《受恩蒙福的一生》

 | | | 转寄

《受恩蒙福的一生》 杨启寿牧师 序

作者 杨启寿 2010.07.11

知影林宗要牧师teh-beh出版第二本讲道集，感觉真欢喜，同时mā真佩服林牧师退休了后，犹原充满旺盛ê斗志kap毅力。

我有机会认bat林牧师是tī长老教总会工作了后ê事。当时tùi长期工作ê玉山神学院来到台北，无论tī工作上或生活上lóng遭遇bē少困难，感觉非常心力交瘁。林牧师tī hit时chūn出现tī我ê面前，成做到taⁿ难忘ê帮手。伊m̄-nā关心总会性ê事工，常常为事工ê需要慷慨捐助，伊mā关心总会同工ê生活kap福利，透过真chē场合kap方法来鼓励并帮助。伊ê帮助并无hō͘人感觉有所负担，但ē-tàng hō͘人用感谢喜乐ê心接受。

我tùi长老教会总会退休了后，koh接受林牧师ê邀请，tī伊当时牧会ê木栅门诺教会协助主日讲道ê工作。Tī kap伊继续ê交往中，koh-khah体会伊ê为人kap信仰有真chē hō͘阮后辈ê人值得学习ê所在。我总是认为好ê讲道无tī活力动人ê言词，mā m̄是讲解深奥难了解ê哲理，却是藉tio̍h一个人tī伊ê人生战场上ê故事，宣扬上帝ê爱kap救恩。期待读者透过林牧师ê信仰历程kap长期不断ê服事，听tio̍h上帝tī今á日beh赐hō͘咱ê智慧、安慰kap鼓励。

杨启寿 2005年7月初