《受恩蒙福的一生》

 | | | 转寄

智者ê失败

作者 林宗要 2010.08.29

列王纪上三：5-14

智慧tùi人生极力追求争取ê，因为通常伊是hō͘认为是由人ê观察kap经验ê产物，依照圣经ê见解，智慧hō͘看做人phah拼ê结果，同ê时伊mā是上帝ê赏赐。敬畏上帝，顺从神旨ê人是得tio̍h智慧ê基本条件，「敬畏耶和华是智慧ê开端，只要遵行他命令ê是聪明人」（诗篇一一一：10）。「敬畏耶和华是智慧ê开端，认bat tio̍h圣者tio̍h是聪明」，（箴言九：10），这两节是圣经中讲智慧ê基本，因为具备伊ê人，tī活上lóng会表现出符合神旨ê生活方式，chit种生活内容，to̍h是圣经中所强调ê智慧ê人生。

的确，智慧tī人生活中占非常重要ê地位，因为伊会tòa来真chē正面ê作为，帮助人行向理想kap成功ê人生路途，所以咱chiah会hiah-ni̍h重视伊ê存在，这是指正常ê范围内，伊对人生ê帮助实在是任何物件lóng无法度取代--ê，但是咱mā会看tio̍h真chē人kā智慧用tī恶质之路，成做犯罪ê工具，近年来ê社会犯罪较óa智慧型ê犯罪，这就是咱ê俗语所讲--ê：“贼计状元才”，kā智慧用tī恶质、无合法犯罪ê用途，chit种结果是造成今á日ê社会混乱、犯罪增加ê原因。1986年有一个高智慧型ê犯罪集团，做真chē案件hō͘警方无法度破案，to̍h是林宗诫、温锦隆案，后来温自首chiah破案，警方表示chiah-ê 高智慧型ê犯罪，实在hō͘警方真oh破案，罪犯彻底了解人性心理，m̄抢银楼，因为头家会拚命反抗，所以危险性khah koân，若是抢运钱ê车，因有保险，就bē tú tio̍h强烈反抗，比较khah安全，in pok薰或者槟榔粕lóng br7乱tàn，是khǹg-ti7lak袋á内底，事先计画预习，控制青红灯，犯案ùi北到南，分散注意力，办案人员怨叹讲：智慧若无够koân，无可能有án-ne周全计划。

咱知影智慧若bōe-sái善用ê时，会对人类社会造成混乱kap问题，这确实对人生生活有负面ê影响，是人类ê不幸kap悲哀。假使人类ē-tàng善用智慧，一定会带hō͘人类正面积极ê环境，咱看历史ê过程就知影，真chē进步ê文明生活，lóng是人善用智慧ê结果，尤其是hiah处tī领导地位ê政治人物，若ē-tàng善用智慧，就会带hō͘人民有福利kap安定ê生活，人类ê文化史mā是如此，若善用智慧，确实ē-tàng带来khah koân文化进展。

有智慧ê人会协助人解决人生ê危机，危机ê化解是人生ê福气，tī中国历史上ê姜子牙、孔明lóng是智慧绝顶ê人物，战国时代齐景公ê宰相晏子mā是非常有智慧ê人，虽然伊m̄是真koân，但是确实是真有智慧ê政治家，tī当时景公身边有三名武将，田开疆（征服外邦有功），古冶子kap公孙捷lóng因为护驾有功，三ê人结拜，tiāⁿ-tiāⁿ利用特权，靠势有功，欺负邻里，侮辱公卿，因为势力siuⁿ大无人敢反抗指责，做宰相ê晏子一直想beh除去in，有一工鲁国ê君主来拜访，晏子叫人去挽六粒罕得有ê万寿金桃，两ê君主一人一粒，chhun二粒，晏子建议齐王赐hō͘ siōng有功ê人，公孙捷kap古冶子家己认为救驾ê功劳siōng大，所以一人提一粒食，田开疆看in二人ê动作了后，kā齐王讲：我替大王南征北讨，替大王奠定稳固ê基业，我ê功劳应该比chit二ê人koh-khah koân。晏子讲：确实田将军ê功劳是齐国之首，无人thang比，可惜已经无寿桃。田将军讲：家己功劳siōng koân，soah得未tio̍h寿桃，无面khiā-tī朝廷，而且kohti7两国君臣之间受着侮辱，án-ne 活leh有啥物意义？所以伊tio̍h自杀，另外两ê人看tio̍h结拜大兄，因为无寿桃来自杀，家己认为功劳无thang kah田比评，竟然koh接受寿桃，实在无应该，mā lóng自杀，一时之间除去三大害，这就是真出名ê晏子二桃杀三士ê智慧计策。

Tī圣经中mā有chit种智慧ê人，比如族长时代ê约瑟做埃及宰相ê时，处理当时埃及全国ê粮食问题，lóng是相当有智慧ê杰作。

另外就是所罗门王，伊一开始ê时，只求上帝赐智慧来方便伊管理上帝ê子民，真谦虚ê向上帝求讨智慧，「求上帝赐hō͘我智慧，thang好判断你ê子民、ē-tàng判断是非，á无siáng ē-tàng判断 chiah-nih chē ê民众neh」（列王纪上三：9），果然上帝赐hō͘伊无限ê智慧，连真chē外国ê君王，lóng因为伊ê智慧来请教伊。其中siōng有代表性ê一件案件，就是两位妇人the相争一位活ê红婴仔，这确实是一件头疼ê案件，但是所罗门王soah ē-tàng运用智慧，叫人将活ê gín-á剖做两pîng，一人一半，án-ne siōng合理，m̄-koh所罗门王tī-chiah 是利用母爱来解决问题。

确实tī伊登基开始，圣经形容伊ê国势是无人thang比--ê，因为伊ê智慧，所以伊ê治理国政真正常，真兴旺，人民ê生活非常富裕，列王纪上四章就是述讲初期所罗门ê国势kap伊ê智慧。

（一） 好字运者所罗门
Tùi旧约列王纪咱了解，所罗门王ê成长kap生活环境是非常完备、顺利。伊是大卫王kap拔示巴所生ê gín-á，大卫王hit时东征西伐，因此奠定了良好ê国基，因为伊是tī战乱、动乱不安ê时代中，建立稳固ê政权交hō͘伊ê后生所罗门，所以所罗门登基ê时是继承了良好ê基础，来展开以色列民族siōng 繁荣ê景象，所罗门是和平ê意思，可能是大卫王想tio̍h家己一生ê动乱生活，期待继承伊ê所罗门ē-tàng建立真正和平、安宁、统一ê王国，虽然tī继承顶koân有一kóa问题，但是所罗门lóng一ê一ê去克服，来成为一国之尊。

果然tī伊掌权ê时，国家表现出和平、强盛ê状况，kap过去ê扫罗王以及伊ê老父大卫ê治世完全无仝，过去二王所奠ê国基，伊chit-má享受现成ê果实，若kap前二位国王比较，所罗门确实是好字运ê。

当然大卫mā有真chē gín-á，所罗门是siōng小ê，竟然ē-tàng排除万难才登上王位，亦表示伊是一位好字运者。

（二） 智慧ê所罗门

咱bat提起所罗门hit时ê环境，伊是一位好字运ê人，台语讲「生tio̍h时」，chit种好字运定定是人成功ê原因之一，而且配合伊ê聪明，以及头先伊ê谦虚，就是伊所有成就ê表现。

（A） 良好ê环境是主要ê原因之一。虽然环境对人生无一定是绝对--ê，因为咱看tio̍h真chē虽然有真好ê环境，结果mā是失败，但是mā有真chē tī恶质环境中ê人，soah ē-tàng克服恶质ê逆境来成功ê事例。但是大部份，人生ê境况若好，当然khah有成功ê机会，当时ê所罗门有良好ê环境，成做伊成功ê原因。

（B） 向上帝求智慧。另外一个成功ê原因，着是tī当时ê所罗门，确实具备谦虚ê心态，列王纪上三章伊kap上帝ê对话中，清楚ê讲：「耶和华我ê上帝ah！如今你hō͘仆人接续阮老父大卫作王，但是我是gín-á，m̄知影应当án怎出入」……所以伊求上帝赐hō͘伊智慧，「求上帝赐hō͘我智慧，thang好判断你ê子民、ē-tàng判断是非，［、］á无siáng ē-tàng判断chiah-nih che7e5人民neh」，（列王纪上三：7-9），因为上帝tī怪象中明白kā所罗门讲「你希望我赐hō͘你啥物？你ē-tàng求」（列王纪上三：5），chit-ê时chūn ê所罗门无求国家ê强盛，无求家己ē长岁寿，以及消灭敌人，（chiah-ê lóng是做一个国王所必具备ê条件），伊所求ê是正直kap是非ê判断，ē-tàng做一位公正明理ê仁君，确实伊所求ê tú好符合上帝ê要求，所以上帝真喜乐伊ê祈求，m̄-nā赐hō͘伊智慧聪明，伊所无求ê，上帝mā赐hō͘伊，（列王纪上三：13），就是hiah-ê属世ê物质条件，列王纪上四章就是teh描写所罗门强盛ê政治力量，伊向上帝祈求治国之本ê公义kap是非分明ê人生内容，因为伊确信国家ê兴旺kap衰微，m̄-nā tī 财富kap强盛ê兵力，mā有用公义治理国家，hō͘全民有判断是非ê生活kap真高尚ê义理心to̍h ē-tàng辨别是非，án-ne国家就ē-tàng强大兴旺。

Chit-ê事实，咱ē-tàng用过去ê历史去求证，国家ê兴旺kap衰弱ê关键m̄是tī外在条件ê旺盛，伊是tī符合上帝旨意ê公义kap怜悯ê发挥，咱看近代ê苏联政权，tī iáu未改革chìn前，苏联是一ê无公义ê国家，虽然真强，但是结局mā是瓦解，chit-má in百姓ê生活水准已经降到三流，为何会án-ne？原因在tī欠缺公义，咱mā ē-tàng用中国ê历史来看chit件 tāi-chì，通常朝代会hông拍败，lóng是因为政权无法度用公义好好对待百姓所造成--ê！咱看清末ê失败政治，是造成孙中山革命ê主要原因，国民党ê hō͘共产党占领大陆，虽然原因复杂，但是欠缺公义kap失败ê政治是主要原因，因为心思hō͘极权遮盖，soah造成治理无法度发挥公正价值kap辨别是非，造成混乱kap问题，chit-má ê台湾tī政治型态上，确实需要检讨，因为伊定定kap乌金结合造成社会ê动乱，全省八百gōa位议员中，有乌道背景ê占二百gōa位，这实在是非常严重ê事实，人所以会因为现实状况来影响对公义ê判断，是因为人ê无知（无智慧）所造成--ê！

当时ê所罗门了解智慧ê重要，所以伊kan-nā求上帝赐hō͘伊智慧，chit-ê智慧，所罗门共伊定义做「敬畏耶华是智慧ê开端，认bat圣者tio̍h是聪明」（箴言九：10），mā ē-tàng讲心中有上帝是人生智慧，确实上帝若tī心中，hit-ê人全部ê言行举动，lóng会照上帝ê旨意，tī人间社会中，若ē-tàng发扬上帝美旨ê时，hit种社会就是人间ê理想。所罗门开始ê时，确实已经tī当时ê社会建立相当程度ê国权，因为伊ê心内有上帝ê智慧，所以ē-tàng用公义ê判断，引chhōa人生有辨别是非ê生活内容。Chit种用智慧治理国家，就是人成功ê原因，可惜ê是，tī政权顶koân人时常用手段当做治国ê 要领，tiāⁿ-tiāⁿ会造成复杂ê人生社会问题！

（三） 失败ê所罗门（列王纪上十一：1-11）
咱若看所罗门初期ê情景，无论tī物质、政权kap生活ê环境，lóng是siōng受祝福ê时代，照理伊应该好好计画来治理，成全上帝交托hō͘伊ê重大责任，成为一位自头到尾lóng是充满智慧、成功kap理想ê君王，因为至少伊tī列王纪上三章所表现ê，实在是非常伟大将才，是正确ê人生态度，为何chit位聪明绝顶ê所罗门王，竟然会成做上帝所弃绝kap诅咒ê人！

列王纪上十一：1-13真详细ê说明所罗门王失败ê原因，为何一位智慧、成功ê人，会变成顸慢失败？圣经teh提出人性ê缺点，tiāⁿ-tiāⁿ有chit种情形，若用信仰ê角度去思考ê时，咱就会了解，主要原因是tī违背上帝ê生活所引起--ê！开始ê时伊kám-m̄是hiah-ni̍h谦虚卑微ê面对上帝？

（A） 违背上帝ê命令，用十一章ê记载，造成所罗门失败灭亡ê主因，tī伊放荡ê生活，伊娶了真chē外邦女子做bó͘，上帝一开始就禁止以色列人，bē-tàng kap in来往，因为以色列人会引诱in离开上帝，去顺从外邦ê礼俗。Tī一般人ê了解，成功者ê背后，一定有好牵手鼎力相助，这就是「世界ê运命，掌握tī妇人人手中」格言ê由来，所罗门ê失败，tī伊ê生活中，无信仰ê牵手，列王纪上十一章记载，伊所娶ê某lóng是外邦人，上帝已经禁止以色列人bē-tàng kap in来往（十一；2），所罗门soah kap chiah-ê异邦人结亲成，chit种作为是teh说明伊违背上帝ê旨意。一个违背神旨ê人，心中已经无kah上帝同在，因此对放荡ê生活kap家庭生活ê失败并无认为是问题。十一：3提起所罗门有千gōa名ê后妃，chit种放荡ê生活已经m̄是有智慧ê王ê作为，tī chit种环境中注定会失败ê，因为chiah-ê异邦ê嫔妃，hō͘伊ê心歪去（十一：2），诱惑伊ê心无顺从上帝（十一：3、4、6），kap过去伊向上帝ê告白完全无仝。

（B） 少年得志，好额造成骄傲。（享受现成ê美好境况，会失去进取、儆觉ê生活）。Tī所罗门登基chìn前，伊ê老父大卫王一直kā伊警告，ài遵行上帝ê旨意，chiah ē-tàng蒙主喜乐，开始ê时，伊ē-tàng坚定行主所喜乐ê tāi- chì，（列王纪上二：3-4），m̄-nā án-ne，上帝本身mā向伊显现，强调他kap所罗门ê关系是特殊--ê，伊必定ài遵守他ê旨意，服从他ê命令，chiah会受tio̍h祝福，万事亨通，m̄-koh伊soah失败阿，原因tī伊ê少年得志，而且现实境况ê富强，mā致使伊ê失败，有时人生若过了亨通，往往会产生负面ê结局，所以人生中谨慎、有撙节ê生活颠倒会策动人生正面ê价值。

（C） 祭拜偶像。一个上帝ê子民，必须ài用谨慎ê心态去经营生活，若过分放荡享福，往往会迷失tī现实中，来看bē清伊kap上帝之间ê真正关系，这是所罗门siōng大ê失败！m̄-nā án-ne，伊iáu犯了真大ê罪过，就是引进koh祭拜偶像，这是所罗门ê致命伤，因为伊犯了上帝siōng怨恨ê罪，tī十诫中ê第二诫「bē-tàng替家己雕刻尪仔，mā bē-tàng作甚么形象，kah-ná上天下地kap涂跤下跤水中ê百物，bē-tàng跪拜hiah-ê像，mā bē-tàng奉待伊，因为我耶和华你ê上帝是禁止妖邪ê上帝，恨我ê我一定追讨伊ê罪，ùi老父kap后生一直到三四代，疼我守我诫命--ê，我一定向in发慈疼一直到千代」，咱若看十一章ê圣经咱就知影，伊受嫔妃ê引诱chiah犯下真大ê罪，m̄-nā引进偶像，mā为chiah-ê偶像起庙，而且koh鼓励民众去祭拜偶像。

Tī上帝子民中，无比chit种罪恶koh-khah惊人--ê，所以耶和华ê怒气降到伊ê身上，伊成做上帝所弃绝ê人！ kap上帝ê关系上，人若hō͘上帝所弃绝，是siōng 悲哀ê下场，无一种失败比chit件tāi-chì koh-khah凄惨。
结论：
所罗门ê事实，thang做基督徒ê鉴戒，咱必须明白，智慧ê根源tī上帝，维持好kap上帝ê实在关系是持守智慧ê关键，bē-tàng半路断绝，必须ài继续，代代传承hō͘咱ê kiáⁿ孙。若hō͘上帝弃绝，这tio̍h是人siōng大ê失败。