《现代台语新约圣经 读经日记》

 | | | 转寄

读经笔记17 割礼无可能是「家己割伤身躯」！

作者 李南衡 2015.06.21

读经笔记17　　　　割礼无可能是「家己割伤身躯」！　
读经版本：罗马字版《现代台语译本新约圣经》，2007，台北：台湾圣经公会
进　　度：腓立比书第三章

第2节后半：chù-ì hiah-ê ka-kī koah-siong seng-khu ê lâng. 阮读三遍mā m̄知chit句话啥意思，想讲kā写作「汉罗」来读，是m̄是会khah好了解？「注意hiah-ê家己割伤身躯的人。」无，犹原看无。只好chhōe看别种译本按怎写。《巴克礼》：「持防chiah-ê受伤割ê。」老实讲mā无法度了解啥意思，m̄-koh tio̍h想讲巴克礼牧师的《新约圣经》是成百冬前的1916年翻译出版的。《和合本》：「防备妄自行割的。」mā是看无，仝款mā是成百冬前的1919年出版的。咱看1975年一月taⁿ仔翻译好出版tio̍h hō͘警备总部没收两千两百本的《红皮》：「警戒hiah-ê坚持割礼ê人。」“BBE”：“against those of the circumcision.”咱知“circumcision”意思就是「割礼」；预定2015年出版的《全民》：「注意hiah-ê坚持割礼ê人。」三种版本拢足清楚。有人譬相(phí-siùⁿ)「哲学」是用一寡咱听无的言词来讲一项咱原本知影的代志。阮希望tī二十一世纪译写出版hō͘现代台湾人读的圣经，mài hiah呢「哲学味」thsng hō͘人读khah有。而且照第5节保罗先生讲“Góa chhut-sì tē-poeh ji̍t chiū siū kat-lé,”请注意chit字“siū”是被动的，因为「割礼」是被动的，无可能家己割伤。可见第二节写作“ka-kī koah-siong seng-khu”是错误的。

第15节前半：Só͘-í, lán toing-kan sêng-se̍k ê lâng tio̍h ū siâng-khoán ê siūⁿ-hoat. 阮看tio̍h“sêng-se̍k”会想讲到底是啥物「成熟」，是智能成熟？是体能成熟？办事能力成熟？抑是啥物成熟？看别的译本按怎写。《巴克礼》：「所以咱见若做完全ê tio̍h存chit-ê心志；」《红皮》：「所以咱在灵性上长大成人ê，lóng tio̍h抱仝款ê心志。」《全民》：「所以，咱中间灵性成熟ê人，tio̍h有仝款ê心志；」《和合本》：「所以我们中间，凡是完全人总要存这样的心；」《现代中文》：「所以，我们当中所有灵性成熟的人都要有这样的想法。」所以，阮建议伫“sêng-se̍k”的头前加两字“lêng-sèng”，会加真清楚。

第20节前半：M̄-kú, lán sī thiⁿ-téng ê kong-bîn. 用“kong-bîn”chit-ê词无适当。咱看《巴克礼》、《和合本》、《红皮》、《全民》拢译作「国民」。咱知，见若有取tio̍h 一 国国籍的人，无分男女老幼，拢是hit国的国民；一国的国民，koh享有公法上权利kah负担公法上义务的人才会tàng称作公民。公民伫法律上享有宪法所赋hō͘伊的权利，照现此时台湾的「中华民国宪法」来讲，见若有中华民国国籍的人民拢叫作国民，国民年满二十岁，而且tòa伫台湾地区，才叫作「公民」，公民有选举、罢免、创制、复决的权利，有服兵役的义务。所以伫现此时的台湾，未满二十岁的国民并无公民权利mā无公民义务。咱台湾基督教长老教会内有接受小儿洗礼的婴儿，kah二十岁以前接受洗礼的青少年，拢是教会的一份子，mā拢总是天顶、也就是上帝国的国民。阮完全m̄知，天顶的「公民」chit-ê概念是ùi叼位生出来的，足奇怪。想bē晓《现代台语》那会去译作「公民」咧？原来是in照《现代中文》的用词。阮一再发现，《现代台语》内底有一寡错误的语词，大部分是根据《现代中文》的用词。诚遗憾！