《受恩蒙福的一生》

 | | | 转寄

信仰者ê决定

作者 林宗要 2010.11.28

约翰九：1-8，20-25，35-41

人是啥物？自古以来有真chē无仝ê定义，柏拉图讲：人是无毛ê二脚动物，一个学者德里欧金尼斯提一只无毛ê鸡囥tī伊ê学校，讲「这to̍h是柏拉图讲ê人」，然后，柏拉图koh加一句「Koh有脚盘扁平ê人chiah是」。

可见替「人」下定义并m̄是简单ê tāi-chì，孟子讲「仁者，人mā。」这是中国儒家对人ê一种定义，但是mā无法度将人实在而且完全定义出来。当然iáu有真chē人对人提出看法，比如忠心、爱情、道德感、宗教心、会穿衫或者会用火ê动物等等，若用基督教ê人生观，咱会koh-khah清楚，人是被创造是ài有上帝形像ê存在者，伊存在ê目的是teh荣耀上帝，若用che来看，咱koh-khah ē-tàng了解人存在ê价值kap意义。

但是事实上，人soah违反上帝hō͘人类ê基本原则，因此人hō͘上帝所弃绝，致使tī人生现象中，有真chē tùi罪性所引起ê不幸kap悲哀。咱thang tùi人生实况kap社会情形来了解人类违背上帝旨意所引起ê悲哀kap罪恶，tī chit种罪性限制之下，人类ê政治、经济、教育、制度所表现出来ê垃圾kap乌暗面实在惊人，1994年4月美国第37任总统尼克森往生，引起世人关切，报纸mā有真chē报导，伊是美国第一个tī任内必须向人民会失礼下台ê总统，主因tī水门事件，tī-chia thang看出执政者ê恶质、自私、利用特权kap资源来制造tùi家己有利ê环境，chit种状况是大多数政客ê手法，iáu有一些tī高位者，利用特权累积财富，mā是咱时常见--ê。

Chit种利己kap无爱心ê行径所经营ê政治现象，to̍h是贪图利益或者利益输送，tī台湾，有人用kúi-nā亿万kho͘参加民代ê选举，伊ê目的tī tó？Kám真正beh为民服务？通常是利用所有ê特权来满足伊ê贪欲，这是台湾社会乱象之一，其他比如工程乌钱、捷运系统真chē无合理ê设备、世界第一贵ê工程费、工期一延再延、试车二次lóng有问题等等，原因何在？自私kapsiau2贪mā。

处tī án-ne人生社会中，人有时会怀疑：人间到底有正义公理存在boh？旧约中诗人祈求上主「主ah！Ài到啥物时neh？」相信有正义感ê人lóng会kap诗人仝款，有chit种感慨，基督徒处tī án-ne社会内，必定ài有相当ê信仰良知去面对现实ê挑战，当然，tī-chia mā因为背景无仝有无仝程度ê信仰表现。

重要ê是，基督徒ài不断用信仰ê反省去面对上主所托付ê责任，只要尽siōng大ê phah拚去完成伊，其他ê问题hō͘上主去定夺，tī chit种信仰生活中，所要求ê是基督徒ê自我认知，认bat你家己，知影人ê理性ê界线，kap属于家己ê清楚界线，若无人生tiāⁿ-tiāⁿ会落入自chhōe烦恼ê景况。

因为tī芸芸众生，实在有真chē状况m̄是咱ē-tàng完全了解，譬如约翰九章，chit段圣经teh描述学生无了解chit位生来to̍h是chhêⁿ-mê ê人，学生无法度体会，伊chiah向主耶稣提出问题，若用「苦难是罪ê结果」来讲，到底是伊本人或者是伊ê父母犯罪？无论tùi tó一方面思考lóng无合理，苦难是因为罪chiah来mah？有人讲是，有人讲m̄是。确实tī现实人生状况中，有真chē主所喜乐ê kiáⁿ儿，tī伊ê人生过程中tú-tio̍h相当ê苦难，但是有人soah有完全无仝ê境遇，台语有一句话「歹心戴纱帽，好心倒iau饿」，tī现实生活中，咱的确有chit-ê体验，chit种人间ê矛盾kap无合理ê情形，有时是咱ê理智无法度理解--ê，因为一方面是人ê理性有限，另外一方面是chiah-ê问题，m̄是属于人ê部份，是在tī上主ê掌权中，好亲像约翰九章chit段记事，若用人ê立场看，实在无法度解释，但是主耶稣soah讲，「Mā m̄是chit种人犯罪，mā m̄是伊ê老父老母犯罪，是beh tī伊身上显出神ê作为来（九：3）」

（一） 生来就瞎眼ê乞食者（悲惨不幸ê人生）
Tī-che记事中，咱来思考三种人：
1） 生来就chhêⁿ-mê，不幸悲惨ê乞食，伊ê人生实在是非常不幸。
2） 当事人ê父母，惊惶特权kap恶势力chiah失去公义kap勇气，m̄敢讲出真实ê话，照理in kiáⁿ chhêⁿ-mê得tio̍h主医治，in当心存感激而且对人宣扬伊ê kiáⁿ koh得医治，但是soah hō͘当时特权kap恶劣世俗所控制，m̄敢宣扬。
3） 法利赛人——恶质ê领导者，这to̍h是腐败kap堕落ê主因，chit种伪善无忠诚ê领导者，是国家败亡ê主因，in用权力压制正义kap真理，表现tī人间社会ê是虚伪、恶劣ê习俗。公义kap真理若为特权所压抑，社会必定败亡！国民政府tī短短数年内失去中国大陆，主因在tī放纵特权，民国37年蒋经国整顿上海经济犯，但是tú-tio̍h扬子公司就束手无策，因为蒋介石下令禁止调查该公司（孔令侃为总经理）！

Chit-ê天生瞎眼，不幸ê乞食者，伊可能生长tī一贫苦ê家庭，koh失明，造成伊不幸ê运命，失去kap人竞争ê本钱。马太六：22～23，主耶稣讲「目chiu to̍h是身上ê灯」因此人生光明á无关键在tī目chiu，人若失去引chhōa人生之灯，to̍h是生存在乌暗ê中间，伊ê行动无法度尽力发挥，处处受限制，chit种ê人生bōe可能有极大ê成就。既然无身上ê灯，in ê人生只有tī乌暗中摸索，这tī生存竞争ê社会中，是khah食亏ê事实，因为竞争ê条件比bē起明眼ê人，因此约翰福音九章描述ê chit-ê天生瞎眼ê乞食者ê人生是悲惨不幸ê！

（二） 绝望中tú-tio̍h主
比如头前所讲，学生因为chit位天生chhêⁿ-mê ê乞食向耶稣提出问题－是siáng犯罪？这mā teh说明传统社会对chit种不幸tiāⁿ-tiāⁿ会想tio̍h罪或者上帝ê责罚，这确实是真pháiⁿ处理ê问题，但是耶稣讲，「Ài tī伊身上显出神ê作为」，这是一件人生现象中ê伟大真理，若人ē-tàng tī伊ê无完全ê现实中彰显上帝ê荣耀，he是一项非常有价值ê存在，因为tī人ê见笑或者无能为力ê时，ē-tàng转变逆境，hông成做荣耀上主或者充满能力，这kám-m̄是人生siōng大ê荣耀kap体面？Chit种绝境变做荣显神恩，侮辱变做上主ê权能，这to̍h是福音！因此chit位不幸ê人，ē-tàng tī不幸中tú-tio̍h救主，这是伊siōng大ê福音。

耶稣基督ê福音，tāi-chì经由人chit种现实中ē-tàng显现，对基督福音ê观点，有时bōe-sái用人ê常理去体会，因为tī人ê世界，人ê观点kap判断有时mā会有失觉察，chit-ê事实，咱必须ài了解，人m̄是绝对，所以tī人生社会中，有真chē失败ê事例：发射太空船失败、飞龙机失事，chiah-ê lóng是会发生ê tāi-chì，因为tī无完全ê人生中，无可能有绝对完全ê tāi-chì。孔明ê智慧kap计画非常厉害，伊ê空城计、借东风lóng thang看出伊ê智慧，伊用计火攻司马父á-kiáⁿ mā是万无一失，但是谋事tī人成事在天，这是bē-tàng否认ê真理。

人生时常有如意算盘，万无一失ê人生规划，但是ē-tàng成功ê人无chē，理想kap现实ê距离teh说明人生ê有限性，tú亲像使徒行传十七章28节，「咱生活、动作、存留lóng tī他…」，人无法度用家己ê能力去超越chit-ê界线，tī chit种无可能中，人若tú-tio̍h救主，to̍h是人生ê福音，福音ê能力有时kap人ê常理无仝。

若tùi人ê观点来看chit位天生瞎眼不幸ê乞食，实在是非常可怜，伊ê人生值得同情，但是若tùi另外一个角度去观察，咱会发现，因为chhêⁿ-mê ê不幸kap悲哀造成伊kap救主ê事实，假使伊是正常、健康ê人，mā可能就bōe tú-tio̍h救主，mā就bē有接触tio̍h福音ê事实，当咱看见，伊tī chit种悲惨不幸ê人生中ē-tàng荣显上主ê荣耀，这kám-m̄是人生siōng大ê价值？基督ê拯救tī伊不幸中实现，这是人生siōng大ê光荣，基督徒ê人生，tiāⁿ-tiāⁿ ài有chit种心态，「咱ê人生，就是beh彰显上主ê荣耀ê人生」，无论你tī任何景况，lóng tio̍h ài有chit种人生生活ê决定，tī你人生有成就辉煌ê时，你tio̍h彰显上主ê荣耀，tī你人生失败不幸ê时，你也tio̍h设法hō͘上主ê荣耀藉tio̍h你现实ê弯曲、患难ê性命kā伊发挥出--来，这是基督徒ê生活原则，mā是咱实在ê信仰生活。信仰生活绝m̄是kan-nā存在tī人生ê正面世界，有时tī人生ê负面状况中koh-khah ē-tàng发挥伊ê功能。

（三）信仰者ê决定（去西罗亚池洗）
耶稣hō͘人信仰ê层次lóng无仝，有人是即刻完成，比如血漏十二年ê妇人或者提因城ê少女，但是有一kóa是ài经过信仰ê行动配合。

一个目chiu失明ê人beh经过一段时间kap空间chiah ē-tàng完成愿望，必须有相当ê觉悟，chit种觉悟是信仰生活ê内容，当一个基督徒听tio̍h福音了后，伊必须ùi主所指示ê所在去完成得救ê生活。Tú亲像chit位chhêⁿ-mê者，伊听tio̍h耶稣向伊宣示得救ê完成是teh往西罗亚池去洗，chit段路程对伊来讲是一段信仰ê路程，有时间kap空间横隔tī伊ê面前，chiah-ê状况tiāⁿ-tiāⁿ 成做信仰生活上真chē阻碍，这to̍h是现实。基督徒tī伊信仰ê路径上，有一kóa人会因为时间ê延迟或者场所ê变迁产生真大ê变化，本来有希望ê事实变kah涂涂涂，chit款tāi-chì，tī信仰ê世界tiāⁿ-tiāⁿ会发生。有真chē教会青年，tī本地教会ê时非常热心可取，一旦外出或者khang-khè环境变化，就完全迷失阿，真chē可敬ê教会青年teh婚后，信仰生活完全改变！Chiah-ê lóng teh说明现实ê基督徒信仰ê路径。

咱thang tùi chit-ê chhêⁿ-mê ê人ê现实来了解伊所必须面对ê信仰ê决定。Tī信仰ê世界，基督徒必须了解，信仰必须建立tī人格ê存在之上，人格ê动作，是经过思考→选择→决定→行动→结果ê步数，信仰ê重要性的确m̄是只有teh听tio̍h福音ê时机而已，必须用坚强ê决定力去亲身实行，chiah ē-tàng有得救ê把握，ná亲像chit位chhêⁿ-mê ê人，假使伊只听tio̍h耶稣ê声音soah无决定ê行动，伊ê目chiu bōe koh见光明，tùi chit件tāi-chì，咱了解一项信仰ê绝对真理。

对一位天生chhêⁿ-mê ê乞食，伊就信仰ê决定，的确非常艰苦：
（A）双眼失明，空间ê阻隔：西罗亚池tī耶路撒冷ê东南方，对一位双眼失明ê人，chit段路程相当pháiⁿ行，必须ài有决定kap勇气，若无会失败，因为tī-chia有真chē阻碍会影响伊得救ê把握，这to̍h是基督徒ê信仰路径。
（B）传统恶势力ê攻击（法利赛人，用恶霸ê极权，否定真理），法利赛人为tio̍h稳固家己ê地位kap权力来否定chit位双眼失明，hō͘基督所医治ê不幸者，虽然有绝对明显ê事实证明耶稣基督ê作为，但是in只因为耶稣teh安息治病ê动作chiah否定伊ê绝对性，chit种法利赛人ê心态，无论tī信仰ê世界或者一般生活中，尤其是政治运作中，四界thang看tio̍h chit种「传统势力腐化ê爪牙」，为tio̍h确保家己ê权益kap现实ê厉害关系，真chē政客ê作为实在卑鄙可恶，kan-nā顾家己私利，m̄管国家民族ê死活！
（C）现实无情ê父母kap亲人（无人敢出面证实！），当chit位可怜不幸ê乞食hō͘主耶稣医治了后，照理，伊厝内ê人应该是刣猪斩羊大庆祝，因为伊ê kiáⁿ儿天生失明，chit-má已经thang看tio̍h天日，但是约翰九章20～22节记载，chit对可怜ê父母，因为真理hō͘传统ê权威所压制soah m̄敢面对事实，m̄敢讲出真实ê内心话，tùi人性ê立场看，这是何等ê悲哀！
（D）信心的确认kap决定：咱看chit位不幸可怜ê人ê信仰体验，活tī án-ne恶质ê传统社会中，伊完全表现出伊信仰ê特性，伊敢用伊卑微ê身份拒绝hiah-ê领导者，koh向反对势力见证真理！（九：30～33）伊所讲ê实在是由信仰ê动力发出ê，面对传统恶势力ê压抑，伊无屈服，法利赛人讲：「耶稣是罪人，是恶者。」伊soah讲：「有一件tāi-chì我知影，以前我是看无--ê，如今ē-tàng看tio̍h」（九：25），这是伊信仰ê确认，伊所知ê chit件tāi-chì，是伊人生ê新性命，是伊人生ê全部。了后，伊hō͘法利赛人赶出会堂，koh tú-tio̍h主耶稣ê时，伊所讲ê信仰告白，kap对主所表现ê感恩kap尊崇，lóng是伊信仰ê决定！伊用坚定ê信心kap行动去完成主所交托有关伊siōng切身ê问题。

结论：Chit段圣经确实值得咱深思，「你往西罗亚池内底去洗」，是主耶稣向信伊ê人所讲ê话，今á日mā是仝款！咱ài用行动来成全主ê旨意。