《受恩蒙福的一生》

 | | | 转寄

现代化kap理想ê老境

作者 林宗要 2011.02.27

箴言16：31；提多书2：1-3

老化是近代世界中有备受注意ê一个人生问题，因为追求长岁寿ê人ē-tàng讲是人ê本性，通常人lóng ǹg望伊ê人生有美好koh久长ê日子。古代社会提起三多：多财、多子、多寿。可见自有人生以来，人一直ǹg望长岁寿，因此mā有bē少祈求长岁寿或者不死丹ê事例。有一则故事：荷兰有一位名医哈佛博士，m̄-nā医术好，救人无数，而且岁寿真长。Teh-beh过往chìn前留落－无beh外传ê长岁寿秘方，藏tī封起来ê铁箱中。有一位英国好额人开掉伊ê家产，向chit位名医ê后代kā chit份长岁寿秘方买落来，带tńg来家乡kā厝内ê人lóng叫--来，用chiok期待ê心情phah开chit-kha铁箱，发现伊用大笔ê金钱买tio̍h ê只是一张纸，顶面写tio̍h两chōa字：「人若beh长岁寿，头ài冷，脚ài烧；食饭只食八分饱。」chit位大好额人用大笔金钱买来ê只是生活中ê智识而已，这两chōa字「头冷脚烧」，确实是一位健康ê人ê形象，尤其是食饭八分饱，koh-khah是历代名人所主张ê长岁寿秘诀。

虽然老化kap长岁寿是人生所关心ê问题，讲tio̍h人类性命ê年限，相信咱lóng了解古早时，人类平均岁寿是30左右，古罗马时代是30出，亚历山大大帝32岁死，凯撒大帝活到45岁；中古世纪乌死病kap ma-lá-lí-á hō͘人e̍岁寿mā tī 30出头左右，一直到工业革命了后，chiah突破40岁。美国自1900年间开始统计是49.2岁，1950年是70.2岁，2000年soah超过78岁。台湾ê情况mā相仝；根据今年9月份ê统计，65岁以上ê人有213万人，百岁以上ê人瑞有713人。主因是生活环境ê改善kap现代医疗ê进步，对岁寿ê延长有正面ê作用。

唐朝诗人韩愈（西元768-824）tī伊ê〈祭十二郎文〉中写tio̍h「我iáu有三ê阿兄lóng不幸早早来过身去，我岁数iáu末四十tio̍h看茫茫、发苍苍、齿牙摇动」，文中提起三位阿兄岁寿lóng无长，家己mā呈现老化ê现象，头毛白、嘴齿动摇，视力茫茫可能是白内障或者老花，虽然韩愈本身活到56岁，tī当时无算是早死，但是chiah-ê老化ê现象是人生ê过程，虽然因为个人遗传kap体质有一kóa无仝，但是面对老化chit-ê问题，hiah-ê人tiāⁿ-tiāⁿ想出所有ê办法想beh去解决或者延迟老化ê现象，老人本身确实必须ài认真去面对老化ê事实。美国南加州有一个特别ê国际组织，叫做「长青社（Hemlock Society）」，Hemlock是北美洲ê松科ê长青树，chit-ê团体是tùi多位诺贝尔奖得主发起--ê，主旨是推sak hō͘老化变慢ê活动，其中提出「疾病压缩论」，尽力hō͘人年老ê病ê痛苦愈短愈好，siōng好是the beh过身前一个礼拜，或者tī前一两工chiah破病，koh-khah好是无病痛ê自然变老过身，mā to̍h是咱社会所提起ê人生五福「考命终」。所以，如何实现人生teh老化ê过程有理想kap完美，确实是今á日老人生活ê一件大事。

虽然每一个有岁ê人，tī伊老年ê生活中，的确真期待理想ê老年期生活。但是实际生活上，人进入老化ê过程往往有各种无仝ê影响，比如细胞组织ê退化，mā to̍h是生理ê退化。因为老化所形成ê生理状况，致使老年人食ê方面无理想，koh-khah影响老年人ê身躯状况，是造成老年体弱多病ê主因为之一，疾病mā影响胃口，形成恶性循环。因此tùi头顶到脚底，差不多所有器官lóng会发生状况，视力、听力、嘴齿，慢性病比如高血压、糖尿病、心脏病、腰子病，甚至是帕金森氏症或者退化成植物人，必须完全依赖别人或者医疗设备维生。除了生理ê退化问题之外，老年ài面对ê iáu有家庭问题、经济问题、文化问题等，chiah-ê问题lóng会影响老年生活。相信chiah-ê每一个人lóng必须去面对ê人生现实，因为老年mā是人生ê一个ê时期，ná亲像少年、壮年仝款是人生ê一个过程。既然是人生过程，必须用平常心态去面对伊，同时ài准备迎接老化ê过程。因为明知老化ê必然，若有先准备就khah ē-tàng适应，生活适应好就ē-tàng khah顺利，mā to̍h是teh老化ê过程中有khah美好ê理想状况，体验人生比如倒食甘蔗，愈食愈甜。

Tùi心理上，咱mài kā老化看做是一种老，伊是成熟。古早诗人杜甫ê诗句「人生七十古来稀」，chit句诗tī现代人需要重新评估，目前台湾70岁以上ê人身心状况lóng iáu相当理想，真chē lóng ē-tàng完全自理生活，这是可喜ê现象。因为现代ê老人bōe-sái有古早时ê老人观念，古早老人一切生活lóng tùi序细服侍，现在chit种生活方式已经无可能，确实有mài-koh tī以前ê时代。所以今á日ê主题咱beh来思考（一）现代化kap人生（二）现代化对老年kap人生ê影响（三）理想ê老境。

（一） 现代化kap人生
现代化是英国伊丽莎白时代所产生ê语词，表示当时ê生活比过去ê生活好真chē，各方面lóng真进步。台湾社会tī 50年前kap chit-má，mā是完全无仝ê社会状况。因为人生kap时间kap空间有密切ê关系，ē-tàng讲人是活tī时间kap空间ê中间，chit种ê时空ê变迁tī近年代是非常快速--ê，相信40、50 gōa岁ê人lóng ē-tàng tùi观察中感受tio̍h，若用回顾过去kap现在ê社会动态，会发觉tio̍h时间kap空间ê变迁，其实非常激烈，因此有人称做「急变ê现代」。但是现代化有toh一kóa特性neh？

（1）Speed速度：速度是现代化ê特徵，生活上ê实例，ē-tàng讲50、60岁ê人lóng经验过gín-á时社会动态ê清幽，kap现在社会ê紧张是非常明显ê区别。我回忆儿童时代庄内面脚踏车iáu m̄是真普遍，归庄mā只有一位姓许ê先生有一台50cc ê o-to-bái，当时有o-to-bái是真轰动ê tāi-chì。Hit时公车ê速度mā bōe紧，我bat jiok tī公车后面走了两三百米，车到站，我mā到阿。Hit时kap现代ê分秒必争完全无仝，过去社会是安然、和气kap真慢ê步调。现在大都市内，无论是tī街路行ê人、病院ê医生，四界lóng像用走--ê仝款，快步行，因为hiah-ê人lóng感觉时间无够用！以前有一部片叫做环游世界80工，是想beh显示现代交通ê速度，chit-má无需要80工阿。Chit-má飞龙机比汽车火车koh-khah紧，hiah-ê人甚至ē-tàng坐火箭起lih月球，速度是现代化ê重要特色。

（2）Change变化：mā是现代化ê特徵。若详细观察现在ê人生社会、文化背景、价值心态，咱lóng ē-tàng体会tio̍h近年社会型态、都市发展、庄脚ê变迁lóng真快速。有一kóa人因为都市计划，一下á变成大富户，街路四通八达，交通利便，家家户户lóng有自用车，少年人教育经济水准提koân，家庭结构mā改变，大家庭变成以夫妻kap kiáⁿ儿两代为主ê小家庭，以往用老人做家庭ê中心，现在变成用孩童做家庭ê中心。Iáu有价值观ê改变，古早时男女授受不亲、饲囝防老、查某囝仔无才to̍h是德，chiah-ê观念lóng已经无合时代，因为价值心态完全无仝，思考模式或者是行事规则无仝，以前ê人安份守己、m̄敢为非sám做。现代有一kóa青少年为tio̍h beh达到目的不择手段，欠钱用竟然用抢劫、绑票来解决！强调「只要我欢喜，有甚么bē-tàng」，自我放纵ê表现，是现代化ê不良ê改变。

（3）Confusion混乱：mā是现代化ê产物。以往大路或者交通ê情形iáu bōe hō͘人感觉混乱kap繁杂；现代社会ê步调快速加上hiah-ê人自私无守法ê结果，就变kah混乱。Phah开社会版ê新闻，抢劫、凶杀、绑票、强奸：政治上ê混乱像911事件、暴动；国际之间民主kap共产ê对立、回教国家敌视西方英美；宗教ê乱象以及现代性方面ê乱象等等。虽然现代化提升真chē人类生活ê方便kap舒适，但是mā造成了真chē人生ê混乱，chit种负面混乱ê现象，是以往单纯ê社会里m̄-bat发生ê tāi-chì。

（二） 现代化对老年kap人生ê影响
有岁数ê老人因为过去所受ê教育kap社会经历，kap现在chit-ê时阵相比，有siuⁿ大ê变迁，因此有真chē观点、价值观kap心态，以及对事物ê观察角度，lóng kap现代青年无仝，chit种时代ê差异是难免--ê，需要双方面ê互相调适，chiah ē-tàng hō͘家长生活koh-khah美满。To̍h是因为án-ne chiah出现老人独居ê情况，老人独居mā是现代化ê产物，过去三、四代同堂真普遍，现在是真少看tio̍h ê，主因to̍h是两代之间受tio̍h现代化ê影响，产生观念kap价值观上ê差异，tùi此thang知现代化对老年有绝对ê影响。问题是beh如何减轻chit种现代化对老人造成ê负担？这就ài看人看款阿，主要就是ài调整到ē-tàng承受ê范围内。有人讲人生ná亲像是坐火车，坐过车站一站koh一站，无注意tio̍h到了终点，千万mài坐特快车，甘愿坐慢车ta̍uh-ta̍uh-á欣赏沿路风景。

当然，现代化对老人ê影响siōng大ê to̍h是身心ê变迁。因为人生若tī时空中过tio̍h相当ê一段时间，必然经历人tī时空中产生ê真chē问题，若用以往to̍h有ê观念kap价值心态，看待现代完全无仝ê价值观kap思考模式，当然会产生无适应。这是目前真chē老人对青年人ê生活方式无法度接纳、甚至讨厌ê原因。现代老人看kiáⁿ孙辈对待父母、ta-ke-koaⁿ ê行为kap态度，会认为是真无合理ê人生态度，以前我tī Digest杂志上看tio̍h一篇khau洗ê文章，写tio̍h「人生70 ê五子登科」：（1）厝内ê人上班或者外出，我顾厝；（2）厝内是非m̄听，做一个臭耳聋。（3）后生新妇上班，我看孙。（4）无顺眼ê时，就当chheⁿ-mê。（5）厝内ê tāi-chì mài讲，就做哑口。文中mā提起老人生理上必须准备面临ê人生状况：（1）身躯ê肉松松（2）白头毛kap落头毛（3）血管硬化（4）体能落降（5）器官退化（6）性退化（7）新陈代谢bái；吸收力、胃口无好，无法度维持水准ê体能。若生理ê问题之外koh加上其他ê负担，ná亲像是经济压力、kiáⁿ孙无关心ê时，lóng会形成无理想、负面ê老境，to̍h算长岁寿，mā会出现真chē问题。

（三） 理想ê老境
基督徒对老境ê人生价值观，应该tio̍h有比一般人koh-khah高层次ê人生体会。Ùi咱ê人生发出ê有基督，主耶稣bat应允信他ê人有丰盛ê性命（约10；10）tī-chia所讲ê丰盛，当然包括每一个人老化ê人生，因此有信仰ê人生，tī人生ê过程中，必定有比别人koh-khah丰盛ê性命表现。当然tī-chia所必备ê条件，先是对家己ê身躯ài有相当程度ê了解，然后配合智识kap意志力去好好á照顾。Teh老化ê过程中，有完美理想ê表现是上帝交hō͘咱ê责任，健康ê身躯确实ē-tàng延迟老化，这是咱必须了解ê事实。但是健康是需要tī平时ê生活，去建立ê性命内容，绝对m̄是只靠健康食品而已。因为健康ê身躯是指整体性ê，食物虽然重要，但是其他ê身心灵各方面ê配合mā是要素，保持运动kap好ê生活习惯，mā必须吸收保健ê智识，chiah ē-tàng帮助咱建立美好ê人生内容。对咱身躯ê状况ài了解，我本身自1980年开始记录健康状况近60 pái。通常咱lóng知影ài保持健康ê生活、饮食、生活环境、禁薰酒、多多运动、保持心情愉快，但是实行上真有问题，所以理想ê老境是ài建立：（1）老人本身ê认知kap意志力：认知指ê是ài建立老人生活ê正常ê价值观，用此价值观做基准，去经营符合老境ê生活方式，应该是bōe差siuⁿ远。讲到意志力，koh-khah重要，伊是推动咱生活去达成目标ê动力，一般来讲，老人ē-tàng家己正确ê食药仔、照顾三顿食穿，to̍h是理想ê老境，可惜人因为老化，渐渐因为真chē症状，加减lóng会影响tio̍h意志力，这可能是老人必须去克服ê问题之一。（2）家庭kap kiáⁿ孙（亲人）ê关怀：理想ê老境是需要家庭亲情，这是绝对ê事实。21世纪初人类ê两大危机：爱滋病kap癌症，现在koh增加了忧郁症，尤其是老年忧郁症。因为理想ê完全是在teh老化ê过程中，生活tī完美理想ê过程来ê，老化ê现实若kap理想相差siuⁿ过chē，老年ê生活ē-sái讲是无幸福thang讲。Chit种理想kap现实差siuⁿ大ê老化ê过程，会成做老人ê负担，但是老人无负担ê本钱；理想ê老境是老人生活无负担kap压力，无论现代化变迁ê冲击如何，厝内ê人亲情ê润泽，siōng ē-tàng hō͘老人生活感觉温暖。（3）信仰ê完成kap上帝ê赐福：箴言16：31「白发是荣耀ê冠冕，tī公义ê道上必定ē-tàng得tio̍h。」非常清楚说明了人生得胜ê目标，基督教ê价值tī-chia，咱人生ê一切，有上帝丰富ê预备，只要你具备信心，伸出信心ê手路接受丰盛ê神恩！