《受恩蒙福的一生》

 | | | 转寄

堕落ê前兆

作者 林宗要 2010.07.25

创世纪十三章1-13节

圣经ê排列用创世纪开始，用启示录结束。你是m̄是bat思考过，为何会有án-ne ê编排？tng-tong你用心去kā伊思考ê时，你就发现tī-chia有上帝非常清楚、完美ê安排kap计画。

咱知影创世纪是用上帝创造宇宙做开始，然后说明人性ê根本问题，chiah用以色列人为代表人选；启示录是以世界ê最后会产生ê各种现象为主体，来强调荣光胜利ê基督beh分配、审判世界ê事实。虽然，属tī基督ê教会tī现实ê地上会受tio̍h真chē迫害kap 无理想ê现象。若是照人ê看法，kah-ná是恶者、kap上帝做对ê人权是胜利者，他ê教会一直teh hông迫害中。但是启示录soah teh kā咱讲，tī最后ê时他会用他ê权柄来消灭kap教会做对ê恶势力，来建立属tī他ê理想王国、接纳对他忠心ê子民，同齐kap他分享属灵王国ê喜乐。

Tī启示录内描写每一项重大tāi-chì ê发生chìn前必定有一个兆头，mā ē-sái 讲前兆，tùi án-ne通过chit-ê前兆来表示有重大ê tāi-chì teh-beh发生。比如启示录第八章beh拍开七个封印ê时，「羔羊phah开第七个印ê时chūn，天顶恬恬无声，大概半点钟。」（八：1）。以前ê世界是混乱，吵闹、扰乱ê，chit-má soah有半点钟hiah-ni̍h久，tī绝对ê恬静中，chit-ê恬恬半点钟久，是beh拍开七个封印ê前兆。咱koh看启示录十九章，当恶势力beh永远被消灭chìn前，有hiah-ê chìn前被迫害窘逐ê一大tīn基督徒将一切ê光荣归hō͘全能永远ê主（十九：1-10），然后chiah完全消灭hiah-ê迫害教会攻击基督ê名ê撒旦ê势力，虽然交战猛烈，结局是基督ê胜利。

若用咱生活ê经验，咱mā ē-sái体会，tī大自然中ê事物会有一kóa前兆，譬如风台、地震，照学者研究有一kóa动植物会表现出chiah-ê tāi-chì teh-beh发生ê一kóa动作，相信tī咱人生生活中，mā会有chit种前兆teh kā 你讲你ê人生或者是身躯中，有啥物问题ê发生。保罗tī使徒行传廿七章有一个经验，当时276人仝坐一只船，多数人以一chūn微微á ê南风吹来感觉欢喜，但是保罗soah认为he是一chūn惊人ê风beh来chìn前ê前兆，虽然保罗bat建议，但是无被采纳，chiah会发生真惊人ê危机kap损失（船沉落、货无去）。

Tī咱人ê人生现象中，咱mā会有chit种感受，tī重大ê tāi-chì beh发生ê时，通常lóng有一kóa前兆teh kā你讲，真通俗ê是目睭皮会眺（这虽然是生理现象）但是有人真巧合有tāi-chì来发生。或者是母囝连心ê情形，有时老母亦会体验tio̍h无tī身边ê囝儿会发生ê前兆，（虽然是半信半疑）。

确实，咱若详细来思考咱人生状况ê时，无论信仰方面或者是日常生活方面，tī每一件重大tāi-chì，lóng有一kóa前兆，尤其是人身躯上ê问题，lóng有前兆teh提醒你，你ê身躯某一方面有一kóa欠缺，你tio̍h-ài赶紧去处理，比如：胃疼、高血压、心脏病、血尿、感冒chìn前ê前兆等等，lóng teh kā 你讲身躯ê某一kóa功能有问题，及时ê把握，to̍h ē-tàng化解危机，时间一过就成做惊人ê危机，甚至影响身躯ê健康，甚至性命。

所以，tī现实ê人生境况中，对前兆ê适应（观察、判断、理解），对人生ê现实必定有正面ê存在，因为若ē-tàng体会伊ê事实，你就ē-tàng用适当ê办法去面对你ê人生危机或者是问题，有准备ê人生，chiah-ê问题tio̍h好处理。

因为人生lóng teh追求成功，但无可能ta̍k项tāi-chì lóng会hō͘你成功（人生难免有不如意），颠倒是不如意，失败ê tāi-chì占多数，因为án-ne人tio̍h有责任去减少失败ê成份tī你ê人生现象中，伊若减少，自然成功ê成份就会增加。

基督徒tī属灵ê路上koh-khah ài体会会hō͘基督徒灵命堕落ê真chē前兆，án-ne chiah ē-tàng坚持信仰ê绝对性，当一个基督徒tī教会生活中有一kóa现象出现ê时tio̍h需要 khah注意。无关心、对参加教会ê兴趣减少、惯习m̄做礼拜、主日有tāi-chì ài去处理、无欢喜读经、祈祷、灵修，chiah-ê lóng是信仰生活开始怠慢ê前兆。主耶稣告诫学生：「Ài有智慧如蛇」。Chit种koân度ê警觉力需要观察、辨别ê能力ài强，然后chiah有真正行动ê准则，to̍h是生活ē-tàng有khah美好ê结果。

（一） 相争→问题ê启端
Chit段圣经所记载是值得基督徒tī属灵ê路上来深深思考--ê，罗得kap长辈亚伯拉罕同受召，ùi吾珥城出来beh到上帝所应允ê迦南地，伊自细汉tòe chit位有淡薄á有信仰ê阿叔，kap伊同齐生活，照理伊应该真清楚伊ê阿叔ê信仰状态以及上帝对受选者所应该有ê期待，ài tī伊ê受选ê境况中成做符合上帝ê需求，这是上帝对选民ê期待，因此选民应该有儆醒tī建立kap上帝之间ê良好关系。必须ài有属灵ê智慧来辨别现实ê属灵ê状况来便利tī伊ê kap上帝ê正常关系。Ē-sái讲是咱看tio̍h伊kap亚伯拉罕有美好ê信仰表现，伊却表现出暧昧kap矛盾ê信仰性格，tī圣经中常常引用伊是bōe专心koh双脚踏双船ê人物，chit种性格已经失却了信仰ê本质，咱知信仰要求信仰者ê iáu是绝对ê忠实，bē-tàng有二样心，tú亲像上帝所讲「我以外你bē-tàng有别ê上帝」chia所讲ê上帝的确m̄是指神明上ê上帝，mā包含任何tī你心中会取代上帝地位ê物质ê事件。咱若去看圣经，咱就知罗得ê信仰khah有妥协性，妥协ê信仰就会失去信仰ê真义，因为tī绝对ê信仰ê世界是无容允有妥协ê存在，今咱看chit位常常kap信仰ê人格者同齐生活ê罗得，为何会有chiah-ê负面ê信仰生活ê种种表现。

至少，tī创世纪十三章chit段圣经中，咱ē-tàng看出问题。Tī-chia事先发生问题ê就是「相争」（争端或者争吵），这就是堕落ê前兆，tio̍h亲像头前所讲，tī ta̍k项事件chìn前lóng会有一kóa前兆teh kā 咱讲有tāi-chì teh-beh发生，因为争端原是表示人ê心中无爱心，「怨恨引起争端」（箴言十：12），「食一块饼换来ê心安理得，赢过为tio̍h kui桌酒肉相争吵」。这是teh说明人心中若无爱心ê存在，就会相争，咱看咱ê实际状况，tī社会中，真chē亲人，为tio̍h相争祖产soah发生真chē惊人ê问题，以前ê分家伙定定hō͘兄弟á互相杀害。

Chit段圣经kā咱讲hō͘咱知影罗得kap亚伯拉罕ê奴仆ê相争，虽然无记明内容，但是相信这是kap in ê生存有利害关系ê事所引起--ê，到底是非如何判断，实在是一件淡薄á艰难ê tāi-chì，但是有一件事实，就是主人ê人格表现tī奴仆身上，咱ē-tàng ùi做长辈ê亚伯拉罕ê发言看出伊是一位信仰ê人格者，伊用爱kap亲情来化解奴仆之间所引起ê危机。Tī chit件tāi-chì顶面，咱ē-tàng看出罗得无责任ê态度。相信双方ê相争，罗得必须负应该有ê责任，但是伊tī事件上soah无chit种愿意负责任ê心态，chit种无意识ê心态是teh证明伊ê人生当teh行入堕落ê路，相争表示无法度有共同生活ê可能，伊ê状况就是teh失去kap一位信仰ê人格者共同生活ê可能，这m̄-tio̍h是teh说明人beh堕落ê前兆mah？

基督徒生活堕落ê起始kap这相仝，无疼心、无情、失去共同生活ê意义。

（二） 贪欲ê心性
既然争端已经发生，亚伯兰先提出解决ê办法并向罗得说明互相之间ê亲情：「咱是至亲，bē-tàng冤家。」（十三：8）这是正确ê人生态度，既然无法度共同生活自然就是分开，bē-tàng一直用传统ê共同生活去维持现状，是无利益ê，早时ê家庭状况，父母m̄甘kiáⁿ儿分开，chiah维持无向心力ê共同体，每一个份子lóng艰苦心！亚伯兰建议，m̄管正pîng抑是倒pêng hō͘伊来选择，「罗得giâ头看约旦河hit-pêng ê平原lóng真肥沃koh润泽，tī耶和华beh灭掉所多玛chìn前，亲像耶和华ê园á，mā像埃及ê地。」（创世纪十三：10），这是构成满足罗得选择ê地ê肥地以及适合伊生存ê条件，无论耕作或者是牧羊lóng真适合，耶和华ê园á kap埃及之地是hit时形容siōng美好ê所在！

罗得无客气tio̍h选择chit-ê所在作为伊kap亚伯兰化解争端ê原因，伊用伊ê眼光来选择有利伊ê人生生存ê条件，罗得chit-ê动作本身是teh表现出伊ê心态，贪心ê人是自私--ê kan-nā顾家己ê利益，无想讲chit位长者已经年老，只要对家己有利ê境况就争取，m̄管别人如何，这是贪心ê人ê本性！因此chit-ê人ê心思若被chit种贪欲ê心所控制ê时，当teh说明hit-ê人已经渐渐á接近堕落！

罗得用伊ê眼光来选择伊认为有利ê生存境况ê时，完全被chit种贪欲ê心所充满ah！

保罗向提摩太讲：「贪财是万恶ê根源，有一kóa人因为贪慕钱财chiah离开了信仰ê道路，食真济苦，心灵破碎。」（提前六：10），咱若看圣经或者以现实ê状况来思考ê时，旧约中ê夏娃、亚当、大卫（目、财、色）lóng是tùi贪先开始，然后犯了chiok惊人ê罪，贪欲ê心性，kan-ta图谋家己ê安稳以及目前ê享乐，khah无想tio̍h会引起ê后果，贪图家己ê利益kap享受是伊ê特色。

（三） 选择
夏娃听蛇ê巧语是先以目chiu看，「hit-ê cha-bó͘人看见hit丛树á ê果子好看、好食。」（创世纪三：6），然后就伸手去挽，chiah带hō͘人类chiok惊人ê罪，是先ùi目看ê原因，然后chiah有动作。

罗得因为先用目chiu看约旦河边ê一片肥ê土地，chiah选择了hit片平原，当做伊日后生存ê场所，人生是选择！因为tī咱ê现实生活中，有真chē ê分歧点tī每一个人生chìn前！人不断来khiā-tī叉路上，人生必须做正确ê选择，因为伊决定人生kui-ê运命！tī选择chìn前，人生必须ài先有判断，因为只有建立判断ê人chiah有所选择。Tī判断chìn前，人必须ài有真chē培养判断ê筹备khang-khè，tī chiah-ê价值判断chìn前ê时，有真chē价值观念ê建立，是人生成败ê主因。因为通常面对选择ê时，通常是家己承担，虽然有亲人、朋友，但是in只ē-tàng khiā-tī参考ê立场。主要ê犹原是当事人本身ài有独当一面ê能力，通常tī面对人生ê选择中，是处tī成败ê关键时刻，因为tī你人生面前ê双叉路，无一定lóng是美好ê路，或者有死路、绝望之路，teh选择ê时，人生需要有敏锐ê观察力以及真正确ê价值判断，chiah ē-tàng帮助你ê人生选择有正面价值ê人生道路来化解真chē人生危机。

咱看罗得ê选择，伊kan-ta khiā-tī物质现实ê利益立场，伊无思考伊ê身份以及kap上帝ê关系，伊ê选择是1)家己本位；2) 只贪图物质kap现实ê生活：3)疏忽属灵ê信仰条件，这是堕落ê前兆。

（四） 迁徙到所多玛khiā起（徙伊ê布棚到所多玛）
罗得kan-ta顾虑tio̍h目chiu前ê事实，伊无想tio̍h「所多玛人chiok pháiⁿ，大大得失tio̍h耶和华」（十三：3），因为chit种恶劣ê环境对人生生活是有负面ê实在，为何现代人一直teh反对in不利ê生活环境ê设施？主因tī chiah-ê状况会对in ê生活（kiáⁿ孙）有不良ê影响，（抗议六轻、核厂、粪埽场等等），罗得kan-ta贪图目前ê问题soah疏忽hiah-ê要紧ê实在，咱若看chit段圣经咱就会明白，人ê堕落是渐渐形成--ê，m̄是一开始就跳入堕落ê坑。

咱看罗得ê状况先ùi 1) 奴仆in ê相争开始；2) 亚伯兰提出问题了后；3) 伊ê贪心hō͘伊无尊重序大；4)选择（照理伊应该hō͘亚伯兰先选择），chit种结果就是造成伊tòa-tī所多玛ê事实，是一步步ta̍uh-ta̍uh-á来--ê。这是beh hō͘基督徒堕落ê设计者（主谋者）撒旦ê一贯作风，伊hō͘基督徒堕落是用渐进ê方式。有一个故事讲，基督徒妇人梦中拾tio̍h无数ê钱银财宝，先ùi细开始chiah到大，大到无法度容纳chiah发怨言，听见主叫伊看头前，chiah知是魔鬼tī面前故意khǹg珠宝hō͘伊拾。

咱ē-tàng tùi罗得chit种现实状况来体会tio̍h，tī基督徒属灵ê路途上，一kóa值得咱思考ê问题，相信咱ta̍k人lóng期待咱属灵ê道路是tī美好ê境况中。

罗得ê作为值得咱警醒，因为伊重要ê心灵ê境况。被现实ê利益遮tiâu。

因此咱必须记tiâu耶稣所讲ê「lín ài谨慎自守，闪避ta̍k样ê贪婪，因为一个人无论án怎富裕，伊ê真正性命伊有jōa-chē财产无关系。”（路加十二：15），人ê活，物质条件真要紧，但是若为tio̍h伊来损失属灵ê性命ê时，tio̍h亲像耶稣所讲「人若thàn得全世界，赔上家己ê性命有甚么好处neh？」，真chē人为家己ê理想，放弃hō͘人看做可惜ê khang-khè kap待遇！

结论：
基督徒ài认bat清楚咱生活ê性格－肉体现实、心灵永远，同时tī现实中ài看透你生活中ê一切，chiah善用主所hō͘你ê智慧来发挥你人生ê内容，克服你ê人生危机！