《受恩蒙福的一生》

 | | | 转寄

信心ê报偿

作者 林宗要 2010.11.21

路加十八：35-43

Tī新屋教会牧会ê时，有一位日本时代ê财主，teh光复了后独资兴建一座桥，大概有5～6公尺长，这桥是伊ta̍k工一定ài行ê路，已经是六、七十岁ê老人，beh去新屋街仔，无骑车，lóng是用行路ê，tùi in-tau到新屋街大概20分钟，ta̍k pái路过伊出资兴建ê桥顶ê时，伊lóng会停落来看几分钟仔，心内发出欢喜ê笑容，认为家己做了一件有意义ê tāi-chì，hō͘来往ê人非常方便，同时伊mā真欢喜听tio̍h hiah-ê人提起伊ê义举，来自我满足。

这是一般人对家己ê慈善行为ê一种心态。 基督徒ê信仰中，bē-tàng有chit种功利ê心思，认为咱替上帝（教会）所做ê是一种有价值ê行为，soah期待上帝ê祝福或者报偿。

日前有一位长老会ê执事，问起路加十六章，「财主kap拉撒路ê故事」，ài如何去了解？因为照圣经ê记载，好额人并无任何犯法ê tāi-chì，但是hit位可怜ê拉撒路mā无配ㄘㄚtio̍h进入天国ê善行，但是圣经soah描写财主入狱受苦，拉撒路tī天国享受福气。确实这段圣经，咱无简单去了解，是m̄是主耶稣teh排斥好额人？当然m̄是，主耶稣强调ê to̍h是chit位财主，上帝交托hō͘伊无限ê财富，伊应该尽力去做伊应该做ê圣工，上帝差一位可怜ê乞食，tī筵席中来到伊面前，伊有责任将一碗饭hō͘ chit位需要ê人，chit种sòa手ê帮助，伊应该tio̍h了解，这是上帝所托付伊ê人生责任，m̄-koh咱看tio̍h chit位财主，kan-ta知影享乐，soah疏忽了目chiu前伊应该ài做圣工，当然好额人享福无一定是罪，但是未完成上帝交托ê使命，做伊应做ê tāi-chì，to̍h是罪。上帝hō͘ chit位可怜ê人，tī伊厝ê门脚口，ǹg望ē-tàng分tio̍h伊一点点物件，伊soah无hō͘伊任何物件，thang看出chit位好额人ê心态，是无将上帝khǹg tī眼内，（a）伊认为一切ê财富是伊所有，心中无受托ê精神。（b）伊虽然好额，但是soah无疼心，好额soah不仁，to̍h是伊入狱ê原因。

Chit件tāi-chì teh教咱基督徒ê人生观kap财富观，所以基督徒ê任何义举或者对教会ê关心kap奉献，bōe-sái看做功劳，he是上帝交hō͘伊ê恩赐。ē-tàng提起--ê，只是伊有疼心去完成上帝交代ê使命而已，因为疼ê行动是付出、是牺牲、是无计较--ê，当然koh-khah bōe-sái有期待上帝ê祝福chit种功利思想tī心内。但是，上帝mā是会特别祝福持有chit种人生观kap价值观ê基督徒，至少正确ê人生观是致使hō͘上帝赐福ê要件。保罗tī哥林多前书十三：4-5「疼是bōe自我夸口、bōe青狂、bōe做歹势ê tāi-chì，bōe求家己ê好处」。非常清楚teh说明疼ê特质，基督徒若ē-tàng照保罗所讲ê疼去行，必定有美好ê结果。福音书中，咱看tio̍h马利亚用香膏抹耶稣，chit件tāi-chì to̍h是保罗所讲ê疼ê真实内容，无计较是疼ê性质，马利亚若计较，伊bōe用三百工工钱chiah ē-tàng买tio̍h ê香膏去抹耶稣（若用今á日工资1000 kho͘/工×300＝30万！），这是何等价值ê作为，chit种作为（完全ê疼ê表现），to̍h是主耶稣o-ló马利亚ê主因。基督徒ài了解，chit种疼ê行为to̍h是基督教信仰siōng好ê注解，基督徒必须ài tiāⁿ-tiāⁿ用che来见证基督ê福音，hō͘每一个基督徒，真正ē-tàng将咱所白白得tio̍h恩典ê福音传开，这是基督徒ê使命。当然，beh完成这使命，基督徒必须ài有亲身ê经历上帝，有体验ê信仰，chiah会有荣耀上帝ê作为。

今á日咱所读ê chit段圣经，路加福音十八：35-43：chit位可怜、不幸ê chheⁿ-mê者，经过伊迫切ê哀求耶稣，chiah得tio̍h耶稣ê怜悯了后，伊所表现ê to̍h是对主耶稣基督恩典ê回应「就tòe tio̍h耶稣，一路归荣耀kap神，众人看见chit项tāi-chì，mā o-ló神」（路加福音十八：43）。Chit节圣经to̍h是描写一个受恩ê人应该ài有ê生活表现，tòe tio̍h耶稣ê人生是基督徒ê人生，chit种人生的确是荣耀上帝ê人生，同时mā有好见证，众人看见伊荣耀上帝ê作为，mā lóng kā荣耀归hō͘上帝，这to̍h是上帝创造人ê目的，chit种伟大有价值ê行为，to̍h是基督徒信仰生活所必须ài认真phah拚去实行ê生活方式。

（一） 悲惨不幸ê人生
通过chit段圣经咱来思考chit位chheⁿ-mê者所表现出来ê信仰内容，伊ê人生是不幸koh悲惨，圣经用「Chheⁿ-mê koh做乞食」来表明伊当时ê状况。chheⁿ-mê本身是人生生活ê一件负面ê事实，主耶稣tī福音书中，bat真中肯ê说明目chiu kap人生ê关系，「身躯ê灯to̍h是目chiu，你ê目chiu若光，规身躯tio̍h光，你ê目chiu若昏花，规身躯就乌暗，你内面ê光若暗，hit-ê暗是大ê」。咱ê社会形容目chiu是灵魂之窗，to̍h是teh强调目chiu ê重要性。因此tī人群中一位失明ê人，必定会失去竞争力，因为伊欠缺人生siōng重要ê光明ê目chiu，chit种状况tī/teh各所在lóng一样，古今lóng然！tī/teh台湾ê社会，失明ê人实在无法度kap看会tio̍h ê人竞争，因为in欠缺了人生ê光。一个chheⁿ-mê者假使有无数ê产业，án-ne伊tī生活上就无需要烦恼，m̄-koh圣经顶koân讲，chit位chheⁿ-mê者是讨食ê；因为伊失去了kap人竞争ê目chiu，但是伊必须ài生存，唯一ê办法to̍h是伊求人怜悯，不得已成做乞食，咱想一位chheⁿ-mê ê乞食，坐tī路边kā人分，若tú-tio̍h有疼心、同情心ê人，有可能会伸出同情ê手来援助伊，m̄-koh tī现实社会中，真有疼心ê人无chē，通常人lóng是无情，甚至iáu会批评责难chiah-ê不幸ê乞食，咱ē-tàng tùi圣经看tio̍h chit项事实，「行tī头前ê人，就责备伊，m̄准伊出声」（路加福音十八：39），假使有疼心，kám-m̄是应该行óa伊，chhōa伊来到耶稣面前，hō͘耶稣ê疼降tī伊ê身上chiah对，因为hit一大阵人，一定真清楚耶稣有能力，会行神迹，而且chit位可怜ê chheⁿ-mê者本身mā有chit-ê意愿，ǹg望耶稣ē-tàng kā伊医治，hō͘伊复明，但是众人hō͘伊ê是无情kap责难，甚至压制伊，叫伊mài呼叫，当时ê群众是án-ne teh对待chit位不幸ê chheⁿ-mê者，现代人对待chiah-ê不幸ê人koh如何？相信咱mā ē-tàng tùi现实生活中体会tio̍h，有时咱看tio̍h行动无方便ê人，因为坐公车soah hō͘司机大细声，kap当时ê群众有啥物无仝？Chiah-ê目chiu失明ê乞食，in本身ê生活已经有够痛苦不幸阿，koh tú-tio̍h无情、无疼心ê群众ê责备kap压制，án-ne ê人生kám-m̄是真悲惨？

（二） 不幸中遇tio̍h耶稣
通常，人若tī悲痛中过日子，tiāⁿ-tiāⁿ会有真chē绝望ê表现，伊ê特色是消极或者失志。

Hiah-ê人tiāⁿ-tiāⁿ会批评chiah-ê消极ê生活者是「意志薄弱」或者「对人生ê了解无清楚」，事实上，hiah-ê活tī不幸中ê人，若无啥物tāi-chì thang当做性命ê动力kap ǹg望，tiāⁿ-tiāⁿ会发生悲哀ê结果。

今á日chit位不幸ê乞食，伊ê生活只有tī路边讨饭食，到底食会饱boh，lóng是一个问题，伊ê生活to̍h是án-ne teh渡，等到有一工，耶稣经过chit条路ê时，hō͘伊发现tio̍h绝对ê ǹg望，因为伊tùi平时所有ê经验（听人讲起），知影目前犹太人社会中兴起一位教主，to̍h是人称提撒勒人耶稣，tī耶稣过去一段短短ê时间ê事工中，有真chē神迹发生，解决了真chē人ê危机kap绝望，跛跤ê人ē-tàng koh行，致tio̍h臭头ê人mā好去，死人活起来，chiah-ê消息深深刻入chit位不幸ê乞食脑海中，伊teh期待、ǹg望，相信有一日，耶稣一定经过chit-ê所在，伊tī-chia分的确m̄是无原因，咱ē-tàng想像，tī伊ê内心必定抱真大ê期望，若ē-tàng tú-tio̍h耶稣tùi chia经过，m̄知jōa好！因此当伊听tio̍h耶稣经过chit-ê所在ê时，伊大声叫耶稣，求耶稣kā伊斗相共、kā伊医治，chit时ê「不幸」，造成伊「有」机会kap主耶稣接触，伊若是明眼ê人，可能chit时，伊bōe tī路边叫耶稣，或者伊是离开故乡出外，或者是生活堕落mā无一定，但是因为伊chheⁿ-mê，hō͘伊kan-ta ē-tàng tī路边kā人分，对人ê立场来讲，实在是不幸kap悲哀ê人生，耶稣基督ê福音，tiāⁿ-tiāⁿ是发hō͘人生tī chit种不幸kap悲哀中，咱看教会生活，有真chē人tī悲痛、绝望ê境况中，忽然间tú-tio̍h耶稣基督ê福音来成为基督徒，所以有时人生ê不幸kap悲惨，颠倒提供hiah-ê人有接近救恩ê机会。真chē显赫、有成就ê人，通常是用人ê方法teh经营人生，但是当in失败ê时，就会开一条通到上帝面前ê路。得意顺利ê时，人是自专骄傲，当真正体验tio̍h人生ê绝望ê时，所有ê办法lóng无效，chit时除了向上帝呼求以外，无别条路，chit位chheⁿ-mê者to̍h是chit种状况，chit时chit-ê所在，只有耶稣基督ê恩典chiah ē-tàng解决伊ê问题。

（三） 信心ê报偿
咱看tio̍h chit位不幸ê可怜人，虽然受压迫、责难，但是伊对主耶稣ê信心，无因为外在坏环境来改变，这值得今á日ê基督徒向伊学习。人tiāⁿ-tiāⁿ会因为现实ê境况，改变伊ê心中ê意志，tī圣经中siōng明显ê to̍h是彼得三次m̄认主，tī学生中彼得算是代表人物，伊是学生ê领袖，事实上伊所表现ê信仰（对耶稣ê关系），实在是值得钦佩，伊tiāⁿ-tiāⁿ tī重要ê关头，代表学生表达意见，无gōa久前，伊iáu真勇敢ê用刀仔kā祭司长ê奴仆ê耳孔割落来，但是几点钟了后，伊soah tī一位cha-bó͘-kán面前，m̄敢承认伊ê主，这是何等惊人ê反背行为，mā是信仰生活上tiāⁿ-tiāⁿ有ê问题，真chē hông认为有作为ê基督徒，会因为现实ê利害关系来出卖耶稣，但是tī-chiqa咱看chit位不幸悲惨ê chheⁿ-mê者，伊m̄惊环境ê压迫kap人ê责难，koh-khah增强伊呼求耶稣ê决心，伊深信除了克服逆境，若无无法度khia7ti7耶稣面前，承接耶稣所beh赐hō͘伊ê一切福份。

当一个人有chit种坚强ê信心ê时，无论外在ê境况jōa nih-á恶劣，mā 无可能消除基督徒心中ê绝对信心，chit款事实to̍h是初代教会迫害史，若用初代教会kap组织完美ê罗马帝国对比，教会实在m̄是伊ê对手，thang用卵kap石头来形容当时ê教会承受罗马政府无人性ê压迫，m̄-koh初代基督徒ta̍k-ê受tio̍h圣灵ê充满，in表现出对主耶稣热烈ê信心，成做性命ê动力，chit种tùi信仰所发出ê真理ê力量，m̄是政权thang压制ê，chit位chheⁿ-mê者克服了逆境，hông chhōa到耶稣面前，chit时to̍h是伊人生ê关键时刻，重要ê转捩点，伊ê人生就看面对耶稣ê这一刻！克服阻碍chiah ē-tàng接近耶稣，这是信仰者必须认bat ê真理，伊决定ê信仰kap热诚ê意愿是伊到耶稣面前ê条件。

当时耶稣向伊提出一个问题，「你ài我为你做啥物？」万有、恩典ê主耶稣，一直用chit句话teh问每一个时代中ê每一个人。当一个人khiā-tī耶稣面前ê时一定会听tio̍h chit句「你ài我为你做啥物？」，tī-chia决定人ê生死、祸福！因为信仰to̍h是人对耶稣chit句话ê回答，当耶稣发出chit-ê呼声ê时，你beh如何kā他回应？这是人生siōng大ê课题。

Chheⁿ-mê者无求乞食siōng迫切需要ê食物（糊口），伊所求ê是伊永远需要ê「我ài看会tio̍h」，食物只ē-tàng满足伊暂时ê需要，但是目chiu ē-tàng看tio̍h是伊永远所希求ê，只要伊ê目chiu ē-tàng看tio̍h，伊就m̄惊无饭thang食，chheⁿ-mê者chit句话是自古以来人类ê心声，每一个时代ê hiah-ê人lóng需要向耶稣讲出chit句话，「主ah！我ài看会tio̍h」，可惜ê是chiah-ê需要ê人，虽然tī恩主面前竟然m̄-bat主耶稣，「光照tī乌暗内底，乌暗soah无接受光」（约翰一：5）

Chit位chheⁿ-mê者克服了逆境，用积极ê心态khiā-tī主面前，将伊siōng迫切ê需要，求主帮助，果然伊决定ê信心，成全了伊ê心愿，解决了伊人生ê不幸kap悲惨，hō͘伊ê人生重新出发，建立充满tio̍h无比希望ê人生，chit种人生to̍h是人类追求ê生活方式。

结论：「主ah！我ài看会tio̍h」，看bē-tio̍h是人生ê悲痛，不幸kap悲痛ê化解tī面对耶稣。会记得，tī你到面对耶稣ê路途中，有真chē障碍物，你必须ài有勇气克服，tòe tio̍h耶稣，荣耀上帝。「众人mā kā荣耀归hō͘上帝」，这是明眼人ê责任。