《受恩蒙福的一生》

 | | | 转寄

圣洁ê教会

作者 林宗要 2010.12.12

使徒行传五：1-11

耶稣ê死，带hō͘学生有真大ê冲击，造成in ê身心lóng真thiám、困惑kap绝望。因为in认为耶稣既然ē-tàng行异能神迹克服人生真chē问题，甚至ē-tàng hō͘人起死回生，他若是来拯救以色列民族ê救主，soah无想tio̍h伊传道生涯竟然hō͘当时反对势力所终结chiah hông钉死tī十字架，因此耶稣ê死对in来讲是hō͘人绝望--ê，m̄-koh chiah-ê反应是in ê信心无坚定ê原因，in bōe-tàng体会耶稣来世间ê使命，耶稣bat真清楚kā学生讲，人子必受钉死，三日了后复活。虽然当时ê学生对耶稣复活ê信仰iáu无彻底了解，soah已经化解in对耶稣ê死真chē恶劣心情，teh耶稣复活了后四十工之久，耶稣告诫学生应该有ê信仰方式，他kā学生讲，他kap学生虽然将beh暂时分离，但是soah应允in圣灵来做in ê帮助、安慰、导师kap力量，同时叫in ài建立教会，将福音传扬到全世界，因为向人传福音to̍h是教会存在ê使命kap价值，beh完成传福音ê使命，教会必须ài有圣灵ê充满，因为若m̄是óa靠圣灵ê能力，软弱ê人是无法度完成án-ne艰巨ê khang-khè--ê。

学生遵照主耶稣ê吩咐，tī耶路撒冷专心等候所应允ê圣灵，果然圣灵降到学生身上而且大大改变了in ê人生kap信仰，in ê心态完全kap以往无仝，咱thang用彼得做例，teh未承受圣灵ê时，伊tī信仰方面虽然有所表现，但是并无坚定，伊siōng大ê败笔to̍h是三次m̄认耶稣，当伊受圣灵充满了后ê信仰生活，tio̍h全然无仝了，咱看使徒行传三章，伊表现出大有能力，使徒行传四章伊甚至敢公然向当时ê大官见证主耶稣是救主，kap以前伊m̄敢tī人ê面前承认耶稣ê作风全然无仝。

Chiah-ê tāi-chì kā咱讲教会生活ê重要事实teh受圣灵ê充满，tùi使徒行传一～四章亦thang看出。教会生活kap圣灵有密切ê关系，因为只有óa靠圣灵ê帮助kap引chhōa，教会chiah ē-tàng正常而且理想ê运作，咱看使徒行传二章经圣灵充满了后ê教会生活，是非常ê完美。使徒行传二：43-47；四：32-37，初代教会chit种理想完美ê疼ê共同体，实在是教会ê典范。非常美好ê教会生活表现tī人间！相信了后ê基督教会，无任何教会ē-tàng kap初代教会完美ê信仰生活相比。

伊表现出基督教ê siōng koân价值ê疼ê共同体，chit种疼ê共同体ê发挥，必须ài藉tio̍h圣灵ê充满chiah ē-tàng完成。因为未受圣灵充满ê人性，通常只表现出自然ê人性，因此充满人自私ê欲望以及真chē利己ê行为，chit种自然人所表达出来ê是属于肉体ê作为，mā是现实ê世界中咱所看tio̍h ê人性ê乌暗面。比如保罗tī加拉太书五章16节所讲情欲kap圣灵为敌，tùi人ê情欲所产生ê结果是hiah-ê人类生活上真chē恶劣ê作为，kap圣灵所结ê果子无仝。教会是耶稣基督所有ê乐园，是受圣灵充满ê所在，因此chiah ē-tàng有án-ne完美ê团契生活tī初代教会中出现，咱看tio̍h用疼做主体ê信仰结果，是人人克服私利为别人设想ê。Chit种生活ê结果，to̍h是初代教会ê理想表现，chit种完美ê疼ê共同体ê信仰生活to̍h是信仰siōng有力ê证明。

教会ê使命是传扬耶稣基督所交托ê福音，伊本身是人类siōng需要ê实体，但是tiāⁿ-tiāⁿ因为教会无法度表达出chit种真实ê信仰见证，致使hiah-ê人无了解教会所宣扬ê福音ê内容，自然bōe-tàng接纳耶稣基督做in ê救主，这是咱教会必须ài tiāⁿ-tiāⁿ省思ê一项严肃事实，同时mā是基督徒ài不断来面对上帝来思考咱ê信仰kap生活。咱来思考下面几点：

（一） 亚提尼亚ê作为
咱若看圣经ê记事咱会发现tio̍h一个真严肃ê真理，使徒行传一～四章lóng teh说明教会ê光荣、胜利、完美、理想ê信仰状况，实在是非常美好ê教会生活，m̄-koh当咱看使徒行传五章ê时，就会发现tio̍h tī án-ne完美理想ê教会生活中，竟然会出现chit种不幸ê悲剧。

Chit件事实teh提醒/基督徒一项真理，to̍h是教会（基督徒）若当teh光荣、胜利、理想ê状态中，往往mā是恶魔siōng活跃ê时刻。

恶魔往往tī hia-ê热心、可敬、理想ê教会生活动工，所以愈是热心事奉、表现理想信仰ê人，愈ài提koân儆觉；因为这to̍h是恶魔争取ê对象（比如有两间教会，教会中恶魔全然无仝ê状态：A）无闲应付活动 B）Ta̍k-ê tī厝尾顶困，因为m̄免khang-khè，教会荒废，基督徒冷淡，生活堕落，to̍h是恶魔所希求ê）。

Tī-chia kā咱讲一个事实，若自认为信仰生活坚实ê人koh-khah更加ài小心，以免跋倒，tī教会生活中，hiah-ê tī信仰生活中ê失败者，通常m̄是hiah-ê对教会生活冷淡ê基督徒，颠倒是hō͘人肯定做可取ê信仰者。所以家己认为khiā了隐koh-khah应该谨慎（哥林多前书十章12节）。因为热心可取ê基督徒往往是撒旦争取ê对象。

初代教会hit种完美可取ê教会生活是撒旦所怨妒ê，所以伊用尽方法利用chit对翁仔bó͘，hō͘当时ê教会生活产生污点，tī-chia咱thang看出亚提尼亚翁仔bó͘，in ê信仰生活m̄是主所喜乐--ê。

A. 无老实kap虚伪
In tī当时ê教会生活中行事虚伪，咱知影，基督徒kap上帝之间ê信仰是忠诚真实--ê。约翰讲上帝是神，敬拜ê人必须用心灵kap诚实ê态度敬拜他，基督徒追求ê信仰to̍h是真实。若tī信仰生活中失去真实性，he就是失去了信仰。而且in虚伪ê行为mā是信仰ê致命伤，信仰者ài时常省思，咱ê信仰是m̄是真诚？是m̄是有虚伪ê动作？咱必须记tiâu基督tī马太二十三章责备当时ê法利赛人，重点to̍h是tī in ê虚伪。

B. 虚荣心、爱面子
Chit对翁仔bó͘疏忽了上帝hō͘人ê恩赐lóng无相仝，in看tio̍h当时有一kóa人ê热心捐献（尤其是巴提巴）chiah受tio̍h教会全体ê肯定，因此in ê虚荣kap爱面子ê心思hō͘ in做出chit种无老实ê作为，tī-chia咱mā thang看出tī信仰ê世界，的确beh去除chit种心态，若无咱ê信仰bōe-sái荣耀上帝，只荣耀人，因为tī平常ê世界，虚荣心过重kap相爱面子ê人，lóng已经是不可取，tī信仰ê世界koh-khah是án-ne。

C. 欺骗
亚提尼亚翁仔bó͘ ê作为表现出一种惊人ê罪，to̍h是欺骗上帝。彼得责备亚提尼亚讲：亚提尼亚！为甚么撒旦充满你ê心来欺骗圣灵，将卖田产ê钱暗中留几份？（使徒五：3）In若只将部分献hō͘教会，彼得一定bōe责备伊：问题是in宣称in卖掉「一切」献hō͘教会，但是暗中soah留一部份。其实in有权ē-tàng留一部份，但是bē-tàng欺骗，信仰生活中ê动机真重要，因为伊是行动ê原因，teh信仰ê过程中主khah chiap鉴察信仰者ê动机，譬如耶稣o-ló献二个半厘ê妇人人，有时主mā会向咱要求咱ê时间、chiah ē-tàng kap钱财、恩赐等等，但是咱必须会记一个事实，to̍h是主koh-khah欢喜咱敬拜他是出自真诚ê信心、纯洁ê动机。而且咱知影，tī人ê世界，欺骗ê tāi-chì mā无可能久长，因为ē-sái瞒一时，瞒bōe了一世。这是人间ê情况，koh-khah是tī属灵ê世界？圣经时常提起：上帝是bē-tàng 轻慢ê，欺骗上帝ê结果是败亡！

（二） 彼得ê行动（保持教会ê圣洁）
咱若读chit段圣经ê时，咱会发觉彼得ê行动kah-ná khah过份一kóa，圣经虽然无写in二人献出jōa-chē，但是kā伊观察chit-ê tāi-chì thang知影，因为是卖田产ê钱，数目应该真大，若用今á日台湾ê钱来算，可能是十几万或者几百万kho͘，chiah-ni̍h大ê数目捐hō͘教会，彼得应该tio̍h心怀感谢来接受chiah是，为何kā伊骂，致使chit对翁仔bó͘当场猝死，彼得为何用án-ne残忍ê方法来对待chit两位无忠实ê信徒neh？

上帝hō͘ in ê刑罚kám bē相过重neh？这是人tiāⁿ-tiāⁿ the想ê问题。

当咱读tio̍h chit段圣经ê时，会想tio̍h现代教会ê基督徒奉献ê问题，真chē基督徒poa̍h-kiau赢钱将其中ê一部份the̍h来奉献，tio̍h六合彩ê基督徒，献大笔钱hō͘教会，这到底是啥物款ê信仰？

Tī-chia彼得处置亚提尼亚翁仔bó͘ ê情形实在无符合慈疼ê上帝ê形象，因为圣经时常提起耶和华有恩典kap怜悯，确实，咱若以上帝慈疼ê性格来思考，咱有可能无法度了解彼得ê作为。为啥物彼得会用chiah-ni̍h重ê刑罚来处置chit对翁仔bó͘，kám-m̄是欠缺疼心？

但是咱ē-tàng了解彼得chit-ê举动是因为：
1） 保持教会ê圣洁——初代教会当teh克服万难，tī圣灵ê引chhōa之下渐渐形成完美教会ê形象，为tio̍h beh保持教会chit种纯洁性，彼得不得已用siōng沈重ê作为来处理chit-ê tāi-chì。相信彼得那时chūn，一定mā是作一个真痛心ê决定，但是为tio̍h保持教会荣耀以及完美无瑕ê事实，tú亲像保罗tī以弗所五章27节：「Beh将伊献hō͘家己，做荣耀ê教会，无lâ-sâm无皱痕，to̍h是圣洁无缺点ê」，这是教会应该ài有ê圣洁。

2） 教会ê训练hō͘基督徒了解，只要属于耶稣必须实实在在kap耶稣有真正ê关系－比如约翰福音十五：2「只要属于我boài结果子ê枝，伊to̍h剪去」，咱承认咱ê无完全kap真chē缺失，m̄-koh tī上帝所特别召选ê圣洁团体，是无允准有chiah-ê不法ê tāi-chì存在--ê！

3） 对基督徒启示伊ê信仰生活kap奉献有密切ê关系－奉献ê主旨tùi án-ne tī对上帝恩典ê感激所产生ê自然反应，无论任何奉献，伊ê精神lóng无应该离开基督徒对上帝ê恩典ê感激。

Tùi chit种感恩ê心情所产生ê自然表达是奉献ê siōng koân价值。「各人照伊ê本心所酌定ê，无tiuⁿ-tî、无勉强，因为上帝欢喜愿意奉献ê人」（林后九：7）Tùi亚提尼亚chit件tāi-chì，基督徒ē-tàng学习奉献ê真诚态度。

另一件教导to̍h是留机会hō͘人，假使当时对彼得ê责难，chit对翁仔bó͘若ē-tàng真诚悔改，相信主一定会怜悯，人无完全，难免有过失，但是悔改ê心是上主所喜乐，比如诗篇五十一：17：「神所beh ê祭，就是ài忧伤ê灵，神ah！忧伤痛悔ê心你一定m̄好轻看」，犯罪ê心灵只要真诚tī上帝面前悔改，他一定kā伊接纳。

（三） 少年人ê责任（除去阻碍物）
亚提尼亚翁仔bó͘ ê作为tī当时ê教会中是一个污点，照上帝ê教会ê性质，教会内ê lâ-sâm必须ài除去，伊二人ê信仰心态实在tùi当时ê教会无帮助，因为教会是圣洁ê团体，tī圣洁中koh-khah 无允准chiah-ê垃圾，ná亲像纯白ê衫顶ê污点或者像一锅白米饭中有lām tio̍h一kóa杂物，chit种情形对人生来讲lóng是chiok惊人ê现象，tī人生中bōe-sái留有chit种污点。咱看社会上，人对待bat关过chiah出狱ê人ê态度，虽然讲chiah-ê人之中有人是已经完全改变，但是tiāⁿ-tiāⁿ因为过去ê记录soah无法度hông接纳！Tī上帝纯洁ê教会中，koh-khah bōe-sái留有侮辱上帝荣耀ê不法作为，因为信仰生活koh-khah希求信仰者完全ê圣洁！

当时教会ê污点（亚提尼亚翁仔bó͘ ê作为）已经hông处置。使徒行传五：3-6：「仆倒断了气，…有一kóa少年人起来，kā伊包好扛出去埋啊。」，chit节经节对现代教会ê青少年真有启示作用，青少年有ê是热情kap强壮ê力量，beh善用上帝所赐hō͘ ê chiah-ê热情kap强壮ê力量，投入教会，清除教会中真chē垃圾，hō͘教会保持圣洁，是青少年人ê责任。

每一个时代ê教会lóng会有上帝所无喜乐ê问题，去除chiah-ê问题，是需要有热诚ê心思以及愿意献出in强壮ê力量ê人来负担。今á日ê教会真需要chit种有心，而且肯献出in心力ê基督徒，来维护上帝ê教会ê圣洁，因为chiah-ê尸体若无扛出去，he是教会ê障碍，会妨害教会正常ê运作，因为有污臭ê所在bōe吸引人！教会ài尽量吸引人来听上帝ê福音，但是tī教会中若有尸体或者腐败，那无可能有人愿意去，这是事实！Chit-ê事实是咱今á日教会ê严肃ê问题。

结论：福音ê真理（基督、教会、信仰）无允准虚伪kap欺骗，了解基督徒奉献ê心态kap发出疼心ê信仰生活！