《受恩蒙福的一生》

 | | | 转寄

逆说ê真理

作者 林宗要 2010.09.05

列王纪上十七：1-16

旧约时代ê以色列民族，用上帝ê选民自居，一方面享受in有--ê权利，另gōa一方面mā tio̍h-ài尽义务。权利是tī in kap上帝之间ê特别契约，thang享受上帝ê应允kap特别ê祝福，同时上帝mā要求in，必须ài符合选民特质ê生活方式。

特别tī kap上帝ê关系 chit-ê方面，是别的民族bōe-sái相比评--ê，因为上帝藉tio̍h kap in立约，要求in必须ài尽一切力量去疼上帝，实行上帝所交代ê使命，只有完成选民ê责任，上帝chiah会将in应该得tio̍h ê福气赐hō͘ in。这是旧约中讲tio̍h--ê上帝kap以色列人ê关系，所以tī旧约中，咱tiāⁿ-tiāⁿ会看tio̍h一句话「以色列ah，lín ài疼主你ê上帝」。Chit句话ê前提，就是认定in kap上帝之间ê关系。

今á日咱虽然tī新约时代，相信主耶稣要求咱chiah-ê基督徒kap他ê关系，大概mā是kap旧约时代ê情况相siâng。主耶稣当时bat向彼得提起彼得对耶稣基督ê信仰，「约翰ê 后生西门，你疼我比chiah-ê koh-khah深mah？」（约翰福音廿一：15）相信咱ê主耶稣，犹原ài用chit句话来问咱chiah-ê属于他ê人，咱对他ê疼如何？

事实上，基督徒信仰siōng好ê解释，就是对主耶稣ê疼，因为chit种疼，是发出基督徒所有ê信仰生活ê一切动作，或者是讲疼基督耶稣ê心tio̍h是基督徒信仰生活所结ê果实！

因为咱知影，爱是kā咱人kap人ê间距离giú 较óa ê主因，咱若看tio̍h家庭中亲情ê表达，咱就会了解chit件tāi-chì，翁仔bó͘之间ê感情，父母kiáⁿ儿、兄弟姊妹，或者其他ê亲情，hiah-ni̍h甜美感动人，lóng tī其中充满爱。假使，tùi chiah-ê亲情中除去「爱」ê时，是真悲哀--ê，这mā会发生tī chiah-ê siōng亲密ê人之中，比如翁仔bó͘结冤仇，thâi死对方，甚至灭尸，父母kiáⁿ儿ê歹面相看、相phah、兄弟姊妹为tio̍h利益关系，互相残杀控诉，chiah-ê tī咱ê社会中并m̄是啥物稀罕ê tāi-chì，为何会有chit种悲剧发生，主因tī失去爱ê连结，iah就是tī chiah-ê所谓亲人关系中，无形成做伊ê主要因素—爱，因此成做欠缺爱ê翁仔bó͘、欠缺爱ê父母kiáⁿ儿kap兄弟姊妹，如此一来，teh有利害关系发生ê时，状况就是真pháiⁿ想像，因此咱ē-tàng了解，翁婿为何会将伊ê bó͘ phut死koh灭尸，是án-ná兄弟为tio̍h一kóa利害关系来互相残杀等等ê残忍ê行为。

无爱ê人生关系，是疏远ê人生关系。所以爱是成做人伦关系ê主因！

这就是为什么咱会一直teh强调爱ê重要性，尤其是基督徒应该ài比别人koh-khah ē-tàng体会tio̍h爱ê重要性。因为咱chiah-ê基督徒，lóng tùi上帝hia体会tio̍h无限ê恩疼tī咱ê身上！特别是咱kap上帝之间爱ê关连，是成做基督徒ê信仰生活ê 主要原因。

Chit种爱ài如何表现？Chit种爱ê表达，就是基督徒ê信仰生活之一，圣经中讲teh人爱上帝ê时，通常lóng用顺从上帝命令或者顺服上帝ê旨意做siōng关键ê问题。所以圣经是用顺服上帝来说明人对上帝ê爱ê关系。

今á日ê经节，是描述当时ê掌权者亚哈王，tī政治方面，伊是有成就ê王，但是tī信仰顶koân，伊是欠缺信仰，因为伊tiāⁿ-tiāⁿ表现出m̄顺从上帝ê话，用伊家己ê意思代替上帝ê旨意，因此tī上帝ê眼中，伊是一位无爱上帝ê王，当然mā是无信仰ê王，因为当时ê以色列是神政政治，所以无论如何lóng是以上帝为主，听从上帝ê旨意（神政政治），chiah是符合上帝ê要求。

亲像头前所讲--ê，选民kap上帝之间ê契约是m̄是实现，就是in受祝福或者受弃绝ê关键。因为teh完成契约ê动作中，会充分表现出in kap上帝ê爱，iah 就是用in是m̄是完成上帝ê契约来看出in对上帝ê态度！

因为亚哈王ê反背上帝，soah造成有三年半ê火烧埔，这是非常严重ê问题，因为水kap空气、光线，lóng是人生生存所bē-tàng欠缺ê物质。台湾热天ê时bat因为电力不足或者火烧埔（欠水），来发生严重ê民生问题（1911年4月中，全台湾水无够用，佳哉5月初ê 及时雨化解了生活上ê大问题。）因为连续三年半ê火烧埔，m̄-nā人民用水欠缺，农产品mā欠收，这往往是造成饥荒ê主因。近年来非洲有kúi-nā万人时常生活teh饥荒中，主因是火烧埔所引起ê欠水。（沙漠mā是其中之一）

三年半火烧埔造成水kap食物不足ê结果，开始ê时是影响tio̍h hit kóa社会基层ê人（贫苦ê工人，以及无资产ê歹命人），但是社会中，低阶层ê人占大多数，chiah-ê人若无mn̄g-kiāⁿ thang食，社会必定会动乱，社会若动乱，hiah-ê王公贵族mā无好日子thang过，这是咱ē-tàng了解--ê，历史上朝代ê 改换，通常lóng是因为民生问题，真正属于政治性ê khah少。

Tī亚哈王朝中，chit对艰苦ê母á-kiáⁿ，咱ē-tàng了解in当时ê实况：

（一） 伊（寡妇）ê现实情形
咱已经大概提起，火烧埔kap人生生活ê实质关系，伊对人有决定性ê影响，因为人生生活ê条件，食占真重要ê地位，过去中国人用「民以食为天」来形容伊ê重要性。囡仔时mā tiāⁿ-tiāⁿ听tio̍h chit句「食饭皇帝大」，相信chiah-ê lóng是the讲，人生中食ê重要，为tio̍h beh hō͘生活ê内容koh khah丰富，人类ê历史上，一直teh为伊付出一切，期待tio̍h人生有koh khah理想ê生活内容，相信这就是人为何ài hiah-ni̍h骨力teh做khang-khè、thàn钱ê主因。

生活境况若良好ê时，食ê问题就bōe受tio̍h影响：若无好tio̍h会活teh 枵腹肚ê生活中。咱看世界ê现况，自由国家ê经济状况lóng非常好，共产主义国家，大部份ê生活状况lóng真bái，用苏联来讲，伊是共产国家ê龙头，但是经济状况soah真bái，这就是造成近年来欧洲真chē共产国家改变政治主体ê原因。

因为人民是成做国家ê重要因素，chiah-ê人民若无mn̄g-kiāⁿ thang食，国家就tī危机中，chit种状况，用目前ê台湾kap大陆相比就ē-tàng了解，假使一位偷渡ê大陆人来台湾ē-tàng顺利tòa tī台湾一冬半冬，伊可能ē-tàng thàn tio̍h十gōa万，chit种数目是in tī大陆thàn二十年mā thàn bōe-tio̍h-- ê，这就是为何一直teh遣返偷渡来台湾ê大陆人ê原因，但是in mā是一直beh来，因为这thang解决in siōng大ê民生问题。

Chit位寡妇生存ê条件比一般人受tio̍h koh-khah chē ê限制，因此三年半ê火烧埔，伊kap gín-á ē-sái讲是头一ê受害者，咱thang tùi伊听tio̍h先知ê话了后，伊ê 回答来了解伊ê状况，「伊讲：我用手指永生耶和华你ê上帝咒chōa，我无饼，瓮á内只有一把面，罐á内底只有一点á油，我chit-má chhōe两ki柴，tńg去厝里为我kap我ê后生作饼，等阮食了，死就死阿」（列王纪上十七：12）。Tùi妇人所讲--ê，咱ē-tàng完全了解，伊所有ê可能kan-ta够额做一顿，hō͘ in母á-kiáⁿ食饱，绝对无可能提供hō͘第三者。当时chit位妇人phah算食了了后，就是「坐—e等死」，因为tī伊ê现实ê生活境况中，伊实在chhōe bōe出有其他ê办法thang koh再维持in ê生活！

Hit时chūn，hit种连续三年半ê火烧埔，实在造成了当时社会全面ê痛苦kap危机。Chit位寡妇ê悲哀kap困苦现实，是食好穿好ê现代人，所bōe-tàng了解--ê！除了伊向先知以利亚所讲ê以外，伊实在无其他ê路径thang解决伊所tú-tio̍h ê现实问题！

（二） 贫苦逆境中ê事奉
的确，chit位妇人ê境况实在是真困苦，甚至是充满危机，因为伊phah算食完最后一顿了后就等死，想看māi，人生kám有比chit款境况koh-khah凄惨--ê？
M̄-koh tī chiah-ni̍h悲哀ê境况中，上帝soah安排伊ài负起供养先知以利亚之重大责任，tī列王纪上十七：8-9「耶和华ê话降到伊--讲：你起身ùi西顿ê撒勒法去，tòa tī hia，我已经吩咐hia内底ê一个寡妇供养你」，先知即时起身到上帝所启示ê所在，就tú-tio̍h hit位贫困可怜ê寡妇，伊mā将伊ê实况完完全全ê kā先知讲，「以利亚对伊讲：mài惊惶，tio̍h照你所讲ê去作to̍h好，只要先替我作一个小饼，提来hō͘我，然后替你kap你ê kiáⁿ作饼」（列王纪上十七：13）。Che kap主基督教咱ài先求上帝ê国kap义是仝款ê道理。

照人ê看法，chit位寡妇，自身ê现实生活lóng有问题啊，那有加ê气力去帮助别人neh？伊是无法度thang供养先知--ê！因为伊ê现实thang用「自身难保」来形容。
M̄-koh tī-chiah有人料想未到ê tāi-chì，就是上帝命令伊ài负责供养先知，而且是teh饥荒ê时！咱ē-tàng看出tī属灵世界逆讲ê真理！用理性ê思考，伊是无可能做chit种tāi-chì，但是咱ê圣经讲「人感觉bōe-sái--ê，tùi上帝是万事lóng ē-tàng」，因为信仰ê算盘，定定是kap人ê算盘无仝。上帝ê旨意，有ê时是人无法度体会--ê。
上帝希望chit位处tī极端贫困中ê寡妇，tī án-ne恶劣ê境况中，负起供养神仆ê责任！伊是hō͘上帝选tio̍h啊，当一个人hō͘上帝选tio̍h ê时，就无机会推辞，只要上帝选tio̍h你，你就无可能有法度推辞上帝ê交托。Tī旧约ê约拿书有chit-ê事实，先知约拿hō͘上帝选--tio̍h，ài负担向尼尼微城传道ê责任，虽然伊逃避，但是he是永远无可能ê，因为主上帝是绝对ê主！

上帝ê旨意tī人身上ê时，人是无法度推sak抵抗--ê，人只好完全顺服上帝！Hó亲像chit位寡妇仝款，伊有充分ê理由拒绝上帝所交代供养先知ê责任！因为伊tī现实ê环境中，只chhun 一点点á面粉kap小khóa-á ê油，实在无条件去完成上帝所交托ê责任。

伊ê境况是非常ê贫困，m̄-koh上帝逆讲ê真理，soah发生tī伊chit种状况中！Tú亲像约翰福音六章耶稣叫学生「Hō͘ in食」！腓力讲用二十两银去买饼，叫in各人食一点mā是无够--ê，但是主耶稣soah命令学生，「lín hō͘ in食啦」（马太福音十4：16）。Chit种逆讲ê真理，tī基督徒ê信仰生活中，tiāⁿ-tiāⁿ会出现，因为咱所面对ê主是绝对ê上帝！

只要你hō͘他选—tio̍h，就无任何理由推辞或者抵抗，同时咱mā必须ài会记--eh一项事实，就是任何境况中上帝lóng会选tio̍h咱，m̄是只有顺境、好额、健康ê时，有ê时像chit位sàn-chhiah寡妇，逆境中、病痛ê时，基督徒mā ē-tàng体会tio̍h chit-ê事实，tī真chē人生困苦不幸ê现实中，逆讲ê真理mā会降到你ê身上。

（三） 这就是逆讲ê真理
伊无用人ê观点kap作为来衡量上帝ê交托，伊无用人ê想法来计算上帝所交托hō͘伊ê事工！伊用信仰接纳上帝ê旨意，伊无像上帝辩解伊悲惨ê现况，当先知ê话临到伊身上ê时，「妇人就照以利亚ê话去做」（列王纪十七：15）。Chit句圣经chit位贫困寡妇ê信仰siōng好ê解释。若是一般人，伊有充分ê理由kap藉口来推辞chit-ê重担，chit种作为是现代基督徒ê特色！基督徒tiāⁿ-tiāⁿ用理由kap藉口来推辞上帝所交托ê使命，这是用人ê立场，mā就是无信心ê作为（比如讲我无闲、我苦、我bōe ē-tàng等等），有信心ê行动，好亲像创世记二十二章亚伯拉罕接tio̍h上帝ê命令，beh将孤kiáⁿ以撒献hō͘他ê时ê心态，kap无信心ê行动是完全无仝ê！信仰ê行动上，往往有hō͘人料想未到ê tāi-chì发生，上帝准备另外一只羊á做祭物hō͘伊使用（耶和华以勒）。

Ná亲像chit位可怜ê寡妇接tio̍h上帝所交付hō͘伊ê使命ê时，伊就用信仰来接受伊，koh用行动来表达：当一ê信仰者将上帝所hō͘伊ê信心变成行动ê时，hit时就会发生真chē逆讲ê真理tī信仰者ê生活kho͘-á中。

会记--eh：上帝向伊要求ê是tī伊ê范围内所ē-tàng做ê「一ê小饼」，m̄是大饼，因为上帝对人lóng是按照人ê能力，当chit位寡妇完全顺从上帝ê话去行动ê时，果然有惊人ê结果，「瓮á内ê面，果然无减少，罐á内底ê油mā 无欠缺」，tú亲像耶和华藉tio̍h以利亚所讲ê话（列王纪上十七：16），这就是逆讲ê真理，伊是用人ê理智kap人ê思考所无法度了解ê事实，是超理性--ê！Chit种逆讲ê真理，tī基督徒ê信仰生活中，tiāⁿ-tiāⁿ会tú-tio̍h，mā就是基督徒信仰生活ê事实。

咱ē-tàng tùi chit位非常困苦ê妇人ê现实状况得tio̍h学习，伊面对上帝所交托ê使命，用信心去接纳，koh实际行动。当然，tī-che所需要ê是像chit位妇人肯用事奉ê生活，表现出信仰ê内容，因为ài有丰盛ê疼chiah ē-tàng完成上帝所交托ê使命。

结论：妇人ê现实是tī绝对ê危机中。
绝境逢生ê秘诀是：（一）tú-tio̍h先知。（二）听从上帝ê话。（三）信仰kap行动。（四）上帝无限ê应允，危机会得thang化解。