《受恩蒙福的一生》

 | | | 转寄

生存ê空隙

作者 林宗要 2010.11.07

路加福音十：38-42；雅歌一：6b

雅歌一：6b chit句话对咱现代人生是一句值得咱去省思ê一句话：「In叫我顾守葡萄园，但是我soah bōe-sái顾守我家己ê葡萄园。」（雅歌一：6b）M̄免解释，咱mā ē-tàng体会出伊ê内容。

Chit句圣经确实有反映出现代人生生存ê现实ê问题。因为现代人根本bōe-tàng建立生存ê重点是啥物，无把握tio̍h人生生活ê重心何在。相信咱若用咱现实ê状况，咱就ē-tàng发现tio̍h人ê生活是看近无看远，对人生存在ê根本问题无顾，soah活teh「无闲」soah「无实在」中。Chit句圣经hō͘咱想tio̍h舍己耕人。Chit种无把握重心ê生活是造成人生社会中真chē混乱kap问题ê事实。

今á日台湾社会是án-ne混乱，伊ê成因是现代人ê生活，是失去了重心ê生活所造成。为何台湾社会ê poa̍h-kiáu hiah-ni̍h-á时行，过去ê爱国奖券、大家乐，chit-má ê六合彩、乐透，chit种背后所产生ê后果，tiāⁿ-tiāⁿ hō͘人生ê生活teh家破人亡ê边缘。咱看tio̍h社会上有真chē 不法ê行为，lóng kap chit-ê赌性有关。Chē是人性ê m̄知轻重，失去把握人生重点ê生活内容所造成，mā to̍h是人所建立ê错误ê价值观。想讲签一万kho͘，签tio̍h ê时有一百或者两百万ê收入，chit种观念本身to̍h是无正常ê价值观。Tùi chia chiah产生出真chē社会ê混乱kap不法ê行为，所以chit种结果是对人生社会有负面作用。

咱若思考雅歌一：6b chit句圣经，咱会发现tio̍h chit种情形实在是人生ê生存ê空隙。

「空隙」咱lóng会了解，伊是指tāi-chì hō͘人指责ê无完整处，有ná漏水ê孔。若是人生有空隙，伊m̄是人所ǹg望ê。因为每一个人生lóng期待tio̍h人生ê生存有完美、有理想。因为无空隙ê人生，开始ē-tàng有人生光辉ê内容。Ē-sái讲是人生ê状况tú亲像雅歌一：6b所讲ê，只顾别人soah疏忽了家己ê状况。Chit种生存m̄是人性正常ê生存内容。虽然咱时常听见助人是快乐之本，但是伊ê真意的确m̄是像chit句圣经所讲--ê，乃是有家己ê立足点了后，你chiah去帮助人，án-ne chiah有快乐好讲，bōe-sái将咱ê生存ê内容、kiáⁿ儿教育费等问题lóng投入教会，试想chit种生活的确m̄是上帝所喜爱ê生活内容。

Tī现代chit种工商业化ê社会，人确实真无闲，但是bē-tàng因为无闲来无闲，必须ài建立the无闲中有生活重心ê人生内容，chiah bōe造成咱生存ê空隙。帮助人或者照顾人是美德，但是bē-tàng因此soah影响tio̍h你ê家庭、事业，che chiah是真正有意义ê事实。确实tī chit种功利ê现实社会中，人生所无闲ê重心大部份是teh追求功利。为tio̍h这人生无暝无日soah bōe记了人生所追求ê真正ê内容是啥物。真罕得有时间停落来静思kap反省，这to̍h是现代人tī连续ê假期中所产生ê真chē社会现象。因为人一直teh走chông，无时间thang恬恬á来思考人生koh-khah重要ê问题。（功利以外ê人生内容）

Shulberg ê小说 "What makes Summy run?"（什么hō͘ Summy走chông kah hiah-ni̍h凶狂？）内容讲tio̍h山美凶狂并m̄是为tio̍h啥物理想，「是走本身hō͘伊走」，因为伊相无闲teh走，所以无时间思考应该走toh位去，伊ê走是无目的ê走！Ná亲像chit种情形，相信大家lóng可能有chit-ê现象。Tú亲像雅歌一：6b内容仝款，这是人生ê悲哀kap不幸，mā to̍h是现代化所引起ê结果。
西洋有一句俗语讲：「上帝创造乡村，恶魔创造都市」。Chit句是teh表明乡村kap都市tī人类性命史上ê影响。乡村ê生活对人生有khah正常ê内容，比如空气、民情ê纯朴、罕得有犯罪ê情形。都市soah m̄是án-ne，交通乱、空气bái、无人情味、充满tio̍h各种罪恶，娱乐情色场所ê表现，「Kui暝到天光」是伊生活ê内容。Chit种所在tiāⁿ-tiāⁿ是罪恶ê温床kap问题发生ê因由。（几pái大火lóng发生tī色情场所）主因tī伊ê是无正常ê所在。日本一位学者，提出二大项说明乡村kap都市ê差别：

A） 互相认bat是乡村ê特色，kap都市完全无仝。差不多kui村lóng认bat，thang互相叫出名姓，所以有制约作用，所以khah无人敢去作歹代。都市to̍h m̄是án-ne啊，公寓ta̍k家m̄-bat招呼是真平常ê tāi-chì。（凶杀案死一礼拜iau m̄知动静）譬如坐车，乡村ê车互相交谈，市内公车真少有交谈，讲无啥话。对话ê损失tiāⁿ-tiāⁿ湠生出真chē社会问题，横直我kap你互相无熟悉，无惊惶ê心tio̍h无见笑ê心，造成犯罪ê事实。生存ê要诀teh对话ê成立。（基督徒kap上帝之间、夫妻间、亲情间、朋友间、基督徒ê教会生活等）对话的确立是形成意志ê疏通，伊是解除人心中所有问题、误会、隔阂、主观意识等ê良好办法，进一步koh形成感情ê结合，chiah会促进人生生存ê良好结果。

B） Kap自然结合mā是庄脚ê特色。都市ê文明是由铁kap红毛土来形成，庄脚lóng tùi土kap石头kap草所结合--ê，头前hit-ê是热烘烘、烧滚滚，后者是温柔kap青草树á来组成。都市ê特色是热闹kap扰吵，乡村用自然kap安静，到九点了后无听tio̍h别—的声音，只有虫teh叫ê声音。

都市ê噪音tiāⁿ-tiāⁿ是遮盖tiâu人听tio̍h上帝ê声音ê主因！听bē-tio̍h主ê声音是人生ê不幸kap悲哀。咱处tī无闲ê现实功利社会中ê基督徒，tī-chia必须ài谨慎，bē-tàng因为咱ê生存环境来遮盖了、听bē-tio̍h神ê声音！若无人会迷失方向，伊ê人生生存就会有空隙ê出现，这是真惊人ê人生问题。

（一）「烦忙」ê现代人
处tī现实真无闲ê现代人生，咱必须时常省思咱人生生存ê空隙形成原因tī toh位？因为chit-ê问题ê理解kap把握，会帮助咱ê人生teh无闲中，尚ē-tàng把握tiâu人生存在ê真义。

因为咱每一个人ê生存lóng期待ē-tàng建立tī完美、理想、无缺陷ê人生状况中，但是chit种人生生存ê完美ê理想，tī咱人生现实中无一定ē-tàng有百分之百ê实现，这是人生实实在在ê情形。

有时咱所期待ê人生现象，颠倒得bōe-tio̍h，所得tio̍h ê是咱所无意爱ê人生状况。

Chit种心中ê理想kap现实ê互相冲突，to̍h是今á日咱人生ê问题kap不幸ê主因！

无闲本身并m̄是罪恶，但是若因为过份无闲soah引起真chē负面ê人生状况ê时，就会造成人生生存ê真chē问题kap困扰，成为生存ê空隙ê时，你人生ê phah拼kap用功对你ê人生lóng bōe有正面ê意义。因为囥你人生ê果实ê器具有无底洞。日本童话北海道ê熊，tī河来掠鱼ê身手是一流--ê，伊拾tio̍h一个笼á，真欢喜ê chah 去khǹg所掠tio̍h ê鱼仔。可惜因为笼仔底破孔，伊所掠tio̍h ê鱼仔lóng漏掉。伊自认为今á日真丰收，soah m̄知检查ê结果，连一条mā无。

白做工，一切ê phah拼、成果落空，主因tī所chah ê工具破孔啊。这gín-á古teh教gín-á，bē-tàng生存teh有空隙ê世界，因为枉费人生ê一切phah拼kap作为！这是人生真大ê悲哀。

以前ê台湾tiāⁿ-tiāⁿ用查埔人娶到bē晓款厝ê妇人形容做破水桶，无论查埔人如何用功取水，但是因为水桶破孔无法度留，一切ê劳苦phah拼lóng是白了工！确实tī现实ê人生中有chit种情形ê发生，chit种人生，m̄管伊ê人生如何付出，但是结果lóng是空。

Tī-chia咱ē-tàng看出，主耶稣向当时当teh烦忙ê马大所讲ê话，是teh无闲中ê人生必须去体会ê一句话：「马大ah马大ah，你为tio̍h真chē事挂虑、混杂，但是所欠缺ê，只有一项而已」（路加十：41-42）失去了人生重心ê生存，tiāⁿ-tiāⁿ会造成人生真chē负面ê情况。

（二）迷失方向ê人生生存mā是现代人生ê一个真严ê问题。
雅歌一：6b所讲ê chit句话，to̍h是teh说明chit种人生ê事实。到底chit-ê人ê人生方向（目的）tī-to̍h？伊ê人生ê意义是啥物？

确实tī人生生存现实中，有chit种行m̄-tio̍h路或者坐m̄-tio̍h车ê情形。Chit种人生实在是浪费kap损失ê人生。有一个故事：「行m̄-tio̍h方向」是chit种ê，中原人beh ùi楚国「（南方），hit人soah向北爿行，有人kā伊讲方向m̄-tio̍h，楚国tī南方，你往北m̄-tio̍h，hit-ê人soah应讲，无关系，我有一只好马thang胜任。Hit-ê人讲，m̄管你ê马jōa好，方向m̄-tio̍h会离目标jú行jú远。伊讲，无妨，伊有chah够额ê旅费thang用。Hit-ê人讲，无论你ê旅费有jōa-chē，往北的确无法度到楚国。伊回答讲：…「无要紧，我ê马夫本领好！」南辕北辙（战国策）。各位啊，chit-ê故事teh kā咱讲人生生存ê一个严肃问题，人生ê方向若têng-tâⁿ，无论人生有何等ê成就（科学、文明）mā是了然--ê！Siōng冤枉ê是浪费ê人生！主因teh迷失方向，因为方向ê têng-tâⁿ，m̄管你具备任何良好ê条件，lóng会hō͘空间jú远离，离开你ê目的jú远！

Ná亲像车ê làng缝或者是机械ê làng缝bōe发生任何作用，迷失方向ê人生往往无法度有实在或者有意义ê人生ê果实。因为chit-ê人生生活ê一件重要ê问题，to̍h是你ê人生道路ê方向必须真正确！Bē-tàng有偏差ê人生方向，你ê phah拚走chông chiah有效果。

Chit点，基督徒必须确立真坚实ê人生观，因为上帝已经提示咱chiah属于伊ê人完全了解人生ê所有问题。基督徒应该了解上帝已经完全清楚将人生使命（人应该行ê方向）kā所有ê基督徒讲。所以照理基督徒ê人生路途伊ê方向应该是清楚ê，假使tī基督徒ê人生道路上，伊ê方向若是迷失，是bōe-tàng迎请主耶稣tī伊ê人生中做伊ê导师所造成。只要基督徒ê人生有耶稣ê同在，to̍h是伊ê人生路上必定充满tio̍h光明、美丽、灿烂--ê。因为，他ê引chhōa是安全而且周到--ê，比如牧者kap羊群（诗篇23篇）kap像上帝tī旷野中带领以色列人ê状况，白日有云柱，暗时有火柱，án-ne ê状况必定bōe致使迷失。

人生ê方向若无迷失，就人生ê劳力kap走chông lóng会有成果出来。这to̍h是有方向ê人生ê结果。Chit种有方向ê人生生活，to̍h是主耶稣tī约翰福音15章所讲--ê「结真chē果子」ê人生。这是人生期待ê完成，mā是人生生存所带来ê祝福，是上帝teh信仰ê事实赐福hō͘信仰他ê人ê现实！

（三）把握你ê人生
只要tī人生中ē-tàng把握方向ê实在，就m̄惊人生ê任何现实ê境况。

路加10：38-42 chit段圣经，通常人lóng会替马大抱不平，因为伊实在为tio̍h耶稣kap学生付出了真chē可贵ê时间kap phah拼，但是soah颠倒hō͘耶稣所责难。为何耶稣tī-chia会特别告诫马大neh？耶稣ê意思ài hō͘马大了解，生活ê问题虽然重要，但是食m̄是人生ê全部，tī-chia他kā伊讲，马利亚已经把握tio̍h人生生存ê重点，to̍h是上帝ê话，因为他ê话是人生ê灯kap光。Tī现实困苦、乌暗ê人生现象中，伊比任何食物lóng khah有价值，伊会指引人生活tī光明安全ê路上！Tī人生ê路途上，若有光kap灯ê引chhōa，就m̄惊人生ê现实有jōa-ni̍h-á歹行坎坷，lóng ē-tàng安全行好势。Chit种人生价值观，是支使人生ê动力，tùi chia产生出人生ê结局是荒废或者丰收。

保罗ê人生体验thang是借镜，tī哥林多书十一章有说明伊ê人生遭遇，但是为tio̍h福音，为tio̍h耶稣基督伊有把握tio̍h重点，并向此chiah尽力走chong4 ê路站，伊向提摩太说明伊已经尽一切phah拼去完成受托ê使命（提后四：7-8）tī-chia咱ē-tàng看出保罗对伊ê人生ê把握，虽然伊ê人生并m̄是一帆风顺、百般顺势ê情景中，但是lóng ē-tàng完全把握ê人生内容。照伊ê体验，无论好额散赤或者是欢乐悲哀中，伊lóng ē-tàng发挥伊ê人生生活siōng koân内容，咱若看保罗ê生活咱就会知影，伊归主了后ê生涯是苦难不安ê日子，但是chiah soah无影响tio̍h ê生活内容，主因tī伊有完全把握tio̍h伊人生ê一切，mā to̍h是有充分ê信仰teh扶持tio̍h伊ê生涯。因为信仰会hō͘ in人生有明确ê人生方向，方向明哲ê人生，就bē致使迷失，就会成全伊人生ê理想。Tī-che过程中，信仰所负担ê角色是bōe-sái疏忽--ê，mā to̍h是把握人生是经过信仰ê介入chiah完成ê。信仰会建立一个人生bē致使迷失方向，因为信仰ê主耶稣基督，永远会引chhōa属于他ê人生活tī伊ê旨意中。

结论： 了解咱ê人生是受托ê人生（太25：14-30），善用咱有限ê智慧去成全伊。会记leh，咱人生ê工程必须经过验收（林前3：12-15）「Chit-ê世界kap伊siōng ê情欲lóng tio̍h hō͘伊过去，只有若行上帝旨意ê是永远常存」（约壹2：17）