《受恩蒙福的一生》

 | | | 转寄

Kap上帝同工

作者 林宗要 2011.01.16

哥林多后书五：20～六：1

回顾gín-á时，大约六十年以前台湾庄脚ê生活确实真贫苦，kap现代比起来，是天大ê差别。日本连续剧－「阿信」ê播出造成轰动，一kóa有年岁ê人看了后，真了解伊ê感受受，koh一pái引起回忆，引起真chē ê感想。

六十岁以上ê老大人，mā可能lóng体会过当时生活ê艰苦。Tī he款困苦ê时代，虽然是庄脚教会ê牧师，无论tī教会主持聚会或者做家庭探访，犹原西装革履，穿插整齐，hō͘人看了羡慕无停，连gín-á lóng会对伊起仰慕之心，tī in koh细ê心灵中，对牧师ê khang-khè、生活，加减lóng会有siàu念ê思绪。但是等家己mā teh做牧师ê时，chiah深深体会tio̍h牧师ê难为，kap细汉gín-á时代ê观感全然无仝。当然，牧师ê khang-khè，确实是神圣、有意义--ê、受tio̍h会友ê敬重、关心kap疼痛，我四十gōa年来ê牧会生涯，体验tio̍h会友对牧师ê情谊，有时iáu超过亲情。Tùi另gōa一个角度来看，牧师ê生活非常清苦。Mā可能受tio̍h过去清教徒精神ê影响，一般会友lóng认为牧师应该tio̍h ài食苦；teh牧会khang-khè上，有时无同心协力ê同工，非常无力感，有时iáu受tio̍h恶意ê批评kap攻击，真chē牧师ê kiáⁿ儿，大汉了后离弃教会to̍h是因为chit-ê原因。牧师tī教会受tio̍h委屈kap侮辱，对伊当teh成长中ê gín-á是真大ê心理冲击，有一kóa牧师gín-á tī长执会koh teh讨论伊ê老父留任问题ê时，伊ê心情会koh-khah恶劣郁卒，chit款tāi-chì ê发生对牧师kui口灶来讲，ná愁云惨雾仝款，siōng好避免。基督徒千万ài小心谨慎处理，bē-tàng hō͘传道人生活teh惊惶ê中间，che对双方lóng是不利--ê。「教会是上帝所祝福ê团契」，使徒行传二章描写初代教会，hō͘咱koh-khah清楚chit句话ê意义，伊讲「大家做伙过团契ê生活，只要是物件tio̍h公家用，互相分享，保持和睦ê关系，上主将得救ê人ta̍k工加hō͘ in」。教会所以会受tio̍h上帝ê祝福，是kui-ê团契发挥团队ê精神，干部虽然重要，若无全体动员配合，效果mā是有限--ê，这to̍h是初代教会ê特色。

当然，教会是一阵有罪软弱ê人聚集ê团体，难免有人性ê弱点，牧师、长执mā仝款，lóng有人性ê缺陷、软弱ê一面，如何去辅助牧师kap长执，是信徒信仰ê重任。

大家lóng知影，有人ê所在就有人ê问题，教会mā是。教会mài惊问题ê发生（若无问题是siōng好），问题若来就ài尽力去化解，甚至将伊变成美好ê见证，这chiah是基督徒信仰生活ê重点。每一位信徒lóng有责任参与教会ê事奉kap建设，hō͘上帝ê厝koh-khah理想koh-khah符合他ê旨意。若全体信徒lóng有chit-ê共识，相信教会koh-khah会讨上帝ê喜乐，koh-khah ē-tàng发挥功能。教会是上帝子民ê团契，信徒ê信仰生活内容ài符合上帝所要求ê。保罗tī伊ê言论上时常提起基督徒行事为人ê重要性。当伊hông chhōa到公会ê时，对犹太人大声喝讲「兄弟啊，我tī神面前行事为人，lóng是凭良心，一直到今á日。」（行传廿三：1）伊向罗马ê信徒讲：「为人行事ài光明。」（罗马十三：13），向哥林多教会ê信徒讲：「行事为人是凭信心，m̄是凭目chiu看tio̍h--ê。」（哥林多后五：7），向以弗所教会ê信徒讲：「Lín行事为人，lóng应该符合神呼召lín ê时所立ê标准。」（以弗所四：1），「Lín ê生活必须像光明ê kiáⁿ儿。」（以弗所五：8），向腓立比教会ê信徒讲：「Lín ê生活应该符合基督ê福音所要求ê。」（腓立比一：27），对歌罗西教会讲：「Lín行事为人ài对会起主。」（歌罗西一：10），tùi以上chiah-ê经节，咱看tio̍h使徒保罗对信徒行事为人ê期待，ài in ê生活确实符合「神ê子民ê标准」。Ài如何达到hit种标准neh？

（一） Ài了解信徒ê职责
基督徒应该了解伊tī伊ê人生ê舞台顶，到底扮什么角色，chit点非常重要，因为伊关系tio̍h伊kui-ê人生。做学生--ê若ē-tàng全盘了解老师教课ê内容，chit位学生一定是一个品学兼优ê好学生，将来升学一定lóng无问题，一定会照伊ê志愿进入理想ê学校读册。进入就业期ê青壮年，若ē-tàng了解伊ê所处ê环境，充分发挥潜能，全力phah拚，相信一定有发挥ê空间，hō͘事业koh-khah进入佳境soah大大发展。成家ê人若ē-tàng了解家庭对一个人ê影响是hiah-ni̍h大，伊必定会phah拚去建立温暖、甜蜜ê家庭，hō͘厝内ê人过tio̍h幸福美满ê日子。以上所讲ê真chē情况，siōng主要ê关键，是tī「了解」二个字顶koân，当一个人内心有所了解了后，一定ē-tàng产生积极ê原动力，化被动为主动，积极进取，全力以赴行向成功ê大道。日剧「阿信」，伊ê一生，运命坎坷，但是伊ē-tàng克服困难，勇敢面对，kā伊ê人生改写，成做家家户户lóng知影ê人物。

一个有原气有活力ê教会，是tùi基督ê福音有正确认知ê信徒所组成ê，信徒若了解基督kap家己ê关系ê时，自然会tùi内心产生出无比ê感动kap热情、积极主动去参与教会ê各种事奉，chit种发自内心，心甘情愿ê事奉，教会chiah ē-tàng复兴。若信徒lóng有chit种共识，chit种心态，教会必定会大大兴旺，成做理想koh成功ê教会。日本高知教会，有一位社会地位真koân ê长老，非常爱主，礼拜一定提早去教会，非常关心教会ê事工，见若排柴屐、整理庭院粪埽伊lóng bōe输人，教会有啥物欠缺，伊mā会主动处理，伊ê身份是日本众议院ê议长。以议长之尊，竟然tī教会做chit种服事，实在hō͘人敬佩，因为伊ê好见证，m̄知感动了jōa-chē部属。类似chit款事例，tī目前ê教会中，bōe pháiⁿ chhōe。信徒之所以有chit种疼主ê表现，完全tī伊对神有正确ê认知，来实际行动。

信徒若对「信仰」ê本质融会贯通，就ē-tàng表现tī生活上，bōe对牧师嫌东嫌西，毕竟伊mā是人，m̄是神，伊mā有软弱ê一面。咱应该多多替伊设想，mài用天使ê角度去衡量伊，过份要求kap责备。

（二） 如何kap上帝同工
身为上帝子民ê咱，ài如何kap他同工？
A） Bē-tàng疏忽细微ê事项。
一般来讲，大tāi-chì khah会hō͘人看重，微不足道ê tāi-chì，tiāⁿ-tiāⁿ hō͘人疏忽。重大ê事件对人有决定性ê影响力。但是tī人生ê境遇中，所tú-tio̍h ê tiāⁿ-tiāⁿ是一kóa小khóa tāi。Chiah-ê渺小ê事件，对人一生ê成败mā有真重要ê影响。伊有时会决定人ê运命，像尼克森就栽tī水门事件。水门事件tī当时ē-tàng讲是一件小tāi-chì，一旦爆发了后，总统lóng ài下台，表示负责，尼克森to̍h是án-ne phah无伊总统职位，chiah结束伊ê政治生涯。

第一pái世界大战之所以开始，原因真单纯，只是为tio̍h一个奥国太子hō͘人暗杀，chiah牵拖kui-ê世界，致使全球九百万人死亡，二千万人受伤。信仰生活mā是仝款，基督徒有时为tio̍h一件小事或者一kóa小动作，来造成终身ê遗憾。圣经内底有真chē ē-sái成做警告ê事例，比如夏娃只为tio̍h一粒善恶果来hō͘上帝赶出伊甸园：罗德ê bó͘，为tio̍h一个斡头看ê小动作soah变做盐柱。Tī教会内，有时对牧师讲一句无心ê话，soah致使牧师离开教界。有时会因为一kóa小动作，soah伤害tio̍h慕道友。Chit款类似ê事件，时常tī咱所处ê环境或者教会中发生，咱bē-tàng 无谨慎。基督徒ài kap上帝同工，必须注意细节，重视微小事工。主耶稣讲：「Kā一杯水hō͘门徒中siōng微小ê一个人lim，就一定会得tio̍h报赏。」（马太十：42），圣诗416首mā án-ne讲：「一滴一滴ê水成做海hiah大，一粒一粒土沙，结成地kap山」时间一分一秒，虽然微小，但是连结起来，就成了万万年。有时一个人犯错，看起来bōe án怎，无啥物好讲，但是伊ê杀伤力，soah ē-sái用来毁掉一个人ê前途。若咱ē-tàng施行小爱tī人间，相信chit-ê社会一定有大温暖。所以古早人用：「M̄好因为善细soah m̄去做，m̄好因为恶细soah去做。」来警告咱。基督徒tī教会中对主日学ê扶持、青少年ê关怀，失败者ê鼓励，以及对牧师ê关心代祷，其实lóng是微小事工，但是影响真深远。

B） 用疼kap耐心kap上帝同工
保罗bat勉励以弗所教会ê信徒讲：「Lín行事为人，lóng应该符合上帝呼召lín ê时所立ê标准。」基督徒ê信仰生活ài如何达到上帝ê标准？这是一个大课题。保罗讲；「Lín ài谦卑、温柔、忍耐、用疼心互相宽容。」（以弗所四：2）日文翻译做「用疼来忍耐互相ê缺失」，确实chit种生活方式，用疼相对待，是基督徒生活上bē-tàng欠缺ê，若基督徒用疼做出发点，互相疼互相容忍，必定ē-tàng替主做美好ê见证。保罗向帖撒罗尼迦教会讲：「愿主引chhōa lín，hō͘ lín专心疼上帝，而且koh有基督所赐ê耐心。」（帖后三：5），当我想tio̍h chit-ê问题ê时，就会想起「拚性命活」册中hit位日本长老用花kap祈祷改变了一位年青传道者ê pháiⁿ习惯ê故事。会友kap牧师ê关系也thang看做kap上帝同工ê重要一环。我非常期待，每一位会友用疼kap忍耐去对待上帝ê仆人，mài有「牧师是教会所chhiàⁿ ê」心态，chhìn-chhái kā伊hoah来hoah去，无kā伊尊重。若有意见无仝，看法无一致ê时，ài忍耐加沟通。主耶稣讲：「忍耐到底ê人，必得救。」（马太廿四：13），chit句话ē-tàng讲是基督徒处事成功ê秘诀。圣经上讲：「患难生忍耐，忍耐生老练，老练生ǹg望，ǹg望bē致使见笑。」（罗马：五：3～5）哥林多前书十三：4～7 mā讲「忍耐是疼ê表现」，加拉太五：22「忍耐是圣灵ê果子」，tùi圣经中ê这几位，咱koh-khah了解忍耐ê重要性，只有忍耐chiah会有完美理想ê人生，kap上帝同工chiah会有完善美好ê结局。

C） 用生活ê见证kap上帝同工。
有见证ê人生，chiah是上帝所喜乐ê，因为伊是kap上帝同工siōng好ê表现。见证本身to̍h是kap上帝同工，有见证表示伊ê品德行为受tio̍h肯定，无论是自我修养，家庭、khang-khè、社会公益ê参与lóng受tio̍h肯定kap o-ló，咱ài用现实ê生活表现出基督ê福音kap奥妙。无见证ê基督徒，ài kap上帝同工，恐惊只是破坏，lóng无建设thang讲，m̄-nā bōe荣耀主，颠倒阻碍tio̍h教会ê成长kap复兴。有一kóa会友通常khah注重心灵方面ê信仰，soah疏忽实际生活，比如家庭ê和谐、kiáⁿ儿ê亲职教育、家己ê khang-khè表现kap社会ê人际关系等等，soah m̄知chiah-ê所在，lóng是非基督徒注视咱ê所在。In无jōa知影基督教ê教义内涵，in重视ê是基督徒实质ê表现。Kap上帝同工，最后ê目的就是beh传福音，带领未信ê人认bat chit位真神，hō͘ chiah-ê人成做上帝国ê子民。到底ài如何领人信主neh？方式虽然chē，但是siōng要紧ê一点to̍h是家己亲身去实行，将圣经内底ê宝贵教示，tī生活中实践，用美好ê见证领人归主。长老会teh宣教一百周年ê时，bat做过问卷调查，tī一题如何领人归主ê方法中，勾选ê项目有（1）举办布道会（2）分发福音单张（3）鼓励参与教会活动（4）hō͘ in经济上ê帮助（5）职业传道（6）基督徒生活上ê美好见证。结果前五项只占8％～39％ê影响力。大部分信耶稣ê人，lóng是受tio̍h信徒实际生活良好表现ê影响，chiah决意加入教会。

讲真正ê，一般人是无jōa了解教会ê组织状况，mā无jōa清楚基督教教义，in决定信基督教，大部份lóng是受tio̍h信徒美好ê见证ê感召。因此，基督徒应该建立正确ê信仰价值观，这是kap上帝同工ê先决条件，伊必须是一个形像好、品德高尚、气质高雅、充分表现出内在涵养ê人，广受欢迎，chiah有气质去吸引人进入教会。

基督徒ài koh-khah 内外一致，bōe-sái kan-ta讲外表体面好看，内心koh-khah ài有仁慈、疼心、散发出清芳ê气味。Kap上帝同工siōng主要ê关键，是真gâu培育这欉带有耶稣基督福音ê美丽花种，hō͘伊生长大汉，进一步koh开出清芳美丽ê花蕊。这是基督徒ê重大责任。

总讲一句，基督徒mài辜负上帝ê恩典，ài phah拚去追求koh-khah有意义ê人生，实践保罗教示咱ê功课。