《现代台语新约圣经 读经日记》

 | | | 转寄

读经笔记19　否定的否定敢m̄是肯定？　　

作者 李南衡 2015.12.20

读经版本：罗马字版《现代台语译本新约圣经》，2007，台北：台湾圣经公会 进　　度：彼得前书第一章至第四章

第二章第19节：Tú-tio̍h bô eng-kai siū ê thòng-khó͘, Chit句话讲kah lò-lò长，到底teh讲啥实在无了解。看别的版本按怎讲？《巴克礼》：因为人受冤枉。《红皮》：枉屈苦楚。《和合本》：冤屈的苦楚。《现代中文》：不当的痛苦。《全民》：人受冤枉ê时。以上任何一个版本，敢m̄是拢加真清楚？
第三章第10节：tio̍h kìm-chí chhùi-chih bô kóng pháiⁿ-ōe. Chit句经文内底的“bô”字是加写的，因为否定的否定是肯定。若是kā chit字“bô”删掉变作：“tio̍h kìm-chí chhùi-chih kóng pháiⁿ-ōe, ”才读会通。犯错误的m̄是干单chit-ê版本，《巴克礼》犯tio̍h仝款的错误：「就tio̍h禁止嘴舌无pháiⁿ，」 《和合本》mā犯tio̍h仝款的错误：「须要禁止舌头不出恶言，」好佳哉，犹有人无犯tio̍h chit-ê错误：《红皮》：「就tio̍h m̄-thang讲pháiⁿ话，」《全民》：「tio̍h禁止嘴舌讲pháiⁿ话，」《现代中文》：「就得禁止舌头说坏话，」

第三章第19节：Thong-kè I ê lêng, I mā ū khì tùi hiah-ê tī kaⁿ-lāi ê lâng thoân-tō. Chit节经文所讲的“kaⁿ-lāi”，应该m̄是咱一般所认识的「监内」，有几个版本译了诚好： 《红皮》：「伊ê灵去kā hiah-ê tī阴府ê灵魂传道。」《全民》：「通过他ê灵，他mā bat去传道理hō͘受关tī阴府ê灵魂。」《现代中文》：「他曾以这灵去向那些被囚禁的灵魂传道。」虽然译了m̄是诚清楚，不过犹原看有，算是bē-bái。

第四章第7节：Bān-iú ê chiong-kio̍k kūn-lah！咱台语除了ùi华语直接译过来的新名词「万有引力」以外，那像真少人用「万有」。Khah chia̍p听tio̍h的是像《巴克礼》、《全民》、《现代中文》使用的「万事」，《和合本》、《日文圣书》使用的「万物」，抑是《红皮》使用的「一切」。　第11节中：sū-hōng ê, tio̍h chiàu Siōng-tè só͘ sù un-sù ê le̍k-liōng lâi sū-hōng,“sū-hōng”汉字写作「事奉」，咱台语那像khah少人按呢讲，想讲he是华语。咱khah chia̍p听tio̍h的台语是「服事」“ho̍k-sāi”。

有一点tio̍h theh出来讲的，是阮读《彼得前书》的时，发现译者群有可能为tio̍h文字的简洁，真济所在节省文字，致使读tio̍h怪怪。阮大胆kā一寡字补入去，囥伫 ( ) 内底。请试看māi，是m̄是读tio̍h有khah顺、有khah清楚？ 第一章第7节：Che sī beh chèng-bêng lín ê sìn-sim (ē会) kham-tit siū khó-giām. 第9节：in-ūi lín ōe tit-tio̍h sìn (gióng仰) ê kiat-kó, chiū-sī lêng-hûn ê tit-kiù. 第11节：In tit-tio̍h tī in sim-lāi Ki-tok ê (Sèng圣) Sîn tùi in ê chí-sī, 咱看第12节尾，mā-sī写作“Sèng Sîn”。第14节：m̄-thang chiàu lín (í以／chá早) chêng m̄-bat Siōng-tè ê sî án-ni hòng-chhòng su-iok. 伫第二章第10节、第25节，仝款有需要加“í以”抑是“chá早”字。

第二章第2节：Tio̍h chhin-chhiūⁿ tú chhut-sì ê eⁿ-á chin ài (suh吮) sûn (kiat洁) ê sio̍k-lêng ê lin, 第8节：Tī pa̍t-ūi (koh) ū kì-chài。 第18节：liân (tùi对) khek-po̍k ê mā tio̍h án-ni.

第三章第8节：Chóng kóng (chi̍t-kù一句)；lín tio̍h tang-sim, 第18节：In-ui Ki-tok ūi-tio̍h (lán-ê咱的) chōe siū-khó͘,　为tio̍h啥人的罪？会hông误会是伊家己的罪。

第四章第6节：m̄-kú in ê lêng ōe-tàng chiàu Siōng-tè ê khoán (sek式) lâi-oa̍h. (150606)