《现代台语新约圣经 读经日记》

 | | | 转寄

第九篇 是“kang”，呣是“kang-chok”

作者 李南衡 2013.01.06

　 读经版本：罗马字版《现代台语译本新约圣经》，2007，台北：台湾圣经公会
进　　度：使徒行传第十三章

第2节尾句：“Tio̍h ūi-tio̍h góa chí-phài Pa-ná-pa kap Sò-lô khì chòe Góa ho͘-tiàu in chòe ê kang-chok.”25节头一句：“Iok-hān teh beh kiat-sok i ê kang-chok ê sî, ” Chit两个所在写作“kang-chok”是错误的，因为“kang-chok”伫台语是动词，chit两个所在应该是名词，正确的写法是“kang”。mā会使讲另外一个名词「工课」“khang-khòe”。是按怎会伫chia发生chit种错误？可能是因为伫华语中，「工作」会使作名语使用mā会使作动词使用。

第7节：“I kap chóng-tok Sū-kiû Pó-lô ū kau-pôe, chit-ê chóng-tok sī hiân-bêng ê lâng, i chhiáⁿ Pa-na-pa kap Sò-lô lâi, beh tùi in thiaⁿ Siōng-tè ê tō.”Chit节圣经有一位o-ló有一位嫌。o-ló的是“kau-pôe”chit-ê词，巴克礼译作“saⁿ-kap tiàm”、红皮译作「随员」（事实上并呣是）、现代中文译作「颇有交情」算是译了足好ah、和合本译作「同在」（kap巴克礼仝款，呣知啥意思！）、日文圣书译了mā诚好：「と交际していた」。阮认为“kau-pôe”译了上súi-khùi！o-ló了，咱会使小嫌一下：“beh tùi in thiaⁿ Siōng-tè ê tō.”若改作：“beh thiaⁿ in kóng Siōng-tè ê tō.”敢呣是加真清楚？

第19节后半句：“chiong hit-ê thó͘-tōe hō͘ in chòe sán-gia̍p,”第32节：“Goán chiong Siōng-tè èng-ún hō͘ chó͘-sian ê hok-im thoân hō͘ lín.”第34节后半：“Góa beh chiong tùi Tāi-pit só͘ èng-ún hit-ê sîn-sèng khó-khò ê un-tián sù hō͘ lín.”第47节后半：“Góa í-keng chí-tēng lí chòe Gōa-pang-lâng ê kng, thang hō͘ lí chiong góa ê chin-kiù tòa kàu thiⁿ-piⁿ hái-kak.” 第50节尾句：“chiong in kóaⁿ chhut-kéng.”阮感觉真奇怪，是按怎会直直用chit字“chiong”（汉字写作「将」）？照阮所知，伫台语中「将」字khah济是用伫俗语话，意思是「用来作・・・」像讲「将错就错」、「将功补罪」、「将心比心」，其他用法是「将近」、「将来」、「将就」等等，真少人会亲像顶面五节经文的用法。可能khah济人会用“kā”字、khah少人用“chiong”字。若kā顶面五节经文的“chiong”字改换作“kā”：第19节后半句变作：“kā hit-ê thó͘-tōe hō͘ in chòe sán-gia̍p,”第32节变作：“Goán kā Siōng-tè èng-ún hō͘ chó͘-sian ê hok-im thoân hō͘ lín.”第34节后半变作：“Góa beh kā tùi Tāi-pit só͘ èng-ún hit-ê sîn-sèng khó-khò ê un-tián sù hō͘ lín.”第47节后半：“Góa í-keng chí-tēng lí chòe Gōa-pang-lâng ê kng, thang hō͘ lí kā góa ê chin-kiù tòa kàu thiⁿ-piⁿ hái-kak.”第50节尾句变作：“kā in kóaⁿ chhut-kéng.”按呢读起来敢呣是khah顺？

第41节：Biáu-sī Siōng-tè ê lâng ah, tio̍h khòaⁿ, tio̍h kiaⁿ, tio̍h bia̍t-bông! ” 红皮译作：「gâu藐视人ê」、巴克礼译作：「藐视ê人ah」（呣知藐视啥？）、现代中文译作：「藐视上帝的人哪」、RSV译作：“yo͘ scoffers,”（mā呣知藐视啥？）、圣经新译本（注１）译作：「傲慢的人哪！」、日文圣书译作：「侮る者よ、」。干单现代台语kap现代中文两种版本译作“Biáu-sī Siōng-tè ê lâng” 「藐视上帝的人哪」。读归晡煞花去，到底是藐视上帝抑是藐视人？抑是干单beh讲是「傲慢」niā-niā？ 注解：注１《圣经新译本》（神字版），2002年，香港，环球圣经公会出版。