《受恩蒙福的一生》

 | | | 转寄

Lín厝用啥去Hông看

作者 林宗要 2010.10.03

以赛亚书卅九：1-4

每一个人lóng真了解，家庭对人生ê影响是无法度取代--ê，伊对人生ê成败mā有决定性ê关系，通常tī成功者ê背后，lóng有一个真值得回忆ê家庭生活。无恶不作ê流氓mā时常生活tī不幸悲惨ê家庭阴影之下ê人。Chiah-ê是人生所bōe-sái疏忽ê事实，因此有理想ê人lóng会真重视建立有良好气氛ê家庭，来影响厝内ê人，尤其是孩童kap青年，对in ê人格ê完整形成chiah有利。家庭ê性质原本是单纯ê生活环境，m̄-koh有ê时咱mā会发现tio̍h家庭其实mā是非常复杂ê所在。有时tī现实中，咱会看tio̍h无啥物tāi-chì会比家庭问题koh-khah oh解决，所以有一句话「清官难断家内事」，tùi chit句俗语咱mā ē-tàng明白家庭复杂ê性质kap内容。

Tī社会上真chē人会因家庭问题来发生惊人ê结果，财富、人格、甚至性命ê损失。三国志中ê关羽to̍h是因参予刘备ê家庭问题chiah会发生悲剧：刘备beh认一位义子刘封，去请教孔明，孔明讲he是家内事，无方便提出意见。刘备问关羽，关羽反对，因为刘备已经有kiáⁿ儿，chit件tāi-chì hō͘刘封听tio̍h伊抾恨在心，造成后来发生按兵不动，m̄去救援关公ê tāi-chì，结果关羽hō͘吴国所害，刘备损失了一位非常勇猛ê大将，对了后ê蜀国影响真大。对遮ē-sái看着家庭问题有ê时真复杂、真oh解决，虽然是án-ne，家庭是人类生存所bē-tàng欠缺ê所在，mā to̍h是讲人类无法度离开家庭这是事实。

家庭kap人ê性命息息相关，人ê性命（生存）若无tī家庭中形成就会有真chē ê问题发生，mā会有真chē ê缺陷，这是咱ē-tàng了解--ê，人确实ē-tàng tī家庭中得tio̍h真chē tī外口无法度hō͘ in ê感受，比如：亲情、温暖、关怀、安全感等等，是人切身需要--ê，che当然是指正常ê家庭来讲，所以hiah-ê人时常形容家庭是温暖ê「眠床」，确实是án-ne。人生tī外口会经历真chē无情ê风雨kap攻击、批评，但是chiah-ê受伤ê心灵ài tī家庭中得tio̍h温暖kap安慰，藉tio̍h感受家ê温暖kap安全得tio̍h医治、弥补真chē ê欠缺。

对基督徒来讲，家庭是荣耀上帝ê所在，这是上帝hō͘人类siōng大ê恩典kap祝福，因为上帝已经将人生siōng重要ê疼赐hō͘家庭，因此一个上帝赐福ê家庭必定是互相亲爱ê家庭。咱时常形容khah完美ê家庭hō͘做「小天堂」to̍h是chit-ê原因。天堂是上帝支配运用主权ê所在，上帝是疼，因此天堂内充满了疼，所以tī chit-ê家庭中就会真少发现过失kap缺陷，chit种无过失（tī人ê世界来讲），是成做「小天堂」ê主要因素。因此基督徒必须ài珍惜咱ê家庭，同心协力来建造伊，hō͘伊ē-tàng真正如咱圣诗433首所描述ê「今求救主khiā teh阮中央，成做伊甸乐园，大家相疼彼此和睦，享受地上天国」虽然基督徒mā有无完全，但是咱必须珍视上帝所赐予咱ê chit种家庭关系，设法hō͘咱ê家庭ē-tàng成做荣耀上帝ê存在，m̄是「身气恼命」ê所在。这是基督徒信仰生活非常重要ê tāi-chì，伊ê成败kap咱家己kap咱ê教会lóng有深刻ê连带关系。

（一） 家庭kap教会
基督徒信仰生活中有一件真重要ê tāi-chì，就是ài认清基督徒ê家庭kap教会ê重大关系，事实上教会是毋是有增长，直接、间接lóng kap咱ê家庭有关，因为教会是tùi咱chiah-ê家庭所组成，教会和家庭是密切bē-tàng分割ê。咱ê家庭完美稳固，自然咱教会mā会tī理想、安定中，若是咱ê家庭一直有问题，无家庭ê气氛，相信咱ê教会mā会有真chē纷扰、无理想ê信仰风气。虽然基督徒ê信仰生活是确立tī家己ê经验，但是chit种独立ê信仰一定ài经由基督徒之间ê互相分享建立来造就基督徒ê信仰生活，因为咱是tī基督内ê一个信仰共同体（哥林多前书十二章），共同体ê特色to̍h是互相关系良好ê适应。保罗tī哥林多前书十二章中论述tī基督耶稣内底ê肢体性质，to̍h是咱信仰共同体siōng好ê解释，虽然肢体ê位置无一定仝款，但是伊是平等ê连结tī一个身躯，这是事实。咱每一个基督徒ê家庭，tī无仝ê环境中生活，虽然是位置无仝，但是lóng是属于基督耶稣ê教会，所以基督徒ê家庭虽然四界分散，lóng同款是上帝厝内ê人。Ná亲像咱ê身躯，各有无仝ê存在；口、目、耳虽然功能无仝，但是必须合一，因为是同属tī一个身躯。上帝将咱安置tī教会无仝ê位，基督徒tī教会ê地位是无分大小kap尊贵、下贱；牧师、主席、长老、执事kap一般ê会员，甚至慕道友lóng是同等，牧师长执无khah尊贵，主席mā无khah特别，因为咱tī上帝面前lóng是同等，只是hō͘安排tī无仝ê位而已，只要你tī目前ê现实中完成受托ê使命，就ē-tàng成做有价值可取ê基督徒，ná亲像咱ê 五官各有无仝ê作用，只要tī家己ê位顶koân完成责任，to̍h是尽责。

咱tī教会ê位或者khang-khè是上帝所安排，既然是上帝ê安排，án-ne咱tī教会ê地位kap khang-khè to̍h是贵重而且是有价值--ê。若用此来要求咱ê家庭tī教会ê状态ê时，相信每一个家庭lóng会有美好ê信仰表现，用荣耀上帝做目标来经营基督化ê家庭生活，是咱家庭siōng重要ê课题，án-ne chiah ē-tàng完成kap教会ê互动责任来服务教会，因为基督徒家庭to̍h是传扬福音ê基点。确实tùi教会ê成长观察ê时就会明白，家庭实在是福音ê基点，因为真chē ê基督徒lóng是tùi家庭引chhōa chiah进入教会，家庭对人ê福音ê接触点比教会阔，因此建立一个健全稳固ê基督化家庭，实在是强化教会siōng好ê事实，咱必须学习犹太人家庭，in ê家长对厝内ê每一份子lóng负责传道ê任务，培养训练每一个成员对上帝坚定ê信心是犹太人父母无上ê荣耀kap责任，因此tī信仰ê教育上，犹太人ê家长真成功，这是大家所公认。

家庭既然是福音ê「接触点」，那教会对家庭mā有真重要ê关系，教会必须时常关照家庭，这可能to̍h是教会生活ê探访khang-khè pah！因为咱知影荣耀、成功ê家庭必然mā会形成荣耀理想ê教会。

（二） 恁厝用啥去示人－－in tī lín-tau看见啥？
Chit句话是先知问希西家王，hiah-ê巴比伦ê显贵tī lín-tau看tio̍h啥？Mā用chit句话来思考咱ê家庭，到底一般人tī你ê厝内看见啥？着是讲，咱ê厝beh用什么展现hō͘别人看？相信当时希西家王必定心情愉快，因为巴比伦派特使者来探访伊，伊带领chiah-ê使者去参观伊所ē-tàng向人展现ê事实，这tio̍h是人性，因为人通常lóng会藉tio̍h彰显伊thang夸口ê事来满足家己人性ê欲望，讲到hiah-ê见笑ê事，通常人lóng会想办法藏起来，以免hō͘人khau洗，当时ê希西家王mā 仝款，而且伊koh有巴比伦王ê感激之情，因此展示in-tau所有值得夸口ê事物，来表示伊ê强盛kap富足，这mā是人性。但是希西家王疏忽一件事实，to̍h是伊是上帝ê选民，又koh是选民中ê君王，选民ê价值是tī荣耀上帝ê生活，这是选民siōng大ê使命。今á日ê基督徒kap当时ê犹太人仝款是归属上帝ê人，所以基督徒ê人生必须是ē-tàng荣耀上帝ê人生，mā to̍h是tī生活上kap家庭中lóng tio̍h 不断ê hō͘人看见上帝ê荣耀以及上帝伟大ê作为，chiah是上帝所希求ê。当然人若ē-tàng tī基督徒ê厝内看见上帝ê荣光以及上帝ê伟大作为，同时mā ē-tàng看tio̍h chit-ê家庭受tio̍h上帝ê祝福，有人间所有ê一切荣华富贵，相信这mā是上帝所愿意！基督徒tī人生中若ē-tàng建立chit种正确ê生活观，当然，hō͘人看见上帝ê荣光kap伟大比看见咱ê富裕kap所有ê能力koh-khah重要。Tī-chia，咱发现希西家王ê 一ê 错误，伊无hō͘上帝tī第一位，伊应该向hiah-ê外邦人绍介上帝，hō͘ in认bat耶和华，chiah是正道，但是伊soah将伊ê财富kap武力展示hō͘ chiah-ê外邦人看，tùi chit-ê tāi-chì说明了希西家王ê têng-tâⁿ，一个归属tī上帝ê厝，tī人生中若bōe-sái 时时刻刻显示上帝ê荣光，he是失败ê家庭，一个无上帝ê家庭，虽然有phông-phài ê武力kap财富，必定是会败亡--ê。基督徒ê家庭，若是只有权力kap财富无上帝ê话，这家庭必定是无坚固ê根基，有一日会tú-tio̍h逆境，就会倾倒、毁坏，真chē真体面ê基督徒家庭，因为无kā上帝khǹg tī第一位，致使无gōa久就瓦解，因为基督徒ê人生，若只有无限ê权力、财富soah无信仰ê时，结果就会像建立tī砂土顶ê厝仝款，无法度忍受风雨ê考验，所以ài荣耀上帝必定ài有相当ê准备！有一篇故事：阿公带孙去拜访好朋友，伊ê厝内一切设备lóng是一流--ê，但是chit位主日学小朋友soah问阿公讲：为何chit间中无主耶稣？Kah-ná真失望ê款。今á日基督徒必须tī厝内建立一个以上帝为第一位ê良好体系，咱ê厝beh用什么hō͘别人看？一方面是表示咱所有--ê，另外一方面是咱teh绍介主耶稣基督tī人中间。咱必须确认家己ê身份，然后chiah ē-tàng有正确ê人生观，咱看tio̍h所罗门王teh受上帝祝福ê时，上帝对伊讲：「你愿我赐hō͘你什么？你ē-tàng求。」（列王记上三：5），tī当时伊所处ê境况，伊siōng迫切需要ê是强大ê武力、军队以及财富，但是伊soah无求chiah-ê，伊kan-nā求耶和华赐hō͘伊智慧治理上帝所交托ê子民，这是何等正确！因此，上帝kā其他ê祝福lóng hō͘伊，所以成做hit时ê贤者，有良好ê表现。今á日上帝mā-beh问咱：「别人tī lín厝内看见什么？」看见你有财富、kiáⁿ儿出色穿名牌，生活舒适？Á是看见你有一种kap别人无仝ê基督徒ê气质，或者是tùi气质流露出ê良好品性；有疼心、纯良，会关心人kap厝边有良好ê关系？上帝向希西家王所提出ê chit句话，实在是咱ê鉴戒。希西家王是真善良、有信仰ê好王，lóng有chit款情形发生，何况咱chiah-ê平凡ê人，应该koh-khah谨慎！

（三） 基督是我家之主
希西家王用人ê立场，将in厝内ê成就、财富、权力、武器，显现tī巴比伦人ê面前，若照人ê状况，是无法度避免ê，但是希西家王tī-chia疏忽了伊是上帝ê子民，伊kap普通人无仝，伊有重大ê使命在身，就是ài不断ê将荣耀归hō͘上帝，伊应该hō͘外邦人看见上帝所特别选召ê家庭和谐气氛以及属于上帝ê形象，若是希西家王ē-tàng将耶和华伟大ê作为以及伊对上帝ê信仰，显示hō͘外邦人，同时koh hō͘ in看tio̍h伊ê好额kap强大，相信上帝bōe责怪伊，问题是伊kan-nā将现实ê好额，展示tī外邦人面前，soah kā上帝ê荣耀藏起来，这to̍h是伊失败ê所在。希西家王chit件tāi-chì hō͘咱基督徒ê家庭有无上ê省思作用，咱ài-the̍h什么hō͘人看？「基督是吾家之主」ê那幅圣画下脚有下列特别ê文字：「有一位看bē-tio̍h ê人客，定定kap咱同在」（Teh食饭、困、做khang-khè ê时）。虽然咱ê主tī咱中间是咱看bē-tio̍h，但是他soah深深深了解咱ê一切，只要咱每一个家庭ē-tàng迎接他tī咱厝内，hō͘他来支配咱信仰ê人生ê时，相信hiah-ê人会真清楚看着荣耀ê主tī咱ê厝内。当一个家庭有上帝荣耀充满ê时，试想hit-ê家庭ē-tàng hō͘人看tio̍h什么？To̍h是无私欲ê罪性kap人生ê一切pháiⁿ品性ê作为，所有ê只是圣灵ê果子，充满tio̍h喜乐、满足、善良、疼心、温柔……等ê良好生活ê表现，这to̍h是上帝荣耀ê伟大作为，虽然属于上帝ê人，无一定有phông-phài ê财富以及荣耀ê权柄，但是他会kā比chiah-ê现实ê物质koh-khah宝贵ê人生必需品kap良好ê品德赐hō͘他所喜乐ê人，人生siōng贵重ê物件，当然是良好ê品性，这kóa良好品性是主耶稣基督赐hō͘信靠他ê人。可惜ê是现代hiah-ê人往往kap希西家王犯仝款ê têng-tâⁿ，tiāⁿ-tiāⁿ tī面前显示家己ê才能，像财富、kiáⁿ儿ê成就、事业ê成功、生活ê富裕等等。基督徒ê厝内必须hō͘人看见你ê信仰，用信仰展示未信者ê中间是基督徒生活ê主要课题。有一个旅行者tī美国想beh chhōe出美国成功ê原因，伊tùi交通、银行、教育、科技lóng chhōe bē-tio̍h，一日中昼kap 一个平凡ê作sit人做伙食饭，先读一段圣经，然后祈祷，chiah发现tio̍h伊所beh ài ê答案。

结论：家庭是见证上帝ê所在，别人tī lín-tau看见什么？咱ê厝tī人中间夸口什么？