《受恩蒙福的一生》

 | | | 转寄

《受恩蒙福ê一生》林宗要牧师 自序

作者 林宗要 2010.07.04


我出世tī七十gōa年前ê传统草地（彰化县芳苑乡），tī母胎里就有基督信仰，gín-á时代就参加主日学，因为老母ê信仰。认为敬畏耶和华是智慧ê开端，认bat hit位圣者就是聪明，所以hō͘我成做族亲中第一位受正规教育ê人。可见信仰对人生ê关键性影响。国校时代常常负责亲族中农业品买卖ê账项工作，当时tī心灵上充满自信kap荣誉感（有可能影响我日后人生价值观kap行为心态ê原因）。老母ê信仰对阮幼儿时代ê教育kap信仰，以及做人道理有决定性ê影响，幼儿时代就被要求tī品德上以及信仰方面ê严谨，结局造成一位草地gín-á ē-tàng完成神学教育，担任牧师职，这过程hō͘阮体会tio̍h上主无限之恩典kap赐福tī阮ê身上。

神学院毕业时（1952年）虽然有四、五名教会代表chhōe我，ài我到in ê教会牧会，但是因为传道师无选择权，最后受派到由当时ê T.K.C.（台湾基督长老教会青年团契）所发起ê五角银运动所创设ê新屋教会，十四年久tī新屋教会，确实体会tio̍h上主无微不至ê带领，hō͘一位客语完全m̄-bat ê人，日后竟然ē-tàng用真标准ê客语来讲道，十四年久tī新屋ê牧会确实真艰苦，负担重、挑战大，但m̄-bat因为肉体ê负担以及牧会工作量大来灰心或失志过，反tńg tī辛苦ê牧会生活中体会tio̍h喜乐ê感受，因为教会内有几位年纪kap我差不多ê青年人非常支持，协助教会事奉，牧师娘ê关怀探访工作做得非常好，因此hō͘一间被当时教界认为弱小ê客家教会，tī五年内ē-tàng自立，七年了后就完成建堂工作（全无向外募捐），因此受总会指定为北部ê农村示范教会，常有外国朋友来访参观。

Tī 1966年五月中ê一个主日，有虎尾教会五名长老忽然间（无任何告知）来参加新屋教会礼拜，礼拜了后五名长老向我说明来意，就是boeh聘请我到该会牧会，徵求我意见，并提出一份聘书（主要是年限kap谢礼等）我即时回答in，期待tī祈祷中听上帝ê指示，tī六月ê时回覆，后来就决定到虎尾。虎尾教会是一间组织良好，人才济济，尤其是对牧师ê谢礼上，thang做其他教会ê典范，虎尾教会hō͘我 ê谢礼是按照总会ê规定加六成，是一间有淡薄á顾虑tio̍h牧师实际生活ê教会，五名长老来新屋ê时，每一个人用无仝ê观点观察评估：牧师讲道，师母司琴，牧师子女品德，以及看宿舍是m̄是整齐（每一个人tńg去ê时tī礼拜中向会友报告in所观察tioh8e5内容）。

Tī虎尾教会十gōa年ê教会生活，thang用「战战兢兢」ê心情去面对牧会事工，每周至少负担主日早起kap暗时二场礼拜kap每礼拜ê家庭礼拜，共三pái ê讲道，另外每月有一pái ê青少年主日讲道（青少年三十gōa名，主日学百名左右）以及主日学礼拜ê讲道，工作量相当大，因此关怀ê事工差不多lóng由牧师娘负责（教会有雇用一位姊妹替代牧师娘ê煮饭、洗衫、清扫ê工作），hō͘牧师娘专心tī教会ê事奉，当时ê教会hō͘牧师ê谢礼是十四个月，但虎尾教会hō͘我ê谢礼是十五个月，包括每年一个月ê退职基金，由教会会计负担保管生利息，到1974年ê时因为倒风日盛，会计恐惊牧师基金会发生意外，因此决定由牧师家己保管，隔年光宝公司成立需要创设资金，我就将hit七万元交hō͘元生投资tī光宝，tī十gōa年了后，光宝股票上市，我所投资ê股票mā成做我经济ê主要来源。

Tī-chia体会tio̍h一位清寒ê传教者，上帝ê恩典kap赐福竟然chiah-ni̍h大，hō͘阮ê经济生活完全改观，若m̄是主ê恩典kap赐福是无可能ê tāi-chì，因此常常有感激ê心情面对上主所托付ê牧会事工，来报答主恩，因为子女lóng已经读大学kap中学。所以阮khah有时间去关怀，尤其是牧师娘ê探访thang用「行到脚底生茧」来形容她ê状况，特别是有几户弱势ê会友，阮所对in ê关怀hō͘ in真感动（关心in ê病疼kap实际生活ê需求），确实tī虎尾教会，阮有体会tio̍h上主无限恩典kap赐福，因为教会关心牧师ê子女教育、牧师ê生活，教会lóng表现出in细腻ê关爱，因此tī虎尾教会thang用「无后顾之忧ê牧会生活」来形容阮tī虎尾教会ê牧会。Tī我ê牧会规划中，希望有机会对弱小或回故乡，还福音债ê期待，却因为我家庭ê因素无法度完成（只有真短ê时间tī台中东势教会kap牧师娘ê故乡路上教会），就结束tī长老会ê专职事奉，搬到台北kap元生（我ê长子）共同生活。

志芳（洪长老）知影阮ê情形，因此bat事先建言，是m̄是ē-tàng来木栅帮忙？我有答应伊，若只是讲道应该是无问题，tī 1984年十二月十六日头一pái tī木栅教会讲道，题目：「理想ê基督徒」。自1985年三月起正式成做木栅教会ê牧师，kap主内兄姊建立了非常深厚ê情谊，二十年来，阮确实tī木栅教会体验tio̍h这mā是上主无限ê恩典kap赐福，hō͘阮二位已进入老年ê人，体会tio̍h无thang比phīng、非常尊贵ê主内情谊，阮确信兄姊之间所付出hō͘阮ê是非常尊贵ê情谊，对阮人生晚境ê身心有正面价值ê积极作用，chit种上主美好ê安排，hō͘阮ê身心得tio̍h无限ê温暖滋润。

回顾五十gōa年来ê牧会生活，虽然tī工作上难免有瑕疵kap身心ê负担，但整体来讲，阮行走ê五十年来牧会ê路径，我确实真用心tī讲道ê准备kap经营牧会，chiah ē-tàng完成受托ê使命，无论牧会生活、子女ê成长kap就业ê过程，阮lóng继承先人敬虔ê信仰，tī教导子女方面特别谨慎，尤其是牧师娘对子女ê信仰kap品德培育相当用心，因此阮ê子孙lóng免hō͘阮操心，in ê信仰kap爱主ê热诚，投入参与教会ê事奉，是ē-tàng hō͘阮放心ê，这是阮二人tī人生晚境时siōng大ê安慰，并感谢主恩。

回顾七十gōa年来行过ê道路，任何时刻阮lóng不断体会tio̍h上主恩典kap赐福满满，愿阮ē-tàng珍惜上主所赐hō͘阮ê时刻，好好利用阮人生晚境来报答主ê恩典kap赐福，是阮目前所努力ê生活内容，因为「祢beh将活命ê路指示我；Tī祢ê面前有满足ê欢喜；Tī祢ê chiàⁿ手有永远ê快乐。」（诗16：11）