《受恩蒙福的一生》

 | | | 转寄

人亏神补

作者 林宗要 2010.08.01

创世记13章14-18节

Khiā-tī人ê立场来思考，亚伯兰kap伊ê侄á罗得ê分开，选择in未来生活ê方向ê时，咱会看tio̍h，chit位序细罗得ê现实人性。伊无客气来用伊目chiu前ê判断kap选择做选择，hit时被形容做kah-ná上帝ê园kap埃及地ê约旦河边ê一片平原。

若用人ê立场来思考，人会认为罗得未来ê境况一定是充满非常美好ê远景kap无限量ê将来，因为伊所选ê是siōng适合伊生存ê环境，所以将来性看好！

反倒转来看伊ê阿叔亚伯兰，好--ê已经被罗得选去ah，伊kan-ta ē-tàng接受chhun--ê，he就是石头地，对畜牧是无啥帮助--ê， bē-sái算是好土地，kap罗得所选ê无仝，照人ê观点来看是不利人ê生存环境ê狗屎地。

但是人生ê成败因素，并无kan-ta限tī物质ê境况，iáu有伊其他因素ê影响，虽然物质条件对人生有淡薄á有关键性ê影响，若是单纯用物质ê观点来看chit段圣经，罗得必定是成功，亚伯兰ê生活一定是tī困苦中，但是人生ê成败m̄是kan-ta用物质状况来决定，尤其是信仰者ê人生状况，koh-khah ài体会tio̍h tī信仰状况中，建立kap上帝之间属灵ê关系。伊chiah是hō͘人tī上帝面前蒙福ê主因。咱ē-tàng tùi教会史中，发现tio̍h一件绝对ê真理，就是信仰ê环境往往是信仰蒙福（被上帝所喜乐）ê主因，所以一个信仰者对人生环境做选择ê时，必须ài注意chit种上帝喜乐ê因素，mā就是ài设法ē-tàng定定生活tī上帝所喜乐ê境况中，chit件事实，是信仰者承接神恩ê绝对因素！

咱ē-tàng tùi chit段圣经来看信仰者ê人生实况，若用人ê立场看罗得ê时，伊所选择ê对伊ê日后ê人生有正面ê帮助，因为生存条件优越，ē-sái讲是伊疏忽了信仰者ê信仰境况，因为伊ê现实是tòa-tī极pháiⁿ koh得罪上帝ê所多玛城，chit种环境对伊ê属灵性命是有负面ê影响。

反tńg来看亚伯兰ê状况，伊取得ê土地是不利伊生存ê所在，但是伊soah tòa-tī上帝所应允ê所在，对信仰者来讲，以上帝为优先、信仰优先ê生活方式，是上帝所喜乐ê决定性事实，因为tī伊ê人生生活中，永远有上帝ê带领kap顾守，这是信仰者ài确立ê生活方式。

因为人ê如意算盘有时会变卦，人认为妥当良好--ê，结果却是倒反。有时，人认为不幸、危机--ê，颠倒有美好ê结局。比如跋一倒，捡tio̍h一只金鸡母仝款，tī现实ê状况中，有人认为稳成功ê tāi-chì却发生变故。人所看做困苦ê tāi-chì，颠倒带来荣光ê结局！

罗得kap亚伯兰ê chit件事实，加减有说明chit种状况，罗得kan-ta用人ê立场去面对伊ê状况，kan-ta重视对伊ê游牧生活有益ê一片肥沃ê平原kap丰盛ê水源，soah疏忽了ē-tàng引chhōa人到成功ê基本要件 ＿信仰ê实在，因为tī信仰内底，信仰ê主宰耶和华是创造主，伊是会hō͘无变有ê上帝！

亚伯兰虽然hit块肥沃ê平原已经被伊ê侄á所选，一向主张bē-tàng相争ê伊只好选择另外一片地，就是迦南地。虽然，hit时伊所选ê所在不如罗得ê所在，是无适合伊hit时生存ê境况，m̄-koh伊真重视上帝所应允--ê，iah就是信仰ê环境，伊确信上帝kap伊立约ê事实，chit种tùi信仰所带来ê人生ê祝福，有时无明显ê现况，但是tùi信仰ê实在，一定有美好ê结局，chit种事实，m̄是用人ê观点或者人ê理智所ē-tàng了解--ê，只有用信心去面对ê时，信仰者chiah ē-tàng体会tio̍h chit种看bē-tio̍h ê信心所带来ê上帝美好ê应允。咱ē-tàng tùi咱教会生活中去体会chit种tī信仰ê世界所发生ê上帝ê应允tī他所疼ê人ê中间，mā就是咱ê教会一直teh强调基督徒必须把握信仰生活，来体会上帝无限ê应允。基督徒ài深信tī人ê计画kap安排ê背后有上帝ê成全，人生ê状况m̄是tùi人ê如意计画kap策略tio̍h ē-tàng每项成功--ê，因为上帝赐福ê人！chit种事实，m̄-nā tī教会史上ē-sái看见［亚伯兰、约伯、初代教会］，tī人类史上mā ē-tàng看tio̍h［比如第二次大战，当时ê日本kap德国计画无几年全世界就是in ê］，hō͘咱koh一pái体会tio̍h「谋事在人，成事由天」。

Tùi chit段圣经咱来思考下面几点：

（一） 人亏神补ê发生过程→ 纷争
头前咱已经提出发生分开ê主因在tī in现实ê状况，因为in现实ê环境无法度满足in两大家庭ê实际需要，所以in必须ài分开，chit款事实是人生过程中必然ê事件。

有风度ê亚伯兰提出hō͘伊ê侄á罗得选择条件，虽然照人ê观点看起来，现实上伊比较khah食亏，原因是适合in ê生活环境ê美好条件，lóng hō͘伊hit-ê无客气 ê侄á罗得先选去，伊已经开嘴，当然bē-sái有后悔ê心态。

所以伊必须tòa-tī人看起来是抛荒地ê所在建立伊ê人生生活，但是chit-ê所在是伊kap上帝之间所立约--ê，是上帝所应允流奶kap蜜ê所在，虽然hit时看起来是抛荒地，但是伊soah确信这是上帝beh赏赐伊ê后代美好ê迦南地，因为伊对上帝ê信仰是绝对--ê，所以伊唯一ê重点就是确立好伊kap上帝之间ê属灵关系，讲到其他ê tāi-chì，伊根本无teh注意，因为伊相信上帝bē辜负人，他beh赐福koh再赐福hō͘只要是尽心尽意疼他守他诫命ê人！因为伊有chit种信心，虽然处tī 抛荒地，但是确信会出奶kap蜜ê肥沃之地。Chiah-ê lóng是因为纷争所引起--ê，tī基督徒人生中，难免mā会有chit种问题发生，信仰者必须tī tāi-chì中将所有ê问题引chhōa到以信仰为主体ê生活状况ê时，就会像亚伯兰当时ê状况→ 抛荒地变做流奶kap蜜ê迦南地，或者是雅各ê经验，苦境变做圣路，chit种信仰生活ê体验是属灵ê siōng koân状况，基督徒若ē-tàng建立chit种生活状况ê时，伊ê属灵ê性命是非常ê伟大。

（二） 分离ê教示
人生tī所有ê事件中，lóng tio̍h ài设法去体会正面价值，对人生生存有利ê内容，咱看chit段圣经对当时ê亚伯兰、罗得来看是悲哀ê 事件，因为tī-chia有因为相争所引起ê分离，但是咱ē-tang3tui3 chit-ê tāi-chì来体会tio̍h几项宝贵ê人生真理：

A) 吞忍m̄是食亏
Tī chit件tāi-chì中，咱ē-sái看tio̍h亚伯兰有表现出信仰者ê良好风度，吞忍kap 让步，因为tī双方发生争端ê时，若互相坚持家己ê意见，往往是无法度化解问题，颠倒增加问题ê严重性，既然有相争发生，就是teh争自身ê利益权限，tī人生纷争中，实在真pháiⁿ决定是siáng ê绝对性，而且，人又koh是自私ê存在，一直为tio̍h家己ê利益设想，khah bē晓khiā-tī别人ê立场思考tāi-chì，这就是人kap人之间ê问题性→ 争端。Tī-chia咱看见亚兰ê伟大品格「你我bē-tàng相争…你倒pêng我正pêng，你正pêng我倒pêng。」伊ê风度kap吞忍ê性格tī-chia完全表现出--来，tī-chia咱ē-sái体会tio̍h信仰之父伟大ê信仰kap品德，伊ê完全吞忍，但是伊soah无食亏，中国俗语讲「有人一亏，天有一补」。台湾俗语讲「Hō͘人骗khah好困，骗人者bōe食bōe困。」只有良心不安。

B) Lín各人bē-sái kan-ta顾家己ê tāi-chì，也tio̍h顾别人ê tāi-chì（腓立比二：4）
这是针对自私ê人性所提出ê一句忠告，通常ê人生，只khiā-tī家己利益ê立场思考tāi-chì，chit种结果往往是造成人生问题ê原因，因为伊ê对手mā是自私ê人，m̄-koh咱看tio̍h亚伯兰tī-chia所表现--ê，to̍h是保罗向腓立比教会所讲--ê，伊劝人bē-tàng成做自私ê人性，伊教导人ê完全，在tī 多多替别人想，这是建立理想ê人生、社会所bē-tàng欠缺ê因素，今á日咱一直teh责备台湾社会状况ê恶劣，主因tī-chia，就是人太自私，kan-ta想tio̍h家己ê利益，无想tio̍h别人ê立场。「日头赤焰焰，随人顾性命」、「别人ê kiáⁿ死bōe了」。Chit二句台语完全反映台湾ê人心，chit种自私ê生活方式，就是造成社会ê混乱kap罪恶ê主因。咱看亚伯兰所表现是健全ê人生态度，伊先顾虑tio̍h别人，伊无用私人ê立场处理tāi-chì，这就是伊蒙恩ê主因。Tī人间，咱看hiah-ê受上帝祝福ê人，in ê生活lóng是褪去自私ê外表ê人！

C) 重视生活环境
咱tùi chit段圣经来省思咱ê现实生活，这是人生现象中ê必然ê事件，无论是m̄是有纷争或者是问题ê发生。人到一个阶段ê时，必须ài分离，「人生无不散ê筵席」。虽然tī世上人ê分离有时是暂时性--ê，出外，学业，事业，chiah--ê lóng是暂时性ê，但是，咱所需要ê人生生活是啥物？通常人lóng真重视婚姻，学业，就业，lóng期待有良好ê状况，因为伊kap人生有切实ê关系。孟母三迁teh说明伊对人性ê影响。基督徒必须省思，你信仰ê环境如何？是m̄是重视伊？你本身如何经营信仰？你家庭ê信仰气氛如何，你ê kiáⁿ儿ê心灵状态是án怎，咱ē-sái用罗得ê状况来反省。

D) 财富m̄是绝对--ê
财富对人ê生活确实有正面ê作用kap价值，伊能替人生完成真chē有价值ê tāi-chì，但是伊的确m̄是万能，或者有钱使鬼会挨磨，人必须清楚财富若处理无妥当，mā会带hō͘人生真大ê灾难kap悲哀。咱看人生中所有ê腐化以及堕落、犯罪ê行为，jōa-chē lóng kap财富有关，咱ē-tàng tùi现实ê生活状况去思考，当时ê罗得kan-ta用充实伊ê现实做伊ê选择人生ê 重点，所以伊选khah有财富ê所多玛城附近ê平原，tī人生现象中有真chē 不法无道德lóng kap伊有关联，因此tī处理上ài非常慎重，咱无否定伊ê价值，但是必须好好利用伊，bē-tàng因为伊变成犯罪ê工具，因为人生tī财富以外iáu有koh-khah重要ê tāi-chì，若运用无妥当，伊就成做你人生犯罪ê工具而已！

（三）信仰所带来ê祝福（人亏神补）

咱已经大约论述chit件tāi-chì发生ê时，两人ê表现kap in ê心态，tī-chia咱koh来思考亚伯兰对处理chit-chān tāi-chì 正确ê态度，he是tùi信心所产生出来ê行为，伊通常lóng会表现出hō͘上帝喜乐ê结果。

所以对信仰者来讲，无论伊所面对ê状况对自身ê利益如何，因为信心，伊就会真坦然去做，ná亲像亚伯兰当时处理双方奴仆ê纷争仝款，chit种因为信心ê行为，有时看起来无一定有利，颠倒是食亏，［ná亲像亚伯兰好ê平原lóng hō͘罗得选去，伊所ē-tàng有ê就是hiah-ê 抛荒地］m̄-koh伊soah用信心面对人生ê一切，因此有hō͘人感觉意外ê人生结局，就是活tī hiah-ê人看做抛荒地ê状况中，soah得tio̍h上主无限［超出人所想--ê］ê祝福。

当然信仰者ê心态m̄是得tio̍h上帝祝福ê心态chiah去行动（m̄是存心kan-ta想beh上帝ê祝福），he是无条件顺服上帝ê旨意ê生活，chit种信仰生活往往是神开天窗赐福hō͘他所疼ê人ê条件。咱看圣经中ê亚伯兰：

A) Siōng完美ê一句话（创十三：8-9）
「你我bē-tàng相争，你我ê奴仆mā bē-tàng相争，因为咱是骨肉，每chit-ê所在kám-m̄是lóng tī你面前mah，你ē-tàng选择。」伊是序大，有án-ne宽大正确ê处世原则，公正无私ê心胸kap心胸开阔而且充满疼心ê品格，tī chit句话中ē-tàng看tio̍h。台语中有一句话「有量chiah有福」，尤其是kap当teh食亏ê人所讲ê话，确实是án-ne，这是人生ê原则，只要人有chit-ê心，伊ê人生必定有良好ê结局，thang tùi现实ê状况来证实。

B) 放弃长者ê特权
亚伯兰对chit件 tāi-chì ê态度，tī伊所提出ê条件，咱已经ē-tàng充分了解伊ê人格kap信仰，chit种无私公正充满疼心ê操守，就是形成伊所以hō͘上帝悦纳ê决定性事实，mā就是伊tī真chē困境中，有上帝丰盛ê祝福，就是tī伊伟大ê品德kap绝对ê信心，另外，咱tī-chia mā ē-tàng看出伊ê谦卑，tī古早时代长者ê权威是无限--ê，过去四五十年前ê台湾社会ê「序大」或者父权，（siōng代表性ê一句话「lín父」］”，「序大」定定用薰吹叩hit-kóa m̄听话ê人，亚伯兰有chit-ê权威，但是伊soah放弃，表示伊ê做人略略á有亲切感，一个有亲切感ê长者，bē chhìn-chhái去运用伊ê权限，这是事实！疼心kap谦卑ê心态，就是形成ê原因。

C) 重视爱上帝ê生活
这mā是亚伯兰tī hit种状况之下，受上帝大大祝福ê原因，因为伊事事以上帝为主，为中心，无论到任何所在，lóng会替耶和华起一座坛，就是建立伊kap上帝之间ê敬拜ê关系［礼拜ê生活］chit-ê事实，是值得今á日信徒学习ê，咱定定处tī像伊ê状况中，通常是先处理家己现实生活ê问题，khah无像伊chit种以上帝为先ê生活表现，实例：基督徒若换khang-khè，一定先去chhōe教会，然后投入教会生活，后来相当受祝福，上帝疼gōng人！

结论：
确立你正确ê人生观，学习亚伯拉罕ê品德kap信仰ê风度，努力完成tī任何人生过程中，就会领受主悦纳ê生活。