《受恩蒙福的一生》

 | | | 转寄

灵巧kap纯朴

作者 林宗要 2010.10.24

马太十：16

世界上有真chē问题真pháiⁿ解决，尤其是民族kap民族之间kap因为宗教引起ê纠纷siōng-kài复杂，永远是人类ê问题，现今民主kap共产阵营，已经m̄是以前hiah-ni̍h分明ê对峙状态，美苏关系mā已经改善，美国kap中国大陆mā开始来往，但是tī人ê问题上，á是无法度完全解决。

Tī chit-má世界中，咱四界thang看见chit种因为民族或者是宗教信仰所引起ê冲突，譬如1995年3月巴基斯坦kap土耳伊两国发生ê严重冲突，死伤人数相当chē，to̍h是因为无仝宗教信仰所引起。回教极端激进教派，khah buē用暴力砰掉in心目中ê敌人，像纽约世贸中心大楼hông khǹg炸弹爆炸，死伤严重，koh有一位印度人作家鲁西迪（英国籍）写一本小说有关回教ê小说，hông认为是侮辱阿拉，hō͘极端教义派下追杀令了后，不得不逃去英国避风头，chit种情形kap基督教ê作风完全无仝，tī无gōa久chìn前，有一部电影叫「耶稣最后ê试探」teh播送ê时，有一kóa基督徒bat tī街头抗议、示威，过程相当理性kap温和，mā无发生什么问题，chit部片虽然是用圣经中耶稣基督做主题，但是伊ê内容soah完全kap圣经脱节，电影内充满性kap暴力，迎合现今低道德ê人类ê娱乐心理，同时一káo好奇ê基督徒，mā去排队买票看，增加片商收入，tī美国四大城市ê电影院人满满，tùi chiah-ê事实，ē-tàng了解基督教kap 回教ê基本差异。早期ê 回教徒ê标帜，to̍h是一手提可兰经，另外一手提刀。中世纪时回教ê势力差一点仔侵占所有基督教ê国家，hit种强势作风ê传教方式，到taⁿ犹原盛行tī 回教国家，hiah-ê极端回教份子，犹原用劫持、暴力、绑票等惊人手段teh进行in ê残酷恶行，án-ne咱thang看出，chit两种宗教信仰ê无仝。

Khiā-tī纯信仰ê立场，chit种用暴力做手段来达tio̍h目的，实在m̄是宗教信仰ê基础，耶稣tī圣经中提醒学生了解一ê真理，to̍h是传播福音，m̄是用强者ê武力去征服弱者，是用疼心去感化弱者，这to̍h是主耶稣tī-chia所讲ê：「Ài注意，我派lín出去，好亲像kā羊送入去狼群中仝款」，这是一件相当危险ê事工，mā实在是困难重重ê tāi-chì，tī面前chit种危险性真koân ê挑战ê时，伊用代表灵巧ê蛇，kap象徵神圣ê粉鸟ê两种性格，是面对chit种koân度危险ê时所ài具备ê特性。

Teh传福音ê事工上，确实充满tio̍h相当ê困难kap危险，chit-ê事实，咱thang tùi二千年来教会宣教史发现，无论tī任何地区，只要福音初到ê所在，lóng有极大ê困难kap迫害，基督徒ài面对án-ne状况，必须ài像主耶稣所讲ê「Lín ài像蛇仝款ê灵巧、像鸽子仝款ê驯良」。伊ê信仰生活，若ē-tàng完全体会耶稣tī-chia所讲ê灵巧kap纯朴ê时，必定是真完美、自然，tùi伊ê信仰所经营出来ê生活，就会有美好ê结果。因为通常tī人生中产生ê真chē问题kap困扰，lóng是欠缺chit种灵巧kap纯朴ê心性所引起--ê，人ê一生若具备了chit两种特质，伊ê生活状况必定会khah成熟kap完美，这to̍h是发挥基督徒信仰决定性ê事实，所以耶稣tī-chia所讲ê问题，若ē-tàng tī人生生活中好好á运用， án-ne伊ê信仰kap生活是值得肯定ê，伊ê生活内容ē-tàng发扬光大，chit种生活，to̍h是荣耀归主ê生活，是基督徒人生ê全部。

确实，基督徒tī现实生活中，必须具备充分ê智慧，因为伊是帮助kap化解人生问题重大ê因素。咱lóng知影，一个人tī社会上，是m̄是ē-tàng善用灵巧，是伊ê人生成败ê关键。若真gâu运用伊，加减对伊ê人生ê运作，lóng有正面ê帮助，无论teh kap人ê往来，以及专业ê经营上，伊lóng真有帮助，tī圣经中，关于伊ê论述真普遍，尤其是诗篇kap箴言，关于智慧、灵巧ê教导bē少，整体上咱ē-tàng讲，有智慧ê人生，会带hō͘人生真chē富裕kap福气ê生活，伊ê人生teh智慧ê引chhōa之下，就ē-tàng合情合理，因此会体验tio̍h真chē人生正面价值ê生活。

Tī圣经人物中，约瑟用伊ê智慧，成做hit-ê时代ê伟人，约书亚mā是真有智慧ê人，所以ē-tàng继承摩西带领以色列人进入迦南地，完成艰难使命。所罗门王mā是真有智慧ê人，当上帝向伊显现ê时，伊只求智慧，来方便领导上帝ê选民。咱thang tùi伊判断gín-á以及真假花ê tāi-chì，充分看出伊ê智慧，可惜伊因为堕落chiah 名声不保。司提反是符合初代教会选执事ê条件，是一个充满智慧ê人，因此伊做真好ê事工，是第一位殉道者，可见智慧tī人生生活中ê重要性。

因此主耶稣教学生ài「灵巧像蛇、纯朴像粉鸟」，因为主耶稣深知基督徒用单纯ê信仰beh生存tī复杂社会中，必须ài有相当ê警觉性去评估属于家己，有利teh信仰生活ê种种行为。

（一） 世上之ê贤人（有智慧ê人）
Tī历史上有真chē智慧人物，对人类有正面ê作用，但是mā有人用伊ê 才智去做一kóa对人类有负面不法ê tāi-chì。Tú亲像顶面圣经中所讲ê，真有智慧ê人物，chiah-ê人lóng真gâu运用伊koân度ê智慧。
Tī中国历史上mā出现真chē有koân度智慧ê人物，比如古早ê周公、孔明、……Tī伊ê性命中lóng有真优秀ê智慧表现，比如孔明ê空城计，若m̄是有koân度ê智慧，实在是bōe-sái去冒险，伊ê主因tī伊真清楚对方teh想什么，亦to̍h是看破对方脚手，因为chit-ê 事半功倍。战国时代齐国ê晏子，mā是真有智慧ê人物，伊用二粒桃仔刣三ê士ê手路，是有真koân智慧ê人物思考ê结果。通常tī人间社会中，chit种智慧运用tī政治kap商界khah-chē，尤其是政治人物ê智慧，往往关系tio̍h人类切身福祉，因为有影响力ê政治人物，ē-tàng造福人群，mā会hō͘人民tī痛苦之中，用咱国家目前ê政治环境，实在是非常无尊严ê政治实体，咱ê总统beh出国，处处受tio̍h阻碍，伊主要原因为何？是tī过去ê政治人物所造成ê悲哀，六十年代以前，咱是联合国ê席位，koh来强调国家ê统一，kám m̄是比现在ê情势koh-khah有利mah？可见政治家ê智慧对人民ê好kap不幸有决定性ê tāi-chì。

Koh用seng-lí人ê观点来看智慧，hiah-ê正派经营ê seng-lí人，in具备比一般人koh khah有智慧ê判断kap分析能力，甚至有果敢ê意志去冒险，mā to̍h是tī别人iah未做chìn前to̍h先料想tio̍h。

Tī信仰ê世界，mā真需要智慧去配合，因为咱ê信仰生活，以及教会ê经营，lóng是tī现实ê人生社会中，若是teh信仰中，若欠缺智慧ê运作，往往会引chhōa人ê信仰建立tī偏差ê智慧有关，比如美国大卫教派、日本ê真理教派、我国tī 1996年10月发生宋七力显相馆、妙天禅师、清海无上师…等等事件，但是若变成the感情用事，无理性来制衡ê时，往往会发生弊端，近来台湾教会灵恩运动，kap认为贝理斯是流奶kap蜜之地去鼓励基督徒移民，lóng已经造成真chē明显ê问题。

（二） 智慧安在？
若用人生ê状况来思考ê时，灵巧或者智慧，thang ùi天生kap日后所有--ê，因为人有遗传因素，因此teh相亲ê时，每一个人lóng真注重先天因素ê条件，但是koh-khah重要ê是日后环境kap教育，mā to̍h是人格ê塑形是比任何事实koh-khah重要，一个本来tio̍h优秀ê人，若tī偏差ê家庭大汉，伊ê所建立ê人格是无完美ê人格，试想伊所有ê灵巧，m̄-nā对家庭无帮助，颠倒变成家庭ê问题。若是一个智力中等ê人，若tī良好ê家庭环境中大汉，有明理kap高尚ê父母thang做伊ê人格形成背景ê时，伊ê人格必定理想koh成熟，对伊ê人生kap社会lóng有积极kap有意义ê价值。

因此灵巧chit-ê问题，必须ài有khah广阔kap多方面考虑，因为tī咱社会中，存在真chē恶质koh有计谋ê人，chiah-ê人是tī伊ê日后环境中所造成，chit-ê问题，是关联tio̍h人ê罪行问题，tī人生中，咱定定会看tio̍h人用智慧去做违背上帝ê真理ê歹代，咱若看社会版ê新闻，hiah-ê犯法ê人，in ê才智，lóng相当ê koân，智慧型犯罪tī现今社会真普遍，chit种m̄是tùi上帝来ê智慧，tiāⁿ-tiāⁿ会造成人生社会ê乌暗kap纷争。因为无上帝ê存在其中，但是tùi人所表现出来ê计谋ê结果，定定有伤天害里ê tāi-chì。

对基督徒来讲，伊ē-tàng了解「敬畏耶和华是智慧ê开端，认bat tio̍h圣者，to̍h是聪明」（箴言九：10），这是基本真理。Tī圣经中，智慧是上帝所有，上帝是智慧ê开端，所以雅各讲lín中间，若有人欠缺智慧，就ài向hit位白白hō͘众人，mā无弃嫌人ê上帝祈求就会hō͘你，kan-ta ài用信心去求，全无怀疑（雅各一：5～6）。Tī-chia咱ē-tàng看出，得tio̍h智慧ê人生，是the kap上帝ê关系，同时雅各koh再进一步讲起智慧人ê生活kap内容（雅各三；13～18），一个充满智慧ê人，必须ài有谦卑kap智慧ê好行为，表现出美好ê人生内涵，bē-tàng有bái ê私欲，ài像保罗tī加拉太书第五章所讲圣灵所结ê果子ê生活内容ê人生，chiah是真正属于上帝chiah有智慧ê人生。

对基督徒来讲，咱是hō͘耶稣救赎，重新赐hō͘咱有属于上帝生活ê人生，tú亲像保罗向歌罗西教会所讲「当用各种智慧kā基督ê道理，丰丰富富ê存tī心内」（歌罗西三：16），或者看哥林多前书第一章20～31节，咱mā会了解，智慧ê根本问题，无论是旧约时代所罗门王求智慧、箴言讲tio̍h智慧或者约伯记廿八章12～28上帝了解智慧，作者用任何物件lóng无法度取代伊，人生mā 真pháiⁿ掌握伊，但是上帝了解智慧ê路，知影去toh位chhōe智慧（约伯廿八：23），因为他是智慧ê所有者，tī最后段经文讲：「敬畏神to̍h是智慧、离开邪恶to̍h是聪明」（约伯廿八：28）Tī人生社会中，咱ē-tàng体会出灵巧ê人生内容kap人生ê实质关系。

（三） 灵巧kap纯朴（实际生活中ê人生）
耶稣向学生讲：「Lín ài灵巧像蛇，驯良像粉鸟」，tī当时学生所面对ê人生现象，是真复杂koh艰难ê现实环境，chit种不断面对挑战ê人生状况，to̍h是基督徒人生生活ê写照。确实若用认真正心态去经营人生ê时，必定会经历真chē挑战，好亲像保罗向提摩太所讲：「只要是立志跟随基督耶稣，过敬虔生活ê人，lóng会受逼迫。」（提摩太后书三：12）Chit种情形tī基督徒现实生活中是真平常ê情形，因为基督徒ê人生bōe-sái kap世界认输，若是beh认输，就bē受tio̍h逼迫。咱若看初代教会ê迫害史ê时，hiah-ê变节，认输ê基督徒，lóng bōe受逼迫，受tio̍h逼迫hiah-ê人，lóng是chiok坚持对主耶稣基督信仰忠贞ê基督徒。

但是基督徒必须ài认清咱所生存ê现实社会，定定kap敬虔ê信仰原则有真大ê差别，chit种差别，to̍h是基督徒信仰生活ê重点，tī-chia就必须具备chit种灵巧ê判断力kap绝对意志，chiah ē-tàng面对现实ê环境，tú亲像诗人所讲：「我beh用智慧行完全ê路」（诗篇一○一：2）这是基督徒信仰生活siōng重要生活内容，用智慧去行完全（理想、完美）ê人生道路，这是何等伟大ê生活，因为现实ê社会，ná亲像耶稣所讲比如羊送入去狼群中间仝款，咱若用敬虔信仰角度去思考基督徒现实生活ê种种问题，咱就会了解耶稣tī-chia所讲ê内容，当然，若用chhìn-chhái或者认输ê态度去生活，自然to̍h是chhìn-chhái kap认输ê一生。既然像羊hit种tī狼群中生活是基督徒信仰生活ê事实ê时，就必须ài有chit种灵巧kap纯朴ê生活来应付，这mā to̍h是基督徒生活ê高智慧。

因为面对tio̍h复杂、混乱、多元化ê人生社会现象ê时，有ê时会面对tio̍h是或者非、ē-tàng或者bē-tàng ê人生选择。咱生存ê现实环境，m̄是只有单纯ê教会而已，iáu有教会以外生活场合，基督徒bōe-sái因为信仰无仝，就排斥伊，án-ne做，是说明咱无通达人情世故，但是mā bōe-sái因为人情ê原因，soah伤害tio̍h信仰ê真理。

相信chit种现实生活问题，每一个基督徒lóng会体会tio̍h，主耶稣在世ê时tiāⁿ-tiāⁿ tú-tio̍h像约翰福音八章面对hit位犯罪ê cha-bó͘ kap纳税hō͘撒该ê问题，chiah-ê问题lóng充分表达出耶稣基督智慧ê所在。

当然，基督徒tī chit种人情世事中，必须有充分ê信仰背景做基础，然后chiah ē-tàng有所表现，比如基督徒ài疼仇敌ê爱心问题。

最后，基督徒必须ài了解，咱ê身分是koân价赎tńg ê，同时基督徒mā是生活tī现实ê社会中，灵巧kap纯朴ê智慧ài如何去撙节，mā是关连tio̍h教会成败ê因素。