《受恩蒙福的一生》

 | | | 转寄

刺中花

作者 林宗要 2010.09.26

雅哥二：1-2

四十年前tī新屋教会ê时bat演出一个圣诞剧：刺中花。大概ê内容teh讲一位教会女青年信贞，有信仰而且koh生做真súi，性情温存，是一位标准ê理想châ-bó͘ gín-á，因此佮意伊ê人bē少，châ-bó͘ gín-á因为坚持信仰，所以伊期望理想ê伴侣是教会青年，但是伊ê母亲ê信心马虎，有一日媒人来提亲，男方名风流，是地方上好额人ê孤kiáⁿ，人品无好，人tio̍h亲像伊ê名仝款，但是伊ê老母并无考虑信仰，kan-ta siáu贪对方ê厚礼kap聘金chiah答应了chit-chan婚事，媒人问伊ê母亲：Kám讲m̄免kap lín cha-bó͘-kiáⁿ参详，伊ê老母共伊应讲：m̄免，我thang作主，媒人koh问：Kám讲m̄免kap您ê牧师参详？母亲答讲「Kap hiah-ê无开化ê人参详tāi-chì是bōe成功--ê！」

Châ-bó͘ gín-á tńg到厝了后知影chit-ê tāi-chì，向伊ê母亲举出kap无信者结合ê利害关系，恐惊信仰mā会受影响，母亲讲：「Chiah-ê lóng m̄免担心，男方已经同意信仰自由，ē-tàng参加礼拜，chit种条件toh位去chhōe？」Cha-bó͘-kiáⁿ举出实例，哀求伊ê老母，mài hō͘伊进入活地狱，母亲受气共伊责备讲，「我敢生你，就m̄惊你反抗」，cha-bó͘-kiáⁿ去哭hō͘牧师听，牧师来苦劝伊ê老母无应该kan-ta贪图物价，母亲竟然回答牧师讲，「牧师传福音要紧，mài干涉人ê家内事，cha-bó͘-kiáⁿ是我ê，你iáu担心我boeh将伊嫁hō͘ siáng？」牧师无奈，只好oat头勉励châ-bó͘ gín-á讲「Mā可能有主ê美意」。

结婚了后，因为伊ê翁婿m̄做khang-khuè koh有真chē歹习惯，家势衰败，负真chē债务，债主上门讨siàu，翁婿iáu活tī酒色中，ta-ke ê责备，翁婿ê起跤动手，面对真chē债主，koh ài担起全家责任，án-ne ê生活实在非常痛苦，佳哉chit时，伊ê屘cha-bó͘-kiáⁿ已经是国小仔一年仔，母á-kiáⁿ相依为命。翁婿放荡ê生活并无改变，厝内已经无ē-sái当ê物件，只chhun cha-bó͘-kiáⁿ学校ê制服，mā hō͘先生强取去当铺当掉。当铺头家ê bó͘是一个不守妇道，kan-ta知影享受，m̄尽本分，个性败害，时常用摔物件发泄情绪ê cha-bó͘，翁婿非常无奈，当「风流」提伊cha-bó͘-kiáⁿ 学校ê制服来当铺ê时，头家诚恳ê kā伊苦劝，mài tī福中m̄知影惜福，hit种贤慧ê bó͘ m̄知影珍惜，反倒tńg来共伊虐待，你想看māi，伊嫁入去lín-tau受尽折磨，m̄-bat讲出怨言，mā kā厝内整理kah真整齐，án-ne贤慧ê女子beh去toh位chhōe？Koh勉励伊奋发向善，重新开始过去律师ê khang-khè，风流良心发现，mā完全觉醒，但是后悔过去ê hit种人生状况，伊实在无面去见bó͘-kiáⁿ。

婚后十年ê一个暗时，母á-kiáⁿ照常做完家庭礼拜，cha-bó͘-kiáⁿ去困，信贞家己the替翁婿ê改正迫切ê祈祷，翁婿chit时已经完全听见伊e5bou2 ê祈祷，回想店头家ê忠言，想tio̍h过去十年来辜负信贞母á-kiáⁿ siuⁿ-chē，当伊听见牵手án-ne迫切诚恳ê祈祷，伊ê内心无法度koh忍受，走去跪tī in bó͘ ê面前，痛悔求赦免，kā伊ê bó͘揽牢放声大哭。

当然结局是翁婿悔改归正，家庭恢复幸福美满，chit-ê有淡薄á ē-tàng感动人ê话剧，伊teh说明chit位女主角，虽然tī极端ê困境中忍受tio̍h普通人真pháiⁿ忍受ê人生境况，但是伊lóng无怨天尤人，伊依从主耶稣ê教导，甘心背十架跟随他ê脚步，伊ê存在，tú亲像雅歌二：1-2所描写ê是一蕊非常美丽ê刺中花，无hō͘恶劣ê环境所胜，颠倒战胜伊达tio̍h尊贵、纯洁ê人生状况，这to̍h是刺中花！

圣经雅歌是指siōng出色、优jú ê诗歌，中文译做雅歌，充分表现伊ê原意，主题是讲男女间ê情爱，所以会hông骗入圣经ê正典，一般hông认为是比喻或者是解释以色列kap上帝ê关系，新约是基督kap教会ê关系，用chit-ê心态去看雅歌ê时，chiah ē-tàng体会内中ê真义。

（一） 刺中鼓子花（本质ê完美）
鼓子花（或者花）通常是hiah-ê人所喜爱ê物件，每一个人lóng爱伊ê美丽凊芳。Tī今á日ê生活中，伊kap咱有真密切ê关系，室内若有花，气氛就无仝，主日ê敬拜，任何教会mā一定有伊。表达爱情、关怀、慰问ê时，lóng用花来表达人内心ê诚意kap真情。因此花tī hiah-ê人ê生活中相当重要，因为伊是天生美丽，人见人爱。主耶稣用山顶野生ê鼓子花kap当时极尊贵ê所罗门王ê衫做对比来解释，hit位极荣华ê所罗门王所穿ê尊贵ê衫mā bōe比山野中ê鼓子花ê súi，可见花ê美丽是无thang可比--ê，所以花无论tī任何场合中lóng显出伊ê可爱娇丽ê特质。

圣经ê作者tī-chiah用「我ê佳偶tī kiáⁿ儿中，kah-ná鼓子花tī草刺内」，咱ē-tàng了解作者tī-chia所强调ê，伊ê所疼ê对象ê生存境况非常恶劣，好亲像hit丛刺中花ê外在环境，虽然有非常险恶ê挑战，但是lóng bōe因为伊ê境况ê恶劣（变化）来改变伊ê本质，是用草刺中ê鼓子花来形容所疼ê对象。

若用比喻思考ê时，可比旧约ê教会到新约ê教会，伊存在ê环境，mā可能有真chē不利，痛苦ê现实包围四周，但是教会ê存在的确bōe因为现实境况ê变化来变质，这to̍h是tī信仰ê过程中，主向信仰者所要求ê信仰ê性格，chit种kah-ná刺中花ê信仰to̍h是基督教信仰ê价值，tī过去ê教会史上表现出chit种尊贵ê信仰本质者，mā有真chē。基督徒ê信仰，to̍h是背十架ê信仰历程。

主耶稣向学生讲「若有人beh tòe我，就当囥下自己，背起伊ê十字架来跟tòe我」（马太十六：24）Tī-chia咱ē-tàng看出基督教信仰ê siōng koân境界。保罗mā向提摩太讲「只要立志tī基督耶稣内敬虔度日--ê，lóng tio̍h被逼」（提摩太后书三：12）。Chiah-ê事实lóng teh说明基督教信仰ê实质内容。

诚然，一蕊美丽可爱ê花teh充满草刺ê所在，ài如何去发挥伊伟大ê特质，这是一件相当困难ê实情，因为tī án-ne恶劣ê环境中，伊必须ài有相当ê警觉kap谨慎，若无一定会hō͘ 四周ê环境所凿tio̍h！这to̍h是基督徒信仰生活ê写照，基督徒tī现实ê生活环境，伊必须ài有相当ê觉醒kap谨慎，若无会凿tio̍h 来产生chiok惊人ê 孔嘴，因为主耶稣已经真明白ê kā咱讲，基督徒ê信仰生活是入狭门kap行狭路ê过程，虽然咱ê人生中四界lóng有开阔ê门kap路，但是伊lóng m̄是属于基督徒所有！

Chit种信仰ê本质，to̍h是刺中花所表现出来siōng完美，高尚ê本质。因此咱ē-tàng讲tī刺中ê鼓子花，本质上是非常完美ê存在，虽然伊生存ê 四周围有非常chē ê草刺！

（二） 草刺中ê鼓子花是纯洁ê本性
刺中ê鼓子花，bōe因为是生存tī草刺中，就变做野草，虽然伊生tī草刺中，但是伊犹原是纯白ê鼓子花，bōe因为环境ê缘故来变质，这to̍h是刺中花siōng可贵ê所在。

好亲像顶面所讲ê hit位善良ê教会女子，嫁入去恶劣、困苦艰难ê家庭中，但是iáu ē-tàng坚持信仰ê价值koh作美好ê见证！

作者tī-chia虽然用温情ê写法，但是soah用属灵ê角度来看chit件tāi-chì，咱ē-sái体会作者ê用心是tī绝对ê信仰kap忠坚ê爱情。只有具备chit种性格，一位信仰者chiah ē-tàng持守信仰上ê纯真kap对信仰ê主绝对无二心ê忠贞。

Tī一般人心中，通常对信仰ê对象ê敬拜tiāⁿ-tiāⁿ是用平常ê心态去应付，仝款是礼拜，仝款是宗教，无啥物差别。真chē人对基督教ê独一性神观无了解（尤其是处tī多神教ê台湾社会），对旧约中耶和华上帝ê排他性mā真pháiⁿ认同。

M̄-koh tī信仰ê世界，信仰ê主要求信仰者必须具备绝对忠贞ê信仰生活，双脚踏双船ê不忠ê行为tī社会上是hō͘人所厌弃--ê，好亲像旧约时代，先知以利亚向当时ê以色列人所讲--ê，in必须ài tī耶和华或者巴力ê中间选定一位，这to̍h是神学家所强调ê信仰ê性格，tī信仰ê世界无允准二样心，心怀二意并m̄是好ê信仰心态。

Tī信仰世界，定定有chit种因为环境来影响tio̍h信仰ê本质ê事例，有一kóa基督徒kap人去观光参观古庙ê时，别人teh拜拜，基督徒mā tòe人拜。有一kóa基督徒tī恶劣ê环境中，m̄-nā bōe-tàng见证福音，反倒tńg kap人行共路，chiah做出犯法或者违背信仰良心ê tāi-chì，真chē基督徒堕落以及失败ê主因，通常是tī bōe-tàng坚持伊ê信仰独有ê特殊纯洁ê本质。信仰者tī社会上应该是beh去影响人，去感化人，但是tiāⁿ-tiāⁿ有一kóa基督徒tī真道上颠倒hō͘人同化。

刺中ê鼓子花tī伊ê恶劣ê境况中iáu ē-tàng保持纯洁ê特质，to̍h是伊可贵ê所在，伊kā咱讲chiah-ê基督徒一件非常重要ê真理，tī草刺中是m̄是iáu ē-tàng保持洁白ê本质？这是信仰kap现实ê生活中ê一件真有挑战性ê问题。Bōe hông 污染tio̍h。

创世记十三章以后，记亚伯兰kap罗得ê情形，咱就会了解信仰必须ài有纯洁ê本质：当时ê罗得袂堪--ê所多玛城真chē恶劣ê状况。本来伊ê使命是「化世俗」，但是现实ê生活hō͘伊成做「世俗化」，假使伊ē-tàng有草刺内ê鼓子花chit种心态去经营伊ê信仰ê时，伊就bōe kap恶魔妥协。

这to̍h是基督徒社会生活ê写照，有ê时有可能会hō͘人认为阿西，但是soah表现出草刺中ê鼓子花纯洁ê本质！

（三） 草刺中ê鼓子花ê香气

咱已经思考草刺中ê鼓子花ê特质，1）完美ê本质 2）纯洁纯正本性，虽然伊ê生存ê环境相当ê恶劣，但是伊soah无因为伊ê境况来影响tio̍h伊本质ê实在，颠倒tī chit种境况中koh-khahe7-tàng发挥伊独有ê特殊纯洁ê内在价值。

最后咱koh思考草刺中鼓子花ê另外一种气质，to̍h是伊ê清芳，咱lóng知影，花会hō͘人欣赏是因为伊外表美丽ê色彩，同时花本身，会发出香味mā是hō͘人欣赏ê主因，咱tiāⁿ-tiāⁿ会tī生活中看tio̍h hiah-ê人提花蕊，khǹg tī鼻孔边闻伊ê香味，假使有一kóa花有艳丽可爱ê外观但是有臭味，相信无人会欣赏伊！因此美丽ê花ê要件，一方面是外观ê美丽，另一方面是有清芳ê气味，chiah-ê事实是花是án-án 会hō͘人喜爱ê主因。

虽然玫瑰花有刺，但是hiah-ê人lóng bōe因为伊ê刺来弃嫌伊，人犹原佮意玫瑰花。

咱看草刺中ê鼓子花ê特质，虽然生tī草刺中（相当恶劣ê环境），iáu ē-tàng放出清芳ê香气。Chit件事实是teh向基督徒提出一个问题，基督徒ê存在，有ê时mā有可能好亲像刺中花，但是咱必须ài明白，无论着抑m̄着时，无论任何场合，基督徒ê特质就是beh不断来发出ē-tàng荣耀上帝、见证耶稣基督福音清芳ê气味。

基督徒见证上帝ê荣耀是无受时间kap空间ê限制，无论你活ê环境如何，基督徒ê特质to̍h是不断来发出基督徒所讲--ê：「因为咱tī上帝面前，无论tī得救ê人身上，或者灭亡ê人身上，lóng有基督清芳ê气」（哥林多后书二：15），tī-chia咱ē-tàng体会信仰ê实在内容，to̍h是要求信仰ê人不断来散播出有耶稣基督ê香味！To̍h亲像刺中ê鼓子花，虽然tī hit种境况中，犹原有独有特殊可贵ê香气。

基督徒ài明白伊ê存在本身to̍h是价值！虽然咱存在ê环境m̄是lóng仝款，但是咱必须明白，咱ê存tī本身to̍h是价值ê事实。形成价值，是在teh发挥伊ê作用，m̄管你ê人生内容如何，温室中美丽ê花蕊，受tio̍h特别ê照顾，khǹg tī花矸内成做人欣赏ê题材，或者是刺中花，活tī hit种恶劣ê境况中，你lóng必须ài会记，你ê存在本身to̍h是价值！因为咱每一个人lóng hō͘上帝安置tī各种无仝ê环境中，境况虽然无仝，每一个lóng有一个仝款ê价值，to̍h是发出清芳ê香气tī你生活ê 四周！这to̍h是刺中花ê特质。

「刺中花」，提醒基督徒对信仰生活ê问题ê koh在认bat、自觉、忧患意识ê建立，kap背十架ê生活心态，lóng应该去思考--ê。尤其tī现实ê生活中，如何去表现信仰生活，tio̍h-ài有信仰ê智慧kap判断ê能力！