《受恩蒙福的一生》

 | | | 转寄

属基督ê生活

作者 林宗要 2011.02.06

歌罗西书三：12-17

每一个人无仝ê生活环境以及文化背景，tiāⁿ-tiāⁿ会反应tī in ê生活习惯顶koân。阿拉伯民族、印度人或者印地安人ē-tàng tùi in ê穿插来分辨，犹太人ê cha-po͘人到taⁿ iáu惯习头戴圆圆ê小帽á，阿拉伯人处tī烧热天气中，穿hiah-nih-chē ê衫裤，hō͘咱bōe-tàng了解伊ê原因，chit种无仝民族，无仝文化kap无仝生活背景，往往to̍h是人kap人无法度斗阵ê主因。因此tī现实生活中，虽然无一定讲无仝ê文化to̍h是m̄-tio̍h，但是teh嫁娶顶koân，hiah-ê人mā一直主张，ài有khah接近ê生活背景，婚姻chiah会khah完美，譬如：年岁差siuⁿ-chē，kap外国人结婚或者学历差相远，往往the沟通ê时会发生问题。70年代台湾一位有真有名ê歌星kap印度seng-lí人谈恋爱，甚至结婚，伊厝内ê人反对，但是当事人soah hō͘爱冲昏头，无顾厝内ê人ê意见，嫁去真远ê印度，in提出beh说服人ê理由是「爱情无国界」，只要二人相意爱，一切lóng无问题，但是当chit对恩疼夫妻tńg去印度ê时，tī in ê厝内就面对了chiok大ê文化冲突kap适应ê困难，teh食ê方面印度人ê食物是用真重ê咖哩，用手掠物件来食，同时mā有hō͘人排斥ê情感，tī he景况中，只有伊ê生活方式kap别人无仝，往往成做hō͘人笑kap轻视ê对象，因为tī hit种多数中ê少数lóng是hō͘人看做无正常。Tī社会中讲tio̍h「正常性」往往是用多数做根据，少数ê动作kap见解，tiāⁿ-tiāⁿ会hō͘人看做「无正常」，这是咱所ē-tàng了解ê，所以tī传统社会中，人ài突破原来ê têng-tâⁿ kap不良ê境况，实在会受tio̍h真大ê压力kap反弹，所以环境对人生ê影响面是非常重大ê。尤其是基督徒生活tī异教势力不lí-á强盛ê台湾社会，tī其他人力求传统作风，保守观念ê状况之下，基督徒ài怎样建立属耶稣基督所要求ê信仰生活，这mā是基督徒面对tio̍h siōng切实ê课题。处tī chit种境况中，基督徒ài如何来见证上帝，是一件真值得咱思考ê问题，chit-ê问题的确kap咱ê信仰生活kap教会ê兴kap败lóng有密切ê关系，虽然咱了解基督徒得救是因信称义，kap行为无关，但是一个得救ê基督徒若无行为来见证，因信称义之道，hiah-ê人koh怎样ē-tàng信服？基督教信仰无像其他ê宗教，主张个人ê修为以及刻苦修行，是基督徒ài tiāⁿ-tiāⁿ用生活来见证基督ê福音。若一个基督徒ê生活比非基督徒koh-khah不法、垃圾，hō͘人讨厌排斥，hiah-ê人怎样ē-tàng对伊所信ê宗教有兴趣？Tī过去咱ê教会生活中有一个值得重视ê现象，to̍h是边仔ê人观察基督徒美好ê言行是in靠向基督教ê主因。长老会bat举行全省ê问卷调查，提出如何替主作见证？「传道、文字事工、关心助人、生活上见证，开放家庭」，结果近80％ ê人认为siōng有效、siōng好ê见证，是tī生活上有良好ê见证，mā to̍h是将自身完美ê生活表现tī众人ê面前，这to̍h是教会ê传道事工，mā是见证基督。因此教会真重视信徒生活上ê见证，因为真chē人信主ê原因，lóng kap基督徒美好ê生活见证有关，这一点咱chiah-ê已经信ê兄姊必定ài注意，特别是有利害关系ê情形；譬如：新妇信主，ta-ke-koaⁿ m̄信，或者tang-sāi-á之间ê关系，已经信主ê基督徒若无好ê言行，就免想beh带领对方信主，因为chit种siōng真实ê生活状况lóng无好见证，是behan2怎叫hiah-ê现实ê人去思考行为以外ê tāi-chì neh？有一位热心教会事奉ê姊妹，tī厝内对待忠厚老实ê翁婿是真无客气，ná亲像母夜叉，伊期待翁婿信主，拜托牧师去kap翁婿讲道，翁婿将心内ê话讲出--来，提出伊ê看法。牧师tńg去了后责备chit位疼主ê姊妹不良ê见证，伊to̍h即时悔改要求牧师替家己代祷，tī-che了后生活完全改变，翁婿mā最后自动要求beh来参加聚会。已经信主ê基督徒对未信ê亲人、朋友，一方面ài有生活上ê好见证，另gōa一方面ài学习保护，为tio̍h beh得tio̍h hiah-ê人，基督徒必须ài有牺牲、付出ê心志，因为只有建立完全属上帝ê生活方式，咱chiah ē-tàng tī福音ê事工上有所分担。今á日咱tùi chit段圣经中，用基督徒应该有ê生活方式来思考属上帝ê生活。

（一） Ài有仁慈宽宏ê心态（三：12～14）
基督徒是属基督ê生活者，因为咱是tùi基督ê宝血所赎tńg来--ê，成做他ê子民，是圣洁koh得tio̍h怜悯--ê，因此属基督ê基督徒，必须teh生活上活出ná主仝款ê仁慈kap作为。Tī圣经中，当彼得问主耶稣：「我ê兄弟得罪我，我ài赦免伊几pái」，主耶稣用一个比喻来说明：一奴仆欠王一千万两银子，求王赦免，王赦免伊，但是chit-ê奴仆ê soah向欠伊10两银ê朋友，苦苦相逼，甚至虐待那位朋友同伴，王知影chit-ê tāi-chì，就boài赦免伊（马太十八章）。Chit段经文结语，上帝叫咱ài互相饶恕，因为人生难免有缺点，任何人lóng无法度永远活tī十全十美ê境况中，基督徒会成做基督徒是因为咱是受恩ê一群，咱chiah-ê基督徒tī上帝面前并无任何功德，咱只是一群软弱、无完全ê人而已，但是tī咱身上soah有上帝丰盛ê怜悯kap恩典，咱是白白得tio̍h恩典ê人。因此上帝要求咱chit阵受恩ê人ài tī世上发扬他ê恩疼，存仁慈、宽宏ê心，来经营上帝所交托、所赐hō͘咱ê人生。当然chit种具备仁慈、宽宏心态ê生活，难免会有一kóa真pháiⁿ克服ê所在，但是当咱详细思考主耶稣替咱chiah-ê罪人所付出ê一切ê时，就ē-tàng了解，上帝要求属他ê人ài有互相饶恕ê生活，因为咱知影人性复仇ê心真重，尤其是父母被害，「父仇不共戴天」是过去ê人ê想法，m̄-koh主耶稣ê教示，是ài属上帝ê基督徒用仁慈ê心互相对待，所需要ê to̍h是赦免宽恕ê生活，因为咱实在是体验了主耶稣基督tī咱身上一切仁慈ê作为，mā必须将chiah-ê仁慈ê作为应用teh生活中来报答主ê救恩。

（二） Ài hō͘基督ê平安tī你心内作主（三：15）
保罗tī-chia进一步ê讲属主ê人ài有基督ê平安tī心内作主，伊所强调ê是属上帝ê基督徒tī生活上ài有上帝ê和平tī内心指挥，掌握咱ê生活。约翰福音十四章27节「我kā平安留落来hō͘ lín，我将我ê平安赐hō͘ lín，我所赐ê无像世人所赐--ê，lín心内mài忧愁mā mài惊惶。」tī-chia咱必须注意ê是主耶稣所讲「我ê平安」kap世人ê平安无仝，是tī主以外无法度取得ê平安，同时伊mā是世人siōng需要ê平安，是人生bē-tàng欠缺ê，只有得tio̍h chit-ê平安，人chiah有真实ê平安kap永远ê安息！咱看tio̍h司提反tī he极端ê危机中，伊iáu ē-tàng表现出无限ê平安，hō͘人用大石用跋倒，临死前伊ê面容所表现出来ê平安，to̍h是基督所beh赐hō͘人ê平安。Chit种平安是tī人间所chhōe bē-tio̍h ê。为何今á日人类会chiah nih仔纷乱不安？主因是人类心中无主ê平安。Ta̍k pái看tio̍h伊拉克总统哈珊tī回教清真寺跪拜阿拉真主ê时，我心中会产生一种疑问，伊ê敬拜是m̄是有价值？圣经kā咱讲，ài建立和平ê世界，m̄是tī联合国，却是hō͘主ê平安tī人心中作主ê人生，基督徒ài如何将主ê平安推sak tī人世间？是tī基督徒beh成做和平ê使者，tī人间实现天国ê理想，比如主祷文中「Tī地上ná亲像行tī天顶」soah m̄是用咱ê愿望kap私欲作主，因为这是人生失败kap混乱ê主因。人ê平安是暂时ê，表面ê，只有主ê平安，chiah有永远ê价值，是tùi内心活出平安、喜乐，chiah m̄是靠金钱，靠才能得来ê平安。

有一ê故事，一ê好额人遇tio̍h一ê sàn-chhiah基督徒讲：「愿你平安！」sàn-chhiah基督徒讲：「我真平安！」好额人讲：「一生平安？」讲：「hō͘天时感谢主，thang做工，落雨天感谢主禁食祈祷（无饭thang食）」好额人讲：「若上帝叫你落地狱你kám会平安？」讲：「我一手信心，一手爱心掠tiâu上帝，kap上帝同在，上帝若tī地狱，地狱mā会变做天堂。」好额人koh问：「你是siáng。」sàn-chhiah人应：「我是王。」「你国何在？」「Tī我心中。」这to̍h是上帝所赐ê平安ê强力果效。

（三） Ài hō͘基督ê道理存tī心内（三：16）
属上帝ê生活，m̄-nā有上帝ê平安，同时koh-khah重要ê是beh hō͘上帝ê道理充满tī kui-ê人生中，上帝ê道理当然是指上帝ê话，是人ê福音，是人生ê脚前灯，路上光（诗一一九：105）基督徒ê人生只有hō͘上帝ê话充满ê时，chiah ē-tàng发挥伊ê光明面。Ma7chiah ē-tàng活出基督徒ê特质。只有hō͘上帝ê道理充满ê时，基督徒ê人生chiah会存感恩ê心来经营上帝所交托ê生活。因为主基督ê道理是咱人生ê指标，同时mā ná希伯来书所讲：「比一切两刃ê剑koh-khah紧」，头前是指引人生活tī上帝所喜乐ê道上，后者是ē-tàng tī咱ê人生中除去一切垃圾无正当ê人生作为，hō͘人生koh-khah净化，án-ne人生chiah是上帝所希求ê人生，tùi chia thang知基督徒生活充满上帝ê话是jōa-ni̍h-á ê重要。

Beh án-ná chiah ē-tàng hō͘主ê话充满teh生活中？A）必须肯听上帝ê话；骨力读圣经，khah chiap聚会，用切慕谦卑ê心去领受。B）愿意食；主耶稣家己是性命ê饼，ài ê人，只要肯食，就ná人teh成长ê时ài均衡摄取所需ê食物，发育chiah会完整，看hiah-ê发育良好ê gín-á lóng是无胃口，若无会发育不良，基督徒属灵ê性命mā kap chit-ê原理仝款。C）Bōe-sái代替，家己负责，家己奋斗phah拚，bōe-sái由别人代替，是家己完全ê责任，真chē热心ê教会长执，伊ê kiáⁿ孙对教会无一定有贡献，父母ē-tàng感化基督kiáⁿ儿ê信仰，但是无法度永远庇荫kiáⁿ儿，旧约圣经以利ê例thang说明chit-ê 事实，着算讲父母ê信仰热心可取，kiáⁿ儿soah是不法之徒，这mā充分说明了信仰生活ê严肃性kap完全独立ê自主性！

（四） Ài hō͘家己ê作为成做荣耀主ê见证（三：17）
最后保罗要求属基督ê生活方式是奉主耶稣基督ê名无论作啥物，或者讲啥物，或者行事，lóng bē-tàng bē记得基督徒ê人生ài成做荣耀上帝ê人生。

Tī基督徒ê信仰生活中，tiāⁿ-tiāⁿ会疏忽言行举止ài kap身份相称，因为人tiāⁿ-tiāⁿ有表面化ê现象，尤其现今咱生活teh重视包装ê世界，咱ê民族又koh是爱面子、重外表，难免会有伪装ê表现，做表面功夫，基督徒ê信仰生活beh突破chit点，chiah ē-tàng真正活出有意义ê信仰生活。Chit种tī社会中显耀信仰ê生活，to̍h是荣耀主ê作为。Bē-tàng因为咱ê生活hō͘主ê名或者上帝ê教会受tio̍h侮辱！保罗讲「无论作啥物」是指咱全部ê生活内容，m̄是kan-nā限tī某一部分，譬如tī教会礼拜或者有宗教气氛ê所在，真chē基督徒有chit-ê情形，tī教会中表现出色，但是tī khang-khòe场做穑soah bōe-tàng荣耀主，这是kan-nā做礼拜堂ê基督徒，咱知影上帝是无所不在ê上帝，m̄是只teh敬拜ê时chiah意识tio̍h上帝临在，tī其他场合特别是不法或者色情场所将上帝放开，这m̄是基督徒应该有ê信仰生活，咱ê信仰无论tī任何境况中（光kap暗、正或者不法、是或者非）lóng tio̍h表现出基督徒信仰ê价值，chit句话ê意义是讲基督徒必须将家己khǹg tī上帝ê面前，对上帝负起完全ê责任。Án-ne tsiah ē-tàng表现出荣耀上帝ê圆满结局。

结论：主耶稣基督既然已经召咱成做圣洁，理想ê存在，咱必须认清属他ê生活方式：1）Ài有仁慈宽宏ê心态 2）Hō͘基督ê平安tī咱ê心中作主 3）Hō͘基督ê道理充满心中 4）Hō͘家己ê生活成做荣耀上帝ê见证。若ē-tàng具备chit四点一定ē-tàng成做理想ê基督徒。