《现代台语新约圣经 读经日记》

 | | | 转寄

读经笔记18一枝嘴m̄是一个嘴　

作者 李南衡 2015.06.28

读经版本：罗马字版《现代台语译本新约圣经》，2007，台北：台湾圣经公会
进　　度：雅各书

第一章第4节 Lín tio̍h jím-nāi kàu lō͘-bé chiah ōe-tàng ta̍t kàu oân-choân koh oân-chéng, long bô khoat-tiám. “oân-choân koh oân-chéng”那像重复，无好。《红皮》kah《全民》可能仝款认为《巴克礼》译作「完全齐备」无真理想，才改译作：「十全十美」。《现代中文》可能认为《和合本》译作「成全、完备」无够好，所以改译作「十全十美」。华语「十全十美」咱台语应该讲作「十全」(cha̍p-chn̂g)，因为「十全十美」m̄是台语。台语讲「十全大补汤」的时会讲“si̍p-choân”。
第一章第17节　mā bô thian-thé tńg-seh ín-khí ê iáⁿ 阮读归晡犹原无法度了解的，是别的版本拢无的“thian-thé”chit-ê词，看《日文圣书》：「天体の动きにつれて生ずる影もありません（mā无因为天体变动所引起的影迹）」，才知影原来是汉字的「天体」。各种版本伫chit节经文的头前tio̍h有先讲，《巴克礼》「tùi众项光ê父落来。」所以才会讲：「伊无变换，也无转旋ê影。」《红皮》：「tùi光明ê创造者上主赏赐落来ê。」所以才会讲：「伊永久不变，也无改变ê影迹。」《和合本》：「从众光之父那里降下来的；」所以才会讲：「在他并没有改变，也没有转动的影儿。」《现代中文》：「是从天父来的；他是一切光的创造主。」所以才会讲：「他不改变，也没有转动的影子。」阮认为，伫chit节的头前有讲“ùi thiⁿ-téng kng-bêng ê Goân-thâu só͘ sù.”已经真清楚ah，假使一定beh讲「天体」chit-ê概念，若是改作：「宇宙众星辰」，chit句话变作“mā bô ú-tiū chiòng chhiⁿ-sîn tńg-seh ín-khí ê iáⁿ.”是m̄是会khah清楚？

第二章第6节　M̄-kú lín bô chun-tiōng sàn-chhia-lâng.各种版本的用辞无仝。语气上轻的是chit本《现代台语》：“bô chun-tiōng”汉字写作「无尊重」；续落去是《红皮》kah《全民》：「看轻」，比「无尊重」khah重一丝仔；续落是《日文圣书》：「贫しい人を辱めた。」（暴辱散赤人）、“BBE”：“have put the poor man to shame.”（暴辱散赤人）、kah《和合本》：「羞辱贫穷人。」仝款；续落去是《现代中文》：「侮辱穷人。」，上严重的是《巴克礼》：「凌辱」。阮m̄知希腊语原文是按怎写的，事实上阮有看出in的语气轻重差别真大，m̄知tó一个khah正确。

第三章第10节　Kám-siā kap chiù-chó͘ ê ōe lóng tùi kâng chit-ê chhùi chhut. “chit-ê”汉字写作「一个」，华语讲嘴会讲「一张嘴」bē讲「一个嘴」。足奇怪的是《巴克礼》、《红皮》、《全民》拢仝款m̄-tio̍h写作“chit-ê chhùi”。咱台湾话无讲「一个嘴」，拢mā讲「一枝嘴」，骂人「干单捾一枝嘴」（华语讲作「光说不练」）；「归身死了了，chhun一枝嘴。」（华语的意思是「死不认输」）；「一枝嘴ná青竹丝」（华语的意思是「嘴很毒」）。咱所讲的「量词」（抑是讲作「数助词」）拢是「约定俗成」的，像讲「一领衫」、「一蕊目睭」、「一口灶」、「一丘田」、「一脚皮箱」，因为无啥道理，致使定定有人会讲m̄-tio̍h，莫怪村上嘉英编《台湾语辞典》的时，特别加编附录2〈常用量词一览〉，可惜伊无收「嘴」字的量词。