《受恩蒙福的一生》

 | | | 转寄

Tī上帝面前富足

作者 林宗要 2010.11.14

路加十二：13-21

「好额」是现实中每一个人人生心中想尽办法达成ê一件人生大事，的确，富足ê人生生活对人生ê状况有特别ê关系，伊会「成全」人生ê愿望，hō͘人生有顺心如意ê生活，这to̍h是造成人幸福ê条件，确实人生ê幸福是建立tī人生活tī顺心如意ê世界，因为伊的确会hō͘人生生活tī真完美满足ê境况中，相信这to̍h是人所追求ê幸福，因此人生chiah会用尽所有ê办法beh得tio̍h会hō͘人生富裕ê物质（钱财），因为tī台湾人心中，「有钱使鬼会e磨」若用普通话来讲是「金钱万能」，tī人间是无可能真正叫鬼去e磨，但是只要有钱就做会tio̍h，to̍h是chit句话ê真意。确实tī人间社会中，咱会看tio̍h有一kóa chit种人生现象，to̍h是人所认为无可能ê状况，tiāⁿ-tiāⁿ因为有金钱介入chiah变做可能。过去咱tiāⁿ-tiāⁿ听见一句「有钱办生，无钱办死」Tī古早ê官府kap现代ê司法界，确实有chit种无合理ê现象。「有钱乌龟坐大厅，无钱秀才人人惊」（有钱讲话会大声，无钱讲话无人听）Chit种现实是现代人ê状况，因为过份追求重视chit种现实chiah致使现代人活tī功利ê现实过程中，chiah造成了真chē人生社会ê负面状况，tī咱ê现实社会中，咱所看tio̍h ê真chē人生乌暗负面ê人生内容，差不多lóng是因为人生对现实ê钱财所表现ê心态chiah形成ê负面价值，chit种人生价值观成做社会价值观ê问题ê评判基准，m̄管你ê人格、品德如何，只要tī你ê现实境况中有充足ê财富，你讲话就会大声，tī台湾ê地方议会，真chē议长或者主席，有真chē是有乌道背景，原因是in用手段kap关系去thàn特别ê钱（普通人若有3～4％ ê利纯，in ē-tàng有20～40％ ê利益，所以乌道beh好额特别kín，因为无人敢反抗，只有按照in ê不法规则）Chit种现象tī台湾社会真普遍，mā是政党kap乌道勾结ê恶质ê政治文化。Tī án-ne ê状况中，自然会影响tio̍h社会、政治、文化等等ê品质，因为咱知影，人性ê恶劣kap堕落，有时m̄是用换一个环境就会有所改善，因为人性是真垃圾难解ê实在，虽然tī外表有议员或者代表ê名称，但是实质上in ê生活方式iáu离bōe开乌道ê处理方式，以前bat有立委hông掠去关tī狗笼仔内tàn tī荒郊野外，tī笼仔顶koh贴替天行道字句，虽然无破案，但是大部分人lóng会了解是啥人ê做法，chit种做法to̍h是乌道处理tāi-chì ê方法，虽然咱ê俗语讲，「君子爱财取之有道」，但是对现实功利心siuⁿ重ê部分现代人已经失去了意义，所以chiah会有hiah-ni̍h chē人为tio̍h beh好额来无暝无日汗流满面，甚至有人为财来死，chit种真普遍ê心态，是teh说明现代人对人生ê富足ê一种共通ê意识型态。因为大部分ê人lóng认为富足ê人生生活确实会hō͘人生生活顺心如意，实在是如此，因为咱每一个人lóng bat体会过无钱ê艰苦，为tio̍h beh克服贫困ê现实，正常ê人lóng会善用伊ê人生资源想beh有koh-khah chē ê财富，ná亲像主耶稣比喻中hit位财主，照理伊应该m̄免koh再去烦恼财富ê问题，因为siuⁿ富裕了，m̄-koh咱tī-chia soaht ē-tàng看tio̍h人生现象，to̍h是无人会嫌家己siuⁿ富足，你看咱ê社会上hiah-ê大好额人，in ê财富非常chē，但是in mā无停止追求财富ê心志，因为财富kap贪欲永远是连做伙ê，只要tī人生社会中，贪ê意念若存在，伊是形成人生问题ê主因，tī人生社会中，咱tiāⁿ-tiāⁿ会看tio̍h因为贪欲之念来产生ê人类真大悲剧kap chiok惊人ê后果。

印度－波罗门教徒死了后一bó͘ kap三ê细汉kiáⁿ生活非常艰苦，有一日伊变成一只金鹅飞到伊ê bó͘面前，kā伊讲ta̍k工tùi伊ê身上挽出一支金毛就ē-tàng解决生活问题（每工la̍k一支金毛）。

伊ê bó͘心贪认为cheng-seⁿ无可靠，趁伊无准备ê时kā伊掠来，kā伊所有ê毛挽了了，结果是平常ê鹅毛，了后继续过tio̍h清苦ê生活，chit-ê故事暗示咱了解贪欲是造成人生不幸ê原因kap产生真chē问题ê原因，马太十九章，好额青年离开主耶稣ê原因mā是kap财富有关，所以耶稣告诫学生讲「富人入天国困难啊！」确实这是人生一ê大问题，对人生ê影响实在siuⁿ大，所以tī财富ê处理kap心态上若有方正ê态度，应该是一位成功ê人生，箴言三十：8-9「上帝ah！求你hō͘我mài sàn-chhiah mā mài富足，赐hō͘我需要ê食物，惊我饱足了后m̄认你，讲耶和华是siáng neh？Koh惊我sàn-chhiah就偷the̍h 物件soah亵渎我神ê名。」这是真理想人生对财富ê心态，但是事实上，人真困难生活tī理想境况中，因为关连tio̍h人心ê贪欲ê念头，hō͘人生chit种理想ê自我控制能力，处tī一方面是理想，另外一方面是现实ê状况中，基督徒必须ài有信仰ê智慧去面对kap咱有切实关系ê富足ê问题。

（一） Tī智慧ê富足
智慧是人生生活中成败ê关键，同时伊mā是kap人生ê财富有真深ê关系，虽然tī人生社会中，有时造成人ê富足可能kap运气有关系，但是大部分ê人ê好额，是建立tī当是人ê智慧ê运用来ê，智慧ē-tàng讲是人生生活ê总动机，因为人生ê存在实在无简单而且复杂，tī án-ne繁杂ê人生现象中，人ài有khah理想ê存在必须ài有koân度ê智慧，chiah ē-tàng应付人生社会中ê复杂ê性格，咱ê主也bat向学生提起「Lín ài训良ná粉鸟，灵巧ná蛇」ê人生内容。

因为伊确实ē-tàng帮助人化解问题、解决危机、造就人生，koh-khah了解人生头前ê路，哲学家bat提起「世上所有ê善lóng规范tī智慧ê下脚」这to̍h是主耶稣基督向hit位提出「良善ê夫子，我当做啥物tāi-chì……」ê时，主讲除了神一位之外，无koh有良善ê了。诗篇kap箴言lóng有teh强调chit项真理，「敬畏耶和华是智慧ê开端」当咱用主讲ê话kap箴言ê教示来思考ê时，咱就会了解人真正ê智慧tùi án-ne tī善ê源头耶和华上帝，tī-chia提出ê智慧是ùi万项好ê根源ê上帝完全ê智慧，kap世间ê智慧无仝，台湾谚语有一句「贼计状元才」表示犯罪ê人用koân度ê智慧作犯罪ê工具，chit种智慧tī上帝面前无受接纳，基督徒tī上帝面前富足ê智慧m̄是chit种智慧。

是ùi siōng-koân、良善ê上帝所赐ê、完全ê智慧，是/bōe陷害人ê，是会造就人ê智慧，是会克服危机，引chhōa人生行向光明ê智慧，会hō͘持有ê人对事物有正确ê判断kap辨别善恶ê智慧。基督徒必须ài有chit种正面ê价值，建立tī信仰ê世界ê chit种智慧，咱tī上帝面前若有chit种tùi上帝所赐ê智慧ê时，就会成做上帝所喜乐ê人生，因为伊会带领信徒生活teh符合上帝ê旨意ê人生过程，这是上帝对人类ê基本要求。有chit种智慧ê人就ē-tàng完成上帝ê要求，这to̍h是上帝ê祝福。

（二） Tī信仰富足
彼得后书一：1「写phe hō͘ he因为咱ê神kap救主耶稣基督之义，kap咱做伙得tio̍h仝款宝贵信心ê人……」，彼得tī-chia用「宝贵信心」来形容咱ê信仰，hō͘咱想tio̍h主耶稣tī马太十三章天国ê比喻中，财宝或者是珍贵ê真珠ê比喻，hông发现tio̍h ê人用尽所有ê方法来取得hit种宝贝，这是人生对现实中有价值ê事物所有ê普遍心态，咱ē-tàng tùi现实ê人生状况来体会tio̍h chit种真理，确实tī人间社会中，人为tio̍h beh得tio̍h心中认为khah宝贵ê物件，人会用尽所有ê方法去争取，希望会得tio̍h心中理想ê价值。

当咱用chit种心态去看信仰ê主ê时，咱就会koh-khah了解，主耶稣所留hō͘人类ê物件确实是无价之宝。若用现实ê物质观看基督，伊死ê时只有留一领外衫，hō͘罗马兵分去，除了这以外，基督无留任何物件（看会tio̍h ê物质），但是二千年来，伊留hō͘人类ê物件确实是无价之宝，二千年ê基督教历史有完全ê说明chit-ê事实，确实，耶稣基督chit种宝贝ê信仰若临到ê所在，tī hit个所在，就有完全无仝ê人生现象。

咱若看基督教史，咱就看tio̍h tī福音感化之下ê人ê情形，有意外中ê变化，真chē野蛮ê民族因为福音ê进入hō͘ hit个社会成做文明ê事实。进化论ê提倡达尔文游历当时未开化ê民足chiah ē-tàng吸收tio̍h文明ê空气，但是当时伊tī十年了后koh再tńg来到以前ê所在，hō͘伊非常gōng-gia̍h，因为十年ê时间竟然会hō͘ chiah-ê野蛮ê人生活tī文明kap社会中，主因to̍h是十gōa年前，耶稣基督ê福音广传tī chiah-ê未开化ê野蛮人中，改变in ê心态kap人生价值观，hō͘上帝ê恩疼完全充满tī chit-ê社会，这to̍h是信仰ê能力，当一个人若实在用信心去经营人生ê时，伊ê人生所表达出来ê种种作为lóng是正面价值ê人生现象。

因为信仰m̄是只有tī心灵siōng而已，mā是beh将伊完全实行tī人ê生活内面，hō͘咱ê人生完全了解上帝ê旨意，比如保罗向歌罗西教会所讲ê「愿lín teh一切属灵ê智慧悟性顶koân，满心知影神ê旨意」（一：9）完全了解上帝ê旨意to̍h是基督徒ê信仰生活，这是基督徒信仰生活siōng高贵ê内容。Chit种生活to̍h是会结圣灵ê果子ê人生，因为信仰是信徒生活ê实际部分，是信徒ê生活kap行动面，「好叫lín行事为人对会起主，凡事蒙伊喜乐，tī一切善事顶面结果子，渐渐知影神」（一：10）To̍h是信徒信仰生活ê内容。

Chit种有美好ê信仰见证ê生活是基督徒信仰ê实在价值，因为通过信徒ê信仰生活会显示出各项ê好事（良善ê人生内容，to̍h是信徒实在ê信仰生活），因为chit种美好to̍h是上帝创造人类ê目的，伊是确立teh了解上帝旨意ê人生过程中，创世纪三章始祖犯罪ê行为kā咱讲一件真理，to̍h是无了解上帝ê旨意，因为上帝明明kā-in讲，in soah去侵犯，致使成做无法度承接上帝恩典ê存在，chiah hông赶出乐园，这是人生ê悲哀，mā teh提出人tī上帝面前罪ê问题，tī上帝面前富足是人tī基督ê恩典ê罪，hō͘人真坦然khiā-tī上帝面前，有良好、美善ê人生过程，chit种过程，to̍h是信仰ê恩典，真自然，chit种人生内容就ē-tàng表现出符合上帝美旨ê完美有价值ê人生状况，这to̍h是结圣灵ê果子ê人生，是tī上帝面前富足ê信心ê结果。

确实，好额tī/teh上帝面前有信仰ê人，伊ê人生状况bōe一定是事事完美、一帆风顺通顺ê人生，反之或者者tī/teh伊ê人生过程中会经历tio̍h真chē ê困苦、逆境kap讲bē尽ê患难mā bōe一定，thang/ē-tàng对一位有富足ê信仰者来讲，chiah-ê人生ê患难是bē晓/bōe/bē影响［响］in ê信仰，反而成为in信心ê鼓励kap造就，hō͘ in koh-khah理想、成熟，益发荣耀上帝。

（三） Tī有疼心ê好所行ê富足
最后一项咱来想，富足tī「有疼心ê好所行」（提前六：17-18），基督徒是认bat上帝ê人，照约翰提起「上帝是疼」（约翰壹册：4）所以属于上帝ê信徒应该是疼ê存在者，因为无疼心是m̄-bat上帝ê人，所以无疼ê人生，本质上已经m̄是基督徒了。

保罗tī罗马书十三章八节「凡事lóng bē-tàng亏欠人，只有互相sio疼，ài时常认为是亏欠」。

照保罗ê意思除了疼人以外，ē-tàng有亏欠人，独独相疼ê人生行为是bē-tàng亏欠人，因为基督徒相疼ê义务是无限ê，tī伊ê人生过程中，基督徒必须了解，伊有永远还bōe完ê疼人ê行为，mā to̍h是相疼是信仰生活中ê负债。

人对负债ê道德行为，事先是承认然后必须想办法去还ê，这是做人ê基本道理，ē-sái讲是现代人ê生活表现但是soah m̄是án-ne，m̄承认负债，同时用欺骗不法ê手段来应付伊ê负债，所以tī社会上chiah有恶性倒闭kap狼毒手段ê诈欺，chit种心态m̄是上帝所喜乐ê方式，人beh tī上帝面前成做富足ê人，伊必须善用伊充满慈疼ê心情去对待人类，因为相疼ê生活是认bat上帝ê人ê标帜，一个人beh tī上帝面前富足，伊的确ài有chit种疼人ê义务是无限ê心态，mā to̍h是伊ê人生资源中，充满tio̍h完全ê疼，然后善用chit种恩典ê疼去表现tī各样ê好事顶面，因为chit种人生中ê善行，是主耶稣拣选咱成做伊ê子民ê原因，「伊替咱牺牲家己，beh救赎咱脱离一切罪恶，koh洗净咱，特作家己ê子民，热心为善」（提多二：14），chit种成做信徒ê神圣使命，每一个信徒必须ài有完全ê了解，因为基督救赎咱是beh hō͘咱成做伊圣洁ê人民，to̍h是表现出热心tī各样好事顶面，mā to̍h是对恩典ê信仰，用完全ê疼去采行咱做基督信者神圣ê使命。Tī西洋tiāⁿ-tiāⁿ有礼拜堂ê旧钟仔会家己叫，是tī地方上值得受肯定ê美好行为hō͘上帝ê心喜乐ê时，钟仔自然会tân，有一个故事说明tī圣诞暝，所有ê人尽in一切ê力量去事奉、捐献，beh hō͘上帝ê心喜乐，所以有一kóa好额ê人确实奉献真有价值ê钱财，但是钟仔并无发出声音，后来一位sàn-chhiah ê孩童，teh赴拜堂途中救一位可怜ê乞食，将伊beh献hō͘耶稣ê礼物－全部ê pháng kap钱ê一半hō͘乞食，kan-ta留一半ê钱献hō͘主耶稣，当伊ê钱khǹg入捐献箱ê时，soah听见钟仔声大tân，chit种故事tī中世纪ê欧洲社会时常hông提起，伊teh说明（强调）信仰kap行为ê事实。因为雅各讲：信心若无行为to̍h是死ê，死ê物件是无价值，因为伊内面无性命ê存在。

基督徒ê人生的确ài有疼，成做充满疼心chiah有好行为ê人，比如保罗所强调「Tī好事顶面富足」chiah是高贵有价值ê人生，卡内基是美国ê钢铁大王，本部tī宾州ê匹兹堡，伊少年ê时bat立志「我必须爬到人类宝座siōng koân ê位」，后来伊确实得但是当伊tī人类siōng koân ê位ê时，伊体会tio̍h孤单kap寂寞，只chhun伊一人！因此chiah自省，chit种人生kám是实在真正ê人生？只有富足tī家己tī上帝面前soah无富足ê人生是悲哀不幸--ê，因此决定将伊所有ê财富捐hō͘教会、学校、救济等事业机构，家己立墓牌「Tī-chia有人安息，伊会kap比伊聪明ê人合作」，或者咱看石油大王洛克斐勒mā是仝款，伊tī在生ê时捐献美金五亿五千万kho͘（四大基金无包括在内），九十七岁死ê时，只chhun一张第一号ê普通股票。Chiah-ê lóng是teh说明tī上帝面前富足tī有疼心ê善行！

结论：富足tī人生中是一件值得欢喜ê tāi-chì，普通人tiāⁿ-tiāⁿ用che来解释人ê成功，基督徒tī上帝面前ê富足mā是án-ne，希望咱tī上帝面前ê富足是有智慧、信心kap有疼心ê好行为，用che来解释基督徒ê信仰生活ê份量。