《受恩蒙福的一生》

 | | | 转寄

有名无实

作者 林宗要 2010.12.26

使徒行传十九：11-20

「基督徒」chit-ê名称是tùi安提阿开始，真可惜有耻笑ê意思，并无善意，但是后来ê基督跟随ê人lóng欢喜用此名称来使用tī基督门徒身上。一个人beh成做基督徒实在是无简单，尤其tòa-tī台湾ê基督徒koh-khah ē-tàng体会beh达到基督所要求ê标准实在无简单，因为tī台湾教会中，iáu存留真chē过去ê迷信kap习俗，比如符仔咒、风水、相命冲克等不良ê习俗，譬如一位牧师ê cha-bó͘-kiáⁿ，是一助产士，tī庄脚时常帮人接生gín-á，但是对象大部分是教会以外ê人，mā就tiāⁿ-tiāⁿ会有一kóa kap世俗认同ê风俗习惯，比如bē-tàng动胎气、床母等等作为。Tī某教会有一位执事，相信风水，听信风水师了后，to̍h带伊tńg去旧厝看风水，改变大门，家己ê套房，mā是因为冲到啥物，soah致使seng-lí bōe顺，就全部拆掉重建，结果开了10～20万kho͘（20年前）。Mā有真chē基督徒相信算命，chit类实例tī咱教会生活中mā四界通看tio̍h，有时是非初信者，或者是二、三代信徒，甚至是出tī传道者ê家庭，chit种情形teh说明，过去ê传统习俗、迷信ê风气对人心ê影响非常大。当然tī án-ne传统社会中ê基督徒难免mā会tú-tio̍h类似ê情形。

有时teh tú-tio̍h争议性koân ê事件，koh再经过会外ê亲成朋友讨论，基督徒往往会动摇伊ê信心，特别teh办丧事ê时，往往有一kóa无法度自主ê基督徒因为亲成朋友ê声音khah大来改变原则，做一kóa无合信仰ê作为，这是台湾ê庄脚教会tiāⁿ-tiāⁿ有ê状况。当然chiah-ê问题，主要关键tī信徒ê信仰kap伊ê态度。一位完全了解基督教信仰ê信徒，伊会承担一切，m̄惊外来ê压力来贯彻真理。

反之，一个信仰m̄是讲真坚强ê信徒，当伊处tī环境良好ê教会生活中ê时，bōe有问题，但是当伊处tī一般传统习俗中ê时，tiāⁿ-tiāⁿ无法度把持信仰ê原则，因此会有无合基督教信仰ê行为出现，比如红婴仔ê收惊、搬厝ê时看ê时辰日期、嫁娶拣日子ê时等等lóng会发生tī基督徒身上！

一方面是信徒生活ê环境，用咱家ê状况做例，亲属中遇任何tāi-chì，lóng会kap咱参详，chit种环境中是绝对bōe有迷信ê习俗存在。

另外一方面，信者本身ê信仰型态mā是主因，因为伊ê心中所建立ê信仰，to̍h是伊处事ê原则，这to̍h是为何教会一直teh强调信徒建立正确坚定ê信仰ê原因！因为每一个基督徒lóng是耶稣基督ê精兵，精兵有作战ê使命，是处tī关键ê时刻，责任重大，军队精良是决定战事成败ê原因，当然iáu必须整体ê配合，比如精神、使命、操练、武器、领导者，chiah-ê整体ê完备，是取胜要件，所以基督徒beh成做主所要求ê精兵，伊必须具备属于基督应该有ê条件：整体性美好ê信仰，因为伊是决定基督徒信仰生活ê内容kap教会成败ê原因。因为当所有信徒lóng是精兵ê时，咱ê教会一定会成做坚强ê教会（无一定是人chōe、钱chōe），当所有ê信徒lóng是老弱残兵ê时，那有加ê时间做其他tāi-chì？自身难保，那有闲去传福音？

所以基督徒一定ài名符其实。我真欢喜强调「像样」（有款），基督徒一定ài有基督徒ê样式。假使基督徒tī社会生活中、tī群体中表现出佛教徒ê款或者道教徒ê款，ài如何荣耀上帝？保罗讲：「信徒是耶稣基督ê香气」，tī社会上无法度hō͘人闻tio̍h属于耶稣ê香气ê时，he是基督徒siōng大ê悲哀，信徒beh做耶稣基督ê香气，m̄是只tī礼拜堂中或者教会团契中而已，因为tī hia真简单表现出来，重要ê是tī一般人中成做耶稣基督ê香气，这siōng重要。

Beh表现有属于基督ê香气ê人，一定ài有信仰，信仰所发出ê生活to̍h是耶稣基督ê香气ê siōng好见证，mā只有chit种生活ê见证，chiah ē-tàng益发流露伊ê香气！

（一） 了解基督向信徒要求啥物？
基督徒必须了解，咱是藉tio̍h主ê宝血所赎回，是基督用koân价kā咱赎回，重生ê性命，bōe-sái koh再依存tī乌暗、垃圾中，圣洁ê人民是为tioh8beh荣耀上帝chiah存在。Beh说明基督向信徒所要求ê实在是siuⁿ-chē了，但是咱必须了解一件tāi-chì，to̍h是他向咱要求ê kap一般人有所无仝：

1） 主tī该撒利亚腓立比ê境内，问门徒讲：「人讲我是siáng？」意思是耶稣ê学生以外ê人chiah-ê未信主ê人对耶稣ê观点，in如何看耶稣？是圣人、伟人、先知或者有疼心ê人？Chiah-ê lóng无重要，主耶稣siōng关心ê是「Lín讲，我是siáng？」这是主耶稣ê重点，一般人对主ê评语，对主ê心态，对主ê信仰lóng无重要，他所关心ê是chiah-ê ta̍k工kap主耶稣共同生活ê学生，「Lín对我ê观点kap信仰是啥物？」是m̄是kap一般人仝款看主耶稣是一位了不起ê圣者？彼得tī-chia代表学生发言、告白学生ê信仰，伊讲「你是基督，是永生上帝ê kiáⁿ儿。」对这信仰告白，主耶稣真满意chiah o-ló彼得ê信仰。

2） Tī约翰第六章中，主耶稣讲「我是性命ê粮，人若食这粮就一定永远活teh……」，当时群众对主耶稣ê信仰有偏差，真chē人离弃了主，chit时，主对hiah-ê离伊去ê人无囥在心内，他所关心ê to̍h是chiah-ê kap他共同生活，属于他ê众学生ê态度。「Lń kám mā beh去？」（约翰六章：67），众人lóng离弃我，lín也tio̍h离弃我mah？这是主siōng关心ê问题，iáu好，彼得chit时chūn koh代表学生回答「主ah，你有永生之道，阮beh归tùi siáng neh？阮已经信阿，koh知影你是神ê圣者」（约翰六：68、69），非常伟大ê二次信仰告白，tī-chia，咱thang看出彼得伟大ê信仰性格。

以上二位圣经kā咱讲，耶稣基督kap咱ê关系是非常特殊、密切ê。现在咱koh再tùi圣经来思考，耶稣要求咱啥物？

A) 我是葡萄树，lín是枝子（约翰十五）
Chit-ê比喻咱lóng了解，伊ê重心tī结果子是枝ê使命，beh完成chit-ê使命ê唯一条件to̍h是结果连tī树身，「因为离了我，lín就bōe-sái作啥物」（约翰十五：5），这是teh kā咱讲基督徒ê信仰生活siōng基本ê问题，to̍h是无时无刻ê kap主相结连。所以咱了解，主耶稣邀情咱ê to̍h是不断kā他结连，因为有所作为ê基督徒必定是结连tī主基督ê信仰，hiah-ê脱离主基督ê人绝对bē有所作为，bōe结果子！有成就、有作为、成功ê人生kám-m̄是你我所切切ǹg望ê？

B) 基督是身躯ê头，信徒lóng是肢体
保罗用这说明耶稣基督kap教会ê关系，一方面指出教会ê头是耶稣基督，教会ê基石是耶稣基督，这是咱ê信仰内容，基督徒to̍h是属于基督ê chiah-ê互相联结ê肢体，tī哥林多前书十二章，保罗用身躯无仝ê肢体来说明基督徒ê教会生活一定ài重视肢体性，所以tī咱教会生活中，真重视有相通bo̍h，互相合作，来发挥教会ê整体力量（有一kóa教会ê个体ê力量有发挥，但是欠缺教会ê整体力量）

C) 我是牧者，lín是羊群
约翰十：11～18，主是好牧人ê比喻，这mā是主向咱要求ê一项真理，他知影人世间ê险恶，羊群若无tòe牧人，往往会发生极真大ê危险，所以主要求属于他ê人：1）听牧者ê声音，基督徒ê信仰生活所bē-tàng欠缺ê条件to̍h是不断听tio̍h主ê声音。2）好好á跟随牧者chiah ē-tàng保全性命ê安全，因为若tú-tio̍h凶恶ê敌人，伊软弱无法度抵抗，但是只要有牧者tī边á，就ē-tàng生活tī绝对ê安全中间。

各位ah！Chiah-ê是主耶稣时常要求tī伊ê信徒事实，咱必须ài用严肃ê心情去省思，咱ê信仰生活是m̄是符合主耶稣ê要求？

（二） 有名无实
咱已经讲过，主向咱要求ê是beh信徒kap主有结连ê信仰生活，bē-tàng做一个有名无实ê人，主耶稣tī山顶宝训结束ê时bat警告过信徒「只要称呼我主ah，主ah ê人bōe-sái lóng进天国，只有遵行我天父旨意ê人chiah ē-tàng入去」（太七：21），练痟话ê信仰是无作用ê，信仰ài有实质内容，有行动chiah有价值。

主耶稣向信他ê人所要求ê重点to̍h是真实有内容ê信仰，名符其实chiah是基督徒ê本质mā！Tī教会ê生活中，咱mā看过真chē有名无实质ê基督徒，而且差不多tī所有教会中lóng有chit种人，若讲伊无信仰，但是soah有是受洗、登记做会员ê基督徒，若讲有信仰，事实是除了受洗外，tī伊ê身上chhōe bē-tio̍h一点信仰ê气味，主耶稣tī马太廿三章，向当时ê法利赛人所责备ê to̍h是án-ne，in ê外表，无论tùi任何方面来看，lóng是标准ê信仰者，敬虔、热情、宗教气氛真厚，但是事实上，in只是外表做hō͘人看，信仰kap生活无做伙，所以主讲in假冒伪善。当然in ê心灵无kap上帝契合，这是咱所了解ê。信仰ê内容，siōng重要ê to̍h是信仰者kap信仰ê对象一定ài有直接ê契合，mā to̍h是头前所提起--ê，信徒kap耶稣基督ê实质关系，chit-ê关系若无建立，信仰者永远得bē-tio̍h信仰ê能力，无信仰ê能力，自然就bōe产生信仰ê价值。

信仰ê价值，m̄是用这个名词当做装饰或者古董，是藉tio̍h伊，tùi信仰者身上发出信仰ê清芳！当然，beh发挥信仰ê功能，信仰ê本质一定ài有相当ê标准，若无就无作用，伊关键性ê问题，是在tī信仰ê实质内容，mā to̍h是基督徒kap耶稣基督心灵ê关系，比如头前所提出ê问题：信徒必须kap基督有完全ê结合。1）听从他。2）tòe他，chiah ē-tàng完成做基督徒ê使命。主耶稣向学生讲「若有人beh tòe我，就当舍己，偝起伊ê十字架来tòe我。」（马可八：34）Chit种认真phah拚ê生活方式，to̍h是基督徒ê信仰生活，因此，kap耶稣ê关系若无调整好，实在是无法度完成。

因此基督徒ê信仰生活，必须ài tī平常时，不断kap主耶稣有良好ê关系，m̄是只有形式ê信仰，比如耶稣向法利赛人所讲ê——假冒为善、无内容、有名无实ê信仰。台湾光复了后，有一kóa庄脚人tùi城内买水道头tńg去厝，tī墙顶koân挖孔kā伊插入去，但是phah开水道头soah无看tio̍h水，有人买电火chhu-á tńg来，因为无电，电火朱仔bōe发光，基督徒ê信仰内容必须ài kap耶稣基督建立良好ê关系，kap能力ê源头有直接来往，运用ê时chiah有能力供应，而且源源不绝，基督徒kap上帝之间ê热线建立是信仰ê切实性格，因为咱必须会记主耶稣所讲：「因为离开我，lín就bōe-sái做啥物。」（约翰十五：5）

（三） 有名无实ê结果
Tī社会中，咱ē-tàng看tio̍h有一kóa有名无实ê人生，外表装kah真有内容，内面soah是一无所有！无论任何状况，chit种有名无实lóng是人生ê不利，信仰ê世界koh-khah是án-ne。

圣经使徒行传十九：11～20有án-ne一段记载，hō͘咱了解人生中有一kóa惊人ê结局往往是tùi有名无实所造成。

A） 无能力
In ê作为是期待发挥能力，但是实质上in是无内容、自然无能力，因为人ê能力bōe-sái假，台湾话讲「无毛鸡假大格」！kan-ta有名，无实质内容是有名无实ê结局。人生生存ê重点tī能力ê持有，无论学问、经济、khang-khè、生活、信仰，人一定ài尽全力来积聚人生ê能力，运用tī人生各方面，今á日咱一切ê phah拚作为，to̍h是the保存人生资源ê能力，因此必须成做名符其实ê人。

B） 受伤害
有名无实ê人，往往有夸耀ê作为，家己认为了不起，soah m̄知家己是siōng可怜ê人，tī人间社会中，有真chē chit种有名无实ê人，因为in ê作为，往往造成伤害家己ê结果。

C） 见笑ê收soah
通常抱chit种心态ê人，伊ê心中lóng抱有一种优越、成就、体面ê人生状况，佮意夸耀伊所有ê一切（但是事实是无内容ê人生，膨风臭弹、夸口是chit种人ê心态），tī人生中，若有chit种心态ê时，往往会tú-tio̍h见笑ê下场，家己hō͘家己见笑ka名声扫落底，tiāⁿ-tiāⁿ是有名无实ê结果。

D） 连累主ê名
用信仰ê立场看chit-ê tāi-chì ê时，咱就ē-tàng体会tio̍h chit款事实。有名无实ê基督徒tiāⁿ-tiāⁿ是hō͘主耶稣ê名受tio̍h侮辱，因为chit种人ê人生结局tiāⁿ-tiāⁿ是负面ê，是bōe-sái荣耀上帝ê人生，这kap基督徒存在ê目的无符合，因为基督徒ê存在to̍h是为tio̍h beh荣耀上帝，无荣耀上帝ê作为ê信徒，是主所无喜乐ê。

结论：了解人生ê结局目标是胜利ê人生，只有充实、有内容chiah ē-tàng成就人生ê胜利。胜利ê人生ē-tàng荣显主名，hō͘主ê道大大兴旺（使徒行传十九：20），ē-tàng感动人（十九：18），ē-tàng去邪导正（十九：19）。