《受恩蒙福的一生》

 | | | 转寄

属基督ê人生

作者 林宗要 2011.01.30

腓立比书一：18-27

创世记五章记载tùi亚当到挪亚这中间ê世系，若详细kā伊思考，就会发现真chē真理，tī人类ê系图中，比如tī马太福音一章中所讲主耶稣ê世系仝款，看起来真单调无味，但是soah有上帝向人类提出ê非常重要ê启示。创世记五章自亚当到挪亚不过十代人，tī-chia有一个共通点to̍h是某某人几岁生某某，然后koh活几年，其中有生kiáⁿ儿，几岁chiah死，lóng是chit种ê写法，只有其中第七代ê以诺因为kap上帝同行三百年，然后hō͘上帝接去。咱ē-tàng看tio̍h一个过程——生kiáⁿ→养育→死亡，这to̍h是人生ê延续。人自出世了后尽伊家己ê能力去成长， 而且成做有路用ê人。大汉了后就ài生kiáⁿ来延续性命，虽然生kiáⁿ了后ê人生iáu有一段时间ài渡，但是无gōa久咱就会结束一生来死去。Chit种生生死死to̍h是人生ê写照！人生是m̄是就ná圣经所写，只是生生死死ê延续？或者是有koh-khah重要ê tāi-chì人ài去做？这to̍h是形成人生ê价值kap内容ê关键。

咱知影上帝创造人，hō͘人权限去管理照顾世界，koh-khah重要ê是人ài成做荣耀上帝ê存在，chit种荣耀上帝ê存在是建立tī人生kiáⁿ饲kiáⁿ ê过程中。因此创世记五章所记ê人生ê生生死死中，bē-tàng疏忽ê to̍h是「生kiáⁿ饲kiáⁿ」，写法虽然真简单，咱ē-tàng tùi其中ê事实来了解上帝托付hō͘人类ê神圣职份，这是人ê天赋，人生ê内容kap价值koh-khah是tùi chiah建立，因为tī-che过程中，人须要相当ê智慧kap能力来教养上帝所赐ê kiáⁿ儿，人是受托付ê，mā是替上帝完成受托ê使命。生kiáⁿ了后to̍h是某某人lóng总享受几岁「chiah死」，此句话对人生有一个明确ê写照，无论人活jōa-chē岁，伊ê结果lóng是「死亡」，chit-ê「死亡」hō͘咱想tio̍h人引罪入世了后，受上帝ê咒忏，伊是罪ê工价。死并m̄是人ê意愿，人所希求ê是永「生」，这to̍h是人类ê问题。

但是圣经soah替咱记了一个非常重大而且伟大ê真理，to̍h是以诺kap上帝做伙行三百年chiah hō͘上帝接上天，其中无经过人生死亡ê阶段，以诺chit件tāi-chì kā咱讲一件伟大ê真理，to̍h是人若beh突破tùi罪所带hō͘人类ê死亡，或者是讲解决罪ê办法，to̍h是「Kap上帝行做伙」，人最后会hō͘上帝接纳，这是kap上帝行做伙必然ê结果。就ná圣经所写「以诺kap上帝行做伙，上帝将伊取去，伊就无tī世间啊」（创世记五：24）现代译本记讲「无看见死，to̍h离开世人」。咱ē-tàng想像以诺kap上帝行做伙ê生活状况。先知阿摩司讲「二人若无仝心岂ē-tàng行做伙neh」，以诺kap上帝仝心，意思to̍h是「活tī上帝ê旨意ê中间」。遵照上帝ê命令，照上帝ê命令，照上帝ê指示、教示，to̍h是kap上帝仝心ê生活方式，是纯洁、美好、理想ê人生生活方式，有chit种生活方式ê人，上帝ê恩惠当然会临到伊ê身上。

基督徒ê存在，也tio̍h kap以诺仝款，是kap上帝行做伙ê人。基督徒ê称号是安提阿人向chiah-ê基督ê学生ê一种khau洗ê称呼，当时chiah-ê属于基督ê人确实有某一kóa方面表现出有基督ê清香之气，若无，外邦人就bōe称呼in做「基督徒」，自hit时开始，tòe基督、信基督ê人就hō͘人称做基督徒。虽然开始ê时无一定是善意，但是属于基督ê人soah佮意chit种称呼，因为che表现了基督徒ê归属。基督徒ê人生ài时刻体认，ài kā属于基督ê特质相称，因此bōe-sái做一个有名无实、挂名ê基督徒。

（一） Hō͘主耶稣基督得tio̍h荣耀ê生活（腓立比书一：20）
基督徒ài家己勉励，伊生存ê内容是beh荣耀上帝--ê！这是宗教改革了后，教会ê基本信仰，因为基督教ê信仰是建立tī只有荣耀上帝ê事实上，无论任何伟大ê信徒或者牧师tī教会生活中，必须ài归荣耀hō͘上帝，m̄是归荣耀hō͘家己，若无就成堕落ê原因了。

「照我所切慕所ǹg望ê，无一项tāi-chì hō͘我见笑，只要凡事放大胆，无论是生、是死，lóng叫基督tī我身上照常显大」（腓立比书一：20）合和本为「基督tī我身上照常显大」现代译本是「无论生死，用kui-ê我来荣耀基督」日译：「基督tī我身上得tio̍h尊崇」lóng是仝义！Beh hō͘基督tī咱身上得tio̍h荣耀，自然m̄-nā是嘴讲讲ê信仰，是ē-tàng显出基督清香之气ê信仰生活，这是历代教会中真chē感动人心ê见证，tī教会史中有千千万万ê人lóng是因为tùi基督徒身上闻到基督ê香气chiah归属上帝--ê。Tú亲像保罗所讲「无一项tāi-chì hō͘我见笑。只要凡事放大胆」无见笑ê人生，to̍h是信仰siōng好ê写照。试想，若基督徒生活tī卑鄙、见笑ê状况中，有可能将耶稣基督ê福音传开？假使信徒ta̍k个lóng是无讲理、恶质，比一般人koh-khah恶劣，主ê福音kám bōe受影响？虽然咱ê信仰m̄是靠行为得救，但是基督徒ài了解，现实ê人生中间，hiah-ê人是真注重基督徒生活状况，to̍h是基督徒ê行为！一般人看bōe-tio̍h基督，in只认bat隔壁ê某某基督徒，in tio̍h用基督徒ê生活来评估基督ê福音，来了解基督教ê上帝！所以基督徒ê生活，实在是非常重要，有人比喻基督徒ê生活，是hō͘人看见基督ê借镜，是真合适--ê，确实，基督徒ê存在是hō͘人了解主耶稣ê关键，hiah-ê人beh tī基督徒身上看见荣耀ê基督。同时hiah-ê人mā beh tī基督徒身上发现tio̍h卑鄙下流ê基督教信仰！To̍h是讲，基督徒身上实在负担tio̍h无限量ê使命；荣耀或者侮辱，全系tī每一个基督徒身上。当咱想tio̍h咱ê存在是为tio̍h荣耀上帝ê时，基督徒的确ài用谨慎ê心态去经营基督所交托咱ê信仰生活。Ná亲像保罗tī哥林多前书十：31所讲：「无论是食，或者lim，或者作任何tāi-chì，lóng tio̍h为tio̍h荣耀上帝来行」！若ē-tàng用che做信仰生活ê准则，相信咱就ē-tàng建立属于基督ê生活。

（二） 尊主为大ê生活（腓立比书一：21-24）
若beh谈尊主为大ê生活ê时，咱自然就会想tio̍h主耶稣ê母亲马利亚，tī路加福音一章所表现出来ê赞歌「我心尊主为大，我灵用神我ê救主为乐」一位未出嫁ê少女，忽然听tio̍h天使对伊讲伊teh-beh有身，tī-chia án-ne重大ê tāi-chì中，伊iáu ē-tàng尊主为大，实在是无简单，因为chit项tāi-chì kap cha-bó͘ ê贞节相关，是cha-bó͘ ê第二性命，m̄-koh马利亚soah ē-tàng尊主为大，chit款ê信心，to̍h是后代ê教会所敬仰ê信仰之母！

基督教信仰ê真实内涵是建立teh尊主为大ê根基上，只有主hō͘人尊崇ê时，信仰chiah会发现伊ê效用。因为尊主为大，是tī伊ê信仰生活中，以上帝为第一位，凡事lóng kā主考虑在内，chit种生活chiah是真正属基督ê生活，所以属基督ê生活to̍h是尊主为大ê生活；比如保罗tī腓立比书一：21-24所讲ê「无论死活」lóng服从主ê意思，若活tī世上，就尽一切kap本份来荣耀上帝，若hō͘主接纳，离开世界，就thang放下人生真chē ê烦恼、负担，kap主同在天国，享受主ê应允。像保罗chit种「人生观」，to̍h是基督徒应该建立ê人生观。因为性命ê主权m̄是人ē-tàng左右，伊是属于上帝ê。人是beh尽一切ê本份来完成上帝所托付ê使命。所以tī基督教伦理中，伊要求每一个基督徒ài成做一个良好ê子民，做负责任ê父母，或者工作者，tī各无仝ê领域中，完成美好ê角色！因为chit种美好ê角色ê完成，to̍h是ē-tàng充分荣耀上帝ê行为！所以尊主为大kap荣耀上帝是一体ê两面「无论生死」lóng完全交托hō͘上帝，m̄是无负责任ê表态，却是积极ê信仰生活ê建立。

（三） 是积极ê人生生活（腓立比书一：25-26）
属基督ê人生是尊主为大ê生活，是凡事交托hō͘主ê生活，同时伊是积极ê人生生活，是有信仰长进kap喜乐ê生活。当时ê保罗是hō͘人关tī罗马ê监狱中，保罗勉励腓立比ê基督徒mài受此影响，ài用积极ê心态去经营人生。「Hō͘ lín tī所信ê道上，koh长进koh喜乐」是保罗ê期待。咱读腓立比书一章25-26节就会了解，积极ê人生取向是基督徒应该有ê生活态度，因为只有实行chit种生活，基督徒chiah有能荣耀上帝。

因为这是人生信仰ê一个决定性ê关键，基督徒ê人生一定ài tùi信仰上得tio̍h增进人生状况ê积极意义。Chit种信仰chiah有价值。历史上真chē伟大ê人物，in有非常丰富ê人生经历，虽然无lóng仝款，咱lóng ē-tàng tī in身上看tio̍h积极ê人生观，用che当做伊人生ê根基，无论任何逆境lóng无法phah倒in积极ê人生心态，这to̍h是in成功ê主因。

因此建立积极主动ê人生观，是基督徒ê信仰生活中所bē-tàng欠缺ê要素。咱知影人lóng会面对无仝人生中真chē苦难、问题kap环境，正确ê人生观to̍h是面对伊siōng好ê利器！仝款ê tāi-chì，因为人ê观念ê无仝chiah形成两种极端ê结果，譬如：仝款是半杯茶，有人感谢，有人soah怨叹，仝款做一件tāi-chì，有人用喜乐ê心去做，有人soah拾恨tī心内，结果完全无仝。日本ê企业án怎会hiah-ni̍h成功？成做全世界siōng好额ê民族，而且kap英、美各国完全无仝？主因tī in ê企业管理经营了真好，但是siōng重要ê是日本人ê忠心护主ê态度！将伊ê一生投入tī企业，用充满感恩ê心去面对，自然就会得tio̍h美好ê效果。基督徒mā应该比其他ê人koh-khah会晓感恩，因为咱确实享受tio̍h上帝无限ê慈爱，存感恩ê心去面对你ê人生、家庭、khang-khè、生活，就会有无限ê收成，这是策动积极人生ê动力。

（四） 名符其实ê人生生活（腓立比书一：27）
「只要lín行事为人kap基督ê福音相称」现代译本翻做「应该符合神福音ê要求」无论是荣耀上帝，尊主为大或者是积极ê人生，lóng是beh建立咱chiah-ê hō͘人称做是基督徒ê人成做名符其实ê基督徒！

Tī教会生活中，咱tiāⁿ-tiāⁿ会看见bōe真实ê基督徒，伊时常谤渎上帝，hō͘上帝ê名受侮辱ê主因。真chē挂名ê信徒，世上ê pháiⁿ事lóng敢做，tī教会中，chit种tāi-chì满满是。Chit种作为自然bōe荣耀上帝，颠倒hō͘上帝ê名受侮辱，旧约中ê真chē假先知，藉着上帝ê名做m̄是上帝旨意ê事；比如以色列国ê巴兰、基哈西，新约真chē伪善者；使徒行传十九章13节记载，有人家己专门奉耶稣ê名赶鬼，结果失败，hiah-ê邪灵讲：「耶稣我认bat，保罗我mā知影，lín是siáng？」In就hō͘邪灵攻击。Kap信仰无相称ê生活m̄是基督徒应该有ê生活方式，基督徒beh建立ná保罗所讲：「行事为人符合神ê福音」ê生活，因为这是siōng基本--ê。身为一个基督徒，假使连siōng基本ê福音准则lóng无符合，mā就失去了基督徒ê价值。「相称」是人生生活ê大事，无论tùi任何角度来kā伊思考，「角色ê相称」应该成全人生ê基本条件，人ê生活必须ē-tàng活teh相称ê角色之下。真chē人间ê悲哀kap不幸lóng是起因tī人活teh无相称ê角色之下，伊tiāⁿ-tiāⁿ hō͘人teh生活中发生真chē悲剧。今á日台湾ê状况，hiah-ê人活teh无相称ê角色中，致使无正确ê价值观，mā造成了真chē不法ê弊端，为tio̍h钱chiah去做pháiⁿ、poa̍h-kiáu、抢劫、食毒，产生真chē社会问题，tùi此可见角色ài相称，名符其实ê重要。

基督徒是tī耶稣基督宝血ê救赎之下，以待罪之身进入神ê恩典内面，基督ê宝血会将咱洗炼出啥物款ê人生？经过福音ê薰陶应该是价值连城--ê，因为入是啥物，出mā是啥物，咱共同勉励。

结论：虽然俗话讲：入是粪埽，出mā是粪埽，但是基督徒用待罪之身进入基督ê恩典中，耶稣基督用他ê宝血kā咱ê罪洗清气，救赎咱，经过福音ê洗炼，出来ê应该是价值连城ê精金，bōe koh是粪埽！