《受恩蒙福的一生》

 | | | 转寄

献身kap事奉

作者 林宗要 2011.01.09

罗马书十二：1-2

人性是影响人ê一生，mā是形成社会文化ê因素。近来，咱时常感觉咱生存ê社会ê品质实在太差，尤其若用欧美先进国家ê水准来衡量台湾社会ê状况，咱ê生活环境实在非常无符合人生存ê条件。

当然，咱早to̍h惯习活tī chit种环境中，咱有可能感觉iáu bē-bái，因为若tùi物质情形来看台湾ê社会，咱实在是处tī食好穿好ê富裕状况中，因为无论是食ê iáu是穿ê，项项lóng ē-tàng满足人心，有时甚至感觉咱ê生活过分thó-chè、无chhái，因为一桌二、三万kho͘ ê菜tī台湾真普遍（差不多一千美金一桌菜！）若用亚洲地区阿富汗（150）、尼泊尔（170）、寮国（180）、越南（175）ê国民年平均所得（美金）来比较，台湾一桌ê菜钱，in ài付出5～6年ê所得。虽然，经济成长造就了台湾ê富裕，同时伊mā为人心带来负面ê作用。Chit几年来ê台湾社会、自然生态暂时mài讲，真chē社会现象实在值得担忧：政治ê bē稳定、真chē情形hō͘人认为无公正、抢劫、绑票、爱博ê社会（hō͘外国人评为「kiáu国」，因为四界lóng the poah，比如过去ê大家乐、六合彩、股市等），实在是非常惊人。尤其近年来台湾人ê价值观念改变，kap过去ê骨力、勤俭完全无仝。尤其是劳工方面，一天thàn三、五千kho͘ 是平常ê tāi-chì，好亲像一堆沙仔担去lih四楼，koh再tùi四楼担一kóa废物落来，khang-khè时间tùi九点半到十二点半，工资ài四千kho͘。为啥物劳工会hiah-ni̍h贵？主因tī无人beh做，假使劳工市场人真chē，大概to̍h bē án-ne。为何人无爱做粗工？原因tī hiah-ê人欢喜轻松而且待遇好ê khang-khè，尤其是一、二年前台湾ê股市，只要二、三支涨停，就赢过二个月ê收入，chit种价值观对台湾社会ê人心、经济成长lóng无正面ê作用（比如江南案二ê主角出狱，有人竟然用英雄来欢迎in！），同时伊mā影响tio̍h台湾社会各种无仝ê生活方式，因为明知人生价值观ê建立是影响伊人生ê kui-ê事实，价值取向对tī人性ê影响mā真大，而且人性受罪所束缚、是有罪ê人性，有罪ê人性通常lóng有负面ê影响，咱ê社会现象所表现出来ê to̍h是人性ê描写，因为社会to̍h是tùi咱chiah-ê人所组成ê集合。

Tī-chia，充满tio̍h自私、自利，只求家己好处，m̄管别人死活，chit种自私ê人性是siōng标准ê人性ê表现，现代án-ne，过去mā仝款！

咱看tio̍h圣经teh描写耶稣ê门徒争论siáng siōng大，若照路加福音记ê，是发生tī耶稣kap学生最后ê暗顿，tī约翰福音ê记载，暗顿ê时，耶稣以身作则，告诫学生ài学习事奉人，成做人ê奴仆（约翰十三章）。Tī-chia，咱thang看出，chiah-ê无完全、软弱ê学生，至少（1）In ài ē记耶稣ê教示，因为耶稣时常kā学生讲：人子来是beh事奉人，甚至献伊ê身躯来赎人ê罪，因为主耶稣所传讲ê福音是事奉ê福音。（2）咱tī-chia mā看出学生争论ê时间m̄-tio̍h，in实在无了解耶稣基督，假使in了解耶稣所beh面对ê十字架，大概就无心互相争siáng siōng大，tī-chia咱mā看tio̍h学生ê无知kap bōe-tàng深刻了解耶稣ê状况。

Tī-chia，咱ē-tàng看出学生中自私ê人性，chit款tāi-chì完全影响tio̍h历代ê教会历史，tī kui-ê基督教历史中，咱发现教会不断有人性ê软弱hit面（无完全、软弱ê教会），部分教会khah无chit种纷争结党ê行为，但是有一kóa教会soah时常有，有时所表现--ê会影响tio̍h初信者ê信仰，因为in信仰iáu未坚固，会因为教会chiah-ê负面ê行为来跋倒、离开教会，甚至失去信仰，当然，教会若无chiah-ê吵吵闹闹ê tāi-chì to̍h khah ē-tàng荣耀上帝，但是咱必须理解教会是tùi软弱无完全ê人聚集ê所在，难免会有一kóa软弱无完全ê表现，chit-ê事实同时mā kā教会ê领导者、牧师、长执或者个机构ê负责人讲，必须ài用严谨ê心态去经营教会，chiah ē-tàng带领chit阵软弱无完全ê人，成做荣神益人ê团契，这chiah是咱教会存在ê使命。

因为上帝交托咱每一个教会（或者基督徒）去完成历史ê使命，基督徒tī教会生活中受召、受托，基督徒本身ài深深了解，这m̄是职位ê提升，是责任ê加重！咱若ē-tàng谨守chit-ê原则，就ē-tàng成做荣耀上帝ê门徒！为tio̍h beh完成受托ê使命，基督徒（教会）必须深深了解，比如保罗或者主耶稣ê教示－付出。

只有欢喜、肯付出ê事奉，必定会hō͘人生koh-khah完美丰盛，chit种完美koh丰盛ê人生是咱ê主向人所希求ê性命内容！基督徒必须ài自觉，ài不断来充实受恩ê生活，hō͘咱ê性命bōe辜负性命ê主，这是基督徒ê人生观。

（一） 主所喜乐ê事奉是建立teh疼ê基础顶koân
咱lóng了解teh事奉中，siōng重要ê是心ê预备，台语讲「心已经便」，因为无心ê人确实无事奉thang讲，事奉是多多付出，付出是beh牺牲、消磨家己，to̍h是对家己不利，这是事奉ê特性，因此kap自私ê人性无符合，所以事奉tī社会中是一件艰难ê khang-khè，咱社会所表扬ê好人好事，通常是因为chiah-ê人愿意事奉人，肯付出家己一切来帮助人。确实，人若ē-tàng建立用疼心为基础ê事奉，伊所付出ê事奉，必定会有决定性ê效果。创世记廿九章记载，雅各为tio̍h疼拉结，tī伊丈人tau做十四年长工，「雅各就为拉结服事了七年，伊因为深疼拉结，就看chit七年ná亲像几工，」（创世记廿九：20），为何雅各tī-che七年久ê事奉，不过看做ná亲像几工？关键tī伊深疼tio̍h拉结！虽然雅各tī-chia所表现ê疼是情爱，但是mā thang看出一个事实，to̍h是用疼做出发点ê事奉，就bē有负担，无负担ê事奉，to̍h是疼！

基督徒ê事奉，若beh蒙主悦纳，siōng根本ê问题是确立tī以疼做基础ê事奉，tú亲像保罗tī哥林多前书十三章：讲疼ê状况，无疼ê基础，一切ê作为lóng是无chhái工、无价值。基督徒一切事奉作为必须用疼做基础，若无to̍h ná亲像保罗讲ê：「我若将所有ê周济sàn-chhiah人，koh牺牲己身hō͘人烧，soah无爱，犹原tùi我无帮助。」（林前十三：3）。因此信徒事奉ê动机非常重要，只要有纯真正动机，咱ê事奉必定成做主所喜乐。咱也thang tùi路加十五章29结hit位长子向老父所提出「讨人情」ê作为，看出chit位长子对老父事奉ê内容，已经失去价值，因为有价值ê事奉是完全ê疼、m̄看重回报ê事奉，chit种疼ài ē-tàng不断成长（继续决定ê疼），chiah ē-tàng达成目标，ná亲像翁仔bó͘ tī上帝面前誓约，每一个人lóng用肯定ê态度回应对方，但是婚姻ê路上soah充满tio̍h极大ê变数（婚姻ê完美ài有继续成长ê疼），án-ne咱thang看出人ê无完全kap软chiáⁿ hit面，无论任何hông看做伟大ê人物（比如摩西、大卫、以利亚ê灰心），lóng会有无完全ê所在，若beh突破人性ê软弱面，人生必须ài不断继续成长ê生活，chiah ē-tàng hō͘咱ê疼成做完全，只有chit种更新ê疼ê继续chiah ē-tàng建立完美ê人生现象，同时tùi chia所出ê事奉自然有伟大ê作为，因为伊ê动机是真爱，所事奉ê是绝对、无条件ê付出，这to̍h是圣经中上帝所喜乐ê献祭，信徒ài有chit种体验！

（二） 主所喜乐ê事奉是建立teh顺服ê生活
Tī基督徒信仰中，疼是信仰生活ê一部分，因为有信仰ê人，的确是疼上帝，会疼ê人！这是圣经ê要求，因为一位人bōe-sái疼神疼人ê基督徒， bōe-sái算做有信仰ê内容。所以主所喜乐ê事奉是用疼做基础ê事奉，无爱心做基础ê事奉，往往会发生偏差！甚至有一kóa无正确ê表达观念。现在咱进一步来思考疼ê本质是啥物？

比如一位疼上帝ê人，伊必须ài表现出有顺服上帝ê生活，因为chit种顺服上帝ê生活是信仰者表达信仰ê一项实在ê内容。一个人beh如何证明伊kap上帝之间ê信仰？咱thang用顺服或者听从来形容伊，一个bōe-sái服从、听从上帝ê基督徒，是无法度hō͘人认为有信仰ê，因为疼上帝ê功课，是建立tī人对上帝ê话顺从，咱tùi创世记三章人类受引诱ê状况来看，三章16～17上帝命令人ài执守，上帝讲园中各样树顶ê果子，你ē-tàng随意食，只是分别善恶树顶ê果子，你bē-tàng食，因为你食ê日子一定会死。只要听从上帝ê命令，必定有安乐ê日子，但是tī第三章：人soah hō͘恶来胜利，m̄听从上帝ê话，违背了上帝ê命令，结果成做hō͘上帝弃绝ê人，这m̄是上帝所喜乐ê人生。咱koh再看撒母耳记上十五章，chit段圣经是记载以色列首任国王扫罗生死ê问题，先知命令扫罗王若是先到ài先等先知来，m̄-koh扫罗无听从上帝ê命令，自作主张（1）对亚玛力ê宽容。（2）自作主张献祭hō͘上帝。Tī旧约中献祭m̄是王ê khang-khè，是祭司，伊认为án-ne是the替上帝做tāi-chì，是teh事奉上帝，但是tī上帝眼中，伊是无听从上帝ê话。Tī信仰ê世界，信仰者kap信仰ê对象之间，若无建立顺从ê关系，信仰是bōe发生效用！因为tī上帝眼中，信仰ê重要性是teh听从！当扫罗向撒母耳辩解伊ê作为ê时，撒母耳soah向伊讲：「耶和华喜乐燔祭和平安祭，kám比ē过喜乐人听从伊ê话neh？听命胜过献祭、顺从胜过公羊ê油。」（撒母耳记上十五：22）

Tī-chia咱看tio̍h一个信仰ê真实内容，伊是建立tī信仰者对信仰ê主ê顺从、听从，因为tī上帝眼中，无顺从ê信仰是无价值、无内容。基督徒ê信仰生活to̍h是事奉ê生活，咱若beh有美好ê信仰生活（ē记leh！基督徒ê信仰生活是不断运行tī美好、理想ê事实内底！）因为伊是主所喜乐ê，一定bē-tàng疏忽基督徒事奉ê实在，因为事奉通常是表达信仰siōng基本、又koh是siōng积极--ê，teh事奉中，基督徒ài学习听从、顺服！

耶稣基督绝对顺服天父旨意，是人类得救ê应允！基督徒是承接这拯救ê应允者！

（三） 信仰ê完成ê事奉（事奉是基督徒信仰ê完成）
一位具备真诚ê信仰者，伊ê信仰生活中必定是充满tio̍h主所喜乐ê事奉生涯，咱ē-tàng tùi信仰者伟大ê事奉生涯来肯定in ê信仰，所以主所喜乐ê事奉是基督徒信仰ê完成。圣经中hiah-ê做美好ê事奉者，lóng kā in美好ê信仰留落来（印证了）tī人间，旧约中ê约瑟，新约中ê保罗等，咱ē-tàng tùi in事奉ê生涯看in信仰ê结果，尤其保罗tī年老ê时写hō͘所疼ê提摩太ê批中，咱看tio̍h伊所强调ê，伊苦劝少年ê提摩太ài忠诚事奉主，用忍耐ê精神kap专心ê态度来事奉主kap他ê教会，用有技巧ê方法，好好á引chhōa教会，mài因为家己少年soah hō͘人看轻，用谨慎ê心，尽本分去完成上帝所交托ê事工。

最后保罗告白讲：「那美好ê战我已经phah过了，当行ê路我已经走尽啊，所信ê道我已经守tiâu啊，tùi-án-ni了后，有公义ê冠冕我存留，to̍h是照tio̍h公义审判ê主到了hit日beh赐hō͘我--ê，m̄-nā赐hō͘我，mā赐hō͘只要疼慕他显现ê人。」（提摩太后书四章4～7）

Tī-chit段圣经，咱了解保罗肯定伊ê人生，尤其对主所托付ê教会ê事奉，伊实在尽siōng大ê本份，因此伊真相信有荣耀ê冠冕当teh等待伊。Chit种绝对自信ê信仰实在是咱信仰ê模范！基督徒必须ài有chit种信仰ê把握kap坚持。同时咱tùi保罗ê告白，mā ē-tàng看出保罗一生ê事奉kap伊信仰ê完成是一致ê，mā to̍h是咱tī-chia beh强调ê：主所喜乐ê事奉是信仰ê完成。

基督徒ê人生中，siōng大ê期待to̍h是信仰ê完全，ná亲像保罗tī-chia ê告白：「Tùi-án-ni了后，有公义ê冠冕为我存留」，假使当咱khiā-tī审判ê主面前， bōe-sái体会这一ê事实ê时，咱ê信仰to̍h是落空了。

Ē记leh！有时tī主面前，咱mā会听tio̍h主讲：「我从来m̄-bat你，lín chiah-ê作恶ê人，离开我去pah。」（太七：23）听见chiah-ê话ê基督徒iáu自信in是奉耶稣ê命令传道，奉耶稣ê名做任何tāi-chì，可见in hō͘主所拒绝是因为in所做ê m̄是主所欢喜ê！

基督徒必须ài谨慎来经营受托ê人生，tī咱事奉主ê生涯中，必须ài会记leh，一定若是主所喜乐ê！

当咱省思学生为tio̍h beh争取第一位ê纷争以及耶稣教导ê重心，用保罗tī罗马书十二章1～2节「所以兄弟啊，我以上帝ê慈悲劝lín，将身躯献上，当作活祭，是圣洁ê，是上帝所喜乐ê，lín án-ne事奉，是理所当然ê。Mài效法chit-ê世界，只要心意更新来变化，叫lín察验为何上帝ê善良、纯全thang喜乐ê旨意。」作咱信仰ê经营重点，hō͘咱ê事奉，成做主所喜乐，这chiah是有价值ê信心！