《现代台语新约圣经 读经日记》

 | | | 转寄

第三篇 “nā-sī”汉字有两种写法

作者 李南衡 2011.12.25

读经版本：罗马字版《现代台语译本新约圣经》，2007，台北：台湾圣经公会
进　　度：使徒行传第五章

第五章13节 《巴克礼版》白话字圣经是按呢译：kî-û â lâng bô chi̍t-ê káⁿ kūn-óa in; nā-sī peh-sìⁿ chun-tiōng in; 早前读chit节经文ê时会感觉怪怪，等到《巴克礼版》汉罗字版出版了后，看in按呢译：其余的人无一个敢近倚in，若是百姓尊重in。老实讲chit节经文愈读愈花。好佳哉，读《现代台语圣经》chit节经文按呢译：Chèng-lâng lóng chin chun-tiōng in, m̄-kú bô-lâng káⁿ kap in chiap-kun. 才喘一个大气：tio̍h ah按呢才是「现代」「台语」。

　　《巴克礼版》白话字圣经干单新约圣经就有187位“nā-sī”，大部份拢是「但是」ê意思，真少是「若是」ê意思，像讲《马可福音》第十四章29节，《现代台语圣经》无kā「若是」译出来，《红皮》译作：彼得对耶稣讲：「假使其他ê人ê信心拢会起动摇，我绝对bē按呢。」《马太福音》第六章29节前半，《巴克礼版》：nā-sī góa kā lín kóng,《现代台语圣经》译作：Put-kò góa kā lín kóng,《红皮》译作：Tān-sī Góa kā lín kóng。《现代台语圣经》大部分kā“nā-sī”译作m̄-kú、put-kò，有ê所在意思会通就省略起来无译。

　　咱来看辞典按怎写：《厦英》“nā”有两个意思，第一个“nā”汉字写作「若」，文言音读作“jio̍k”，英语意思是if, like。“nā-sī”意思是if it be (only)。第二个“nā”汉字写作「但」，文言音读作“tān”，英语意思是only。例句有m̄-nā，英语意思是not only。“nā-sī”英语意思是only, if。巴克礼牧师伫伊所编ê《厦英》补遗第156页，仝款kā“nā”作两种解说，一种是「若」，一种是「但」。甘为霖牧师编着ê《厦门音新字典》（以下简称《厦音字》）496页仝款kā“nā”作两种解说，一个是「若」，一个是「但」。「若」ê例句有：nā-sī, nā-bô, lí nā-beh;「但」ê例句有：nā-sī, nā-tiāⁿ, m̄-nā。所以《巴克礼版》汉罗字版chit节经文若kā汉字写作「但是」，咱读起来就会真清楚。

　　咱查战后台湾、日本出版ê各种台语辞典，「但」拢无“nā-sī”ê用法，甚至chit几年中国出版厦门话á是闽南语辞典，「但」mā拢无“nā-sī”ê用法。唯一会tàng看tio̍h ê是一九三一年出版ê《台日》，仝款分两个：第一个nā-sī意思是：如果，假使，唯一；第二个nā-sī意思是：但是，干但。 　　
按呢，咱可能会使假定，连chit-má中国厦门漳泉一带ê人所使用所谓ê「闽南语」，mā无用「但」来作nā-sī ê语词ah。

注解：
注1：甘为霖编着ê《厦门音新字典》(A Dictionary of The Amoy Vernacular spoken Throughout The Prefectures of Chin-chiu, Chang-chiu, and Formosa[Taiwan])，甘为霖(Rev. W. Campbell)， 1913年，台南 台湾教会公报社。以下简称《厦音》