《受恩蒙福的一生》

 | | | 转寄

旷野ê路

作者 林宗要 2010.12.19

使徒行传八：1-8；26

欲望是性命ê原动力，根据心理学ê讲法，人若ē-tàng适当满足需求，对伊身心lóng会有正面ê作用，若tiāⁿ-tiāⁿ tú-tio̍h需求bōe-tàng满足，往往会造成人生ê不幸kap悲哀。因为需求是人心中ê理想，chit种心中ê理想若ē-tàng得tio̍h满足，对人生来讲是一件非常重要ê tāi-chì。咱thang tùi细汉gín-á需求得tio̍h满足ê hit种欢喜感受tio̍h伊欢喜ê心情。咱大概mā lóng有chit种经验，tī细汉ê时父母或者亲人hō͘咱一件心爱ê物件，hit种满足感kap喜乐是真深刻ê，chit种感受tī人格ê形成中占有非常重要ê份量。

真chē青少年期ê心身症，tiāⁿ-tiāⁿ是基于chit种需求不满ê状况来产生，有人是tī感情上，有人是tī学业ê过程中，chia有一ê实例：某某人有一个kiáⁿ，家境小康，对孤kiáⁿ期望非常koân，自细汉灌输伊人生ê目标是博士或者医生，因此ài读一流ê高中，所以初中ê成绩必须保持相当水准，chit种强大压力下，chit位学生考tiâu台中一中，全家人非常欢喜，认为将来ê愿望ē-tàng达成，但是chit位学生soah tī一年仔下学期出现状况，转学转kúi-nā-pái，mā是无法度得tio̍h高中文凭，后来hō͘精神科医生诊断出精神分裂症，一直用药物控制，soah无法度过正常人ê生活。Chit种需求不满所引起ê病态人生，tī咱ê社会中是真chiah看tio̍h ê tāi-chì。M̄-koh当咱细察人生ê时，咱就会了解，人是无法度完全满足人生所有ê愿望，这是残酷现实人生ê内涵。「人无千日好，花无百日红」，to̍h是teh说明人生ê现象。确实咱若用人生ê理想kap现实来kā伊省思ê时，就会了解，人心中ê理想tī现实ê人生中无一定会完成。当然有达成ê，mā有部分达成ê，有ê甚至全然破灭。Chit种完成jōa-chē ê程度是形成人生有满足bo̍h ê主因。若完成siuⁿ少或者是完全无法度完成，造成人生真chē失败，chit种失败ê累积，会成做真大ê压力，人若一直活tī压力中间，早慢会出问题，心理学家以水坝做例来说明人生ê生活kap日常ê压力，因为人所ē-tàng承受ê压力有限，就像水坝siōng koân ê水位，超过伊ê限度，就会发生惊人ê危机。Tòa-tī北部ê人tiāⁿ-tiāⁿ经验tio̍h石门水库泄洪ê时刻，主因是水库ê水位超过警戒线ê时就会有危险，因此需要调节水量，将部分ê水泄放来保持安全，这mā是近代化心理学者一直强调ê，人teh tú-tio̍h重大压力ê时，一定ài有适度ê发泄，来维持身心ê健康状态，这mā是现代学校设有辅导老师ê主因。现代青少年心理ê压力非常沈重，照常理来讲，求生是人ê本能，为何chiah-ê天真少年会有人想beh结束宝贵ê性命？最近就有kúi-nā件学生自杀事件：成大廿三岁电机系程姓学生跳楼，高雄海专工商美工科三年级萧姓女生食安眠药自杀，新营高中一年仔黄姓男生吊死，成德国中张姓女学生跳楼等，m̄管境况如何lóng teh说明，chiah-ê青少年ê压力过分沈重，因此造成崩盘，若无是bōe去自杀。咱ē-tàng tùi chiah-ê事件中体会tio̍h，人ê环境kap生活上所产生ê压力，对人生直接ê影响，这mā是现代父母必须加强关心ê重要事实，尽力hō͘ kiáⁿ儿生活tī khah舒适ê环境中，同时mā ài尽量减轻kiáⁿ儿teh学习中ê压力。但是处tī台湾chit种现况中，咱ê青少年怎样ē-tàng免受chiah nih重ê学业压力？省教育厅公布八十四年度学生意外事件死亡四四八人、伤者二八五四人，车祸、自杀、淹死、中毒、相phah、凶杀……等，五月份人数siōng chē，是学生ê危险期，可见面临升学、就业ê压力kap选择，lóng会影响tio̍h情绪。Chiah-ê数字hō͘咱ē-tàng koh-khah了解现况，这是一件值得深思ê人生现象。用信仰ê角度来思考chit种人生现象ê时，咱mā会体会tio̍h chit种严肃ê真理。上帝ê恩典kap他所疼ê子民同在！Chit种关系应该有正面ê意义，mā to̍h是上帝ê慈疼必定施hō͘ tī上帝所疼ê人身上，引chhōa in ê人生事事顺利亨通蒙福，因为这mā是上帝ê应允。但是tī信仰ê路径上上帝所祝福ê人生无一定事事亨通，万事如意。确实，咱ē-tàng tùi教会史来体会chit种状况，教会受迫害，基督徒性命tī水深火热中，若用人ê观点来看，或者无法度了解，为何上帝竟然hō͘他所疼ê子民行tī旷野ê道路（出埃及时ê四十年旷野ê经历）？亲像当时ê使徒腓利，伊tī撒玛利亚有相当做功ê表现，忽然受圣灵指示ài伊离开伊熟练有事业基础ê环境，往迦萨之路！因为人人lóng真清楚，he是旷野ê路！对人生来讲，包括心灵ê世界，旷野之路，是人生khah无欢喜ê所在，因为那内底无方便kap危险存在，伊mā是属于人生负面ê现象。M̄-koh，基督徒必须了解，行chit种旷野之路，mā是基督徒信仰生活一件一定ài经过ê，是每一个基督徒lóng无法度避免ê信仰历程，只要你用信心kap顺服ê心态去行上帝ài咱行ê旷野之路，你就会发现上帝ài咱做ê事工，竟然tī-chia荒郊野外ê路径上！Chit种信仰ê经历，kap一般人ê想法是差不多ê。

（一） 腓利到撒玛利亚城
圣经记载，当时ê教会受tio̍h相当大ê迫害，有第一位殉道者司提反，koh有真chē人hông关起来，本来chiah-ê门徒一直tī耶路撒冷，一方面in有好ê信仰经历，有理想ê教会生活（使徒行传二章后段），另外一方面in期待主koh再临，beh解救所有ê基督徒。Tī教会生活中面临án-ne严厉ê迫害，有时hō͘人无法度了解上帝ê旨意。相信tī基督徒ê现实生活中，mā tiāⁿ-tiāⁿ体会tio̍h用人ê观点无法度了解上帝ê旨意ê事实。但是真chē年前长老会总会议长谢纬牧师（同时有医学博士资格），teh赴彰化二林基督教病院途中发生车祸死亡，因为当伊teh发挥人生存在siōng有价值ê时，引起真chē人惋惜，mā因此tī教会中引起相当大ê关心kap讨论：上帝ê旨意为何。亲像初代教会tī耶路撒冷有非常理想、热诚ê教会复兴ê时，忽然间tú-tio̍h真惊人ê迫害！Kah-ná恶势力beh消灭福音事工kap教会，m̄-koh tī教会生活中有时chit种撒旦破坏ê khang-khè会变成荣耀上帝ê机会，kah-ná水银落地散各地，这to̍h是当时ê迫害颠倒形成了撒玛利亚地区教会ê复兴，因为teh迫害中腓利到撒玛利亚地区传道，建立了教会ê基础，因为教会ê存在，致使撒玛利亚城内大大ê欢喜（使徒行传八：8），成做充满喜乐，充满希望ê城市。

教会受迫害，教会ê理想受阻碍chiah面临困难，咱知影困难tiāⁿ-tiāⁿ是阻碍理想ê实现，这是人生ê实况，但是tī信仰ê过程中，经由信心ê效应会有超越正常人ê理想kap结果发生。Chit种teh患难中，经过信心所发生ê信仰行动，往往会tī困境中产生chiok大ê正面效果。Tī现实境况中时常有负面ê人生状况（逆境、病痛、生活上ê压力、家庭、事业等等ê bōe顺chiông！），但是，有一kóa信徒soah ē-tàng tī án-ne人生状况中，发出人生ê芬芳气息，行tī hiah-ê人ê中间来荣耀上帝！当然，重要ê是tī-che种境况中，基督徒心中有一股极大ê动力kap支持！这to̍h是对主耶稣所有ê信心ê价值，mā to̍h是保罗所讲：「我靠tio̍h那加hō͘我力量ê，凡事lóng ē-tàng做。」（腓立比书四：13），koh ē-tàng适应任何情况，这to̍h是历代教会存在tī社会中ê实际情形，mā是基督徒信仰生活ê实际状况！Teh变化多端ê现实生活中，基督徒若有谦卑ê心kap完全顺服上帝ê生活，一定ē-tàng得tio̍h圣灵ê帮助去面对家己ê任何生活环境，因为一个人生活中有圣灵帮助ê时，伊ê人生必定会「化险为夷」hō͘苦境变做光明灿烂，因为有全能ê圣灵kap咱同在，人生就ē-tàng事事亨通，这to̍h是基督徒信仰生活。

（二） 成功ê腓利
当腓利tio̍h离开已经tòa惯习ê耶路撒冷到撒玛利亚去，这实在是一件苦差事，tī当时撒玛利亚是外邦之地，相信腓利内心一定有相当程度ê踌躇，这mā是人ê本性（我tú tùi神学院毕业ê时hông派到客庄ê新屋教会，内心mā有chit种感受！）M̄-koh，腓利tī-che境况中靠圣灵ê引chhōa，克服真chē障碍，to̍h是用正确ê心态去面对现实ê境况，tiāⁿ-tiāⁿ会得tio̍h美好ê结局。使徒行传八：5-8描写腓利宣讲基督，众人听见koh看见腓利所行ê神迹，就同心合意听从伊ê话，hō͘撒玛利亚全城充满tio̍h喜乐，tī-chia咱看tio̍h腓利所传耶稣基督ê福音对撒玛利亚城有真大ê影响。

一个传道人若受教会肯定，受会友欢迎，实在是hō͘人欣慰ê tāi-chì，大概tī咱ê教会生活中ài chhōe-tio̍h一位受全教会所肯定ê传道人为数无chē，但是咱看圣经形容腓利带hō͘ kui城ê人喜乐，koh同心合意听伊ê话，单tùi-án-ni二句经文，咱就ē-tàng确定腓利tī撒玛利亚ê传道khang-khè是成功ê，为何伊有án-ne伟大ê表现，hō͘全城ê人大大欢喜？咱若详细思考chit段圣经kap当时ê教会状况ê时，咱就会了解原因是tī伊疼主ê心态，谦卑kap甘心顺服主ê命令，这mā是信徒非常重要ê信心要件，圣经讲，主要kap谦卑ê人同在，这是基督徒信仰生活ê重点。只要基督徒有chit种人生态度，无论伊ê生活ê现况如何，lóng会有美好ê结局。因为有主同在ê所在to̍h是天堂，这是教会生活中结出清芳ê果实，基督徒成做基督ê馨香之气，相信咱ē-tàng tùi实际生活中去体会chit种信仰ê感受。

另外一方面咱看tio̍h hit时tī耶路撒冷ê使徒听见撒玛利亚城ê状况，就差派当时教会ê大人物彼得kap约翰到撒玛利亚，彼得kap约翰siōng大ê khang-khè是带hō͘圣灵ê感动tī chit-ê城市，圣经描写「因为圣灵iáu未临到in一ê人身上，只有受洗归tī主基督ê名而已」（使八：16），这mā是信仰生活ê一件重大ê学习，基督徒ê信仰必须ài追求圣灵ê充满，m̄是只有tī外表ê形式；此外to̍h是彼得kap约翰出现了后，chit位hō͘撒玛利亚城所欢迎ê人物－腓利就消失阿（使八：9-25），本来tī撒玛利亚城传道ê主角是腓利，但是现在soah换成彼得kap约翰，完全取代了腓利ê地位。Tī电影或者电视中咱tiāⁿ-tiāⁿ会看tio̍h安排主角ê问题所引起ê纷争，chiah引起拒演等事件kap新闻，可见主角ê地位对人有相当大ê吸引力kap利益关系。腓利soah无因为角色hông取代chiah产生kap彼得、约翰有无爽快ê纷争，mā无认为撒玛利亚教会是伊一手建造，是伊苦心经营--ê，对彼得、约翰ê来到，伊无不平，mā无怨言，koh-khah无用心计较争取伊ê权益。但是咱看现今有一kóa牧者自认为带动教会有功soah无愿意退休，想保tiâu家己ê权益。Tī-chia咱看出腓利有真完美ê信仰风度，形成ê主因tī伊心态纯正，hō͘咱无法度mài去想tio̍h施洗约翰kap主耶稣ê情形，伊对主耶稣ê态度，永远是用先锋ê角色去面对。伊kap学生谈论主耶稣ê时讲「他必兴旺，我必衰微」。

（三） 旷野ê道路
当腓利tī siōng成功得意ê时，彼得kap约翰ê出现完全ê改变了伊ê现况，虽然伊无讲咱mā thang想tio̍h伊ê艰苦，毕竟伊是一个平凡ê人，tī-che困难ê时，主ê使者对腓利讲：「起来向南爿去到迦萨ê路去，he路是旷野」（使八：26），用撒玛利亚kap旷野ê情景相比，he是真无仝ê环境，前者tī人生生活上是方便kap舒适，后者充满tio̍h各种不安kap危险，是无适合人生活ê抛荒地。当时腓利无用家己ê想法去代替上帝ê指示，既然圣灵指示伊ài去行chit条旷野之路，mā是上帝ài伊行ê路，伊就顺服，欢欢喜喜ê行chit条不便而且充满危险ê人生道路。Chit件tāi-tsì咱mā ē-tàng tùi亚伯拉罕ê受召来看，信心ê老父ê人生是确立tī完全顺服上帝ê命令。这mā是基督徒生活重要ê课题，ài生活tī上帝所喜乐ê世界，必须tio̍h用谦卑顺服ê心听从他ê指示。尤其当时腓利ê状况，tī伊面前ê撒玛利亚城kap旷野之路，实在差异真大。何况人lóng是注重现实kap目chiu前ê利益，譬如：景气无好ê时，有一对翁仔bó͘有一工得tio̍h三块饼，非常欢喜，一人分一块，koh tshun一块，无分做二个，tùi án-ne约定siáng若先讲话就buē-sái得tio̍h tsit块饼，tú好贼仔走入去in-tau，翁仔bó͘二个人siáng lóng m̄愿先喊掠贼，tio̍h án-ne损失惨重。照当时腓利tī撒玛利亚城ê情景，伊舍去撒玛利亚城suah去旷野，伊并无将心中ê疑问问天使，mā m̄知旷野有何事thang做？Tī hia ê时伊只有听从圣灵ê指示，完全顺服上帝ê使者，遵照上帝ê命令。虽然听起来有一kóa无合理，抛荒地那有传福音ê对象？To̍h亲像上帝向亚伯拉罕要求献以撒，伊心中充满tio̍h真chē ê不解kap疑问，但是伊soah无kap上帝争辩，只有完全得tio̍h顺服，这to̍h是基督徒信仰ê态度。Tī信仰ê过程中，基督徒tiāⁿ-tiāⁿ mā会tú-tio̍h chit种景况，tī真舒适ê环境中，上帝忽然间ài咱行旷野之路，若用人ê心态去面对ê时会有真chē问题发生，就会有不满、怨份、抗议、辩解等等ê情绪产生。但是基督徒若用信心做出发点去面对ê时，就会「Tī旷野之路了解神ê旨意」，上帝ê旨意若得tio̍h了解，he是基督徒信仰生活siōng大ê收成，to̍h是成功ê信仰。因为tsit时ê旷野对腓利来讲已经m̄是旷野，是上帝ê荣耀显现之地，因为上帝ê权能施行tī旷野，自然就m̄是旷野了，相信腓利tī旷野khang-khè ê结果，一定bōe输tī撒玛利亚城，比如圣诗249首中所讲--ê，「愿主伸你圣手，牵我做我保护…」。

结论：基督徒ài体会人生，无可能永远生活tī舒适ê境况中，有时mā会听tio̍h上帝ài咱去行旷野之路，过旷野ê生活。Tùi腓利ê信心去学习听从主旨意ê生活内容，ē-tàng做到án-ne，tī旷野mā会开出结果，旷野就m̄是旷野啊。