《受恩蒙福的一生》

 | | | 转寄

得胜ê人生

作者 林宗要 2011.02.20

约翰一书五：1-12

工商业ê发达，hiah-ê人汲汲营营teh追求功利，因此「成功」成做现代人所烧热烈追求ê目标。近几年来有关chit种「成功」ê书籍不断地出版，这显示现代人心中ê「价值观」，mā显明人性ê真实面。因为好胜是人ê天性，所以tī人生中，咱tiāⁿ-tiāⁿ会发生好强夸耀ê情形，证明了人类chit种「好胜癖」。虽然适度ê好胜心，对人生有所帮助，但是过份ê时就会失态，甚至产生人格ê问题。Tī咱ê社会上tiāⁿ-tiāⁿ有一kóa「假仙」kap「澎风龟」to̍h是chit种过份ê夸口心所致ê结果。胜利ê喜乐，每一个人lóng经验过。Tī春秋时代，秦武王是出名ê大力士，tī伊身边有两个勇士真受伊ê宠恿——任鄙kap孟贲。有一pái孟贲看见两只牛相斗难分难解，伊一手chhi̍h一只ê角，另gōa一只iáu想beh斗，伊受气只kā伊掠起来，正手大力kā牛角挽掉，牛死。有一工王带二人来到周都，看见九鼎，武王讲：「kám有人ē-tàng kā伊举起来？」众人lóng知武王好胜，因此lóng讲言bōe-sái，任鄙提议讲，孟贲真gâu举重，举起来koh行，武王mā举起来行了几步（beh夸示伊ê气力真大）但是soah因为力不足鼎chiah lak落来压tī脚顶koân，将脚指头ê骨头teh断，流血siuⁿ chē soah死去。Chit-ê故事teh说明人ê好强、好胜ê心理，有时过份要求，颠倒会造成人生ê不幸。

有时咱teh信仰ê世界mā会发生chit种事实。教派之间ê互相评论to̍h是一例。自认是属灵ê人往往会真无客气批评伊感觉无gōa好ê教派。长老教会是siōng chiap hō͘人攻击ê目标。

真chē自认为是属灵派ê人往往批评其他ê教派是无灵性。相信tī咱ê信仰生活中，咱tiāⁿ-tiāⁿ会有chit种经验，有人嫌咱ê教会无够属灵chiah离开去其他教会。Chit-ê时阵基督徒必须反省一项事实－啥物是「圣灵内涵」？Kám讲是hiah-ê外表跳舞唱歌祈祷大声喊「哈利路亚」「阿们」ê人？并m̄是án-ne，属灵ê基督徒必须ài teh生活、家庭、职业上有美好ê见证chiah会受tio̍h尊崇。虽然咱bōe晓跳灵舞，咱祈祷ê时bōe大声hoah，但是只要咱ē-tàng teh生活上、家庭中、职业上受人肯定ē-tàng荣耀上帝，我相信chit种有见证ê生活会比跳灵舞koh-khah讨上帝喜乐。这是信仰ê真理，若是，一个基督徒tī外表虽然有热情ê表现，比如祈祷大声hoah，但是伊ê生活若bōe-sái荣耀上帝，无好见证，试想，chit种人beh如何称伊做属灵ê基督徒？

因此基督徒必须ài建立一个共识，to̍h是经由生活ê见证来宣扬信仰。这是教会二千年来所强调kap要求基督徒信仰生活ê真正内容。

理所当然ê，面对tio̍h外教派ê批评，咱也tio̍h适度反省，当咱见tio̍h别ê教派ê信徒，对圣经真理ê了解若真透，传讲福音ê热情，以及完全ê投入教会事奉，咱chiah-ê hō͘人看做无够属灵ê基督徒，必须ài自我反省。宗教信仰虽然m̄是kan-ta有感情，咱iáu bē-tàng bē记热情ê信仰气氛，对信仰生活所造成ê正面作用。

尤其是tī教会生活中，咱体会tio̍h jú是热情ê信仰表现，jú ē-tàng有得胜ê信仰生活。Tī教会中表现美好ê事奉者通常lóng有一粒火热ê心。

咱评断别人ê成败，m̄是现在伊手中有啥物，是伊tī人生观是m̄是有正确。社会上，真chē好额子弟，有非常好ê人生条件（手头有丰盛ê人生资源），但是in因为无健全、偏差ê人生观来成做了尾á-kiáⁿ，反之有一kóa非常sàn-chhiah ê人，两手空空，soah ē-tàng建立理想、健全ê心态，因此经过几十年ê phah拚chiah有所成就。

因此我知影，人生态度是直接影响人生成功siōng根本ê因素，基督徒ê信仰生活koh-khah需要chit种正确ê心态，持有正确信仰价值观ê基督徒，teh信仰生活上，必定结美好ê果子。但是真chē有无健全信仰心态ê人，tī教会生活中ê表现往往成做教会ê负担。

无健全、偏差ê心态是造成人生失败ê主因，teh信仰ê世界mā相仝，无正确ê人生态度bōe造就基督徒ê信仰，对教会mā bōe有好处，这自然是bōe荣耀上帝，下面几点是tī主内当建立ê正确人生观：

（一） 建立用信仰来赢过chit世界ê人生
约翰kā咱讲一个真理：上帝ê囝儿ē-tàng赢过世界，咱战胜世界是因为咱ê信（约翰一书五：4）。

所谓胜利ê人生，必须tī人生ê各方面，lóng有战胜一切ê表现，人生ê成就，是bōe-sái靠幸运来得tio̍h。爱迪生ê名言，「天才是99％ ê汗水kap phah拚chiah建立ê」咱看真chē世上伟大ê成功者，in ê人生旅程中lóng经历过一段奋斗phah拚ê苦境，chiah有骄傲ê成就。

因为teh创造ê起初，人反背上帝，上帝hō͘人类犯罪ê惩罚to̍h是：「所有ê土地因为你ê缘故受tio̍h咒忏，你tio̍h终身辛劳chiah ē-tàng生产够额ê粮食。你tio̍h汗流满面chiah食会饱，你tio̍h 做穑，一直到你死去，归tī尘土」（创世记三：17～19）tī chit段经文，咱thang看tio̍h人生ài phah拚ê必然背景，本来上帝所创造ê世界将人安置tī伊甸园内，但是chit种快乐ê生活soah hō͘罪所破坏，自人类犯罪以来，上帝就将犯罪ê人赶出乐园，自那时chūn开始，人to̍h ài透过流汗kap phah拚chiah ē-tàng生存。咱mā thang讲，人是活tī上帝ê受气中（因为犯罪chiah受tio̍h咒忏！）Chit种生活并m̄是上帝创造人ê本意。上帝将创造ê人安置tī伊甸园中，表示上帝赐hō͘人ê生活本是快乐ê，可惜罪hō͘人生变成失败ê人生，因此人必须恢复成上帝ê kiáⁿ儿ê身分chiah ē-tàng有胜利ê人生，chit种tùi罪ê释放m̄是óa靠人ê义，是tī上帝ê恩典，to̍h是基督耶稣十字架ê救赎，tùi基督宝血ê救赎，犯罪ê人chiah ē-tàng koh再恢复成做上帝ê囝儿，chit种成做上帝ê囝儿ê过程，to̍h是基督徒ê信仰生活，mā to̍h是约翰所讲ê tùi上帝所生ê人生。只有án-ne，人chiah ē-tàng赢过世界。因为经过人ê信仰，chiah ē-tàng接触tio̍h上帝ê大能kap福音ê表徵－基督耶稣，因此基督ê灵自然会赐予听他真理ê人身上。Chit种受圣灵感动ê人生，自然是胜利ê人生， mā to̍h是保罗所讲tī伊ê人生中会结圣灵果子ê人生，自然胜利是属chit种人ê，因基督ê灵所充满ê人生，自然ē-tàng用他ê灵运用tī人生ê过程中，tī真chē人生ê选择有良好ê指引，因为圣灵ê角色正式指引属基督耶稣ê信仰者行teh符合伊ê真理ê路顶koân，chit种真理ê路，mā to̍h是人生成功ê路。

因为咱人生ê路时常有弯曲坎坷ê状况，若无特别ê力量做人生ê动力，真gâu跋到，m̄-koh当一个人有信仰ê时，tiāⁿ-tiāⁿ人生会产生奇妙ê变化，真chē信仰者teh生活中因为有奇妙ê变化chiah ē-tàng克服真chē逆境kap难题，人所看做无可能ê tāi-chì，tiāⁿ-tiāⁿ因信仰chiah解决。人生加上信仰，tiāⁿ-tiāⁿ有hō͘人料想bē-tio̍h ê结果。雅各tī旷野ê时ê经验（创世记廿八），当时伊ê内心是烦闷、不安、惊惶，但是teh信仰内底kap上帝连结了后，chit种对抛荒地ê惊惶kap不安soah变成伯特利（上帝ê厝），hō͘伊体验tio̍h上帝ê荣耀，tú亲像圣诗287首：「苦境变为圣路」，chit时ê人生to̍h是胜利ê人生，m̄管伊ê景况如何，lóng已经ē-tàng完全体验tio̍h得胜ê性命。

面对诱惑ê时，有信仰ê人tio̍h用信仰ê盾牌来防恶ê利诱，hō͘人生teh试探中得胜。信仰hō͘咱kap基督连结ê时就成做上帝ê囝儿！只有相信耶稣是上帝ê kiáⁿ儿ê人，chiah ē-tàng战胜世界。（约翰一书五：5）

诚然！相信者tī现实生活中，有siuⁿ-chē真pháiⁿ了解ê tāi-chì，若用信仰ê角度观察，咱就会了解保罗所讲「万事lóng互相效力，叫爱神ê人得好处」（罗马八：28）体会chit种人生to̍h是得胜ê人生。最后咱来思考死亡kap信仰，死亡会吞掉人生ê一切，化一切变做乌有，但是当人用信仰赢过死亡ê时，就变成复活kap永生，这kám-m̄是得胜人生？

（二） Tùi疼来完成ê人生
胜利ê人生，是beh tùi信仰来形成ê人生，因为人生真chē现实ê状况实在m̄是软弱无完全ê罪人ē-tàng应付--ê。人生ê tú-tio̍h逆境、心灵ê冲突、信心ê动摇等，chiah-ê问题有一kóa时chūn确实m̄是人所有法度负担ê，用人ê气力实在无办法面对，一定ai 3 tùi上帝hia来ê信仰力量来扶正、引chhōa处tī真chē问题中ê人生，行tī上帝所喜乐ê人生道路顶koân。

信仰（特别是基督教信仰）tiāⁿ-tiāⁿ kap「疼ê行为」有深切ê关系，有人用疼ê行为当做解释信仰ê siōng好工具，说明疼kap信仰ê实质关系。因信仰是抽象--ê，必须经过具体行动——疼，chiah ē-tàng证实信仰伟大ê内容kap价值，teh信仰ê世界，无疼ê信仰是bōe受肯定ê。雨果ê悲惨世界－ē-tàng改变hit位主角人生观ê，m̄是主教ê信仰，是伊疼ê完全表现。Ná亲像头前讲--ê信仰ē-tàng创造奇迹仝款，teh疼ê行为中mā有chit种伟大ê真理，有学者强调主耶稣ê神迹，to̍h是他完全ê疼ê表现。因为一切ê问题lóng会phah teh疼ê面前，中世纪ê法兰西斯tiāⁿ-tiāⁿ tī山野中kap毒蛇猛兽做伙，讲道hō͘ in听，因为伊有完全ê疼，因为疼会kā一切溶去，无论任何tāi-chì lóng会hō͘完全hō͘疼溶去，这是事实。以赛亚书十一章teh描写弥赛亚理想国ê时，gín-á tī毒蛇孔出入mā bōe受伤，因为tī其中充满tio̍h疼，疼会医治人生一切ê苦闷，化解人之间ê争端。箴言「怨恨会惹起争端，仁爱会遮盖真chē罪过」。Tī人世间所有ê斗争怨恨lóng是因为欠缺疼，chit种状况m̄是人所乐见ê。假使人一直活teh充满仇恨ê环境中，是bōe有理想ê日子--ê。比如过去ê东方kap西方ê对立，以及犹太人kap阿拉伯人ê仇恨，hō͘人ê生存建立tī不安kap仇恨中，chit种生活方式bōe-sái算是得胜ê人生！

因为咱欠缺疼，致使tī咱ê中间有猜疑、怨恨、自我中心，tī chit种境况中欠缺温和ê空气kap甜蜜ê气氛，所以「疼」to̍h是造成人生胜利ê主要因素，若无伊，人生就无法度得胜。

咱chiah-ê已经体验tio̍h上帝ê疼ê基督徒，必须ài tī人生中，传播koh-khah chē疼ê行为，kā che成做咱得胜ê人生基石，án-ne，咱ê人生必然得胜！

（三） 有永恒ê性命（约翰一书五：11～12）
最后咱来思考得胜ê人生，是有永远ê性命--ê。Tī chit段圣经中kā咱讲：基督耶稣ê性命是用水加上十字架顶ê血ê性命，虽然真chē人怀疑，但是上帝ê灵亲身见证chit项tāi-chì。因此，用这三者——水、血、灵ê见证来证明基督耶稣是上帝ê kiáⁿ儿。咱知影，证人通常lóng有决定性ê影响。（譬如案件真pháiⁿ有进展，若有一个证人，就简单解决阿！）tī人án-ne，koh-khah m̄免讲上帝亲身见证ê基督耶稣，这比任何人ê见证koh-khah确实、koh-khah有保障。因此对hiah-ê相信上帝见证（上帝ê kiáⁿ儿耶稣基督hō͘伊信他ê人有永恒ê性命）ê人，tī伊ê性命中，to̍h ē-tàng体会到永恒ê性命。比如约翰三：16「Hō͘信他ê人有永生」。上帝ê灵ê见证m̄是空有--ê，是有永生的证据。约翰tī-chia kā咱讲「上帝已经将永生hō͘咱，这永生是teh信他ê kiáⁿ儿，信他kiáⁿ儿就会有永生，m̄信上帝ê kiáⁿ儿ê人就无永生」这永远ê性命是人kap基督耶稣信仰相联结chiah有ê恩典，chit种因为恩典ê信仰chiah赐hō͘咱ê永远性命，是存tī基督耶稣内底。

Tī-chia咱thang知上帝所赐ê永生是确立teh满有恩典ê信仰，若无这信仰，m̄管人生是何等ê敬虔、人格有jōa-ni̍h-á高尚，人生jōa-ni̍h-á受人肯定，若拒绝上帝ê kiáⁿ儿，永远ê性命就无可能存tī伊ê人生中，若无上帝ê kiáⁿ儿耶稣基督，m̄管你得tio̍h全世界，但是你soah无永远ê性命，chit种人生是无价值ê，耶稣讲：「人若thàn得全世界soah kā家己ê性命赔起lih，有啥物好处？」咱koh-khah ē-tàng了解耶稣向伯大尼ê姊妹讲ê话：「复活tī我，性命mā tī我，信我ê人虽然死mā一定会复活。」（约翰十一：25）。

Khiā-tī基督教信仰ê立场，咱了解得胜ê人生是有永远性命ê人生，这是咱信仰phah拚ê方向。若失了咱ê信仰，一切lóng是白了工ê！

结论：人ê希望得胜、成功是事实，可惜teh属灵ê道路顶koân，人tiāⁿ-tiāⁿ无愿意phah拚追求。约翰kā咱讲三条ē-sái行ê路：1）用信仰来追求。 2）用疼ê行为来完成ê人生。3） 把握永远ê性命价值！