《受恩蒙福的一生》

 | | | 转寄

无愧ê一生

作者 林宗要 2010.08.22

申命记卅一：7-8；约书亚廿四：31

1997年九月第一ê、第二ê拜六，分别有两个世界性ê丧礼，一个是英国王妃黛安娜，一个是tī印度ê修女德瑞莎，咱ē-tàng tùi电视、报纸顶koân看tio̍h chit两个丧礼ê壮观，黛安娜王妃青春美丽，是全世界lóng-teh注意ê焦点，德瑞莎修女奉献一生六十年岁月tī siōng贫苦ê人身上，近期教会公报一篇文章「虚幻ê玫瑰kap真实ê百合」teh讨论chit两位女性，作者ê观点由题目ē-tàng了解，但是咱ē-tàng百分之百肯定德瑞莎修女ê作为，伊ê人格以及由信仰表现出来ê疼ê行为，咱thang用「无愧ê一生」来形容伊。

今á日咱读ê圣经，讲约书亚ê一生，前段讲伊接受使命，后段讲伊死了后hiah-ê人对伊ê怀念以及伊对社会ê影响力，约书亚ê一生是无愧ê一生，「无愧」两个字是世人ê评断，由伊ê人格表现来决定，m̄是家己讲ê。

Tú好chit-má是重阳节，今á日咱来讲老人ê问题，台湾已经进入「老人国」，所谓老人国ê定义，to̍h是六十五岁以上ê老人占全人口ê 7％，台湾teh二、三年前就已经达tio̍h chit-ê数目。

现代社会变迁，会记得六十年前农业社会ê庄脚村á内底有二、三位年岁khâh koân ê长者，任何大小事，inl óng有chiok大ê权威，我亲目chiu 看见长者用长长ê薰吹kho̍k一位无听话ê序细ê头，虽然非亲非故，全村人对in lóng真敬畏，hit时厝内长辈若使性地m̄食饭，kiáⁿ孙就ài跪the涂跤哀求伊食mn̄g-kiāⁿ，今á日chit种情形无可能koh看见，老人ài自求多福，mài随在使性地、发脾气。

「老人」ê阶段，每一ê人lóng会经过，若tú-tio̍h kiáⁿ孙有孝，感谢主，ná是无，mā mài怨叹，ài以积极ê心态，面对现实，自求多福。「四十想六十」是我一直teh强调，提醒每一位会友ài有ê人生规划，tio̍h用功充实家己ê人文素养，tòe-tio̍h社会脉动，建立正确ê人生观，若ē-tàng有chit种准备，老年生活一定ē-tàng khah幸福安稳，bōe成做「老贼」，咱mài惊老，ài惊ê是无尊严ê老。英国「经济人」杂志bat以经济ê观点来看老人，结论是「老人ê义务就是去死！」。美国一位州长，mā劝老人若有慢性病，千万m̄-thang赖leh m̄-cháu，残害kiáⁿ孙！听起来非常无情，完全无想着老人过去ê作为。夕阳无限好，老人ài如何hō͘家己活得有尊严？这m̄-nā是老来chiah ài去想ê问题，mā是二十岁、四十岁ê人应该想ê问题，过去ê社会，老一辈ê人tiāⁿ-tiāⁿ以家产来控制kiáⁿ儿序细，今á日kiáⁿ儿序细ê经济能力远超过in，chit-ê旧社会ê法宝已经失—去效果阿。读者文摘bat有一篇文章「五子登科」，伊讲人生七十岁chiah开始，五子登科指ê是1.kiáⁿ儿无tī时，tàu顾厝，2.新妇上班，tàu顾孙á，3.厝内是非m̄听，假做臭耳聋，4.看bōe顺眼，假做chheⁿ-mê，5.家事mài讲，装作哑口，虽然是一篇讽刺文章，soah 反应出现代老人ê生活。

老人ài如何建立有尊严ê生活？

（一）建立正确ê人生价值观
社会急变，ài老人来适应社会比较khah困难，mā因为án-ne少年人时常khau洗老人是「老顽固」，坚持原则是好，过分固执soah无帮助，老人ài克服固执ê心态。我teh四十岁时开始规划六十岁了后ê生涯，用健康ê心态来适应年岁ê增加，腓立比一：20～25，保罗讲伊甘愿离世kap基督同在，因为这是好得bōe比--ê，但是若tòa-tī世间，kap众人tòa作伙，ē-tàng hō͘信徒tī所信ê道上，koh khah进步koh khah喜乐，所以无论是生，是死，伊总替主喜乐。若ē-tàng有像保罗chit种ê人生观，无论toh一种景况，toh一种问题，lóng thang适应，这就是幸福ê人生，只要是练达，保罗食老时知影家己离世ê日子近了，但是伊犹原尽本份ê做家己应该做ê tāi-chì！chit种人生观是值得阮/咱学习ê。无论生、死，基督ài tī我身上得荣耀，活teh是为基督，死mā有好处，活leh是为信徒ê长进kap喜乐！我年老时siōng大ê安慰就是kiáⁿ儿、新妇、查甫孙、查某孙lóng非常有孝，kap咱二老非常亲密，这是上帝特别ê恩典kap祝福，当然孙á kap 阿祖感情好ê关键tī kiáⁿ儿、新妇，孙新妇敬重父母，孙á自然学习父母ê模样，mā会尊敬阿祖，少年ê父母teh教育kiáⁿ儿时，特别ài用心注意chiah-ê事。

（二）成做受人尊敬ê老人
老化是人生必然ê现象，机能退化、体力衰败，新陈代谢、消化机能、智能、思考模式lóng退步，有时甚至失态、失控。进入老年了后，siōng可贵ê是1.老伴2.健康3.朋友4.老本，但是chiah-ê物件会一项一项ta̍uh-ta̍uh-á失--去。所以老年人ài服老、认清家己，千万m̄-thang靠势家己年老，有问题时请教少年人，hō͘ kiáⁿ孙快乐、满足、hō͘-in感觉家己mā ē-tàng教阿祖，老人mài固执，应该加吸收新知识，建立家己成做有智慧、健康、可爱ê形象，成做少年人学习ê对象，用客观ê条件克服主观ê状况，「老才弥坚」是指老人只要身心状况iáu ē-tàng，仝款ē-tàng有快乐ê人生！beh到chit种境界，需要平时，特别是自青壮年时期就ài phah拚kap建设，同时mā需要kiáⁿ儿kap家庭ê关心kap扶助。

（三）心灵成熟ê人
若用信仰角度去看人生，我真实体验tio̍h上帝ê恩爱！这的确是上帝特别ê赐福，因为我ê老年生活无压力，无烦恼，过tio̍h清净ê日子，是teh享受人生ê时期！可惜有一kóa老年人因为现实环境无法度如愿，譬如身躯衰弱、kiáⁿ孙不孝、心智障碍、经济困难等，人生实在无法度十全十美！圣诗322首讲「koh-khah好ê tāi-tsì mā有乌点」，tī chit种现实中，老年人ài如何善用上帝ê恩赐去建立咱ê人生，特别是晚境成做无愧ê一生？hō͘老人真正成做「家有一老，kan-nā一宝」，真正体会上帝ê祝福kap快乐无比ê人生状况？

老人必须明白本身ê老化以及心理状况ê问题，基督徒拥有受祝福ê人生，上帝赐咱信仰kap智慧，一位年老ê基督徒若ē-tàng善用上帝所赐无限信心ê力量，以及信心所带来ê智慧运用tī你人生过程中，你必定成做一位十分完美ê人生！

「心灵成熟」确实是老大人非常重要ê人生内容，只有绝对ê信仰chiah ē-tàng引chhōa老人勇敢、放心去面对食老时期待ê真chē人生状况，甚至死亡，tī任何阶段lóng ē-tàng成做荣耀上帝ê存在者，这是上帝向人类要求ê人生siōng koân目的。一个人到老年时ná是iáu ē-tàng成做荣耀上帝ê人，chit种ê人力就是无愧ê一生。

老人虽然无少年人ê冲劲kap气力，但是伊有丰富ê人生kap信仰ê体验，智慧ê累积，致使心灵到完全成熟ê境界，这就是教会生活时常提起ê“信仰ê属灵性命”，只要具备chit种成熟ê心灵，咱就ē-tàng克服真chē老年人所有ê身心障碍，障碍若消除、克服，kám m̄是完美、理想？mā就是以信心去克服真chē人生问题，因为任何老化所带来ê人生现象lóng会tī成熟ê心灵ê直接带动之下kā伊化解，hō͘老化ê问题减到siōng低限度。Chiah-ê事实，咱thang tùi真济位伟大ê信仰前辈ê生活得tio̍h印证。

学生时代认bat一位杨长老，是一位伟大ê信仰者，伊ê一生充满坎坷、病痛，但是伊有充份ê心灵ê资源，虽然生活teh苦境中，soah ē-tàng成做荣耀上帝ê存在，mā就是运用伊ê属灵ê生活去带动衰弱痛苦ê肉体生活。

结论：
「家家有本难念ê经」,尤其是老大人，m̄-koh「无愧ê一生」是每一个人必须phah拚去经营--ê。Tī急变ê现代社会，老人一定bē-tàng被叫做“老贼”，咱ài发挥老人ê特质，自重自爱，积极主动，tī夕阳无限好ê过程中，无一定是凡事顺心，但是咱ài hō͘伊成做“无愧ê一生”。