《受恩蒙福的一生》

 | | | 转寄

新ê机会

作者 林宗要 2010.10.10

用西结十八：20-24、30-32

人一生ê成败kap机会有极密切ê关系。因为机会存在tī人生中间，人一生ê成败，决定tī是m̄是掌握机会。真chē成功ê人，通常是真gâu利用时间，把握机会。因为光阴ná箭，sut一下tio̍h过去啊，bōe等人。希腊人bat有chit种ê传说:「机会ê前扩有两条辫子，后脑光溜溜，一枝头毛lóng看无无」，这teh说明机会来ê时，每一个人lóng有可能kā伊掠tiâu，因为伊ê前扩有两条辫仔，真简单to̍h掠会tiâu。一旦错失良机，m̄管你用toh一种方法，lóng无法挽回。

希腊人ê传说真有道理，当机会来临ê时，真简单掌握，beh共伊掠tiâu m̄是真困难，若错失机会，beh挽回就oh了。咱tiāⁿ-tiāⁿ听tio̍h「Ài把握机会，bē-tàng错失良机」，可见机会kap人生关系jōa-ni̍h-á密切ah！

咱lóng知影，人ê一生是tùi「机会ê累积」，机会决定人ê成败。所以俗语讲：「时间to̍h是金钱」，有ê时「时间比黄金koh-khah值钱，koh-khah贵重」。因为黄金若是失去thang koh再得，但是机会soah 无法度。一旦失去机会，永远无可能koh tńg来。「把握良机」非常重要，若无「失之交臂」就可惜了。

维也纳有一位名医叫劳尔贝斯，医术非常高明，因为手术bōe流血，名声透全球。有一pái，伊到美国讲学，顺续做美西一日游，当伊家己一个人tī 人tòa ê社区散步ê时，狠狠落大雨，伊马上走ùi siōng近ê一间厝，请求hō͘伊避雨，结果女主人应门了后，真bōe耐性ê讲：「请到别位去，阮tau麻烦已经有够chē啊。」，然后kā门关起--来。Chit位医生真无奈ê沃雨行tī路上，tú-tio̍h一台车，chiah载伊tńg去旅馆。过几工，新闻刊出劳尔贝斯tńg维也纳ê消息，绍介伊ê医术kap相关医疗相片。Hit位拒绝伊请求避雨ê夫人看tio̍h了后，非常后悔，无接待chit位不速之客，因为chit位医生to̍h是伊致重病ê cha-bó͘-kiáⁿ siōng好ê救星。上帝送伊上门，伊soah bē晓把握机会。

Tùi顶面这则故事，hō͘咱了解tio̍h箴言第三章27节ê真理，伊讲：「你ê手若有行善ê能力，bē-tàng推辞。」传道书九章十节mā án-ne讲：「你ê手该做ê事，ài尽力去做，因为阴间无khang-khè，无计画，无知识，无智慧，但是你beh去--ê，to̍h是chit-ê所在」续落来koh讲「Tī这个世上，真gâu走sio-jek ê人无一定得奖，勇敢ê人无一定相战to̍h赢，聪明ê人，无一定有饭食，机智ê人，无一定好额，khiàng脚ê人，无一定tī koân位，时运左右一切」。（传道书九：11）时运to̍h是机会。

上帝hō͘人ê机会lóng是平等--ê，无论贫贱富贵lóng仝款，无对谁较好。差别ê是人对机会ê处理态度是m̄是积极、谨慎。Tiāⁿ-tiāⁿ听tio̍h有人怨叹讲「无机会」。Kah-ná the怨叹上帝无公平，无hō͘伊机会，其实m̄是án-ne，上帝hō͘任何人ê机会lóng相仝，无偏心。拿破仑讲：「『怨叹无机会』是弱者ê藉口。」一般来讲，各人所处ê环境，mā可能有所无仝，但是若态度积极，真gâu把握机会，无一个bōe成功ê。

社会上一kóa成功ê案例，研究in成功ê原因，lóng是真gâu把握时机。当然mā有一kóa是靠祖先ê庇荫，继承了一kóa本底to̍h有ê基础，chiah好额成功。但是chiah-ê人若无kā良机把握hō͘ tiâu，mā会栽tī失败ê洪流，毁掉先人所hō͘ in ê恩泽。

Chit-má咱同齐来反省咱ê信仰生活，基督徒应当以上帝hō͘ in ê信仰机会，去提升基督徒属灵生活ê层次。上帝hō͘人ê机会是仝款ê，但是往往因为基督徒ê态度无仝，所表现出ê信仰层次mā有差别。

信仰生活ê重点，tī基督徒如何面对上帝所赐ê信仰机会，如何掌握问题，进一步koh有新ê属灵造就，mā to̍h是灵命更新。基督徒对上帝所hō͘ in ê机会ê态度，往往决定in ê信仰生活ê品质好bái。咱ùi下脚几方面来看：

（一） 净化ê人生
基督徒ê时常生活tī宗教气氛十分厚ê环境中，tī chit种气氛薰陶之下，hō͘伊成做符合上帝旨意ê人，沐浴tī chit ê环境ê基督徒，当然是上帝所喜乐ê。

若是有ê人久长浸tī chiok厚ê宗教气氛中，soah失去了信仰ê警觉性，结局无法度表现出基督徒美好ê一面，无法度hō͘家己ê行为，达tio̍h如圣经顶面所描述ê「作光kap作盐ê境界」。甚至比非教徒iáu khah hâm-bān，koh-khah hō͘人讨厌，chit种基督徒ê存在，m̄-nā bōe荣耀上帝，颠倒会hō͘上帝ê名声受tio̍h侮辱。Chiah-ê人虽然身穿基督外衫，soah无基督ê真道tī伊ê内心，对上帝ê救赎无清楚，对圣经中ê真理mā m̄是真了解，普通时仔做礼拜mā只是应付应--付，完全无接纳主耶稣tī伊ê心中，koh-khah无像哥林多后书五章17节所讲--ê「无论siáng，一旦有了基督ê性命，to̍h是新造ê人；旧--ê已经过去，新--ê已经来临。」Chit种信仰体验。

Chiah-ê kan-ta有外表ê基督徒，心kap人ê无一致，伊ê信仰是无真实--ê，in无彻底ê把握上帝所hō͘ in净化人心ê机会。Ná亲像主耶稣批评当地ê法利赛人仝款，讲in ê人生比如粉饰ê坟墓，外表美观，但是内面soah藏tio̍h臭骨骸。只有虚伪ê外表，上帝所要求ê公义，仁义tī in身上lóng chhōe未tio̍h。完全是假仙假ta̍t。In ê心思意念无hō͘上帝所赐hō͘人ê机会所代替，灵命无更新，旧我无去除。虽然chiah-ê法利赛人tī当时ê社会地位非常koân，但是实质上in ê存在是完全无价值--ê。主耶稣形容in是青盲ê向导，是毒蛇、毒蝎之流（马太23章33节），in是无法度逃避上帝ê审判--ê。Kah-ná马太廿一章，主耶稣咒忏hit丛无花果树仝款。只有美丽ê外貌，soah无实质ê内容。

Tī信仰生活中án-ne是一件真惊人ê tāi-chì。信仰好ê人，伊是承受了上帝赐hō͘人，有净化人心，改变人性恩典ê机会。所以基督徒若bōe-sái成做新造ê人，就失去了做基督徒ê意义。Tio̍h会hông当做废物tàn-sak，由人糟躂。有一个源洁流清ê故事，án-ne讲：古早时某部落，有一口公用井，有一工，忽然臭气冲天，无法度lim，经由开会讨论，认为是鬼怪作祟，道士作法无效，用消毒剂消毒mā无效，最后派一个人落去井内探勘，结果发现死猫tī内底，将伊捞起来并淘井，彻底清洁tio̍h有效。人心mā仝款，人若无上帝所赐ê机会净化，伊ê心思意念有可能是浊浊lah-sap ê。

（二） 新ê机会，hō͘人看见上帝
主耶稣tī八福中讲--着心肝纯洁ê人有福lah！因in ài-beh看见上帝，这to̍h是上帝赐hō͘人机会，siōng具价值ê事实。旧约圣经记载，人bōe-sái看tio̍h上帝，因为看tio̍h ê人必死。M̄-koh tī上帝赐hō͘人ê新机会，耶稣基督降临ê chit件tāi-chì顶面，hiah-ê人lóng ē-tàng藉chit-ê事实看见上帝。Tú亲像八福中主耶稣所讲--ê。另外耶稣teh面对十字架ê道路中，bat向伊ê学生讲过：M̄免担忧、烦恼，ài确信上帝，他只是先去预备地方。我beh去ê所在，hit条路lín是知影--ê。多马问讲：「主ah！阮m̄知你beh到toh位去，怎样会知影hit条路neh？」，耶稣讲：「我to̍h是道路、真理、性命；若m̄是藉tio̍h我，无人ē-tàng到老父hia去」（约翰十四章）。腓力iáu要求主耶稣ē-tàng「将天父显现hō͘阮看，án-ne阮就心满意足啊」。对腓力所提出ê问题，主耶稣讲：「腓力，我kap lín作伙已经chiah-ni̍h久啊，你iáu m̄-bat我mah？」Siáng看见我，就等于看tio̍h天父。这kap旧约所讲ê lóng仝款，上帝将伊ê孤kiáⁿ赐hō͘世人，目的是hō͘人藉tio̍h chit-ê事实去体验天父ê存在。这是上帝ê恩典。To̍h是新约ê恩典。因为世人本身满是lap-sap，无可能亲近上帝，需要靠主耶稣所流ê宝血来洗清气，chiah ē-tàng得tio̍h救赎。主耶稣ê降世，to̍h是上帝赐hō͘世人唯一ê机会。人ài藉chit-ê机会，去建立kap上帝关系；经由信心去承接上帝赐hō͘咱ê，用真实ê信仰kap主耶稣契合了后，内心ê罪恶lap-sap lóng会hō͘伊洗清气，chiah成做心肝纯洁ê人。Tī-chia有福了，必ē-tàng看见上帝。

主所赐ê机会，完全属于每一个人，无像当时ê犹太人所讲ê谚语：「老爸食酸葡萄，连kiáⁿ儿ê嘴齿lóng感觉酸。」（以西结十八：1）teh信仰ê领域内底，每一ê人面对上帝赐予ê机会ài家己负责，bōe-sái父子互相影响，互相牵累。以西结十八章二十节讲：「好人the-beh因为行善得tio̍h报赏；Pháiⁿ人beh因为作恶受惩罚」。Chit点基督徒应当认bat清楚。Tī教会的确mā有chit种案例，老父信仰值得o-ló，受人景仰，但是kiáⁿ儿soah无视上帝hō͘ in ê信仰机会。Tī旧约圣经内底以利kap撒母耳ê故事to̍h是。Chit种因为看见上帝chiah做上帝囝儿ê事实，是ài建立tī人对上帝所赐ê机会，表现tī个人ê信仰生活内底。这是做一个基督徒ài严肃面对，而且ài kā伊深思。信仰虽然是一个人ê问题，但是做人老父老母iáu bōe-sái推卸责任，自细汉就ài教育kiáⁿ儿认bat上帝，hō͘ in成做心肝纯洁。俗语讲：「父母不保kiáⁿ儿贤」。Tio̍h是讲，tio̍h算父母ê品德koh-khah án怎koân，mā bōe-tàng保证每一个kiáⁿ儿lóng会像父母仝款。所以，做人父母--ê千万bē-tàng疏忽kiáⁿ儿ê宗教教育。

（三） 用美好ê见证生活来回应上帝所赐予ê机会
当一个人面对上帝所赐予之机会ê时，并m̄是用伊ê身分地位或者先祖对信仰ê贡献来回应，是用伊本身是m̄是真诚来决定。马太福音第三章，施洗约翰对当时ê社会领导人，亦to̍h是法利赛kap撒都该人发警语就thang知影。Chiah-ê人有不哩仔自负，认为靠tio̍h社会kap宗教信仰ê地位，就thang优先进入上帝国。因此，约翰提出忠告，严厉责备。警告世人，人kap上帝ê关系m̄是决定tī外表或者传统，是决定teh个人ê实际行为。先知以西结tī旧约圣经内底，mā特别强调这一点。

以西结强调，有信仰ê人，必须用美好ê见证去回应上帝所赐ê机会。M̄是靠外表或者世袭。先知用二种人来比喻，to̍h是义人kap恶人。上帝ài ê是态度真诚，生活上koh有美好ê见证，chiah m̄是身上hiah-ê称呼。义人e所以hông叫做义人，是因为伊ê行为符合上帝ê要求，良善美好。若是义人m̄ koh做善事，尽做一kóa pháiⁿ人所做会hō͘人怨恨ê pháiⁿ tāi-chì，án-ne伊过去所做ê善事，就无koh hông纪念，伊ài因为犯罪来死亡，以西结十八：24 chit句话有真发人省思。

人ài不断来结出符合上帝美旨ê果子。这是咱信仰生活ê重点。先知bat用恶人做例来告诫咱，人若ē-tàng真心改过完全归向上帝，上帝就boe7ka7伊过去所犯ê过错记leh。只要伊诚心悔改，上帝会赦免伊，bōe koh去追求伊。这to̍h是上帝ê恩典。

就提扫罗kap大卫王来讲！大卫王ê手段残忍杀害人ê翁婿，夺取部属ê bó͘（撒母耳记下十一：12），但是扫罗是犯了无顺从上帝旨意ê错，自作主张（撒母耳记上十五章），两者比较起来，若用现代司法量刑，应该是大卫王罪khah重，但是大卫王soah khah受tio̍h上帝悦纳，原因tī 二人对上帝所赐ê机会，表现出无仝ê态度。扫罗认为家己无m̄-tio̍h；大卫王soah是诚心悔改认罪。这两人ê故事，时常hō͘神学家提来讲。上帝所喜乐ê是忧伤痛悔ê心灵（诗篇五十一：17），咱若读诗篇五十一篇，就会明白大卫王为啥物会hō͘神喜乐ê原因，tī伊ē-tàng用忏悔ê心，去回应上帝所赐hō͘伊ê机会。

咱koh来看新约时代ê保罗kap犹大。保罗对基督hō͘伊ê机会，伊会用真诚悔悟ê心去面对；但是犹大soah无。这to̍h是犹大败亡ê原因。保罗mā因此成做基督教史上非常重要ê人物。

总讲一句，tī人生ê旅途中，上帝不断ê赐机会hō͘人，面对机会，咱ê表现可能有m̄-tio̍h，但是失败ê时，ài有忧伤痛悔ê心灵，真诚悔改。因为上帝是无希望任何人灭亡--ê。（以西结十八：13）