《受恩蒙福的一生》

 | | | 转寄

为tio̍h你ê缘故

作者 林宗要 2010.10.17

约拿书一：1-15

Tī人生中咱有时会看tio̍h一kóa咱所bōe-sái了解ê情形，tī社会现象中，有一kóa人做了天大地大ê tāi-chì soah kap其他ê人无啥关系，颠倒是有一kóa人做真细项ê tāi-chì，soah hō͘人间发生了真惊人ê后果。

有办法ê人thang tùi法律缝来闪避伊ê所犯--ê真大ê罪恶，另外有一kóa老实忠厚ê人soah因为伊ê老实忠厚去犯tio̍h法律hông判重罪。无gōa久以前tī苑里有一位艰苦人因为tī保安林中a̍t几支枯干ê木麻黄hō͘保警看tioh8ka7伊送到法院hông判七年有期徒刑，像chit款tāi-chì，tī现实ê人生中，咱时常ē-tàng看tio̍h。

有时tī人生社会中会为tio̍h某某人ê缘故chiah影响tio̍h人生状况，chit种为tio̍h人ê缘故所牵连出真chē ê人生问题tī咱ê人生生活中是tiāⁿ-tiāⁿ有ê现象，像父母对kiáⁿ儿无意识中ê感化，真chē kiáⁿ儿ê生活或者人生观lóng会受tio̍h父母ê缘故ê影响，相信chit种tī厝内所形成无意识中ê影响对kiáⁿ儿ê人格ê造成有决定性ê关系，因为tī kiáⁿ儿ê心中，tiāⁿ-tiāⁿ用父母ê生活方式成做一种定型ê模样，chit种自然无形中ê影响，m̄-nā tī父母kap kiáⁿ儿中ē-tàng看tio̍h，有时tī教会中，牧师kap会友之间mā会有chit种情形产生，牧师驻tī固定ê教会一段时间了后，会将伊定型ê模样，teh有意，无意识中造成符合伊型态ê信者ê状况。

Chit种影响kap感化，tī咱ê生活中tiāⁿ-tiāⁿ ē-tàng看见，tī咱ê生活中咱tiāⁿ-tiāⁿ听见一句.「啥物父母生出啥物kiáⁿ儿」是teh说明人tī境况中受tio̍h影响ê事实。为何teh提亲ê时hiah-ê人会真注重探听对方ê家庭状况？这确实m̄是beh了解财富或者社会地位ê问题，主要tī家庭成员对当事人ê影响，chiah看会出对方人格ê状况。

因为人生ê生存是处tī ē-tàng塑做性ê过程中，尤其是gín-á以前ê时期，虽然人ê意志对人格ê影响mā是主要因素，但是生存ê环境可能比人ê意志所占ê成份khah koân一--kóa，因为咱各人lóng真了解咱人ê人性ê软弱，所以伊ê意志tiāⁿ-tiāⁿ会受tio̍h环境影响，当然mā有一kóa例外，有人tī非常恶劣ê环境中iáu ē-tàng离开环境来成功，有人tī美好ê环境中堕落ê人mā是有。

M̄-koh人若ē-tàng有khah适中ê环境，生活可能khah安定幸福，这是事实，这是现代父母一直teh phah拼替后一代ê缘故开创koh-khah完美ê家庭环境，hō͘咱ê kiáⁿ孙ē-tàng生活tī khah完美ê境况中！

同时咱mā必须了解一ê事实，to̍h是你ê kiáⁿ孙因为你ê缘故来成功，有成就，对教会、社会有美好ê表现，同时，你ê kiáⁿ孙mā会因为你ê缘故成做匪类，m̄敢正正当当ê行路，tī教会、社会环境中无面见人！相信咱会了解chit种严肃ê人生现象。

每一个人lóng期待人生会有成就，chit种成就确实m̄是kan-ta tī个人，必须ài有传承，若无是无价值ê，为何tī台湾有一句话讲「好bōe过三代人」To̍h是承传断绝，chit种情形tiāⁿ-tiāⁿ lóng确立tī个人ê影响力，mā to̍h是咱所beh强调ê缘故，因为chit种由私己ê缘故tiāⁿ-tiāⁿ lóng会关连到其他ê人际关系上，基督徒必须ài体认tio̍h chit种因为咱ê缘故chiah影响tio̍h kiáⁿ儿、家庭、教会kap社会khang-khè等等ê问题，chit种认同to̍h是信仰生活有价值ê内容，因为经过你美好ê信仰ê缘故，ē-tàng tī你所有有关ê生活境况中有正面积极ê信仰表现，chit种信仰是主所喜乐ê信仰。

因为án-ne，基督徒必须ài tiāⁿ-tiāⁿ用严肃、谨慎ê心态来反省检讨咱ê信仰kap生活中所带来ê影响力，hō͘伊ē-tàng成做有价值，ē-tàng建立德性，造就人生ê信仰内容，chiah-ê lóng是因为你ê缘故。

（一） 问题ê开始
宇宙ê主宰耶和华kap偏狭犹太思想ê对比to̍h是约拿书ê主题。列王纪下十四章廿五节：「……好亲像耶和华以色列ê神藉tio̍h伊仆人迦特希弗亚米太ê kiáⁿ儿先知约拿所讲--ê……」。这位先知是西元前八世纪时代ê人，到底是m̄是chit位先知或者是别人，tī神学界mā有争论，不过大部份ê人是认为藉tio̍h先知约拿ê名，向当时ê犹太人提出一个问题。咱若看约拿书ê前一本俄巴底亚册，咱就会知he是充满tio̍h排斥异邦民族，尤其是以东人，因为以东人对犹太人ê耶路撒冷ê陷落m̄-nā无同情，颠倒用应该死好ê心态去对待伊，所以咱chit本册to̍h是针对以东人ê排斥、诅咒chiah写--ê，但是约拿书ê主题khah m̄是限定tī偏狭ê犹太人思想，伊是teh强调犹太人所敬奉ê主耶和华，伊是万民之主，mā是尼尼微人ê上帝。

虽然当时尼尼微城ê人民犯罪反背耶和华上帝，但是上帝iáu期待tio̍h chiah-ê迷失ê人民会悔改归正，hō͘ in有koh再接受上帝恩典ê机会，所以命令先知约拿去传播上帝ê怜悯kap疼，这是上帝ê旨意，但具有偏狭犹太主义思想ê先知约拿，伊soah认为主耶和华是属于犹太民族所有，其他外邦人无资格thang接受上帝ê恩疼，因此当上帝下命令叫伊去尼尼微传上帝ê怜悯kap公义ê时，伊soah逃往他施，因为伊认为chiah-ê无受割礼ê外邦人实在无资格thang接受上帝ê恩典kap祝福。

约拿书ê主题就是beh hō͘当时ê人民了解，上帝m̄-nā是以色列人ê上帝，同时mā是尼尼微人ê上帝，为tio̍h chiah-ê迷失、反背ê人民，上帝必须命令先知去传达伊ê救恩。

Chit-ê思想若用今á日教会ê立场来讲，「上帝是基督徒ê上帝，同时mā是非基督徒ê上帝」所以上帝ài咱chiah-ê已经认bat神恩典ê基督徒，向hiah-ê非基督徒传达上帝ê怜悯kap公义，这to̍h是咱ê教会存在ê使命。

假使咱若bōe-tàng认真建立chit种观念，咱就会疏忽上帝托付hō͘咱ê使命，失去传福音ê教会，to̍h是kap当时ê先知仝款。

因为tī伊ê心中，伊所理解--ê，是神恩无应该tī尼尼微城中，hit种骄傲 ê心态咱mā thang tùi约拿向hit时ê人所讲ê话来体会伊，「Mài家己心内teh讲，有亚伯拉罕做咱ê祖先，我kā lín讲，神ē-tàng tùi chiah-ê石头中hō͘亚伯拉罕兴起kiáⁿ孙来。」（马太三：九）。确实chit种思想tī当时ê犹太人中真普遍，可能tī基督徒中mā有chit种心态，咱自认为是上帝特选之民，但是其他ê世俗人是化外之人，但是约拿书kā咱讲，chit种偏狭ê心思是m̄-tio̍h ê，因为上帝是全人类ê主！

（二） 约拿逃避上帝
约拿是先知，应该是siōng ē-tàng体会上帝心意ê人，这是先知ê特质，但是约拿tī-chia所表现ê是bōe-tàng了解上帝ê旨意，这是矛盾ê角色！各位啊！咱kap上帝ê关系应该比别人koh-khah清楚上帝ê心意，这是基督徒ê特质，但是有ê时咱soah生活tī kap上帝心意相伴ê生活状况。上帝ê命令是ài先知约拿去尼尼微传达上帝ê恩典kap救恩，去尼尼微是上帝hō͘约拿ê使命，但是伊soah选择倒反ê方向他施。虽然尼尼微ê道路或者弯弯曲曲，但伊soah是上帝ê意思ê路。

他施ê路mā可能是通顺舒适，但是伊soah m̄是上帝所指示ê道路。

Chit-ê事实the kā基督徒讲生活ê原则，同时咱mā会想tio̍h主基督tī马太七章：十三～十四：两条无仝ê路有无仝ê路况，但是mā有无仝ê结局。

人ê个性，欢喜承受美好舒适ê生活kap khang-khòe，这是事实，但是tī舒适ê人生中若无上帝ê旨意ê时，hit种舒适ê人生实在bōe-sái荣耀上帝，tī人世间，人时常逃避人应该ài有ê责任，因为tī-chia人必须付出真chē（加倍）ê能力面对伊ê人生，但是对基督徒来讲，无上帝旨意ê人生状况虽然舒适安逸，但是soah m̄是基督徒生存ê实在，基督徒tī人生生活中必须ài确立听候上帝ê声音ê生活方式。

Chit种会阻碍基督徒去完成上帝ê托付ê生活，通常是tī基督徒bōe-tàng体会合神ê旨意所致使ê，咱人ê价值观若bē合上帝ê价值观ê时，to̍h是人逃往他施ê主因，亲像约拿认为尼尼微配bōe起神ê救恩，所以虽然有上帝ê声音，但是因为kap伊ê理念无仝，（自然会发生矛盾、冲突ê现象）为tio̍h beh解决伊kap上帝之间ê无仝认同，伊用远走高飞替伊进一步ê路－到他施去。

他施tī toh位？虽然无真明显，但是真chē人认为是chit-má西班牙南边，tī当时是不lí-á发达ê所在（Mā to̍h是文明ê所在），为何约拿无选别ê所在soah选他施？

可能to̍h是chit种人ê算盘，一方面是空间ê远离，另外一方面koh有koân度文明ê所在，因为chit种进步发达ê所在mā是吸引人ê生活ê一种方式，你看今á日真chē移民，in ê心思to̍h是希望ē-tàng生活tī khah好ê人生环境中。「Tú-tio̍h一只船、beh ùi他施去」，人ê如意计划，配合无tú好tú-tio̍h，tiāⁿ-tiāⁿ会hō͘人认为he是天赐良机，因为心所想ê kap现实ê状况非常巧合！

咱mā想tio̍h使徒行传廿七章，保罗beh往罗马ê时ê巧合，有一只船beh去罗马，koh有一阵微微á ê南风吹来，众人lóng真得意，就出帆，结果是tú-tio̍h极大ê危机，船kap所有ê货物lóng失去！
Tī人生ê过程中，chit种意念kap现实ê机会真巧合ê相tú ê时，人往往会真得意，才bē记得（却）了交托hō͘主ê人生生活。

（三） 为tio̍h你ê缘故
Chit种人ê如意算盘（本来是充满幸福kap光明ê未来），啥知影约拿tī船顶soah tú-tio̍h非常惊人ê危机，「狂风大作、甚至船破坏了差不多」（约拿一：4）。本来约拿ê如意计划是逃离去他施，坐船了后伊就tī船底困，认为siōng妥当（Ē-tàng 无烦无恼ê生活）！但是耶和华阻挡，破坏伊ê计划，用船siōng惊ê风涌来抵挡伊，虽然船内有真有经验ê内行人，tú-tio̍h真正危机ê时是无办法ê，kā人ê能力用尽啊kap作为失败了后，人开始chhōe全能者ê庇护，用siōng原始ê见解，to̍h是咱中间某一人有得失tio̍h上帝！所以什么人ê缘故hō͘船遇难？结果约拿中签。

约拿本身向船内ê人诉明伊ê状况kap伊所信ê主上帝，伊mā深深了解今á日ê问题lóng是因为伊chiah引起，「我知影lin2tu2-tio̍h大风、是因为我ê缘故。」（一：12）

为tio̍h约拿ê缘故，chit只船tú-tio̍h m̄ bat有ê危机，in用尽一切（1）人为ê方法，船内ê工作人员ê经验，但是无办法thang好化解in ê危机。（2）各人哀求家己ê神明mā lóng无帮助。（3）Kā船来ê货物掷掉（是财产、是行船ê主要目的），mā无法度解决问题。

「耶和华ê愤怒」m̄是用chiah-ê方法thang好化解--ê，是teh chhōe出元凶ê主因，mā to̍h是缘故ê消灭，chit-ê问题，是基督教信仰ê中心问题，耶稣基督ê救赎ê意义ê原因，只有上帝本身ê作为，chiah ē-tàng解消人ê罪债。

好亲像约拿当时，hiah-ê人ê作为，kap in ê神明或者是船内ê货物lóng m̄是缘故者，无缘故者自然无法度解决因为缘故chiah引起ê危机。

约拿mā有先见之明，伊了解船ê危机是伊ê缘故，所以要求in消灭缘故者－伊本人，除了消灭缘故者以外是无办法hō͘ chit只船ē-tàng平顺到目的地。

列为，今á日咱来反省，因为你ê缘故所带来影响：因为你ê缘故（积极正面ê作为），你ê家庭、kiáⁿ儿、亲人、教会、社会lóng有美好ê人生清芳ê气味！若是（消极负面ê人生作为）会因为你ê缘故chiah hō͘你ê厝、kiáⁿ儿、教会、社会有负面ê评判，尤其基督徒ài反省，有时因为你ê缘故chiah伤害tio̍h教会，hō͘基督耶稣ê名受侮辱！

咱必须三思你ê缘故ê事实，因为咱ê存在是连带关系ê，无论tī厝内或者教会内kap社会生活中，确实beh将你ê缘故指向tī有荣光、有见证ê境界中，bē-tàng因为你ê存在，成做天国ê阻碍，这是今á日咱ê信仰生活必须tiāⁿ-tiāⁿ kā伊省思ê所在。

耶稣基督ê福音ê成败关键，lóng确立tī每一个基督徒ê存在中，因为hiah-ê人ài因为基督徒ê缘故才对上帝ê福音有所取舍！

结论：用约拿ê思想来反省咱ê信仰，你ê人生ê动机beh如何去建立？人kám m̄是指向安稳平顺ê目的地mah？是m̄是为tio̍h你ê缘故chiah发生危机或者问题？Bē-tàng因为你ê缘故chiah致使上帝ê名受辱Ài谨慎。约拿ê缘故Hō͘大船发生危机。