê聰美姊。

Tī人生ê舞台，咱學習別人ê優點，演家己ê角色，互相勉勵。Ǹg望咱建立「台灣精神」，mā hō͘「台灣文化」早一日khiā起tī家己ê土地。