《受恩蒙福的一生》

 | | | 转寄

教会ê隐忧

作者 林宗要 2011.01.23

以弗所书四：11-16

有一位疼主热心ê平信徒，tī一pái ê演讲中提出现代教会ê情形：□无上帝ê神学：神学自头到尾是以上帝为主，无上帝ê神学是真惊人--ê。□无基督ê教会：教会kap基督是一体--ê，因为基督是教会ê头，教会是属于基督ê肢体，教会若无基督ná亲像人ê身躯无头仝款，无头ê身躯是无法度生存、是无性命ê、是bōe成长、是死--ê。□无使命ê传道人：当做一个传道人ài具备个方面ê条件：比如学识、人格、信仰、品德……等等，但是其中有一项绝对bē-tàng欠ê to̍h是心志，mā to̍h是当做一个传道者ê使命感！Tiāⁿ-tiāⁿ听tio̍h人teh批评现代传道者ê精神无可取，mā to̍h是关系tio̍h传教者决心献身ê使命感ê问题，虽然有完美ê学识kap品德，但是若无心，伊所做ê工就khah会发生问题，因为心是指挥管理人一切ê根本，所以做一个传道者，心是非常重要--ê。无使命感ê牧者tī教会ê事工上是chhìn-chhái做做而已，一旦tú-tio̍h 真pháiⁿ排解ê问题，往往是落跑to̍h tio̍h啊。Chit种无使命ê传道者就无可能有理想ê牧会生活。□无性命ê基督徒：伊讲无性命ê基督徒是现代基督徒ê特色，这mā是chiok惊人ê教会现象，因为一个无性命ê基督徒tī属灵ê过程中等于死亡，无活动、无荣耀上帝ê作为、无信仰ê果实、无生活ê品质，chit种存在是hō͘人弃绝、是无路用--ê，当然koh-khah是无荣耀上帝ê作为。基督徒必须认清伊ê存在是teh荣耀上帝，永远过tio̍h他喜乐ê生活。一个无性命ê人（无kā主基督连结ê人）比如约翰福音十五章葡萄树ê比喻，是无路用ê枝，hông掷tī外口hō͘人踏而已，是无价值ê存在。因为主耶稣真清楚ê讲，离开他就bōe-sái做啥物！以上所举ê四点实在是今á日基督徒必须ài省思ê重要问题。

咱教会tī现代化ê冲击之下难免会有真chē问题；咱看这四、五十年来ê教会成长以及教会ê心态，加减 ē-tàng了解处tī急变ê社会中，教会有真chē ê挑战kap难题。Chiah-ê tī时代中所产生ê真chē问题往往对教会造成冲击产生真chē问题，当然时代进步，科技发达带hō͘教会teh传道事工上ê方便kap快速，但是mā造成传道事工上真chē ê阻碍kap 不便，chit种情形咱thang tùi实际生活中体会tio̍h。譬如古早时，hiah-ê人对福音往往是排斥kap批评ê态度，现代人对教会（福音）ê心态虽然无像khah早仝款，但是因为物质ê进步，hiah-ê人kah-ná真bōe-tàng mā bōe去关心人性ê心灵上ê问题，mā因此造成传福音事工上真chē困难。物质富裕，hiah-ê人心灵颠倒空虚，无chhōe-tio̍h纯正ê信仰soah去chhōe异端宗教活动来造成损失，比如奥姆真理教kap大卫教派。教会处tī chit种变迁ê社会状况中，到底ài如何去发挥教会ê功能，是教会重要ê课题。当咱想tio̍h chit-ê课题，咱mā ē-tàng发现教会有真chē负面现象值得省思。

（一） 现代化ê影响
主基督向学生讲：「Lín是地上ê盐，是世上ê光」。这是teh说明教会是为tio̍h人类存在tī世界中，但是chit-ê世界一直发展了真紧，尤其是chit-má ê人类有真chē辉煌ê表现；tī科技ê发展上确实带hō͘现代人生活上无比ê方便kap真紧ê生活方式。过去ê人生活tī步调khah慢之中，譬如我teh读神学院ê时，定定行一点钟左右去参加主日敬拜，一kóa朋友、同学沿路开讲，路līn无车，清幽koh安全，若是chit-má大概是无可能ê tāi-chì啊，chit种情形teh说明啥物neh？是现代化ê影响。Ē记tī四十年前，bat参加台南神学院举行ê教员灵修会，差不多四百人参加，课程安排kah真密，自透早6：30到暗时10：30中间只有12：00～13：00 ê中昼顿kap歇困时间，日时八点钟，暗时二点钟ê集训，时间是一礼拜以上，参加ê人各种精神饱饱、真有斗志。若今á日beh举办仝款时间ê灵修会，想是无啥可能啊，主因是teh现代化ê影响，现代人无chit种时间去做chiah-ê tāi-chì，现代人活tī分秒必争ê环境中，kap四十年前hit种清幽ê生活方式完全无仝。Tī chit种急变ê状况中，像过去hit种教会训练mā无必要啊，教会既然处tī án-ne ê教会中，当然就会受tio̍h影响，教会ê生活mā会受限制：譬如教会对时间ê控制，或者教会经营方式mā teh改变。牧师ê牧会方式kap心态lóng无仝款，以前对会友ê探访，乐谱ê处理，lóng kap现在大大无相仝。基督徒ê价值观kap心态相信mā有真大ê差别，当然四、五十年前ê基督徒信仰价值观mā会kap现代ê基督徒tī心态kap信仰ê理解体验顶koân lóng会有无仝ê所在。

咱知影tī chit种现代化影响之下，教会好好利用资源，用teh造就信徒方面必定会有正面ê效果，但是教会因为现代化ê文明，难免有负面ê影响：比如过去bat因为电视ê影响chiah致使基督徒有减少ê情形。基督徒ài清楚教会是存在tī社会以及时代潮流中，因此社会ê任何状况kap时代ê变迁加减lóng会造成对教会ê影响，当然咱无可能去避免或者拒绝chiah-ê，soah是必须去面对，这是基督徒具体ê教会生活内容，但是咱tio̍h用什么心态去面对现实ê社会和急变中ê现代化所带来ê真chē现象，基督徒tio̍h用信仰kap智慧去把握，去疏导负面ê tāi-chì远离咱ê信仰，chiah将有正面价值ê时代产物带入去咱ê信仰生活中，thang好tī信仰ê建立，这chiah是咱面对急变ê现代化siōng理想ê信仰态度。咱必须phah拚来分辨正面kap负面ê影响去面对信仰生活。

（二） 已经离开当初ê爱心（启示录二4）
启示录ê内容是主耶稣向当时ê七间教会提起in实际ê信仰状态；第一间to̍h是以弗所教会，头先主耶稣o-ló教会tī真道上真chē美好ê表现，行为、做穑、忍耐，主lóng知影，bōe容忍恶人、辨别真假使徒、为tio̍h主ê名ê忍耐到底，chiah-ê lóng teh讲以弗所教会是真值得o-ló--ê，但是主soah讲：「但是，有一件tāi-chì我boeh责备你；to̍h是你kā当初ê爱心离弃了」（启二：4）。本来以弗所教会中有美好ê信仰生活表现，对主耶稣有忠心，mā有辨明ê能力（chit件tāi-chì teh信仰上真重要）所以当时in ê信仰生活表现出积极kap主动。但是另gōa一方面in soah失去信仰生活中siōng重要ê爱心行为（尽心爱上帝，爱人ná爱己是信仰生活ê根本），in因为时间chit久chiah失去爱心。Chit句经节对基督徒来讲是chiok大ê警戒，mā thang体会出信仰所要求ê to̍h是持守真理，永远不断ê长进，chiah是信仰生活ê现实，信仰bōe因为时间来改变，是tī时间中永远不断成长。日本有一位学者用人kap人之间爱ê问题来说明chit句经节，表示出人ê性格kap操守将影响人对当初ê爱ê变化。有时tī信仰中ê爱，若用人ê观点来看无法度了解；比如马利亚用香油抹主耶稣ê动作，确实tùi外人ê看法是thó-chè ê行为，但是马利亚是用绝对ê疼表现tī主身上。Tī教会生活中mā有chit款事例，愿将家财全部献出（苗栗何姓基督徒献地hō͘戒毒中心），chit种绝对ê疼是信仰生活中所要求--ê，可惜因为人性ê软弱，基督徒teh信仰上失落了头先对主ê疼，这是现代教会值得思考ê问题，因为现代教会失去hit种对主热爱ê信仰情怀！Chit种疼ê衰退家己会影响tio̍h信仰ê事实上，因为信仰是表现teh疼上帝kap疼人ê生活中。

（三） 批评khah chè过实行
时代进步，自由ê风气是现代ê特色，教会tī现实ê社会中难免受tio̍h chit种世俗ê影响。虽然时代teh变，但是主基督ê真理是永远无变，古早时ê教会kap现代ê教会生活，lóng会因为社会变迁chiah有所影响，致使教会mā处teh变化ê中间。以前会有对待神职人员态度非常恭敬，我四十gōa年前牧会，若去会友家探访，伊喜乐ê情形实在真pháiⁿ形容；而且讲「先生我看你kah-ná天使」。Ē记细汉时庄脚ê会友对传道人ê态度实在是非常ê恭敬，但是tī现代教会中有会友公然骂牧师，有一kóa会友告牧师，有phah牧师--ê，若是背后ê批评、责备he lóng是真平常ê tāi-chì。M̄-nā对牧师，有时对kui-ê教会mā tiāⁿ-tiāⁿ用批评ê态度，chiah-ê人自认为是头家，用chit种心态对待教会实在是无应该，自古以来对待神ê仆人真恶质，佮意批评责难教会ê基督徒是bē受神祝福，因为教会kap牧师是代表神tī地上执行所托付ê使命。诚然，tī现实ê教会中有真chē ê缺失kap无完全，mā有一kóa m̄是真理想ê牧者，但是基督徒若用祈祷kap温柔代替责备kap批评处理教会问题，一定koh-khah ē-tàng荣耀上帝。

另外有关教会ê运作，有时难免mā会hō͘咱感觉m̄是真理想，有时kap咱家己有关系ê tāi-chì会hō͘咱感觉无自然，往往会提出意见、建言、批评；但是咱必须了解教会是共同ê团体，因此基督徒对待教会必须khiā-tī客观ê立场来看，bē-tàng主观意识过强，chiah是基督徒信仰正确ê表现。有时教会表现无一定合你ê心意，但是mā ài体会教会ê公众性，除了你以外iáu有别人ê存在，in ê看法无一定仝款，因此基督徒对待教会ê态度siōng好ê办法是「行动khah chē过批评」，教会是每一个基督徒所有ê，批评者往往跳出kho͘-á之外（已经无所属）所发出ê行动，既然是tī kho͘-á以外伊ná亲像俗语所讲ê「Phah拉凉而已」，咱也tio̍h了解批评者往往是无爱心ê表现，因为一个实在疼教会、有疼心ê基督徒一定bōe chhìn-chhái来批评无完全ê教会，m̄-nā án-ne，mā thang看出批评者ê心态以及人格ê缺失。若咱ê kiáⁿ儿真gâu批评、嫌东嫌西ê时，父母tio̍h ài kā伊注意kap引chhōa伊ê人格成长，tī教会生活中hiah-ê爱kā人批评ê人往往对教会无实际ê参与，mā bōe有实质ê信仰内容，这mā是现代教会值得警惕ê事实。

（四） 无关心灵性生活（灵性ê两极端、信仰ê两极化）
这mā是今á日咱ê教会真重要ê一件事实，因为现代基督徒生活有相当chē ê负担，无论是tī khang-khè上或者是家庭中lóng有各种无仝ê压力，无闲ê生活造成基督徒teh信仰方面所付出ê时间心力无够，因此影响tio̍h属灵ê性命，这是现代教会ài省思--ê。牧会中我tiāⁿ-tiāⁿ会做主日敬拜ê出席记录，主因teh想beh了解基督徒ê出席情形；通常一年五十二pái ê敬拜若有40 pái以上出席算是好--ê，khah chiap ê是20到30 pái之间ê khah chē，45 pái以上ê真少，这teh说明啥物neh？基督徒时常teh敬拜ê时间上受tio̍h 小khóa代、家庭问题、亲人朋友或者外出旅行等等因素ê影响bōe-tàng出席。一个基督徒若一直bōe-sái重视灵命ê成长，teh信仰方面是一件值得担忧ê tāi-chì，咱lóng知影属灵ê性命是建立tī家己ê追求kap体验，mā确立tī基督徒互相之间ê共同敬拜生活来ê，这mā是咱教会一直teh强调基督徒主日敬拜ê重要性，因为che ē-tàng加强基督徒灵命ê长进。另gōa一方面值得咱省思ê是极端狂热ê信仰，tī台湾教会中近来真时行神医布道，圣灵第三波或者权能布道等等，方法是替人chhih手祈祷，hō͘人phah tī土脚kā伊称做圣灵击倒，致使tī现代教会中造成真chē混乱，in tī圣经ê解释上mā有过份主观ê表达，当然咱无讲圣灵ê感动以及信心治病ê能力m̄好，但是chiah-ê恩赐m̄是人人lóng有--ê，上帝hō͘每一个人无仝ê境况无仝ê恩赐，这是咱必须了解ê。基督徒siōng重要ê是用爱心做基础，尽一切ê本份完成上帝所托付ê使命，作主尽忠koh良善ê仆人。六十年代一位留美ê电机工程硕士tī美国期间hō͘教会带领归主，非常热心，tńg去台湾了后放弃了高薪ê好khang-khè，去做教会ê事奉khang-khè，将家庭、bó͘、囝儿ê生活khǹg leh m̄管，试想chit种信仰kám值得鼓励？

结论：信仰tī时代ê潮流中，不断会承接真chē ê挑战kap危机，基督徒tio̍h用智慧kap信心去克服，将信仰引入美好理想ê境界，tī急变ê社会中发挥信仰ê价值。