《受恩蒙福的一生》

 | | | 转寄

属上帝ê性命

作者 林宗要 2011.02.13

约翰一书三：1-11，18

Tī人生旅途上有真chē经历，tī chiah-ê人生ê经验中，siōng ē-tàng发挥人性ê存在ê内容有可能是人生ê选择。因为选择tī人生旅途上占非常重要ê地位，主因tī伊tiāⁿ-tiāⁿ是造成人生成败ê关键，tī人生ê经验中因为人无仝ê选择自然会hō͘人产生无相仝ê结果。

咱ē-tàng讲人自出世以来，to̍h是活teh选择ê世界，tùi幼稚园到成家立业一直lóng teh做选择，特别是活tī现代化ê社会环境中，对选择chit-ê问题koh-khah敏感，因为现代化ê社会ta̍k方面lóng充满tio̍h竞争kap挑战，tī-che状况中，koh-khah显出选择ê重要性，因为现代化ê社会紧急变迁，为tio̍h beh应付chit种变局，人koh-khah需要抉择ê智慧，确立teh选择ê世界，因为大千世界复杂ê事物，无完全是单纯、理想ê，tī chit种状况之下应该去选择符合家己ê人生价值观所需要ê事物。人生ài选择有正面价值ê生活内容，因为tī复杂ê人生状况中，并m̄是所有ê人生现象lóng是安全koh理想ê，对人生无一定有好处。

M̄-koh tī现实ê生活中，人lóng会追求、建立人生理想kap纯全ê生活意向，虽bóng现代人ê心思意念无一定是完美kap纯全ê。（咱ē-tàng tùi现实ê社会状况体会出社会ê腐化kap人心ê恶毒，chiah-ê事实ē-tàng tùi社会新闻去了解）这有可能是teh说明人生ê矛盾，人ê心思意念腐败，充满乌暗kap 不法，但是人soah teh追求人生ê光明以及khah有价值ê人生状况，ná亲像台湾ê政治文化，乌金kap乌暗经由选举进入议会，有时身为议长，但是soah致荫不法ê事业比如kiáu间、情色场所，南部ê议长用铳弹死人，或者hō͘ pháiⁿ人thâi死ê县议长，chiah-ê lóng kap恶势力有关，chit种情形是台湾政治ê乌暗面，这是过去国民党一贯ê作风kap乌道勾结形成ê结果。

咱知影人若活tī矛盾ê状况中，是无可能发挥真正ê人生价值，这是人生重要ê真理。其实人生ê现象虽然繁杂，但是归结起来，只有两大项to̍h是善kap恶而已。

好ê存在代表活出了人生有价值ê光明面，tī-chia ē-tàng看出真chē人有意义ê人生内容。因为伊ê价值ê发挥chiah带hō͘社会真chē建设性ê帮助，以及对人类真chē有意义ê存在，tī-chia thang看tio̍h人生意义kap理想ê社会状况。

另外hiah-ê无好ê人生现象是代表tio̍h人性ê乌暗面kap腐化，作恶ê人生会破害真chē人生ê亲情kap恩疼，mā会毁害人ê幸福，夺取属于人生ê价值kap有意义ê人生内容，伊对人生无建设，伊是破坏。当然形成ê主因是tī人心ê内涵，mā to̍h是人心中有啥物，伊就会表现出啥物。这就像主耶稣所讲ê好树结好果子，pháiⁿ树结pháiⁿ果子ê比喻。因此tī近代农作物中一直teh研究，改良品种ê开发kap创新，主因teh提升品种ê品质，对人类有所帮助。

约翰讲：咱称做「上帝ê kiáⁿ儿」，ē-tàng成做上帝ê kiáⁿ儿，是上帝chiok大ê恩典，这m̄是普通ê恩赐，是上帝非常特别ê牺牲kap付出。保罗讲，因为您是用重价买来--ê。所以lín tio̍h用身躯来荣耀上帝（哥林多前书：20），lín是上帝用重价买来ê，所以bōe-sái作人ê奴才（哥林多前书七：23），tī-chia讲tio̍h作上帝ê kiáⁿ儿ê条件m̄是chhìn-chhìn-chhái-chhái --ê，因为成做上帝ê kiáⁿ儿，ài有上帝ê kiáⁿ儿ê款，ài有上帝ê kiáⁿ儿ê实质内容。因此teh信仰ê学习上，咱必须ài像天父上帝ê完全，用chit-ê phah拚来当做咱ê人生内容，当然tī过程中，咱iáu未完全，咱必须koh-khah phah拚去确立咱ē-tàng成做上帝ê kiáⁿ儿ê条件，ē-tàng符合上帝所要求ê实质内容，保罗tī哥林多后书四：7讲有宝贝藏tī上帝ê器具内面。To̍h是说明了上帝ê恩典tī平凡ê人间。

M̄-koh约翰tī-chia用上帝ê种（上帝ê道，上帝ê性命），hō͘基督徒成做上帝ê kiáⁿ儿。Kap保罗ê宝贝对比ê时，咱会发现tio̍h人生中ê宝贝虽然有价值，但是soah比bē起性命可贵，这to̍h是主耶稣所讲hit句名言：得全世界chiah丧失性命有啥物利益？神学生时代，tiāⁿ-tiāⁿ会参加孙雅各牧师娘ê路边布道，伊背手风琴，tiāⁿ-tiāⁿ手提一粒石头kap一粒蒜头作比喻来说明性命ê重要性；进一步。讲起受上帝所保护ê性命以及受撒旦控制ê生活ê差异点。

今仔日咱用chit段圣经来想属上帝ê生活。
（一） 上帝是命ê源头
一切性命ê源头是上帝，他是性命ê创始者，tùi圣经中咱ē-tàng发现chit项事实：上帝赐性命hō͘受造物比如创世记一：20-21所记申命记ê作者mā提起「他是你ê性命，你ê日子久长mā tī他」（申命记三十：20）。

约伯mā讲：「你将性命kap慈疼赐hō͘我。」（约伯十：12），tī诗篇中诗人对生ê论点mā相当ê丰盛「因为tī你hia，有性命ê源头」（诗篇卅六：9），一句基督徒真佮意使用ê话to̍h是：「你tio̍h将性命ê路指示hō͘我，tī你ê面前有满足ê喜乐，tī你ê正手有永远ê快乐。」（诗篇十六：11）。Tī箴言中mā提起「上帝ê训诲是你人生ê性命」（箴四：13）。「Chhōe会tio̍h耶和华ê，to̍h是chhōe会tio̍h性命」（箴言八：35）。「无智慧ê人是chhōe bē-tio̍h性命平顺ê路」（箴言五：6），所以箴言ê作者讲：「敬畏耶和华to̍h是性命ê泉源」（箴言十四：27），「敬畏耶和华ê，会得tio̍h性命」（箴言十九：23），「谦卑敬畏耶和华ê报偿to̍h是好额、尊荣、性命」（箴言廿二：4）。西底家王向先知耶利米讲「Hit位创造咱ê性命ê人是耶和华」（耶利米卅八：16），tī新约中mā讲tio̍h耶稣是性命，咱siōng清楚ê to̍h是主耶稣向多马讲ê那句「我是路、真理、性命」（约翰十四：6）。当主耶稣ê好友拉萨路死ê时，他向当时ê群众讲一句「复活tī我，性命mā tī我」（约翰十一：25）。向hiah-ê kan-ta想beh食饼ê群众讲「我是性命ê饼」（约翰六：35），并鼓励hiah-ê人必须去食chit种tùi天来ê性命ê饼基督耶稣。因此hō͘真chē群众无法度接受来离弃了主耶稣。约翰福音the讲tio̍h基督耶稣「性命tī他内面，chit-ê性命是人ê光」（约翰一：4），保罗mā讲：「基督是咱ê性命」（歌罗西书三：4）。基督徒beh hō͘人称做上帝ê kiáⁿ儿，应该有属上帝ê性命ê本质。

约翰用「有上帝ê种」来强调上帝ê灵命ê基督徒ê性命ê本质，咱lóng知影「种」ê重要性无tī外表ê观感，是tī伊实质内容ê充实，to̍h是有灵命tī其中，chiah ē-tàng发挥种ê效用（puh-íⁿ、成长，开花结果），约翰tī-chia强调，基督徒ài有ná亲像上帝ê款，chit种生活方式，to̍h是teh说明有属上帝ê性命ê基督徒ê特质。因为上帝是性命ê源头，因此chiah-ê属上帝ê基督徒，若tī伊ê性命中无法度发挥ná亲像上帝ê生活ê人生内容ê时，自然就无法度证实伊有上帝ê性命，主耶稣mā教示门徒ài学像天父上帝ê完全，（马太福音48）约翰tī-chia强调用上帝ê kiáⁿ儿kap恶魔ê kiáⁿ儿互相对比，ài保持上帝ê kiáⁿ儿ê特质（属上帝ê性命）是tī清气无犯罪ê生活，因为这是圣经中上帝向人类所要求ê法则（旧约讲是上帝ê律例法度）遵守伊chiah是符合上帝ê kiáⁿ儿ê生活内容。毋认kap破坏上帝ê法则--ê，是恶魔ê kiáⁿ儿ê生活方式。因为「恶」自开始ê角色，to̍h是破坏上帝，反叛上帝ê法则，这to̍h是罪。

基督徒是有上帝灵命ê人生，因此基督徒ê人生必须建立teh学习上帝ê生活内容，这to̍h是咱一直强调ê基督徒有基督徒ê款chiah是符合咱ê身分ê内容，chiah ē-tàng证明咱有属上帝ê性命。

（二） 属上帝ê性命是健康活泼ê性命
咱知影性命ê价值，的确m̄是只有表现上ê问题，khah重要ê是ē-tàng发挥性命ê效力。

咱lóng知影30 gōa年前有一位北二女学生hō͘公车lòng tio̍h伤一直到taⁿ iáu活tī世间ê不幸ê性命（王晓民）。1998年11月底电视报导板桥有二位兄弟致骨疾萎缩症已经14年，阿兄不幸过身去，父母m̄敢将消息kā小弟讲，惊会影响tio̍h小弟ê情绪，所有ê生活lóng需要父母kā伊扶持。

这只是单纯ê生理方面ê问题，siōng重要是tùi价值观kap人格形成所造成ê偏差ê人性ê行为模式，chiah-ê行为往往tī社会上产生chiok惊人ê负面ê社会现象。Chit种问题，咱ē-tàng tùi台湾ê现实社会kā伊观察。虽然chiah-ê人有真完整ê外表，甚至有一kóa thang称做一表人才。但是in ê心思意念soah充满tio̍h罪恶，tī行为上koh-khah是无恶不作。Chit种tùi意念所引起ê负面性命，对人类社会ê影响是非常大，chit种性命已经失去性命ê价值，tī现代台湾社会中chit种ê生活真普遍，真chē乌道流氓tī地方上无恶不作，soah经由民主ê洗礼进入议会，甚至做重要ê职务，chit种恶质ê心思意念，m̄管经过toh一种洗炼，伊ê原性lóng无法导向正途，当情形无法度满足家己ê需要ê时，就产生问题，社会中时常有ê凶杀事件to̍h是tī-chia。In虽然有权力、财富kap社会地位，但是实在失去了性命ê价值。因为tī chit种性命内面无上帝ê种（mā to̍h是无属上帝ê性命）所以外表虽然好看，但是lóng无人生实在ê价值内容。

因为无上帝ê种ê人，心内将成做属恶魔ê世界。约翰讲恶魔ê kiáⁿ儿，kap上帝为敌，beh破坏上帝ê美好ê世界。（创世记写人被诱惑to̍h是恶魔ê力量。）伊是叛逆者，所以恶魔ê kiáⁿ儿ê人生内容，to̍h是对敌上帝，破坏世界美好ê秩序，毋认人间所有美好ê事物，in所建立是不法、恶毒、诈欺，chiah-ê世间上所以不法ê作为，to̍h是魔鬼ê kiáⁿ儿ê行为，chit种内容是无好处ê，虽然in ê外表有真显耀ê成就，但是soah用不法ê手段取得。Chit种性命tī上帝ê眼中是恶劣ê，kap属上帝ê性命无仝，因为属上帝ê性命，无chiah-ê害ê属性，chit种害ê属性，是促成人准讲犯罪作恶mā bōe感觉见笑ê因素，这m̄是出自上帝。上帝生ê，是有上帝ê性命tī心内，伊是属于健康、活泼、会成长ê性命，tī-chia所讲ê成长，一方面是生理健康ê成熟，另gōa一方面to̍h是生活ê内容ê长进。人性ê光辉mā to̍h是主耶稣所讲：做光做盐ê人生内容。Mā是像保罗所讲ê，基督徒ài活出基督耶稣ê清芳之气ê人生，这to̍h是咱ê圣经强调ê属上帝ê kiáⁿ儿ê人生内容。当然ài有chit种果实，基督徒ê人生内容必须是ài有像上帝ê属性：公义kap仁爱，chit种kā恶魔有差别ê属性，to̍h是形成上帝ê kiáⁿ儿ê性命ê有价值ê内容。

（三） 属上帝ê性命是会开花结果ê性命
一个性命存在并成长，但是伊ê成长过程kap内涵并无一定仝款。咱tī顶面所讲已经略略仔提起chiah-ê事实，主因是tī性命成长ê背景无仝chiah有所差别。比如若有兄弟或者姊妹，因为环境ê需要必须ài kā一人送到别人ê厝（做别人ê gín-á）生活，tiāⁿ-tiāⁿ会因为án-ne，产生chiok大ê差异，有好字运ê，mā有运命坎坷ê。

所以生长ê环境，对人生来讲是一件非常重要ê条件。主耶稣tī马太福音十三章掖种ê比喻中有说明chit-ê事实，籽lóng是仝款，但是因为伊ê生存ê位ê无仝soah发生完全无仝ê状况，主耶稣用 1）路边，2）石头地，3）草刺中，4）好土地上产生无仝ê结果，比如三十倍、六十倍、一百倍。真正属上帝ê性命，必定是属于好土地ê，必定有收成，只是份量上ê差别而已，相信咱thang tùi咱ê信仰生活去体会chit-ê事实，这to̍h是咱ê教会一直teh强调ê属灵ê功夫，像成长过程中所必须ê各种要素。基督徒必须重视信仰属灵ê环境，先天kap后日ê境况lóng是咱必须重视--ê。M̄管基督徒ê信仰背景如何，tī现实ê信仰过程中，若无phah拚认真去建立属灵ê性命ê时，所有ê先天条件，to̍h无法度弥补后日ê欠缺。

这说明了基督徒ê信仰，是真实在ê。活ê意义，是teh不断成长，保持体内所有ê细胞活跳跳，只有chit种活跳跳ê性命chiah会真实成长，mā chiah会开花结果，这是属上帝ê性命ê必然ê结果，因为这是主耶稣赎咱siōng大ê目的。「基督为tio̍h咱牺牲了家己，beh赎咱脱离一切ê罪恶，koh洁净咱，做他家己人民，热心为善」（提多书二：14）此节经文kā咱讲了解属上帝ê灵命最后ê目的，to̍h是会成做荣耀上帝ê生活者－开花结果子。这mā是上帝创造人ê目的。

以赛亚四三：7指出了人生ê主要意义。荣耀上帝，永远hō͘他欢喜是人生siōng大ê目的，伊ê标准to̍h是上帝ê话。只要tī人心中有上帝ê籽tī内面，chiah-ê属上帝ê性命ê人，就可能hō͘伊心中ê籽puh-íⁿ、成长、开花结果，就ná同耶稣所讲ê籽撒tī好土地，因此有ê结实三十倍、六十倍、一百倍，无论如何只要有开花结果ê性命lóng是符合上帝所喜乐ê性命，自然就会hō͘上帝欢喜，因为有开花结果ê性命，to̍h是荣耀上帝ê性命，约翰一书三：1-12中提起三件事实，to̍h是属上帝ê籽ê性命所应该有ê表现。

1） 清气ê人生（约翰一书三：2-3）有上帝ê籽ê性命，ài像他ê款，他是圣洁ê主，所以咱就ài学习他ê圣洁。以色列ah！Lín ài清气，因为我耶和华是圣，这是上帝向以色列人ê要求，这是基督徒ê人生内容。

2） 无犯罪ê人生：只要tùi上帝所生ê to̍h无犯罪。因为他ê种tiāⁿ-tiāⁿ tī他内面就bōe犯罪，因为是tùi上帝所生ê。这to̍h是基督徒ê人生siōng大ê价值。尤其是处tī chit种腐败乌暗罪恶ê现实社会中，上帝要求属他ê kiáⁿ儿ài经营bōe犯罪ê人生生活，tī-chia需要siōng严格、谨慎ê信仰ê反省chiah ē-tàng达成！

3） 咱ài相意爱，相意爱ê人生内容是约翰特别强调ê信息，因为咱既然是属于爱ê主耶稣，咱必须ài teh生活中kā疼ê标帜夯koân，hō͘人lóng看会tio̍h上帝ê籽ê真实ê内容。约翰讲「无疼ê m̄是tùi上帝出，mā m̄-bat上帝」因为上帝是疼。

只要tī咱ê生存环境中坚守chiah-ê原则，相信咱心中属上帝性命ê籽必定会开花结果。

结论：相信每一个属上帝ê基督徒ê心中lóng有上帝ê籽，请注意，籽所khǹg ê环境（信仰生活ê自爱），是m̄是保管妥当？是m̄是有湿气？Kám有通风？籽是m̄是掖tī好土地？掖种了后puh-íⁿ成长ê照顾如何？lóng tio̍h tiāⁿ-tiāⁿ检测ê。