《受恩蒙福的一生》

 | | | 转寄

外貌kap实德

作者 林宗要 2010.10.31

马可十一：12-14，20-21

主耶稣基督降世ê目的，是teh向人类推介上帝ê疼，hō͘ hiah-ê人koh-khah ē-tàng生活teh符合上帝所要求ê环境中。他生长ê环境是tī以色列、加利利附近，因此，咱看他ê khang-khè据点，mā ī加利利海hit爿，去犹太ê机会khah少。他向世人传福音，差不多lóng teh推介上帝ê疼。他tiāⁿ-tiāⁿ用三种方式传道：1)用言语教示 2)用比喻 3)行神迹。咱若查看福音书就会koh-khah了解伊宣教时用教示kap比喻做主体，神迹是tī伊ê khang-khè中，表现了他ê「疼」kap「怜悯」ê另外一种方式，平时他真少行神迹。Tiāⁿ-tiāⁿ有一些法利赛人要求他用神迹来展现权能，但是lóng hō͘主耶稣拒绝。

有时tī必要ê时刻，他mā欢喜用神迹来表现他ê爱心。所以神迹teh主耶稣传道ê生涯中mā tiāⁿ-tiāⁿ出现。主耶稣是beh向世人推介上帝ê疼，chit种上帝疼是beh用信仰chiah ē-tàng真实去体会。伊是属于tī形之上--ê，但是人ê生存、观念、思想，kap理解lóng tī形之下ê环境中，所以人有时对形之上ê问题了解，无一定真热衷或者完全明了。譬如对一个出世就青盲ê人，你beh向伊绍介钢琴、目镜、或者phah字机ê时，kan-ta用嘴说明，恐惊真pháiⁿ hō͘伊认bat，若是用实物向伊ê说明，伊有可能会知影mā koh-khah清楚。Koh比如对gín-á解释什么是疼？Kan-nā口头说明，gín-á有可能无法度理解，若用实际行动去解释，表现tī gín-á ê身上，伊就ē-tàng体会什么是疼。

基督徒ê信仰是tī形之上ê物件，若beh引起一般人ê赞声或者认同，mā可能khah困难。M̄-koh基督徒若ē-tàng tī日常生活中表现出信仰ê果子（To̍h是tùi信仰产生ê圣灵果子）Tī现实社会中，其他ê人才有可能体会tio̍h基督徒信仰ê具体意义。这to̍h是咱教会一直teh强调ê信仰kap生活ài相仝。因为只有基督徒完美ê生活，chiah ē-tàng对信仰做出siōng好ê见证。

Tī教会生活中，siōng ē-tàng带领人归主ê，犹原是看基督徒是m̄是有完美ê生活内容。Hiah-ê tī生活中无法度见证福音ê基督徒真oh传福音hō͘别人，原因是现代人爱看事实ê真相，看tio̍h好ê作为。Tī主耶稣ê传道生涯中，他用比喻kap行神迹，是teh说明chit款事实。他用chit种方式传福音是由他ê疼kap怜悯之心所产生--ê，chiah m̄是the夸口伊ê柄权。因此，神迹是teh表现基督ê疼ê一种事实，因为他是疼人ê主，同时他mā是公义ê上帝。约翰福音二章主耶稣洁净圣殿ê作为，马太福音二十三章他对法利赛人ê指责lóng完全表现出主耶稣公义ê属性。咱看tio̍h chit段圣经文难免会想，chit种举动内底toh位是温柔、怜悯ê主耶稣ê作为neh？事实上，咱详细kā伊思考主耶稣ê疼kap公义ê时，咱就会koh-khah清楚，这是自然流露ê现象。因为tī完全「疼」ê中间，若无「公义」ê存在，hit种疼是危险ê，mā是无完全--ê，这是现代父母教育kiáⁿ儿ê一种缺失。因为受tio̍h自由主义ê影响，父母教育kiáⁿ儿用自由做中心，项项tāi-chì lóng满足kiáⁿ儿ê要求，chiah m̄管tāi-chì 是m̄是正确，kiáⁿ儿有求必应，bōe去考虑hō͘ in ê 是m̄是对ê问题。我bat看过一篇报导，作者讲起现代ê父母欠缺hō͘ kiáⁿ儿维伊命N（to̍h是Vitamin No），kiáⁿ儿有求必应，当然m̄是歹代，但是ài看状况。Chit种教育视欠缺「公义」ê疼。欠缺义ê疼，to̍h是无完全ê，有缺失ê，to̍h是所谓ê「théng-sēng」。

圣经马可十一章12-14、20-21，若照字义来讲，咱会发现耶稣基督tī-chia ê作为kap他ê人格完全无符合，讲真正ê主耶稣m̄是chit种人。圣经上讲：「因为m̄是收无花果ê时chūn」，主耶稣做chit件事是tī逾越节chìn前，差不多tī四月时á，犹太人ê无花果通常tī五、六月chiah开始结果子。

圣经讲：主耶稣iau，远远看见一欉无花果树，生做非常茂盛，一定是结实累累，向前kā看，soah chhōe bē-tio̍h任何果实。若是照得bē-tio̍h to̍h报复ê心理，「M̄照我ê意思做，就hō͘你好看」，咱lóng知影，耶稣基督m̄是chit种人，他绝对bōe做无理ê要求，mā bōe因为腹肚iau chhōe bē-tio̍h果实chiah kā伊咒忏，而且伊ê咒忏koh非常严厉，「从今以后，永远无人食你ê果子」。Tùi字义看，主耶稣kah-ná真无风度，其实咱若tùi福音书中看主耶稣ê人格ê时，咱就thang了解m̄是án-ne，既然他ê本意m̄是照册顶面所讲--ê，án-ne主耶稣tī-chia ê表现必定有他教示ê重点。

（一） 无花果——犹太人ê标帜
Tī圣经内无花果kap葡萄是kap犹太人有密切ê关系。若翻看旧约圣经就会了解，敌人来攻phah犹太国ê时，同时mā会毁掉无花果树，因为伊是犹太人ê主食。Tī犹太地区，四界lóng有无花果，有ê是野生--ê，有ê是人种--ê。人种--ê无花果，通常lóng受tio̍h khah妥当ê照顾。因此，伊ê成长，结ê果实lóng khah丰硕。野生ê，因为无人管理，自然条件khah差，但是mā是有结果实，ta̍k年六月到十月之间，是结果子ê时chūn，chit种无花果ē-tàng生食，mā ē-tàng曝干或者做成无花果饼，是犹太人相当重要ê植物之一。初熟ê无花果确实好食，（新屋教会mā有种无花果）。先知讲：「一定亲像夏令以前初熟ê无花果，看见chit-ê果ê就ài注意，一到手中就吞食了。」（以赛亚书廿八：4b），koh讲「我心欣羡初熟ê无花果」（弥迦书七：1）。Tùi chiah-ê经节咱了解tio̍h无花果，是犹太人生活中所bē-tàng欠缺ê食物，无花果mā是in ê标帜。犹太人有丰收莫，通常lóng看hit年无花果ê收成ê chē少chiah准算，假使无花果ê收成m̄是真理想ê时，in ê生活to̍h陷入困境，可见无花果kap犹太人ê生活息息相关。

主耶稣tiāⁿ-tiāⁿ用无花果来教示学生，主耶稣tī-chia ê用意是无法度用文学ê观点来理解--ê。咱thang看出主耶稣用犹太人生活上所bē-tàng欠缺ê无花果来教示学生，来提醒学生，hō͘ in了解kan-nā生满宗教信仰ê叶仔，soah结bōe出公义ê果实，这to̍h是主耶稣所beh强调ê重点。法利赛人是hit时犹太人ê代表人物，chiah-ê人ê所作所为lóng kap主耶稣tī马太福音廿三章讲ê 仝款--仔仝款，in lóng是假影ê伪善者，信仰上若有chit种情形，he是堕落ê信仰，是比无信仰ê koh-khah悲哀。基督徒ê信仰，是经由信仰ê事实，引chhōa一个软弱、无完全ê人去表现出khah符合信仰ê实质生活，chiah是真正ê信仰。Ná亲像上帝特别拣犹太人仝款，ài in tī万人中彰显出主ê荣耀，这to̍h是犹太人hông选做上帝选民ê原因。M̄-koh in m̄-nā无达成上帝ê旨意，颠倒是伤tio̍h上帝ê心。因为当时in ê情况，tú亲像主耶稣所咒忏ê hit丛无花果树仝款，kan-nā有外表，soah结bōe出果子来，失去了伊存在ê价值。耶稣向学生讲，lín是世间上ê啥物好处。这是耶稣看tio̍h当时ê法利赛人ê作为，有感所讲ê破腹话，这mā是今á日教会必须正视ê课题。今á日咱ê信仰，到底是什么款ê价值观？是m̄是kap当时ê宗教气氛仝款，只有美丽ê外表，soah无实质ê内涵？

（二） 只有外貌无实德
上帝kap犹太人ê关系，是因为犹太人kap上帝有契约关系，chiah成为上帝ê差使，ài in tī人间传达上帝ê旨意，这是上帝对in ê要求。犹太人ê存在，就是beh彰显上帝ê荣耀，ài有严谨ê信仰生活内容。Ē-sái讲是tī主耶稣时代，chiah-ê犹太人已经失去了上帝所要求--ê，当做选民应该有ê条件。当时siōng ē-tàng代表犹太人ê to̍h是法利赛人kap文士，chiah-ê人siōng受耶稣ê指责kap批评。Tùi马太廿三章thang看出，chiah-ê人生活堕落，假仙伪善，有名无实，只有宗教上ê形式，chiah无信仰所应该有ê真诚、公义kap怜悯。Chit种kan-nā有外表ê信仰是人所讨厌--ê。主耶稣藉tio̍h这欉只有茂盛ê外表，soah长bōe出果子ê无花果来教示学生，hō͘学生了解基督徒ê存在，ài tī现实生活中荣耀上帝。约翰十七章15~18 án-ne讲：「我bōe求你叫in离开世界，只求你保守in脱离那恶者，……你án怎差我到世上，我mā仝款差in到世上。」

Tùi主耶稣ê祈祷中，咱真清楚ê了解，主耶稣期待基督徒ê生活，m̄是脱离世界，是beh tī世界做光kap盐，chiah是真正有价值ê基督徒。同时基督徒也tio̍h了解，现实世界充满真chē痛苦kap不幸，基督徒bōe-sái逃避，ài面对现实，实际深入chit-ê现实环境，去发挥基督徒应该ài有ê特质。

基督徒若bōe-sái tī生活中结果子，án-ne存在ê价值，是值得hō͘人去思考ê。Chit种bōe结果子ê人生，耶稣用无花果树ê比喻来说明。

基督徒m̄是只tùi教会生活中向上帝申请一张信徒牌照：基督徒是beh teh受托ê人生中结koh-khah chē ê果实，有结一百倍--ê、六十倍--ê、三十倍--ê。若亲像圣经所讲--ê hit丛无花果树，只有茂盛ê叶á，chiah无结实ê内容，最后会hō͘主耶稣所弃绝。只有外貌chiah无实德ê信仰，m̄是主所喜乐ê信仰模式。主形容chit种信仰是粉白ê墓，「外表美丽，内面soah是臭骨骸」，是hiah-ê人所讨厌--ê。举例来讲：苏格兰有一位长老，外表看起来非常热心，聚会从来m̄-bat无到，无论服事或者捐献，lóng bōe输人，但是行为不正，tiāⁿ-tiāⁿ kap人发生冲突，是争端ê根源。有一kang，伊向牧师讲，伊beh去游圣地，爬西乃山。当伊爬上西乃山ê时，伊beh大声叫，「感谢上帝赏赐十诫。」牧师共伊讲；「你ē-tàng做一件比去圣地koh-khah有意义e5tai7-chì，留tī chit-ê所在实行主训，力行十诫」。这是讽刺信徒信仰ê例，to̍h亲像中国ê俗语讲：「自欺欺人ê伪善者」，kan-ta有外貌soah无实德ê信仰，to̍h是chit种人。Chit种信仰是无路用--ê。「你tio̍h作行道者，mài kan-nā听道，家己欺骗家己。」（雅各一：22）。基督徒应该了解，到底信仰生活是啥物？伊是teh印证主耶稣基督ê福音，chiah m̄是喊口号，siōng重要ê是tī现实生活中用实际ê信仰、行动去印证福音ê价值。用基督徒siōng实在ê言行举止去见证主耶稣ê福音。Mā to̍h是保罗所强调--ê「Lín是基督ê香味」发出清芳ê味。福音siōng好ê见证方式，是用美好ê行为去见证，只有实际ê行为，chiah ē-tàng hō͘人感动，因为行动是siōng有能力去感动人--ê。

（三） 审判是tùi上帝ê厝开始
Chit句话ê意思是讲基督徒ài先受上帝ê审判，基督徒kap上帝ê关系khah特殊，无论tī恩典、权利、使命、义务等方面，上帝对基督徒ê要求lóng kap一般人无仝。因为基督徒ê存在ná亲像主耶稣所讲ê hit丛受tio̍h特别照顾ê无花果树，照理伊应该结真chē果实，对园主有利。这to̍h是基督徒存在siōng重要ê内容。

Tùi马太福音廿五章恩赐ê比喻中，mā thang看出上帝对人类ê期待，tī-chia有详细ê说明：基督徒ê人生是受托ê人生，无论领五千、二千或者一千，最后mā是beh生利息，to̍h算是真细ê数目，主人lóng bōe弃嫌。无视恩赐无生息ê仆人，是无受主人肯定--ê。用年利率6.7％来计算，一千kho͘囥两年，利息只不过小小一百gōa kho͘而已，无法度kap二千kho͘或者五千kho͘相比。但是主人要求受托ê人一定要忠心。这mā是上帝ài咱每一个人lóng ē-tàng有实绩ê表现，chit种tī上帝面前ê实绩，是决定基督徒存在ê价值。咱知影，圣经向咱要求ê真理是：「上帝beh照你ê行为来审判你」（以西结七：3,8）（彼得前书一：17），基督徒ê人生，必须ài有chit种认同。咱ê存在，是不断khiā-tī上帝ê审判chìn前ê存在，mā to̍h是面对上帝审判ê人生生活。Chit种生活要求咱ài谨慎、自爱，同时koh-khah ài积极ê态度去展现人生ê实绩tī审判者主耶稣ê面前，chiah-ê实绩to̍h是谨慎、自爱、积极ê生活方式。基督徒ê人生必须是会结真chē果子ê人生。因为这是主ê命令，主耶稣tī约翰十五章讲：「Tòa-tī我内面ê就加结果子，因为离开我，lín就/bōe-sái做什么」（约翰十五：5）koh讲「Lín加结果子，我老父就因此得tio̍h荣耀」（约翰十五：8），这是teh说明基督徒ê存在，必须ài有实绩表现，mā to̍h是tī日常生活中，hō͘上帝有所收成。咱ê人生是tī chit种严肃ê上帝面前ê生活。彼得讲：审判是tùi上帝ê厝开始，这说明了咱基督徒ê行为，是bōe-sái随便chhìn-chhái ê，咱ê一举一动lóng hō͘上帝看kah清清楚楚，chit种严谨ê生活方式to̍h是结果子ê人生。

咱ê存在就是beh荣耀上帝，伊是确立tī果子ê chē少，当一个基督徒有chit种共识ê时，伊会真坦然来面对上帝ê审判。信仰生活ê建立是基督徒信仰生活siōng伟大ê表现，m̄-nā是外表好看而已，koh ài有充实ê人生，表现出有价值ê人生实绩，chit种人生实绩是荣耀上帝siōng好ê礼物。举一个实例：1995年10月，有三位女性基督徒共同生活，in看tio̍h世上一kóa 不法ê罪行来自责，用苦行约束家己ê方式赎罪，六年了后chiah hō͘家人发现，其中一人已经禁食过身。另外，台中有一位信徒，苦劝伊拜佛ê太太信主，无hō͘伊接纳，所以用自杀来结束人生。Chiah-ê人ê死，动机lóng出自对信仰kap福音ê坚持，但是方法m̄-tio̍h，这是顸颟ê行为，bōe-sái荣耀上帝。

基督徒ê人生，必须建立teh用荣耀上帝为前提ê生活内容，这是咱phah拼ê方向kap目标。

结论： 藉tio̍h主耶稣对无花果树ê比喻，咱基督徒一定ài认清信仰生活ê价值tī toh位，teh重视外表ê现实社会中，基督徒ài成做名符其实，荣耀主名ê真实信徒。