《受恩蒙福的一生》

 | | | 转寄

一皮袋水

作者 林宗要 2010.08.08

创世记廿一：1-19

过去以美苏两大强国所代表ê民主kap共产，定定造成互相对立ê状态，但是自从1991年苏联共产党解体了后（tī-che chìn前，已经有东欧一kóa共产国家开始革新，比如波兰ê改革、东德kap西德ê合并，拆除柏林围墙），世界ê状况就完全改观，美苏两个超大强国，无koh处tī冷战（备战）状态，开始签订友好条约，并拆掉真chē惊人ê核子武器，建立良好ê外交关系，美国甚至用真chē物资援助已经解体ê苏联，chiah-ê伟大ê作为hō͘戈巴契夫得tio̍h诺贝尔ê和平奖，伊实在是一位非常伟大ê政治人物！但是以色列kap阿拉伯民族ê对立，soah自以色列建国以来，一直处tī敌对ê状态中。

确实以色列kap阿拉伯是两个非常复杂ê民族，in形成chit种敌对ê关系是真pháiⁿ处理--ê。Tī圣经中有真chē记载，比如：亚伯兰ê kiáⁿ孙、以扫ê kiáⁿ孙，kap以色列为敌，因此有一kóa学者认为，以色列kap阿拉伯民族之间永远ê纠纷是kap圣经有关，比如以实玛利后裔kap以扫ê后裔（以东）、亚伯兰ê侄á—罗得ê kiáⁿ孙、摩押人kap亚扪人（创世记十九：37－38）等等ê民族，一直是kap以色列（雅各ê后裔）有永远无法度化解ê纷争。

Tī圣经中较明显ê两件，lóng是ùi家庭所引起ê纷争，一件就是亚伯拉罕ê kiáⁿ以实玛利kap以撒，另外一件就是以撒ê双生á，以扫kap雅各，chit两段家庭ê纷争，上帝lóng亲身应允in成做大族，tùi hit-ê时chūn开始，就一直存在永远无法度解开ê问题tī in ê中间。

因此咱ē-tàng了解，tùi亚伯拉罕ê家族（后裔）所产生ê问题，表面上kah-ná是「家」ê问题，m̄-koh soah直接、或者间接--ê严重影响tio̍h人类存在ê问题，咱若看hit时亚伯拉罕ê家庭，虽然上帝已经明白kā亚伯拉罕kap撒拉讲，上帝一定会祝福in ê kiáⁿ孙，hō͘ in ê后裔兴旺亲像天顶ê星，土脚ê沙á，m̄-koh tī信仰ê历程中，人往往会用家己ê主观判断来取代上帝ê应允。Tī chit位hō͘人称做信仰之父ê家庭，撒拉竟然以人ê立场来替代属灵ê境况，因为伊对上帝ê应允ê无信任（因为人ê现实，撒拉已经年老，生产机能已经丧失），因此就用人ê方法，就是撒拉将伊e5cha-bó͘嫺夏甲送hō͘翁婿做bó͘，chit种作法，tī重视「不孝有三，无后为大」ê台湾人，应该是ē-tàng了解--ê，台湾mā有真chē chit种现象。

但是chit种结果tiāⁿ-tiāⁿ是产生家庭纠纷ê主因，咱若看撒拉ê行为，tùi属灵ê观点来看，伊已经犯了严重ê 错误，因为上帝已经明白向in应允，确实会有兴旺ê kiáⁿ孙，但是伊soah用人ê观点取代上帝ê应允，伊认为已经停经ê cha-bó͘人，是无可能koh生kiáⁿ --ê（创世记18：22），但是伊bē记得「tī人无法度--ê，tī上帝凡事lóng ē-tàng」ê信仰，因为chit种属人ê主观，伊决定将cha-bó͘嫺夏甲hō͘伊ê翁婿做细姨，chit种人为ê观点，tio̍h tī chit-ê信仰之父ê厝内种落祸根。事先是夏甲轻视主母（创世记十六：4），因此撒拉tio̍h虐待夏甲，逼伊逃走。

Teh庆祝以撒生日ê时（创世记廿一章），撒拉看见夏甲ê kiáⁿ以实玛利kap伊ê kiáⁿ以撒teh耍，撒拉考虑tio̍h未来ê继承大权，因此用chit-ê诉求来压迫以实玛利kap夏甲，所以亚伯拉罕一定ài逼走夏甲kap伊ê kiáⁿ以实玛利。

圣经记载「亚伯拉罕因为in kiáⁿ ê缘故真忧愁」，chit-ê时chūn，tī chit-ê厝内ê每一个人，lóng体会tio̍h非常惊人ê代价。痛苦ê tāi-chì，无一定lóng是ùi人chiah有，但有时人必须ài为伊ê作为付出相当大ê代价，这是咱ê人生现象中siōng严肃ê事实。亚伯拉罕透早起来，the̍h饼kap一皮袋水，khǹg tī夏甲ê肩胛上，koh kā gín-á交hō͘伊，叫伊走（创世记廿一：14）。咱来想看bāi，亚伯拉罕chit时ê心情比如何？咱ē-tàng想像，夏甲tī chit-ê状况中，咱ē-tàng看tio̍h伊人生ê悲哀：

1) 伊无路thang行，一个少妇chhōa 一位未成年ê少年人，伊ê人 生是何等无助。

2) 伊tī旷野，不管时lóng有可能tú-tio̍h危险ê状况。

3) 皮袋内ê水已经lim完，tī旷野中，水是gōa-nî--á重要，但是chit时，伊beh生存所需要ê重要物质—水，已经完全无lah，这是何等ê惊人！

咱来想看bāi，hit时ê夏甲，teh面对hiah-ni̍h惊人ê境况，伊ài如何去应付伊ê人生？

（一） 夏甲ê现实（夏甲tī旷野）
本来伊ê身分是主母ê cha-bó͘嫺，只要伊好好--á 做家己份内ê khang-khòe，伊ê人生是不止--á安稳。但是经过伊ê主母ê提拔，hō͘伊成做主人ê bó͘，提koân身分kap地位，koh替主人生落一位小主人，因为角色ê转变，造成伊tī观念上ê变化，这是一定--ê，因此mā造成伊hông迫离开温暖ê厝，伊所tiàm ê现实环境就是旷野，伊hō͘人ê感觉是寂寞、孤单、荒凉、惊惶、不安kap危险！chiah-ê现象是无符合人生存ê条件，因为人生存ê条件是tī闹热、互相往来、安全、平安、舒适ê状况中，m̄-koh夏甲当时ê现实soah未具备chiah-ê因素！chit种现象就是人生矛盾ê原因。

咱知影每一个人lóng有伊ê理想面，但现实ê状况，往往kap人ê理想背道而行。Chiah-ê情形就是人生ê问题kap悲哀，夏甲ê现况，to̍h是人生ê反应。Tùi属灵ê角度去观察人生ê时，咱发现，人所期待ê理想，往往无法度实现，颠倒亲像活tī旷野ê人生。Tī hiah人所感受tio̍h ê m̄是安全、平安kap喜乐，是寂寞、孤单、不安kap惊惶。

虽然，今á日ê人生（尤其是tòa tī都市中ê人），会体验tio̍h人生各方面lóng非常闹热，平时tī台北闹区，四界lóng是人，生活ê必需品排满所有店面，食物、衫裤、娱乐场所ê人群，非常ê闹热！

M̄-koh chiah-ê外在ê闹热（物质ê），无法度弥补人内心永远ê孤单kap寂寞，因为现代文明ê产物，对人心灵上ê孤单kap 无安全感，无任何作用。因此咱ē-tàng了解，jú进步ê物质文明社会，人心jú无安全、jú疏远。

生存ê危机mā是hit时夏甲ê体验，咱知影人生存在ê一件重要ê事实，就是人ài活tī有安全感ê境况中，伊是形成人生价值siōng 高贵ê内容，人ê一切操劳kap phah拚ê结果，lóng是teh期待有安全ê生存！无论钱财或者学问以及khang-khè事业等等ê表现，lóng指向这！但是事实上，人生ê不幸或者悲哀就是「安全感ê欠缺」，这是咱所ē-tàng了解--ê。

现代教育真重视建立有安全感ê人格，这是一件非常重要ê tāi-chì。夏甲当时ê 状况，ē-sái讲伊是tī生存ê危机中，伊无一个温暖ê厝，无亲人，所有生活ê条件lóng欠缺，koh tī极端危机ê旷野，这kám m̄是对伊ê生存有真大ê威胁mah？

（二） 一皮袋水
若单纯以人ê立场来思考亚伯拉罕kap撒拉如何对待夏甲母á-kiáⁿ时，咱会感觉实在是相残忍ah！相信每一个人lóng会明白，对夏甲母á-kiann2a2-kiáⁿ ê处置实在过份，m̄-koh chit位hō͘人敬重ê信仰伟人—亚伯拉罕，soah照撒拉ê要求处置夏甲母á-kiann2a2-kiáⁿ。

当然，当伊teh极端痛苦中，伊得tio̍h上帝ê指示，上帝也bat应允以实玛利，会hō͘伊成做大族（创世记廿一：12-13）。若按照创世记廿五：12-18记载，以实玛利是十二大族ê先祖（真chē历史家lóng认为今á日ê以色列kap阿拉伯民族解bōe开ê死结，加减lóng kap圣经chiah-ê记载有关）。今á日咱看见chit位夏甲chhōa后生kap有限ê食物kap一皮袋水，chiah-ê物件是in母á-kiáⁿ日后生存ê寄托。食物虽然重要，但是tī 荒漠ê旷野中，「水」koh-khah重要，chiah-ni̍h重要ê水，tī夏甲母á-kiáⁿ中，只有一皮袋而已，按照人生存ê条件，人是需要有活水泉（现代人ê自来水），chiah够生存ê需要，但是夏甲母á-kiáⁿ，只有一皮袋水，咱ē-tàng体会，chit皮袋水对夏甲母á-kiáⁿ ê重要性，虽然无讲--着容量，但是咱ē-tàng想像，一个软弱ê女子，tī一皮袋水之外，iáu有日常生活所需要ê物品，因此chit kha皮袋水ê容量，咱大慨mā ē-tàng io̍h-tio̍h，siōng chē是10公升～20公升，伊所chah ê水有一工一定会用完，这是一皮袋水ê特质。Mā就是夏甲母á-kiáⁿ绝对依赖维生ê一皮袋水，有一日会用完，人生无水koh bē-sái（无洗身躯iá-koh ē-tàng活），因为人生是tī有限ê状况中，人ê一切mā是有限--ê，甚至人人看做重要ê钱财，咱ê俗语mā讲，生不带来，死不带去，是伊ê特质！

咱每一个人生lóng像夏甲仝款，只chah一皮袋水，但是你必须记tiâu，chit皮袋ê水一定会用完！当你所带ê一皮袋水用完ê时，你ê人生就会面临极惊人ê危机，ná亲像当时ê夏甲teh thèng候死亡ê来临。

Hit皮袋水用尽ah，是夏甲母á-kiáⁿ生存ê危机！是绝望、是人生ê尽头，是人生绝对ê苦难。咱知影人生ê痛苦m̄-nā是生存或者肉体上有ê痛苦而已，koh-khah严重ê事实是，人无法度用人ê气力去解决人生所tú-tio̍h ê问题，ná亲像hit时ê夏甲，to̍h是处tī绝对ê苦难中！因为伊现实ê环境，伊无办法处理伊ê难处！人生ê现实只有一皮袋水，有限、不足、无够用，是伊ê特性。Ài会记咧！你生活ê一皮袋水mā有用了ê时chūn，这是造成夏甲大声哭（人生ê 不安、惊惶、危机）ê主因。

（三） 上帝听见……夏甲就看见井水
一皮袋水ê人生，一定会tī伊ê生存中kap上帝相tú，chiah ē-tàng koh再充实伊ê皮袋ê水，hō͘人ē-sái tī旷野中生存！

当时ê夏甲，咱ē-tàng用走投无路ê绝境来形容，tī án-ne ê绝境中，伊ē-tàng做什么？伊hit时ê人生真正是危机kap绝望，除了坐leh等死以外，伊想bōe出其他ê办法，假使只有伊一人tio̍h khah单纯，但是chit-má身边有一ê宝贝后生，chit种母爱ê流露，hō͘伊想tio̍h爱子，chit时伊ê心情是复杂而且矛盾，情绪极端不稳，自然ê表现就是大声啼哭，来表达伊hit时ê绝境。

伊是处tī偏僻ê旷野中，用来维生ê食物kap水lóng用完ah，tī chit时，伊心思ê复杂是咱ē-tàng了解--ê，处tī án-ne绝境中，伊ē-tàng做什么？只有teh上帝面前哭！相信伊teh亚伯拉罕家ê生活中，必定听过有关上帝ê事实！

亚伯拉罕ê上帝m̄是听人祈祷ê上帝mah？目前伊ê苦境，上帝是m̄是了解？

「上帝听见童子ê声音，上帝ê使者tùi天顶叫夏甲讲，夏甲你为何án-ne neh？mài惊惶，上帝已经听见童子ê声音了，起来，kā童子抱tī怀中，我必定hō͘伊ê后代成做大国」（创世记廿一：17-18）。Tī-chia，咱会看tio̍h人ê办法用尽，人ê能力无效ê时，上帝ê权能就会显现，tī属灵ê过程中，咱定定会听见一句话－「人ê尽头，是上帝ê开端。」

当人生iáu有一皮袋水ê时，人有时常将上帝khǹg外外，但是当人生受tio̍h危机、绝境ê困扰、侵犯ê时，若是用哭来求告上帝，上帝会到tī绝境中ê人。好亲像夏甲当时ê境况，伊tī绝境中体会tio̍h上帝ê临到，「上帝hō͘夏甲ê目chiu变光，伊就看见一口水井，tio̍h去kah皮袋ê水té hō͘伊满」（创世记廿一：19）。当伊皮袋内ê水用完时，伊必定是用真chē ê时间去chhōe水源，因为chhōe无tio̍h，所以chiah用哭ê办法。

但是亚伯拉罕ê上帝是看顾伊ê子民ê上帝，上帝既然应允tī伊身上，他的确会引chhōa in突破绝境，化解in严重ê危机，听见上帝声音了后ê夏甲，就完全无仝，因为伊体验了上帝ê同在，是有希望，是起死回生，人生前途充满力量kap喜乐！

结论：
认bat人生ê一皮袋水，不时了解你人生所chah ê水，phah开心灵之眼，看出救恩ê泉源，kap人生皮袋ê水té hō͘伊满！Ài会记leh！亚伯拉罕ê上帝是引chhōa、看顾伊ê子民ê上帝！tī绝境去体会、领受恩典ê主！