《受恩蒙福的一生》

 | | | 转寄

家庭ê隐忧

作者 林宗要 2010.09.19

箴言十五：24-33；罗马书一：18-32

家庭是人生生存siōng有影响力ê所在，伊kap人生ê成败有决定性ê关系，真chē有成就ê人ê背后lóng kap家庭有关系，因为家通常hō͘人看做温暖ê眠床，当人生面当the面对无情ê现实社会ê时，有真chē负面ê人生状况，但是tī厝内会有无仝ê感受，因为tī chia，咱会体会tio̍h关爱、勉励kap安慰ê人生正面作用ê经验。历史上真chē伟大ê人，in ê家庭lóng bat hō͘ in真大ê启发作用，比如孟母教kiáⁿ，奥古斯丁ê母亲摩尼卡，爱迪生ê母亲对kiáⁿ ê耐心kap了解，林肯ê母亲（后母）对伊ê疼kap鼓励，lóng是造就这几位伟人成功ê因素，chiah-ê lóng kap家庭有密切ê关系。

家庭ê定义是什么？就是一家人共同生活ê所在，tī hia有老父老母、翁仔bó͘、兄弟姊妹chiah-ê亲人形成ê共同体，m̄是单独ê个体，tī-chiah有各人无仝ê意见、观念、价值观等等问题出现，这to̍h是造成家庭ê问题。中国字「家」thang分做两个部分：1）宀 2）豕，若详细思考，咱thang明白teh说明家庭ê状况。

咱lóng知影，家庭对人生以及社会ê影响非常大，因为每一个人lóng是ùi家庭出来--ê，家庭所雕刻ê人格若完美理想，伊所形成ê社会iah一定khah理想。用chit-ê 做前提，咱来看台湾社会ê状况，有真chē 无理想ê人格teh制造真惊人、混乱ê社会现况，当然chiah-ê毒害社会、恶质ê人格ê成因非常复杂，但是受tio̍h家庭影响soah是bōe争ê事实。咱已经体会tio̍h，现代家庭已经完全失去过去美好ê家庭伦理关系，tī社会新闻中，咱tiāⁿ-tiāⁿ会看tio̍h真chē家庭逆伦ê事件、强奸、凶狠、诈欺ê案件，当然咱bōe-sái讲in tùi现代化ê变迁无影响，但是主因iá是tī人ê心态。光启社七十年代ê电视剧「梨仔kap苹果」：一对庄脚翁仔bó͘辛辛苦苦chhiâⁿ养两个后生，大汉了后tī台北成家立业，有一pái老翁仔bó͘思念gín-á，to̍h来到台北，老先生tòa tī大汉后生in-tau，老太太tòa tī第二ê后生tau，因为观念、背景无仝，生活习惯难免有无仝，有一工少年人无tī厝，留老父家己一个人tī厝，嘴干无水thang好lim，伊看见桌顶有一粒苹果to̍h提来食，媳妇tńg来chhōe bē-tio̍h苹果to̍h kā伊ê先生tâu，大汉后生竟然对老父讲：「实在有够thó-chè，一粒苹果ài几十箍！」老父想着以前后生koh细汉ê时，吵beh食苹果，厝内虽然无钱，mā是买hō͘ kiáⁿ食，心中有淡薄á真有感觉。老太太tòa tī第二后生tau，ta̍k工洗衫、煮三顿，媳妇soah kan-ta注重家己ê保养kap化妆，有一工老母看tio̍h一粒梨仔the-beh害去to̍h kā伊tàn-sak，媳妇想beh食soah chhōe无，to̍h认为是老母食掉，tio̍h足受气，后生mā责备老母ê m̄-tio̍h，因为伊ê bó͘已经有身啊。两个kiáⁿ lóng讲beh chhōa 两个老ê去游乐园耍、tòa观光饭店，但是lóng kan-ta出一支嘴，两个老ê无法度koh忍受 chit款委屈ê生活，to̍h恬恬á转去庄脚无kā in-ê 后生讲，厝边若来拜访，两个老ê iáu假做真o-ló 二ê后生tī台北是如何ê款待in，ta̍k工食梨仔kap苹果。两个kiáⁿ chhōe无父母，chiah来感觉见笑、疏忽父母，to̍h回乡，chah tio̍h kui大笼ê梨仔kap苹果做礼物，向双亲认罪。戏剧用「凡事以忍为先，百行以有孝为首」来结束。

Tī现代生活中，chit款tāi-chì必定bōe少，伊mā指出现代ê家庭问题。有一个真实际ê问题是一般cha-bó͘-kiáⁿ kap老母ê关系，lóng非常亲密，但是媳妇kap ta-ke ê关系，有ê时情况to̍h无hiah-ni̍h理想，仝款是女性，只是角色无仝，为什么差别会hiah-ni̍h大？佳哉现代人大部份采用小家庭ê生活，三代同堂ê情形khah无chē，所以chit方面ê问题已经减少一kóa，但是咱若详细思考现代家庭，确实iáu有真chē问题是咱必须ài去面对--ê：

（一） 无平衡ê心态
现代家庭大多数是小家庭，照理应该是单纯ê父母kap kiáⁿ儿序细ê关系，但是若详细kā伊观察，咱确实会发现其中有真chē问题，chiah-ê问题通常是成做家庭问题ê原因。用顶一代kap下一代ê思想（观点）做例，teh时代变迁中所带来ê问题，tiāⁿ-tiāⁿ会造成二代人心态上非常大ê差异，这是实实在在ê事实。用父母kap kiáⁿ儿之间ê思考方式来讲，当kiáⁿ儿进入青少年时期了后，咱有时仔会tùi伊ê嘴内听tio̍h以前咱从来m̄-bat听过、kap家己ê想法完全无仝ê论调kap看法，chiah-ê问题若bōe-sái处理hō͘伊妥当，往往会成做双方冲突ê起点，人kap人之间思想若有差异，就真pháiⁿ得tio̍h共同生活ê事实。

相信现代家庭中，chit种无平衡ê心态非常chē，有一个实例「悔教囝儿来美国」，chit篇文章是一位苏姓寡妇tī报纸顶koân所发表--ê，伊讲天下父母心lóng期待kiáⁿ儿ē-sái成龙成凤，chit-má伊ê kiáⁿ儿真正成龙成凤，但是he狼毒ê脚爪soah伸向家己ê老母，掠得伊kui身躯lóng是伤，心teh滴血……，伊有一个后生三个cha-bó͘-kiáⁿ，翁婿tī十四年前tio̍h过身啊，伊家己taⁿ起一间破碎ê厝，费尽心血，tī 六年中送四ê kiáⁿ儿到美国留学，甚至成家立业，伊一个人tī台湾、孤独寂寞，无gōa久伊抱tio̍h满满ê希望kap快乐ê心情赴美探望kiáⁿ儿，伊用「冷淡、讽刺、虚假kap残酷」来形容kiáⁿ儿对伊ê态度，长女tāi先反对伊赴美，伊讲「老人无适合来美国，阮无时间照顾你，美国人是m̄ kap父母tòa作伙--ê」，老妇人ê目屎往腹肚内底吞，chit种打击hō͘伊ê体重tùi 125磅瘦到90磅，自án-ne致tio̍h严重ê 高血压，第二cha-bó͘-kiáⁿ讲，你kap大姐之间ê恩恩怨怨，伊无ài chhap你，你若看阮bē顺眼，就m̄免chhap阮啊。孤kiáⁿ亦bat因为一kóa小事，tī半暝手the̍h伊ê行李，手指向大门，大叫，「kā我出去，你若死tī半路，我mā bōe流一滴目屎」，佳哉媳妇出来解围，老妇人讲，tī án-ne境况中伊iáu ē-tàng活落去是因为屘cha-bó͘-kiáⁿ ê真心kap体贴，替伊说明美国ê生活方式kap台湾无仝，难免会受tio̍h影响，若有m̄-tio̍h，请原谅in，in lóng是你ê亲生kiáⁿ等……。当然这是极端ê事例，但是tī现实家庭中确实有chit种心态ê差异所引起ê问题。Tī-chiah，可能ē-tàng看出旧道德kap新社会ê问题，或者讲是传统kap现代化ê问题，确实tòa-tī台湾ê父母无法度了解tī美国有一kóa家庭，食饭ê时各人付各人ê，父仔kiáⁿ mā仝款，tī台湾mā bat有人去探访亲友，心肝内必定相当bōe平衡，相信tī欧美社会所有ê现象，早晚mā会发生tī台湾，因为这是现实ê社会风气。

会形成ê原因是tī社会变迁、kiáⁿ儿ê品格、无健康ê伦理教育，tī现代家庭中，定定会出现kiáⁿ儿忤逆父母ê情形，厝内只有一、二ê宝贝，因此过份疼爱，hō͘ kiáⁿ儿成做太上皇，对父母大声喊koh是普通代，几年前我去西安，一个导游kap我讲--着伊ê孤kiáⁿ是偌呢啊pháiⁿ！Chiah小学四年仔。有一篇文章讲：1992年夏，七十七名十一～十六岁ê日本青少年kap中国大陆三十名青少年联合举办内蒙古草原探险夏令营，有真chē行军性质ê体会训练，tī中间看出日本人kap中国人ê无仝心态，日本人所表现ê是刻苦耐劳、m̄惊艰难、忍耐、完美ê合作，中国人所表现soah是自私、m̄合作、口出怨言、chiah好做轻khó、自以为是、相争beh上车！作者评论，tùi chiah thang看出日本第一ê原因！关键tī心态所形成，因此咱知影，心态对人生生活有非常重大ê影响，现代家庭ê隐忧ê一件原因，就是形成chiah-ê人tī心态上ê差异所引起ê问题，相信咱thang tùi chiah-ê人生实况去了解。

（二） Tùi人格kap价值观所产生ê问题
现代家庭ê第二个隐忧，就是现代人ê人格形成ê问题（人格塑造ê 无完美），因为人格是人生tī社会生活中是毋是有正常ê基因，一个khah完好ê人格，伊ê社会性必定是khah正常化，若是一个人格形成tòe-tio̍h一个真chē缺陷ê人，伊ê社会性必定会有真chē反社会ê行为产生，tī现代社会中，有真chē惊人ê社会问题比如凶杀、抢劫、绑票、吸毒等等ê社会乌暗面，hiah-ê主角ê人格状况lóng有真严重ê缺失，这是犯罪学家ê结论。

同时tī现代人生活中，因为现代化ê影响，致使人kap人之间ê人际关系建立ê无gōa通顺，这mā是现代家庭ê隐忧，咱知影，健康互动ê人际关系，ē-tàng帮助咱完成人生重大ê责任，但是tī无闲ê家庭中，父母kap kiáⁿ儿ê关系罕得有时间去用心经营，建立好ê互动关系，譬如老父无闲事业，晚起晚归，kiáⁿ儿soah透早tio̍h-ài起床去上课，无法度见tio̍h老父，一直到beh困chìn前iáu无看tio̍h老父，只有礼拜日chiah有可能见面、相斗阵，chit种情形对kiáⁿ儿ê人格形成必定是负面--ê，甚至造成现代家庭欠缺双方沟通ê管道，无退一步ê空间，相安无事ê时，家庭iáu ē-tàng维持，但是人无法度永远tī平安ê境况，因为人ê现实就是tī不断有问题发生ê所在，所以人生若无退一步ê空间，一旦问题出现，lóng已经真oh处理啊。

另外一个事实，就是tī chit种人格形成ê结果，造成真chē人tī人生ê价值观ê极端偏差，人生ê价值观是决定tī人生成败ê主要因素，通常人生ê作为（生活、事业、khang-khè、社会性）lóng是根据伊ê人生价值观所表现出来--ê。当父母塑造一个完善、理想ê kiáⁿ儿ê人格ê时，chit位kiáⁿ儿将来tī伊ê人生过程中，必定有正面、正确ê人生方向kap态度，tī任何人生境况中lóng有刚强ê意志kap奋斗ê精神，凡事照步来，一步一步进行，无论任何境况，lóng有独当一面ê气魄，chit种人格必定会行向成功之途。

若是一个有偏差人生价值观ê人，活teh娇生惯养ê世界，欠缺斗志，tú-tio̍h问题就软弱失志，脑中所想--ê只是「Tāi-chì少钱ài chē tī 厝附近」ê khang-khè，轻松无压力，食好做轻khó，chit种自私、无敬业精神、贪图利益kap功劳ê性格kám m̄是tī现代家庭四界thang看--ê？到底是siáng造成了chiah-ê看近无看远ê人格？Chit种人格若tī厝内，kám m̄是家庭ê隐忧？这是值得咱思考ê切实问题。

（三） 失去了真实ê榜样
Tī家庭生活中，siōng有教育责任ê是父母或者兄长，in必须成做真实ê教材，chiah ē-tàng造就理想人格ê kiáⁿ儿（小弟小妹），厝内若失去chit种活教材，伊ê家庭教育绝对无法度完美。通常chiah-ê有教育身分ê长者，lóng较用言教，用言语训诫kiáⁿ儿，soah疏忽了生活中ê身教－行为ê榜样。Khah细汉ê kiáⁿ儿ê人格形成中，父母ê 所有行为lóng会深深ê印tī伊人格中siōng深ê所在，成做in未来价值观ê题材，有一个故事讲有一对翁仔bó͘，真会教示in chiah 5、6岁大ê kiáⁿ儿ài相亲相爱、ài有同情心、体贴人，但是翁仔bó͘ 二人因为个性差异，差不多ta̍k工lóng teh冤家、起冲突，有一日二兄妹tī房间学习父母冤家互相攻击对方ê方式，hō͘ chit对父母看tio̍h，二人感觉真对不起，下定决心改掉pháiⁿ习惯！台湾俗话讲「好竹出歹笋」（好人出歹kiáⁿ），若是tùi教育ê立场来思考，是无可能ê事实，但是tī人生社会中，chit款tāi-chì 满满是，有一位教会ê长老，若用人ê标准去看，是人格非常完美ê人，教会生活mā无thang指责，是模范ê好人，但是伊soah有一个为非sám做、pháiⁿ事作尽ê了尾á-kiáⁿ，问题tī-to̍h？父母之间有问题、观点无仝、生活bōe-tàng配合、教育kiáⁿ儿态度无仝、有bē-tàng hō͘人知影ê缺陷等原因造成kiáⁿ儿ê异常，真久以一位司法人员，将伊审理ê一件青少年事件写做一篇文章「活ê榜样」发表tī报纸顶koân，伊讲，当伊对chit位未成年ê少年人讲了一篇做人处世ê大道理，勉励伊ài珍惜家己ê前途，改过自新重新做人ê时，少年人soah kā伊回--讲：Lín chiah-ê大人lóng佮意提大道理来教示阮，听起来真有道理，引用孔孟ê教示，in lóng是已经死几千年ê古早人，是m̄是有伊chit-ê人iáu tio̍h怀疑，横直阮所看tio̍h ê大人世界lóng m̄是hiah-ni̍h好，大人教示gín-á ê tāi-chì，家己lóng做未到，叫阮怎样去相信？并举出真chē例证，说明大人口是心非。虽然少年人ê话并无一定对，但是chit-ê事实是值得成人去反省--ê。

Tī大人ê世界中，咱欠缺亲身去做ê决心，咱欠缺讲ê kap 行为ài相仝ê行动，kan-ta讲古圣先贤自重，行双重标准ê生活方式，chit种生活内容自然无法度得tio̍h少年人ê尊敬，虽然顶面所讲chit位叛逆ê问题少年ê心态无一定正确，但是伊所提出来ê问题，确实值得成人世界好好á检讨，咱mā会发现，这是成人世界ê责任，因为成人所有行动，对下一代lóng有绝对ê影响，心理学家用录影机做例，说明父母ê举动ná亲像录影ê过程一一录tī kiáⁿ儿人格ê潜意识内底，长大后，in会tauh-tauh放出来，而且来评估是m̄是合tī in ê人生价值观！

相信咱每一位lóng相信咱对kiáⁿ儿ê教育是合理、正确ê，但是iáu定定会发生状况！Chiah-ê状况ài成做咱家庭ê隐忧，隐忧若bōe-tàng克服，家庭生活就无完美，无完美ê家庭是问题ê温床，伊会伤害tio̍h人生生活大部分ê内容，是人生负面--ê、真惊人ê现象。

结论：1）认清家己现实ê人生状况。2）用koh-khah chē ê心思去看家己ê家庭。3）用上帝所赐予你ê智慧kap信仰去经营家己ê厝，hō͘你ê厝成做荣神益人ê所在！