《现代台语新约圣经 读经日记》

 | | | 转寄

读经笔记11　“Kap Siōng-tè kiàn-li̍p ha̍p-gî ê koan-hē.”是啥意思？

作者 李南衡 2014.03.16

读经版本：罗马字版《现代台语译本新约圣经》，2007，台北：台湾圣经公会

进　　度：罗马书第二章、第三章

第二章第1节前半：“Só͘-í, lí chit-ê phoe-phòaⁿ lâng ê, bô-lūn lí sī sím-mi̍h lâng lóng bōe-tàng piān-kái.”《巴克礼》：「所以见若拟断人ê人ah，你无thang推托；」《红皮》：「朋友á，所以无论你是什么人，你若判断人ê罪过，你就无辩解ê余地；」《现代中文》：「朋友啊，你评断别人，不管你是谁，都是不可原谅的。」《和合本》：「你这论断人的，无论你是谁，也无可推诿。」《新译本》：「你这判断人的啊！无论你是谁，都没有办法推诿。」《现代台语》译作“phoe-phòaⁿ ”（汉字写作「批判」），阮认为无真妥当，阮查《台日》、《东方》、《台话》各种词典，甚至福建2006年出版的《闽方》mā拢chhōe无chit-ê词，可见伊m̄是台语mā m̄是厦门一带所讲的「闽南语」。唯一有收chit-ê词的是《台白》，不过张裕宏教授有注明：che是日语文或台式日语；抑是终战前不定时代的汉语文。《现代汉语》解说「批判」的意思是：「对所认为错误的思想、言行进行批驳否定。」既然chit本圣经的名是《现代台语译本》，用m̄是台语的词，敢bē感觉怪怪？

第二章第8节前半：“Hiah-ê chū-su, bô chun-thàn chin-lí, khì thàn put-gī ê lâng, ”阮认为“khì”kah“thàn”的中间若加一字“sūn”，变作“khì sūn than put-gī ê lâng,”，按呢读起来会加khah顺。

第二章第11节：“in-ūi Siōng-tè bô phian-thāi lâng.”的chit句“phian-thāi”，阮有查《台日》、《东方》、《台话》几本词典拢chhōe无chit-ê词，可见伊并m̄是「现代」台湾人teh使用的「台语」；连查《闽方》mā chhōe无，可见连厦门的「闽南人」mā无chit-ê词。原来che是现代华语，《现代汉语》的解说讲：「待遇不公平。」

第二章第15节尾句：“In ê liông-sim mā chèng-sit,” 的chit句“chèng-sit”，阮有查《台日》、《东方》、《台话》拢chhōe无chit-ê词；连查《闽方》mā chhōe无，可见连厦门的「闽南人」mā无chit-ê词。《台白》有收chit-ê词，但是有注明是：战后来台或在台的中语文。可见chit-ê词mā m̄是台语。

第三章第21节、24节、26节、28节、30节拢类似21节的写法：“Kap Siōng-tè kiàn-li̍p ha̍p-gî ê koan-hē.”阮看几本译本拢是讲「称义」，干单《红皮》译作「和合」。照阮平信徒粗浅的看法，基督教的道理若beh简单讲是「因信称义」四字niā-niā，若beh讲khah详细是：人若心内相信、嘴里承认讲出耶稣是伊的救主，伊就白白称作义人，伊就白白得救，得tio̍h永远的活命。Che kah一个人严守诫命、守割礼、拚命做好事、散财赈济散赤人、修行等等拢无关系。阮bē tàng了解，chiah呢简单的道理，伫第三章忽然间出现几个所在讲“Kap Siōng-tè kiàn-li̍p ha̍p-gî ê koan-hē.”hō͘阮愈看愈花。阮the̍h chit几段话请教教会的老前辈，in看看一下摇头讲m̄知啥意思；阮the̍h chit几段话问一般台湾人未信者，in mā摇头讲：看无，m̄知teh讲啥物。阮想，新译的《现代台语译本新约圣经》的内容，上好是hō͘现代的台湾人拢看有，至少，mā爱hō͘现代台湾的基督徒看有才好。

注：《台话》是指《台湾话词典》，陈修着，1991年，台北 远流出版公司出版。