《现代台语新约圣经 读经日记》

 | | | 转寄

第七篇　是按怎译作「灵语」？

作者 李南衡 2012.01.28

　 读经版本：罗马字版《现代台语译本新约圣经》，2007，台北：台湾圣经公会
进　　度：使徒行传第十章

第十章第46节：In-ūi in ū thiaⁿ-tio̍h hiah-ê lâng kóng lêng-gú koh chheng-chàn Siōng-tè ê úi-tāi. 内底chit-ê“kóng lêng-gú”阮认为有小可问题。早前阮读《巴克礼版》是译作「in用chiah-ê腔口teh讲」抑是读《和合本》译作「说方言」，那像拢bē感觉有啥物奇怪。因为chit-ê词英文是译作“speaking in tongues”。真歹势，阮m̄-bat希腊文抑是希伯来文，m̄知原文按怎写。

　　咱来看伫使徒行传第二章第4节头一遍出现chit-ê词，《巴克礼版》是译作「开嘴讲别样ê腔口」，后面各所在译作「土腔」「腔口」；《和合本》译作「说起别国的话」，伫后面各所在拢译作「方言」；《现代台语圣经》译作：“kóng pa̍t chióng gú-giân.”后面有译作“ēng in ê pún-tōe-ōe tùi in kóng-ōe”、“ēng lán ta̍k ê lâng ê pún-tōe-ōe teh kóng-ōe”；各种英文版本拢是译作“to speak in other tongues”，而且伫后面各所在mā拢是译作“in tongues”、“in a tongue”。是按怎《现代台语圣经》伫后面拢译作“kóng lêng-gú”（讲灵语）咧？

咱知影，为tio̍h beh hō͘福音传khah紧koh远，圣神hō͘初代教会信徒三项恩赐：医病ê能力、传讲福音ê能力kah讲别国话ê口才。伫使徒行传第二章第4节至第8节，咱看tio̍h ùi各国转来ê犹太人听tio̍h使徒讲出in所来ê各所在ê腔口，就大tio̍h惊。咱ùi圣经bē tàng看出chit-ê口才tī tang时、按怎变kah tio̍h人来解释，致使保罗先生顚倒khah希望信徒有会晓传讲福音ê能力。（请参看《哥林多前书》第十四章第2节至第5节）Chit种会讲外国话ê口才那像初代教会了后tio̍h渐渐伫教会中减少，但是一直无断。一直到二十世纪才忽然间koh兴起来。变作有时身躯会la̍k-la̍k chhoah、会大细声喊喝、发出含糊不清、别人听无ê话语。

　　咱看《现代中文》译作「灵语」，因为“holy spirit”in译作「圣灵」，受圣灵感动讲出ê话语译作「灵语」会通。《现代台语圣经》“holy spirit”是译作“Sèng Sîn”（圣神），受圣神感动所讲出ê话译作“lêng-gú”（灵语），敢bē感觉怪怪？何况阮看几个英文圣经版本（注解1），chit几段经文拢是译作“in tongues”抑是“in a tongue”，无一本无一位改作“Divine Language”（灵语）。可见“in tongues”kah“Divine Language”两个词伫英文中应该有差别。所以，阮认为《现代台语圣经》译作“lêng-gú”（灵语），无真适当。

　　Chit-ê词，《现代台语圣经》译作“kóng lêng-gú”（讲灵语），英文译作“speaking in tongues”，日文译作「异言を语る」，《和合本》译作「说方言」，现代中文译作「讲灵语」。《红皮》虽然字句有khah长一丝仔，不过阮认为译了上好mā khah bē有争议，《红皮》译作：「入神来讲奇妙ê言语」。
注解：
1. 阮查过KJV（钦定版圣经）、ASV（权威标准版）、NIV（新国际版）、NSAB（新美国标准版）等五六本英文圣经。