《受恩蒙福的一生》

 | | | 转寄

得胜ê秘诀

作者 林宗要 2010.08.15

出埃及记十七：8-16；林前十二：26

成功或者胜利ê人生，tī现实ê社会中，是人共同ê期待，因为每一个人lóng期待伊ê人生无论什么方面lóng有完美成就ê结果，因为伊会引chhōa人生建立khah理想ê人生方式，ē-sái讲是tī现实中，人生ê期待无一定会成全，反倒转来讲，人生定定tī成功kap失败中过日子，所以人必须ài有自觉，tī人生中定定有成功kap失败相伴，有人讲人生有成功kap失败两面ê存在，确实，tī人间无绝对ê成功者，任何伟大ê成功者难免mā会有一kóa失败ê经验，这是事实。

Chit种两面性确实对人生有真大ê影响kap关系，人生ài如何确立tī chit种两面性ê世界到伊ê生存ê价值，这是每一个基督徒必须ài完全把握ê人生方式，因为án-ne，人生chiah ē-tàng tī任何境况中有良好完美ê人生内容ê表现。因为咱知影世间上chit种两面性ê事实真普遍，比如金钱mā是两面性--ê，有价值kap罪恶lóng tī使用ê人身上，人若用tī正面有意义ê时，钱就成做对人间社会ê好，反倒转来讲，就是不法罪恶ê工具，涂mā是án-ne，tī田中伊是人生所bē-tàng欠缺ê，会生产真chē农作物hō͘ hiah-ê人使用，ná是伊tī厝内ê桌顶或者眠床顶就变成涂粉，无人爱koh讨厌。自尊心（家己尊重家己）是一件美德，但是程度若是超过定定表现出骄傲，这两者ê差别真大，有自尊ê人受人钦仰，骄傲ê人hō͘人讨厌、弃嫌，照学者ê研究，骄傲ê人真chē是自尊心ê程度相超过所造成--ê，爱家己ê性格mā是人ê一种美德，但是chit种自爱，若过份表现往往会变成自私利己中心ê人生，chit两种性格mā是完全无仝，其他iáu有真chē状况，咱ē-tàng体会。

确实人生是处tī chit种两面性ê状况中，关键性ê问题m̄是tī tāi-chì，是tī操控ê人身上，mā就是人ê心态（价值观）tī形成（影响）事物ê正负面，所以人生ê一项重要ê事工就是ē-tàng建立良好正确ê人生观，to̍h是对伊ê人生ê一切运作lóng khah有正面性ê表现，因为人生价值观若khah正确ê人，伊ê人生表现必定有khah端正ê态度。

所以一个成功ê人生，必须ài把握tùi上帝所领取ê人生，chiah ē-tàng善用tī适当ê过程，以及完全ê领域，tī chit款情形之下成功ê可能性就khah大，若是将人生ê 才能无妥当使用，是违反神道kap人道--ê，tī现实ê社会中，确实有真chē天才型ê人物，因为无妥当使用tio̍h变成犯罪工具，咱若注意社会新闻，就ē-tàng看tio̍h真chē事实，譬如电脑设计师偷theh密码、偷theh现金等等。因为án-ne tī咱人生现象中，人定定处tī适当kap无妥当之间，对che-ê取舍chiah决定人生ê成败，人生ê实况定定lóng会面对chit-ê挑战。

Tī信仰生活中，诱惑本身并无一定是罪恶（因为主耶稣亦bat面对伊），伊之所以成做罪恶，犹原是人禁bōe起伊ê考验，成做伊ê奴才，罪就降kàu人ê身上，若是ē-sái克服伊，对人ê心性lóng有正面ê提升，hō͘人进入koh-khah koân ê层次ê人生经验！

人定定会提出创世记三章亚当tī伊甸园中ê生活kap禁果，譬如鸟á teh天空飞，你无权干涉伊，但是当鸟á beh停tī你头壳顶有所动作时，正常ê人lóng会有一kóa反应！像án-ne，人面对真chē试诱，人实在无权干涉，但人有取决权tī伊来临ê时使用。我tī虎尾牧会时，经过特别区，bat hō͘查某囝仔扭tiâu所骑ê自转车，真热情ê请我入去坐，我kā in讲我ê身份，顺续想beh 向in讲一kóa福音，in随放我行！

基督徒ài有拒绝罪恶ê勇气kap决定，为什么tī/教会中有真chē有为ê基督徒会败tī试诱？咱必须ài记tiâu雅各书一：１５「私欲既然怀了胎、就生出罪来、罪既然生成、就生出死来。」chiah-ê失败ê基督徒，通常lóng是纵容in家己ê私欲，tī伊ê人生中留恋某一kóa私欲，（或者讲做私欲tī伊ê人生中，设特别ê座位）。基督徒ê人生必须留基督做常客，若无会失败--ê，chit种人生生活重心是tī人对适当kap无妥当ê问题ê取舍才来--ê，tī-chia分别出人生ê成败关键性，这是每一ê人生必须定定kā伊深深思考ê严肃ê人生课题。Tī人生现象中，chit种适当kap无妥当ê取舍，往往对人生ê结局有深刻ê影响，譬如以两ê背景差不多ê青年人，因为对适当kap无妥当ê取舍，一ê人成功，另外一ê soah完全失败。事业家或者家庭状况mā thang用chit件tāi-chì来观察，咱所看--ê chit段圣经以色列人成败ê关键加减kap此有关，只是in ê问题tī信仰上ê取舍，mā就是信仰ê适当kap无妥当来决定以色列人ê成败，这是成做选民ê以色列人ê特殊存在。今á日ê基督徒kap chit-ê原理仝款，tī人生ê成败中，基督徒必须加入信仰因素，伊是形成基督徒人生中bē-tàng欠缺ê因素。

（一） 必须面对ê挑战（困境阻碍以色列人ê前途）
是chit段圣经ê一项要紧ê真理，虽然上帝已经应允将迦南地赐hō͘以色列人，但是自出埃及到迦南地中间iáu有旷野ê阻碍，以色列人若beh进入上帝所应允，确实需要克服chit段旷野ê生活，chit段旷野ê日子就是以色列人ê信仰生活，mā ē-tàng比喻做今á日基督徒ê生活实况。当一个基督徒接受上帝ê应允了后，伊就是属于上帝ê天国子民，但是基督徒犹原ài tī人间ê日子中生活二十、三十、五十、八十年不等，chit段日子（人生ê生活）就是基督徒ê旷野生活，tī-chia以色列人会面对真chē生活上ê无方便，因为旷野kap都市ê生活状况无仝，为何庄脚ê厝一坪十万左右，闹区to̍h需要四五十万，主因mā是kap生活有关。

以色列人自出埃及到进入迦南地四十年久，实在经历过真chē真危险，不安、无方便ê生活，食物、水、厉害ê迦南人ê反抗，chiah-ê lóng会影响tio̍h in ê生存，所以in若beh成功，in 主要ê事工，to̍h是ài先克服in目前ê困境，因为chiah-ê阻碍若无克除，就无法度达成in ê目标。

咱若看圣经，咱就知tī in前头有连续不断ê问题阻碍tio̍h in ê生存，十四章过红海了后in因为克服来感谢上帝ê拯救kap上帝ê大权能，十五章无gōa久就发生玛拉ê苦水，后来水虽然解决但是食物soah变成大问题，十六章是记in tī旷野中食mah-nah ê情形，食ê问题解决了后随tú-tio̍h强大ê亚玛力人军队，十七章由chiah-ê圣经ê记事，咱ē-tàng明白上帝ê子民，tī旷野生活ê现实问题，tī-chia必须以谨慎认真正ê心态去面对，所以旷野ê道路是歹行、坎坷ê道路，是充满tio̍h草刺ê路，好亲像耶稣所讲是十字架ê道路，是koh小koh陜ê路，伊ê特色是pháiⁿ行而且辛苦，beh行ê人，必须有谨慎，bōe-sái怠慢，不时lóng-ài保持清醒，若无就会跋倒。Chit种旷野ê道路to̍h是今á日咱基督徒必须ài去行ê路，因为主耶稣kā咱讲咱必须ài phàiⁿ起家己ê十字架去跟随他，chē是学生应该有ê觉悟，基督徒ài定定有chit种谨慎ê心态去面对人生，chiah ē-tàng成功。虽然旷野chit条路是小koh陜koh pháiⁿ行ê路，但伊soah是成功，永活得救ê路。

（二） 共同体ê群体（运命共同体）
以色列人竟然必须去面对tī in头前真chē困苦危险ê路径，tī án-ne情况中，in确实需要成做一个强koh有力ê团体，chiah ē-tàng应付真chē ê挑战kap困难ê现实。当然in ê力量之源是上帝，另外，就是in家己ê表现，就是顺从上帝ê旨意以及成做共同一致ê团体，chiah ē-tàng面对chiah-ni̍h强大ê外来ê敌对势力。

Chit种状况kap现实ê教会有淡薄á仝款，因为今á日咱ê教会mā是处tī chit种面对挑战ê状况，所以有战斗ê教会之称，beh如何tī万般困苦逆境中去完成教会ê使命？这是教会ê课题，tī-chiah需要够额ê力量，当然，教会ê力量是由上帝ê灵来ê属灵ê气力，另一方面，就是所有ê基督徒ê信仰生活ê表现。

因为咱ê应允iáu未实现（比如出埃及到进入迦南旷野中ê生活），咱只是向应允teh追求，好亲像保罗所讲「这m̄是讲、我已经得tio̍h阿、已经完全阿・我是尽力追求、或者ē-tàng得tio̍h基督耶稣所以得tio̍h我ê。」（腓力比三：12）这是信仰生活ê重点。

咱ê教会生活既然án-ne，tī-chiah咱所需要--ê就是成做一ê力量－疼ê共同体，今仔，共同体所需要ê条件是啥？

A. 感情
Tī一个有人格ê共同体内，ài表明伊是有性命力ê共同体，必须ài具备纯真ê感情，因为只有tī有感情ê所在意志chiah会疏通，chiah ē-tàng发挥力量，因为意志是人ê力量来源，伊必须ài有感情来做支撑，chē tio̍h是教会生活中基督徒ê交通，因为基督徒是互相ê肢体，所以一间有感情ê教会kap无感情ê教会有真大ê差别，基督徒看教会亲像家己ê，án-ne chiah ē-tàng对教会有感情，有感情ê所在chiah会有付出，chiah会有力量ê发挥，互相之间chiah有美好ê tāi-chì 来发挥。Tī-chiah会看出真完美ê教会ê蓝图，一幅美丽ê小天国ê描写，chit-ê感情是健全、正常ê感情。

B. 仝款ê运命
近来ê世界当teh向chit-ê方向发展，比如欧洲ê共同体、亚洲ê政治家mā-teh提倡运命共同体、北美ê状况亦是án-ne。或者以宗教背景为中心-- ê mā是强调chit种人有仝款ê运命。台语有一句穿仝一条裤或者hâ仝一条裤带就是teh描写chit种运命ê共同体。Tī一ê群体中ài有chit种运命共同体ê认同kap建立，hit-ê群体chiah ē-tàng真正建立共同体ê实在内容，这mā是教会ê一件非常重要ê认同，to̍h是ē-tàng化解教会所面对ê各种危机。

C. 存在ê一致
Mā是形成共同体--ê一ê非常重要ê条件，好亲像以色列人tī旷野ê生活中，就是in现实ê存在，同时chit-ê存在虽然是由单独ê自我，但是必须ài建立chit种一致ê存在，kan-nā tī哥林多书十二章保罗向哥林多教会所提出ê教会共同体性格，虽然有真chē肢体，但是伊ê存在soah是一致ê。Chit种一致ê存在就是教会完成使命ê能力ê来源。

（三） 得tio̍h胜利ê秘诀
咱看见chit段圣经咱就知以色列人所面对--ê是非常强大ê敌对势力，beh阻碍in ê前程，若照一般人ê观点，chiah-ê无组织ê以色列人实在无法度克服tsiah-ni̍h强大ê亚玛力人，所以in ê存在是tī极端ê危机中，chiah-ê tú tùi埃及出来ê乌合之众（无武装ê人民khiā-tī强大ê亚玛力人面前）实在无法度化解in ê危机，但是经由上帝ê帮助kap以色列人ê共同体ê发挥 chiah完全胜利，tī-chiah至少咱ē-tàng看tio̍h真chē无仝ê角色a)摩西b)亚伦kap户珥c)约册亚kap壮丁d)后面ê群众，chiah-ê人仝心合作chiah克服了非常强大ê敌人。

Chit场战争ê关键是tī摩西手中ê拐á，夯起to̍h是胜利，囥下to̍h是败，亚伦kap户珥双双扶tiâu摩西手中ê拐á hō͘伊永远无下垂（虽然án-ne，相信摩西手ê负担mā是真重--ê，但是必须ài忍耐一切ê疼kap艰苦）。然后约书带领壮丁kap亚玛力人交战 chiah ē-tàng克服危机。当然，咱bē-tàng 放bē记得就是tī后面无直接参与战争ê群众以及妇女做ê hit-kóa补给ê khang-khè，mā是无法度否认ê事实，chiah-ê状况teh说明咱现实ê教会实况，咱ê教会生活中，咱有无无仝ê教会角色tī无仝ê位顶悬，有牧师、传道、长执，各单位ê负责人，主日学先生、圣歌队组员等等koh人tī教会ê功能lóng无仝，但是soah有共同ê目标，tio̍h是面对真强大ê阻碍kap挑战。

圣经写讲“摩西ê手酸阿”伊手中ê拐á［仗］就下垂to̍h是以色列人战败，亚伦kap户珥就sóa石头hō͘摩西坐，两人就扶tiâu摩西ê手，án-ne就ē-tàng克服危机，chiah-ê状况tioh像现代ê教会生活仝款，摩西ê手会酸表示伊ê软弱kap人性，补偿ê方法着是tī亚伦kap户珥ê扶持，in两人无批评摩西颠倒用in ê存在来补足摩西ê不足，hō͘摩西ê手永远bē下垂。定定有人以此来比喻教会中ê传教者与会友（长执）ê关系，必须ài互相扶持，chiah ē-tàng完成人ê软弱kap面对艰苦ê现实，chiah得tio̍h完全ê胜利。同时约 书亚kap hiah-ê壮丁亦无计较in ê危险来议论摩西、亚伦kap户珥in khah安全，完全无chit种私心，chit时ê以色列人thang用万人一心来形容in ê情形，chit种心态kap行动，就是得tio̍h胜利ê秘诀。

Tī-chia咱看见in有a)合一ê事奉b)无分彼此ê心态 c)将荣耀归hō͘上帝ê作为，这是得胜ê信仰生活所bē-tàng欠缺ê条件。

结论：
用以色列人当时ê状况，来反省今á日咱ê教会，尤其咱弱小ê教会，koh-khah需要chit种无分彼此ê心态，以仝步调，同心合意ê心来面对，参与咱ê教会生活，自然是得胜！