《受恩蒙福的一生》

 | | | 转寄

因为你ê存在

作者 林宗要 2011.01.02

使徒行传廿七：9-38

「存在」chit两字咱各人lóng ē-tàng了解，伊是指生存ê意思。但是tī一般ê生活中，人khah少用伊，因为伊ê含意略略仔带有哲学气味，事实伊mā是十二、十三世纪ê时Scholasticism（经院哲学）来ê语源，通常是tùi德语翻译出来ê，经院哲学tī中世纪流行三、四百年，hit-ê时代哲学to̍h是神学。

通常用tī教会既定ê教义，用哲学ê方式kā伊探讨、辨明、组织是哲学ê本分，范围是teh探究，批评或者改造新ê真理。

Ài调和、统一理性kap信仰是经院哲学主要强调ê点（9-12世纪发生期，13世纪全盛期，14-15世界衰落期）Anselmus（1033-1109），Abelardus（1079-1142），Thomas Aquino （1227-1272），Francesco（1182-1226）lóng是chit-ê时代ê代表人物，对当时ê经院哲学lóng有影响，chit句「存在」tī当时是beh表现一件事物ê存在所使用--ê。譬如：人是有理性ê动物，chit件tāi-chì ê理性动物是teh说明人ê本质。

人是啥物？是teh指示咱是「啥物」，to̍h是存在ê意思。经院哲学ê人，用「本质tī存在chìn前」。譬如：创造者上帝kap 被造物ê关系，一切ê tāi-chì lóng tī创造者上帝ê思维中（计划、摄理中）或者是用木匠ê制作器具，伊tī脑海中一定ài先有一个大概ê轮廓（比如现代制图ê寸尺、形体）然后chiah进行khang-khè，chit-ê预先ê计画是构成制好ê成品ê本质。Chit种情况thang用tī上帝kap人ê关系上。

所以人ê本质，是人今á日teh活或者是讲存在ê一个重要问题，tī信仰ê角度来思考ê时，咱就会想tio̍h上帝ê计画，kap期待tī人ê身上。当咱了解人ê本质ê时，咱自然会活tī上帝所期待ê人生境况中，去完成上帝所交托hō͘咱人ê使命。

这to̍h是信仰者ê存在，是tī人生意识真鲜明、真了解人生存在ê价值kap内容ê人生现象。Chit种信仰ê存在ê人生，是充满tio̍h活力kap有希望而且积极ê人生生活，因为tī chit种信仰ê存在中，信仰者充满tio̍h真明确ê人生目标。有方向ê人生，无论伊ê生存ê境况如何恶劣，lóng有可能克服、突破。

Chit种存在kap无意识ê存在无仝，tī今á日，咱tiāⁿ-tiāⁿ会听tio̍h或者看tio̍h人对存在ê问题ê糊糊涂涂，马马虎虎，对人生存在ê事实，无真明显ê；立场，丹麦ê思想家（神学家）祈克果对人生ê存在用一个真适当ê比喻，伊讲人ê存在ná亲像一个沈醉ê作sit人困tī马车顶koân，hō͘马拉tio̍h向熟练ê路上向前行，作sit人ê双手虽然执有缰绳，kah-ná一个驾驭者，但是事实不然，伊讲，ná亲像án-ne，真chē人ná亲像活teh，但是同时kan-nā无存在。虽然是khah深ê比喻，但是对人生存在ê问题有相当深刻ê描述。

确实tī人生ê现象中，咱会发现tio̍h真chē人生ê存在，是teh迷失、无意识中teh过人生ê事实，因为tī人中间，确实ē-tàng掌握tiâu人生存在ê意义kap内容ê人实在siuⁿ少。因为人对人生观bōe-tàng建立有价值ê人生观，致使人生bōe-tàng tī伊有限ê人生存在中，ē-tàng完成上帝所希求ê人生内容。

对基督徒来讲，应该ē-tàng了解人存在ê意义kap价值，所以tī正常ê范围内，基督徒存在ê意义应该比其他ê人koh-khah符合上帝ê要求。同时，tī基督徒ê人生存在中，mā ē-tàng了解经由伊ê存在对伊ê人生ê生存确实有相当程度ê影响面：因为一个人ê存在，m̄是只有单独ê自己，iáu有其他ê人ê关系上ê存在，所以当你iáu-koh继续存在ê时，你有责任（必须）kā你身上存在ê实实在在ê意义发挥出来，án-ne，你存在ê本身chiah ē-tàng成做正面、有价值、ē-tàng荣耀上帝ê存在，当一个基督徒建立chit种人生观ê时，家庭、khang-khè、社会甚至到教会生活lóng ē-tàng发挥真正ê存在ê价值。

（一） 保罗ê存在
咱用chit-ê观念来思考tú-chiah所念ê chit段圣经，来看当时保罗ê存在，若照现实ê情形来看保罗tī当时ê存在ê时，kah-ná失去了伟大ê价值kap效用，因为伊ê身份是一个犯人。Tī任何时代，犯人ê存在bōe hō͘人所重视ê存在，这是人性现实ê内容，咱若看悲惨世界ê主角，因为有过穿红衫ê纪录，出狱了后iáu hông歧视、看清、侮辱、讨厌，虽然伊出狱了后ê生活，对人类社会有贡献，但是hiah-ê人iáu用有色ê眼光看待伊，chit种现实，tī当时保罗ê时代，到现代ê状况lóng无例外，当时ê保罗tī he情形中虽然伊ê人品学识lóng属于一流--ê，但是因为系犯人ê身份，所以伊ê存在是无受重视。虽然hiah-ê人用歧视ê心态对待伊，但是伊是真清楚伊当时ê角色，伊是为福音ê缘故chiah挂铁链，伊了解伊虽然是犯人，但是伊是堂堂上帝福音ê使者，是上帝ê钦差，伊ê存在是高贵伟大ê，mā无因为伊现实ê犯人ê身份来影响tio̍h伊做上帝福音ê特使ê身份。虽然hiah-ê人用有色ê眼光teh看伊，但是伊真清楚，tī伊ê存在中，上帝所交托hō͘伊ê神圣使命，chit种认知，bōe因为环境来改变，颠倒是tī hit种人认为不利ê境况中koh-khah ē-tàng发挥上帝ê真理tī人生社会中。

有可能当时276人中有真chē财主、有权者，但是伊ê存在iau bōe-sái kap保罗ê存在相提并论，tī当时保罗存在中，咱ē-tàng看tio̍h经验kap信仰ê明显ê事实（27：9-11），保罗bat提出忠告，因为伊ê信仰hō͘伊了解，chit-pái出帆有危险，但是伊chit种tùi信仰ê灵感所提出ê警告，soah无hō͘当局接纳，「百夫长相信船主kap船长ê话khah过保罗所讲--ê」（27：11）chit种人生ê经验，往往会造成人性ê危机，因为tī人生中，人tiāⁿ-tiāⁿ夸口人生ê经验是真重要ê实在。

Tī咱现实ê人生状况中，经验kap上帝ê话相tú ê时，现实ê人往往会去选择人ê经验，因此船长ê高见比保罗ê论调khah简单hō͘人所接纳，是咱ē-tàng了解ê事实。Tī一般ê世界（m̄-bat上帝ê状况中ê人）有chit种见解是无法度避免ê，但是tī信仰者ê立场，若有chit种情形ê时，基督徒ê信仰必须kā伊检讨，同时tī咱ê人生生活中，tiāⁿ-tiāⁿ会出现chit种人性ê经验kap信仰ê问题tī咱ê现实生活中，咱必须去选择。看保罗tī当时ê存在，虽然无一定受重视，m̄-koh伊soah真清楚，tī伊ê存在中伊所负ê上帝交托ê使命，这to̍h是基督徒信仰生活ê真正内容，因为每一个人lóng会tī伊ê人生存在ê状况中tú-tio̍h chiah-ê问题。

（二） 得意ê南风（27：13）
保罗khiā-tī信仰ê立场提醒大家，伊讲「我看chit-pái出帆m̄-nā货物kap船，连咱ê性命mā会受害kap大损失」（27：10）但是至少有二、三项理由拒绝了保罗ê建议：

（1）若是百夫长相信船长kap船主ê话khah大过保罗所讲ê话（27：11），这to̍h是头前讲ê经验kap信仰ê问题，in认为靠in ê经验是过去in行船ê事实。

（2）Koh tī chit-ê所在过冬无方便（27：12A），现实ê人生所想ê to̍h是如何过方便ê生活，这是人生ê自然性。

（3）大多数ê人赞成，希望会tī khah方便ê腓尼基过寒天，伊是良港，生活khah方便ê所在，是hit-ê时代多数人ê共同目标，有顶koân chiah-ê理由已经充分表现出ē-tàng继续行ê内容，经验+方便+多数人ê意见，已经真充分，同时tī-chia in koh再体会tio̍h一阵微微吹来ê南风，当时in ê船是beh向西北出发，所以南风对in ê状况非常有利，有以上所列举ê理由，加上chit种自然环境，kám-m̄是对in ê航程有决定性ê帮助？

所以众人认为得意就启锚，照in ê想法，这阵微微吹来ê南风，to̍h是助in ê绝大ê良机，因为认为这阵南风会助in teh向西北驶ê过程中koh-khah有效力，to̍h是顺风m̄是逆风，但是当in出发无gōa久，船就tú-tio̍h真惊人ê暴风，完全失去了控制无法度自主，船hō͘风扫，无法度承受，就kù-chāi伊漂流（27：15），通常是船长teh控制船，chit时人已经无办法，hō͘风所控制，失控ê船是何等ê危险。

今仔日tùi chit件tāi-chì，咱ē-tàng学习几件tāi-chì：
A. 人ê判断有时会têng-tâⁿ
Têng-tâⁿ ê判断往往是人生生活ê常客，tú亲像当时hiah-ê有影响力ê人（多数人）lóng感觉一阵微微来ê南风，对in ê现实有帮助，这是人正常ê价值判断，靠人ê经验kap分析，但是事实soah证明人ê判断是têng-tâⁿ ê，因为大自然ê运作有时是超过人ê常规，譬如风台kap地动等。

B. 人ài听上帝ê话chiah bōe危险（chiah有平安）
保罗ê先见之明是经由上帝ê指示，但是可惜当时多数人m̄听伊，结果in tú-tio̍h chiok惊人ê危机，虽然无性命ê危险，但是全船soah报销，主因tī in无听从上帝ê声音，chit-ê事实kā咱讲，了解安全ê人生是确立teh听从上帝ê话，伊ê话是永远bōe错失ê。

C. 外在境况ê引诱造成chit-pái航船ê不幸ê另一个原因
To̍h是tú亲像顶面所讲ê经验、方便、多数人，chiah-ê已经够in出发，同时koh增加一阵微微ê南风，chit种外在境况动人ê现实ê影响有真大，tī咱ê人生ê存在中，人tiāⁿ-tiāⁿ会挡袂牢chit种外在境况ê引诱，表面上看起来是胜数ê人生，但是往往有负面ê人生结果，这是基督徒ài特别注意ê存在。

（三）因为你ê存在
现在in既然m̄听保罗ê话chiah tú-tio̍h真大ê危机，确实当时全船ê人lóng处tī真恶劣ê状况中，chit种危机往往会hō͘人生活tī绝望中，因为in ê性命当teh受tio̍h真大ê威胁，chit种危机ê日子连续有十四工之久，这是真惊人ê人生存在，无食、无lim、甚至无困，有可能是当时ê状况，因为人生ê存在若受威胁ê时，通常ê人lóng无法食困，若是tī危难中iau ē-tàng大食大lim，he是无正常ê，tī chit种危难中ê角色是基督徒应该有ê本分，众人久久无食，保罗khiā-tī in中间讲：「各位啊！Lín本该ê话……」（27：21），伊ê话是tùi上帝ê启示chiah来，是上帝ê话，对人生ê存在有正面ê作用，基督徒ê存在to̍h是无论tī任何状况中，设法hō͘人听见上帝ê话tī人中间，这是基督徒先知ê使命，hō͘人听见上帝ê话，tī今á日是基督徒存在ê因由，既然chiah-ê人以前m̄听，chit-má tī-che境况中，保罗所讲ê话得tio̍h证实，「现在我劝lín安心」，tī危难中上帝ê话koh再出现是人类ê希望，tī当时ê境况中，mā只有保罗ê话是唯一ê价值，因为保罗所讲ê lóng有证实，所以伊讲ê话成做hiah-ê人遵守ê唯一标准，连百夫长kap船长lóng tio̍h听伊ê话。

Tī hit-ê危难中，保罗ê话对所有ê人有决定性ê因素，ē-tàng用安定剂来形容伊。伊kā大家讲，伊所敬拜ê上帝bat指示伊，全船是有惊无险，船虽然会损失，但是276条性命lóng会平安，保罗当时ê存在成做hiah-ê人存在ê重心kap传达上帝ê信息，m̄是伊本身有chit-ê才能，是

1）伊所服事ê上帝ê指示
本来in lóng绝望了，但是因为保罗ê存在，hō͘当时ê众人tùi绝望中成做有希望ê人生，基督徒必须认清咱是作光作盐，伊ê存在，to̍h是hō͘ in人生有希望kap光明ê实在，咱tiāⁿ-tiāⁿ看tio̍h教会ê标语，基督是现代人ê希望，他是tī教会mā to̍h是咱chiah-ê基督徒身上！

基督徒ê存在必须hō͘ in当时ê境况有稳定ê作用，tī绝望中带hō͘ hiah-ê人希望是基督徒存在ê价值，比如当时保罗ê存在，hō͘全船ê人tùi绝望中有希望！

2）因为你ê存在hō͘别人受tio̍h祝福
假使当时若无保罗仝船，相信伊ê结果必定是悲惨ê，但是因为保罗ê存在soah成做chiah-ê人mā受tio̍h祝福，信仰者ê存在，tī现实ê境况中mā有chit款事实。基督徒必须ài有chit种存在ê内容，经由咱ê存在，至少hō͘其他ê人mā会受tio̍h祝福，tùi咱ê存在hō͘人蒙恩，这是基督徒存在ê基本问题。

3）保罗tī危难中ê角色——患难中ê安慰
保罗仝款mā是tī危难中，ē-tàng有稳定ê价值，必须ài清楚现实ê境况，保罗因为tùi上帝得tio̍h启示，伊深信上帝ê引chhōa kap保守，因此tī别人lóng无法食无法度困之中，伊soah ē-tàng表现出绝对ê信心kap能力去安慰人，基督徒ê现实存在原理kap che相仝！咱负有安慰危难中ê人ê使命，危难中ê使命，是教会ê本质，德国ê潘霍华kap日本ê内村鉴三（长老教会ê国事声明，教会ài成做政府ê原配，bē-tàng为细姨）。

结论：人生ê现实比如船tī大海中，基督徒ài tī大船中（社会、世界中）发挥咱存在ê价值kap作用。