《受恩蒙福的一生》

 | | | 转寄

解开Hō͘伊行

作者 林宗要 2010.12.05

约翰十一：1-3；17-44

Tī耶稣ê传道生涯中，chit-ê伯大尼ê厝占有真重要ê位，路加九：58「狐狸有孔，天空ê飞鸟有巢，唯独人子无枕头所在。」Chit句话充分表现出耶稣当时ê生活状况，确实耶稣ê生活是án-ne，tī chit种现实中，伯大尼chit-ê家tī耶稣ê宣教事工上有关键性ê帮助，因为tī-chia，有安息有温暖情谊有平安kap疼ê关怀，chiah-ê人间ê情谊tī人生生活中是有真有正面价值。耶稣虽然是神，但是他是道成肉身ê事实，所以他mā有人ê属性（无罪而已）。所以tī hit种辛苦艰难ê人生日子中，有一个所在ē-tàng体会tio̍h人间ê温暖，实在是一件值得欢喜ê人生tāi-chì，因此耶稣kap伯大尼家有特别ê感情是咱所ē-tàng了解ê。

Chit-ê家ê三名人物kap耶稣ê关系lóng真特别，拉撒路tùi死koh活起来ê记事，tī福音书中是非常ê特别，tī耶稣ê神迹中，他beh叫死人活起来，lóng是无像拉撒路事件特别，是tī墓内已经四工（约翰十一：17），若通常ê生理状况，肉体已经开始烂，tī chit种状况中，他叫拉撒路tùi死内底复活。

咱tùi chit段圣经来学习耶稣beh向咱讲ê问题，咱知圣经ê事实，的确m̄是只teh说明过去所发生ê事件而已，tī福音书耶稣ê真chē行为中，lóng有他beh向学生提起ê真理，他tī-chia特别强调拉撒路ê事件是为tio̍h上帝ê荣耀，hō͘上帝ê kiáⁿ儿tùi chit-ê tāi-chì得tio̍h荣耀。虽然他接tio̍h拉撒路病危ê消息了后无随去伯大尼探视，iáu tī所tòa ê所在tòa二日，（Hit时耶稣kap学生多数ê学者认为是tòa-tī约旦河东边ê比利亚）因此头尾就有四工，所以耶稣到伯大尼ê时，拉撒路已经死四工，为tio̍h beh hō͘上帝ê荣耀koh-khah发扬，他用chit种方式，确实chit种神迹是耶稣神迹中ê神迹，当然对神迹ê了解，你若认为是神迹ê时，就无论任何状况lóng是有可能ê，tī约翰福音书耶稣所行ê神迹tī共观福音书lóng看bē-tio̍h ê。

1） 迦提婚礼ê变酒（二章）。
2） 王ê人臣ê kiáⁿ重病（迦百农）去ah你ê kiáⁿ儿活啊，彼人信耶稣ê话就去，伊ê kiáⁿ儿就活起来（四：44－）
3） 毕士大池边破病卅八年ê人（五：1-9）
4） 变饼hō͘五千人食（六：1－）此神迹三福音书lóng有
5） 医好出世就chhêⁿ-mê ê人（九：1－）
6） 拉撒路复活（十一：）

Tī三福音书中mā有hō͘人复活如睚鲁ê女（马太九：马可五），提因城寡妇ê孤kiáⁿ（路加：七），但是chiah-ê 是tī时间上kap拉撒路无仝，若tùi生理观点思考ê时，咱就会了解拉撒路tùi死复活ê困难是比其他ê神迹khah难，tú亲像拉撒路ê姊妹所讲：主ah，伊现在一定是臭啊，因为已经死四工啊（十一：39），teh信仰ê观点上，你若认为伊是神迹，chiah-ê时间上ê差异应该m̄是根本ê问题，teh圣经研究上，khah大ê问题tī学者间是认为为何án-ne重大ê神迹tī三福音书中soah看bē-tio̍h？这是圣经学家teh研究福音中ê一个siōng困难ê问题，当然有正反两面ê论述，siōng重要是teh宣示死kap复活ê关系，m̄是只有显示主耶稣本身ê死kap复活ê问题，同时mā hō͘信他ê人也ē-tàng分享复活ê性命，tú亲像耶稣向马太讲：复活tī我，性命mā tī我，信我ê人虽然死去，mā一定复活。只要活teh信我ê人，一定永远bōe死（约翰十一：25-26），chit种复活ê性命ê论调，除了这以外tī别位无koh看tio̍h像耶稣chit种讲法，因为他是性命ê主，所以他有chit种权柄讲chit种话，拉撒路复活chit件事实，beh hō͘信他ê人也ē-tàng分享chit种复活ê性命ê真理，是chit件神迹ê重点。

（一）主ah！你所疼ê人破病啊（十一：3），拉撒路死去（十一：14）
咱先来思考一个问题，to̍h是十一章三节kap十四节所讲--ê，主所疼ê人ê破病kap死！咱若看伯大尼chit-ê厝内ê三ê人，in有无仝ê性格，大姐马大因会事奉来出名，tī现今教会中，只要真gâu事奉ê人lóng hông称做「这是阮教会ê马大姐」，马利亚表现tī耶稣身上siōng出名ê是用hit罐真贵重ê香油膏耶稣ê行为，chit件tāi-chì teh强调伊无计较ê疼，因此tī现代教会中，只要纪念信徒teh奉献上比如马利亚chit种精神ê人，就会用马利亚ê名称来纪念伊，真chē教会lóng有马利亚馆，to̍h是teh纪念某某人对教会无计较ê付出，ná亲像马利亚疼主ê情形。最后一位男性拉撒路，伊siōng优秀ê to̍h是约翰十一、十二章所记，伊tùi死内底复活，成做复活ê见证人，因为伊ê复活，伊成做hō͘人写phoe去耶稣ê原因（约翰十二：10-11），伊mā tiāⁿ-tiāⁿ kap主耶稣坐仝位，所以chit三ê人用三方面无仝ê性质表现出信仰ê无仝内容，chiah-ê状况teh说明in tùi无仝ê方向表现出疼主ê心情，所以成做tī基督ê传道生活中，他siōng捷去ê所在，所以圣经用：主ah，你所疼ê人来形容拉撒路实在是真适当！

照常理，主所特别喜爱ê人，主应该会特别赐福（这mā是圣经ê真理，因为上主一直强调人kap上帝ê关系应是处tī应允ê关系，人若完成kap上帝之间ê关系，上帝一定降福气hō͘他所疼ê人，这是上帝ê应允），所以若照常情，像伯大尼chit-ê家庭，主耶稣应该tio̍h用疼kap平安ê篱笆hông围起来，hō͘ in生活tī平安喜乐kap健康中chiah是合理，因为in是主所疼ê人，tī in生活中，会为in除去所有负面ê人状况，这是正常ê传统见解，因为人kap上帝之间ê关系是忠诚ê信仰者，（上帝所欢喜，所疼ê人）必定ē-tàng就会领受上主ê恩典kap赐福是理所当然ê。但是咱若看教会生活或者是信仰史上ê事实，咱就会了解tī教会中确实有真chē热心疼主ê信仰，in ê人生境况无一定是蒙福--ê，颠倒是充满tio̍h真chē不安、痛苦kap一连串ê逆境，我认bat一位长老，非常疼主疼教会、肯事奉甘奉献，mā真有能力，参加女宣、诗班、任主日学长，热心探访，尤其是爱牧者，但是四十出头就致tio̍h癌症往生，这to̍h是主所疼ê人，但是可惜伊ê人生状况无算顺利，tī现实ê教会中，chit款tāi-chì四界lóng ē-tàng看tio̍h，所以咱看圣经讲：主ah！你所疼ê人破病啊（死去），咱就koh-khah ē-tàng了解人生ê状况，tī人生生活中，chit种病kap死是人生ê不幸kap悲哀，基督徒有觉悟。

反面来思考，忠诚tī主ê一定亨通或者疼他ê必蒙赐福，chit种信仰ê信息若kap现实主所疼ê人mā会破病甚至死亡（大概认为m̄是适当ê死ê时期）ê情形来思考ê时，咱就会了解tī人生ê现象中，的确有chit种时hō͘咱想bōe通ê人生状况会发生tī主所疼ê人身上，chit种现象tī圣经ê信息中mā ē-tàng看tio̍h，旧约ê约伯，伊ê人格信仰lóng是一流--ê，但是伊ê人生状况soah是非常ê不幸kap悲哀，或者是hiah-ê为上帝尽忠ê先知ê生活mā是真无好，新约ê保罗，哥林多后书十一章描写伊ê人生境遇，thang用不幸kap悲哀来形容，siáng ē-tàng比伊koh-khah疼主，替主ê教会ê宣教尽siōng大ê贡献，但是伊ê下场kap经历是非常不幸--ê。有一位长老，人格súi信仰好，负责矿业会计，别人做会计ê时出入无gōa大差别，伊做会计ê时，ta̍k年chhun ê炭有kúi十吨，原因何在？老实无贪心。但是soah kap病做朋友，一生食药m̄-bat怨叹，了后因为癌症过身，teh说明啥物？主所疼ê人仝款会破病、mā会死。

（二）Kā hit块石头徙开
人死ài埋，台湾ê风俗是尽量将死人ê遗体khǹg tī厝内愈久愈好，台语叫做phah桶，通常lóng tùi看日á师父看日子chiah决定，过去时常看tio̍h略略仔好额ê人若看日仔tiāⁿ-tiāⁿ会chhōe bē-tio̍h好日子thang埋尸体，有时ài几十工了后、几个月了后，但是有一个现象，to̍h是sàn-chhiah ê人去看日子，通常lóng是三、四工了后就有日子ē-tàng处理。

以教会ê立场来讲，只要符合丧家各方面需要ê时，通常lóng是好日子，因为上帝所创造ê日子lóng是好日子，所以信徒处理丧事ê时应该是比一般人顺利，而且hō͘人肯定做严谨chiah合情合理。现在chit位主所疼ê人破病啊，耶稣所疼ê人mā会hō͘死神吞灭，耶稣到伯大尼ê时，in已经将拉撒路ê尸体安葬tī固定ê所在（一般犹太人ê墓是安置tī孔内，外口用大石塞tiâu来堤防野兽ê侵犯，）咱若看主耶稣ê墓mā是án-ne，墓口有大石塞tiâu，七工ê头一工，hiah-ê探墓ê妇人iáu为tioh8hit大石徙bōe开chiah烦恼，「Siáng hō͘咱kā石头tùi墓门徙开neh？」（可十六：3-4）。因为hit块大石kā主所疼ê拉撒路塞tiâu啊，hō͘伊永远tī墓内，因此有圣经学者讲chit块石是生ê希望ê终止符，chit块大石kā路塞tiâu，hō͘人永远无可能tùi墓内出来，但是性命ê主耶稣基督，tī-chia命令人kā hit块石徙开，beh hō͘主所疼ê人tùi死内底复活，必须徙开hit块阻挡去路ê大石。「辊开hit块石」chit件tāi-chì，tī基督徒信仰生活ê过程中有非常重大ê意义，因为有时基督徒属灵ê性命会像拉撒路hit种hō͘ hit块大石塞死，致使基督徒无法度kap荣耀ê主有面对面ê机会，当咱详细kā伊思考咱ê信仰过程ê时，tiāⁿ-tiāⁿ为tio̍h私己ê问题失去了基督徒应该有ê性命ê发挥，ná亲像拉撒路仝款，hō͘ hit块大石块封死，因此有人讲，hit块石是死权ê封印，信徒beh发挥属灵性命ê先决条件to̍h是必须先辊开hit块塞死信徒ê灵命，面对荣耀ê主ê大石！因为hit块大石是塞死一个beh tùi死入生ê人ê通路，各位啊！Tī咱ê信仰世界，你必须认清啥物状况阻碍你ê去路－tùi死ê世界beh进入荣光ê所在！Hit块阻碍ê大石若无辊开，你永远无法度面对荣耀ê主。为tio̍h beh出死入生，beh面对荣耀ê主，你必须辊开hit块大石！各位啊！你知影阻碍你ê hit块石是啥物mah？钱财mah？Kā伊辊开，若无你永远见bē-tio̍h荣耀ê主，是你ê事业hō͘你无法度出死入生？你ê人生价值观kap你ê人生思想会封死teh信仰过程中面对性命ê主ê机会ê时，你必须设法徙开hit块阻碍ùi上帝ê道路ê hit块石，若无你ê人生是永远活tī死ê世界，基督徒必须了解，咱ê主一直teh向咱呼唤「辊开hit块石」，因为chit块封死通往荣耀ê主ê路ê chit块大石若无徙开，一个死ê人生是永远bōe-sái行出来面见性命ê主！

这是基督徒信仰ê使命kap课题，咱必须认真去思考，phah拚来完成chit-ê事工，消除你ùi上帝ê道路上ê大石，hō͘伊成做thang直达通顺ê属灵道路，án-ne，你ê灵命会thang纯全无缺！

（三）解开伊，hō͘伊行。（十一：44）
主所疼ê人破病致死，因此葬tī墓内底，tī墓口hō͘一块大石塞tiâu，但是经由耶稣命令，人已经将hit块封死ê大石辊开，现在主耶稣koh再进一步命令拉撒路tùi墓内出来（43），圣经写讲「死人就出来了」，chit-ê死人是「手脚缠布、面顶包手巾」（44）无像台湾风俗ài穿七领或者九领衫裤来方便hō͘阴间ê鬼魂取用，犹太人是将细麻布包tī清气ê尸体顶koân，所以拉撒路虽然tùi墓内出来，但是tī伊kui-ê身躯lóng包chiah-ê细麻布，圣经特别用「手脚缠布、面顶包手巾」来形容一个死人已经完全失去了行动ê能力，因为án-ne境况实在无法度行动，无行动ê性命是无价值ê性命，所以性命必须ài有自主ê行动ê能力，所以主命令其他ê人解开hō͘伊行，因为手脚缠布、面包巾是无法度hō͘人伸脚出手，人无法度行动，因为伊性命ê动力hō͘ chiah-ê布kap巾缚死死ê，拉撒路虽然tùi死复活，但是soah hō͘ hiah-ê布kap巾缚tiâu伊性命应该有ê行动力，tī属灵ê过程中，chit件tāi-chì是值得咱用心去思考ê，tī现实ê教会生活中，真chē人lóng已经hō͘主基督所呼召hō͘伊新ê性命，可惜ê是chiah-ê性命并无解放出来，tī chiah-ê性命中，犹原有真chē人ná亲像拉撒路仝款，「手脚缠布、面顶包手巾」。Tī属灵ê过程中，真chē hō͘基督耶稣呼召ê人无法度发挥出属灵应该有ê活动能力，chiah-ê有名无实ê信者，to̍h是kap当时ê拉撒路仝款，in「手脚缠布、面顶包手巾」，chiah-ê阻碍tio̍h in ê性命力ê发挥。

咱若用信仰生活ê过程来思考ê时，咱确实会了解真chē信徒ê信仰状态实在hō͘ chiah-ê会阻碍性命力发挥ê布kap巾缚死，所以in无法度发挥出新性命ê动力，因为in整体ê性命实在hō͘ chiah-ê世俗ê恶势力所缚死无法度活动！但是感谢主！他命令chhun ê人解开chiah-ê缚手缚脚ê阻碍物，hō͘伊有正常ê行动空间，tī-chia咱必须注意一件tāi-chì，to̍h是他叫chhun ê人来做chit-ê khang-khè，为何？主爱人人参与他拯救ê事工，这是今á日咱ê教会ê大使命，因为tī咱教会ê四周围iáu有真chē ê性命，in是「手脚缠布、面顶包手巾」ê状况，咱教会存在使命是tī做「解开伊，hō͘伊行」ê信仰过程，m̄是只求上帝完全赐与，是kap上帝同工，尽你应该尽ê本分，来完成上帝tī你身上ê信仰ê工程。

今á日咱必须了解，tī灵ê事工上，真chē人ná亲像拉撒路仝款，手脚缠布、面包巾，严重ê失去性命动力，实在chit种人生是无意义ê，因为chit种性命无法度发挥性命可贵ê力量， tùi人类社会无贡献，所以是无价值ê性命，各位啊！当你思考你ê性命ê实质价值ê时，你ê性命如何？是m̄是ná亲像拉撒路当时「手脚缠布、面顶包手巾」ê性命？Chit种性命必须ài解开hiah-ê阻碍tio̍h性命力发挥ê布kap巾，将chiah-ê物件完全去除了后，你ê性命chiah ē-tàng成做纯洁、有力量ê性命，来发挥上帝交代你应该有ê力量，你ê性命是m̄是hō͘世俗ê真chē会缚死你丰盛ê性命力ê tāi-chì所控制tiâu？Tī你ê性命中有jōa-chē布kap巾teh束缚你ê手脚kap面？咱必须了解塞tiâu拉撒路ê hit块大石已经hông徙开，这是大原则，但是基督徒ê失败，tiāⁿ-tiāⁿ m̄是tī hit块大石，是缚tī你ê脚手ê布kap巾，chiah-ê你看做微细ê人生状况。

结论：基督徒必须了解咱ê性命是出死入生ê性命，大石已经徙开，人已经出墓，但是你ê性命是m̄是iáu hông缚死？若手脚iáu缠布面iáu包巾，是无法度发挥性命ê价值！