《受恩蒙福的一生》

 | | | 转寄

微细ê声音

作者 林宗要 2010.09.12

列王记上十9：1-16

列王记上十八章是先知以利亚面对极权ê王权亚哈王ê反背上主，藉着上帝ê帮助，先知tī众人面前，显示出上帝ê大能，利用当时ê气势来消灭亚哈王ê假先知四百五十人。

Hit时chūn，先知以利亚有责备当时ê群众踌躇ê信仰是非常惊人ê信仰危机，tī/chit件tāi-chì，咱ē-tàng明白一件真理，就是先知ê责任就是tī人民ê chit种心存两意，teh踌躇对上帝、对信仰无明确ê立场ê时chūn，才向in宣示上帝ê意志，引chhōa人民，明白必须ài建立kap上帝之间有理想、完美ê人格关系，chiah ē-tàng真真实ê成做上帝ê选民来完成上帝交托ê责任，用今á日教会ê存在，to̍h是承担先知chit种角色，教会tī犹未有信基督ê人当中，ài有引chhōa人去体验上帝、信靠上帝ê使命。

当然chit种khang-khè是有淡薄á艰难ê khang-khè，好亲像当时ê先知以利亚仝款，面对真chē 不义kap 无相信ê境况中，人若beh传达上帝ê启示tī人间，往往会引起chiok大ê反感、反击。

但是先知soah tī chit种极端困苦中去完成上帝所交托ê责任。A)消除当时危害人民kap上帝之间ê信仰ê巴力ê先知四百五十人。B)解决了三年半久ê火烧埔，hō͘人民活teh正常ê过程中。当时以利亚ê作为实在表现出伊ê信仰kap人格，伊ê伟大相信tī he时chūn无人thang比（包括国王在内！），伊ê人望赢过任何人，伊thang利用chit种气势来替家己计画，一定会有美好ê结局，但是伊深深了解chit种世界kap其中所有ê m̄是伊ê主要事工，伊ê khang-khè是宣示上帝tī人中间ê疼kap恩典，因此真正做上帝ê差用者往往会有超然ê心态去面对环境kap事工，tī咱ê社会现象中，咱定定ē-tàng tùi新闻看tio̍h有权力ê人the教示勉励基层人员ài有传教师ê精神，去面对hông交托ê责任，chit种精神to̍h是先知ê khang-khè内容，tī任何境况中，永远死忠tī受托ê使命，咱tī十八章看tio̍h先知以利亚ê绝对胜利，非常有体面荣耀ê人生状况，是有淡薄á得人望ê存在者，但是tī/teh十九章，咱会看见chit位上帝ê仆人ê凄惨可怜，为tio̍h保命，必须拼命逃走，tī-che咱thang/ē-tàng看出完全无仝ê状态，伊所以必须ài逃走是因为伊ê作为所引起耶洗别ê 不满，chit位推罗王ê cha-bó͘-kiáⁿ耶洗别án-ne看是相当有能力ê而且ē-tàng影响伊ê翁婿哈亚王ê作为，是一个有非常坚强ê性格ê人，因为伊ê祖国是祭拜巴力chit-ê偶像，伊mā将chit种tùi偶像追求引进以色列，hō͘选民去拜偶像。（列王记十六：31-33），伊beh刣（追击）先知，（十八：4），同时mā想beh kā先知以利亚杀害（十九：2）为tio̍h beh夺取óa王宫ê 一块地（提伯所有）伊献毒计来杀害园主，来达tio̍h目的，实在是非常狼毒ê cha-bó͘。

「耶洗别叫人去见以利亚，说明日约tī-che ê时我若无使你ê性命，像hiah-ê人ê性命仝款，愿神明加倍处罚我，以利亚看见án-ne就惊惶，爬起来逃命」（十九：2-3）。

Taⁿ咱tùi这二章圣经来看chit位上帝所重用ê先知，前后ê差别竟然chiah-ni̍h 无仝：Tī-che咱会看tio̍h实实在在ê人性ê流露，tī-che为着性命逃走ê以利亚kap十八章khiā-tī王kap 四百五十名巴力ê先知面前ê hit种勇敢、壮观ê气慨完全无仝！

Tī-che伊体会tio̍h人ê软chiáⁿ kap无完全ê实在，伊为tio̍h上帝，做chiah-ê美好ê见证，结果soah是chit位非常狼毒ê耶洗别beh刣伊、消灭伊，伊m̄-nā放出风声，是实在ê动作。

Chit种情境，定定是hō͘上帝ê差用产生真chē疑问，但是信徒一定会相信，万事lóng有上帝美好ê旨意，降落tī他所选ê人身上，这是事实。而且有ê时，亲像chit种状况，mā会帮助信仰者去体会上帝ê恩kap疼tī他所疼ê人身上，亲像以利亚，处tī极端困境中，伊顺服上帝ê引chhōa，重新体会圣灵ê恩赐，chiah hō͘ in新ê使命，需要伊去执行。Tī-che咱看着以利亚tī极端ê困境中重新得tio̍h新ê能力，这就是beh完成受托ê责任所bē-tàng欠ê条件。当咱想tio̍h chiah-ê状况ê时，咱就会明白，tī人所有ê遭遇中，有上帝永远无变ê旨意ài人去完成伊，尤其是tī信仰ê路上，有ê时teh极端ê困境中，基督徒mā会体会tio̍h上帝美好ê事实排teh伊ê面前！

（一） 成功了后ê危险
每一个人tī伊所面临ê事物中，伊bōe-sái用平凡ê心情来khiā tī中ng ê所在，tī-chia，人必须ài有所选择或者有所取舍，chit种对事物ê选择或者取舍ê结果，就是形成人ê成功或者是失败，所以人ê成败，tùi án-ne确立tī人对伊所tú-tio̍h ê事物ê取舍了后ê结局。

无论每一个人ê个人或者家庭状况以及信仰ê历程，lóng是án-ne。若m̄是成功to̍h是失败，所以咱ê人生实在是真严肃ê事实。

Tī人生中，khah无中间地带，尤其是咱ê信仰，koh-khah是án-ne，若m̄是成功就是失败。主基督tī启示录三章十五～十六节［我知影你ê行为，你bōe冷mā bōe烧，我真希望你会一下á冷或者一下á烧。既然你kah-ná温水，mā bōe冷mā bōe烧，所以我ài tùi我嘴中kā你吐出去。］咱ē-tàng tùi主基督所讲ê事实来看咱ê信仰ê性格，伊kap人间社会有一kóa无仝，tī人间，人定定要求人ài有khah中庸ê性格，可能tùi人生ê生活有帮助，khah bōe造成失败，这是事实，但是信仰生活无中间线（无中立），是基督kap魔鬼，光kap暗ê选择，to̍h亲像先知以利亚向当时ê以色列人ê要求，tī上帝kap巴力之间ài选其中一个，bōe-sái 两个lóng选，这m̄是信仰ê道路。

以利亚真成功引chhōa以色列人进入上帝所欢喜ê路径顶koân，chiah解决了当时民众生活ê危机，人若是ē-tàng替社会化解危机，he自然是成功ê英雄人物，但是必需ài认清一件真理，就是人生ê生活是起起落落，有成功，但是m̄是绝对，失败mā是仝款！咱thang tùi历史或者教会生活中体会tio̍h chit种状况，真chē成功ê伟人或者信仰者，有ê时in会表现出失败kap悲惨ê下场，因为tī人间无绝对ê事实（只有上帝chiah是绝对），咱若看圣经，马太十六章彼得ê信仰告白，hō͘主耶稣所肯定o-ló，但是无gōa久soah hō͘主耶稣责备做［撒但退去！］，彼得tī客西马尼勇敢ê护卫耶稣，但是无gōa久就tī查bó͘嫺面前三pái否认耶稣！咱看先知以利亚tī十八章所表现ê kap十九章ê事实，咱就会知，tī人生中定定有chit种成功了后ê危机（无论亚伯拉罕、摩西、参孙、大卫、所罗门等等），chit种情形，一方面是人ê性格ê软弱，另gōa一方面是人ê现实环境，定定是造成咱人有chit种危机ê产生，因此若beh克服chit种对人生有危害ê发生，人生必须ài对人性ê软弱以及现实ê环境做有利ê调整，加强人性ê坚实以及对境况有相当程度ê辨别kap适应，若无tī日常生活中ê错误判断往往是造成人生有惊人ê失败，这是咱ê生活ê真理。另外一种情形咱必须注意--ê就是成功了后ê自高 mā是造成人生失败ê原因。

（二） 危难中chhōe上帝！（以利亚上何烈山）
十九章ê圣经teh说明，以利亚ê境况无论心理抑是生理，lóng是tī极端ê危机kap不利中。当伊听tio̍h王后耶洗别beh刣伊ê消息ê时，［以利亚见这光景就开始逃命，到了犹大ê别是巴，将下跤手人留tī hia，家己tī旷野行一工ê路程，来到一欉罗腾树跤，就坐tī hia求死，讲，耶和华阿，罢了，求你取我ê性命，因为我对不起我ê列祖。］伊认为当时ê状况á是死khah好，咱thang看出当时伊ê困境，实在是处tī非常ê危机中，tī心身lóng非常厌倦中入眠（可见当时伊真正chio̍k凄惨），然后伊体验tio̍h上帝ê预备以及完全ê看顾，因此chiah得tio̍h心身恢复ê能力chiah koh行四十工ê路程到上帝ê圣山－何烈山。当时伊ê境遇实在是非常恶劣，一个真有能力，khang-khè亦相当做功ê先知，mā会tú-tio̍h chit种危难ê场面，这就是圣经teh kā 咱讲人ê现实，无论任何人物，tī伊ê人生中lóng有可能像án-ne ê人生状况发生。

当软弱ê人性面对tio̍h chit种hiah-ni̍h大ê危难ê时，圣经kā 咱讲唯一 ê办法就是－tī危难中chhōe上帝！所以以利亚来到圣山－何烈山。

Tī-chia，伊ê危难得tio̍h化解，同时得tio̍h新ê使命，chiah重新伊ê事工，圣经用渐渐ê方式来表达出上帝ê临在，A)烈风大作，崩山碎石－chiah-ê山破裂， chiah-ê石头破碎，非常强大ê作用，但是耶和华无tī风中。B)透风了后有地动－mā是自然现象中ê状态，hit时ê人，kā chē看做真惊人ê tāi-chì，耶和华mā 无tī地震中。C)地震了后有火－lóng是teh说明自然现象kap渐渐加强ê状况，耶和华mā无tī火中。D)火了后有微小ê声音，tī-chia先知chiah听tio̍h上帝ê声音，tī-chia咱会发现一个事实，就是上帝ê临在是tī有「人格ê」关系上，m̄是存在tī hia-ê无人格中，虽然，咱ê上帝是无所不在ê，但是人kap上帝之间ê关系，必须ài建立tī人格ê关系上，人ê危机chiah ē-tàng真正提出tī上帝面前，咱看见，chit位伟大、有成就ê先知，伊所做--ê成功ê khang-khè，ē-sái讲是危难mā同时kap伊作伙，chit种人生现象，teh说明人生ê实况，不管你ê人生有何等、gōa大ê能力，当你tú-tio̍h人生非常大ê危难ê时，的确m̄是人ê力量thang化解--ê，tī chit种人生中，基督徒必须ài建立tī危难中走chhōe上帝ê管道，chiah ē-tàng解决你人生ê危机。
这就是咱tī教会生活中，时常强调--ê，基督徒kap上帝之间属灵ê状况通顺ê原因，因为tī平时（你ê人生顺畅ê时），你若无phah通你kap上帝之间ê chit条来往ê路径，当危难来临ê时，有ê时buē赴通顺，自然就无法度完成。会记ê he m̄是单行道（有来有去！）。基督徒必须ài明白，咱ê人生ê状况是有起落ê人生，任何状况lóng有可能发生tī咱ê身上，咱若无建立chit种心态，只有生活teh期待上帝ê祝福kap保护ê时，有一工若处tī危难中，咱ê生活就会失去重心。

（三） 微细ê声音（火了后有微小ê声音）
Tī-chia以利亚听见上帝ê声音，mā就是前三pái自然界ê现象中，以利亚无听见上帝mā无体会tio̍h上帝tī其中，只有tī微细ê声音中，伊体会tio̍h上帝ê存在，因为上帝ê临在是tī人格中显现，tī无人格存在ê自然现象中是chhōe bē-tio̍h上帝！Tī-chia上帝用微细ê声音向以利亚说明，hō͘伊使命，咱tī-chia会想tio̍h约翰一章「道」ê真理，［太初有道，道kap上帝同在，道就是上帝，万物是藉tio̍h伊制造ê，只要hō͘伊造ê，无一项m̄是藉tio̍h伊制造ê。性命tī伊内底，这性命就是人ê光。］日语翻译做「言」，伊ê起头虽然kap希腊哲学有关系，但是约翰所用ê 是teh绍介人格神基督，他是性命kap光辉，若用约翰一章道ê思想来思考以利亚tī-chia所听见ê微细ê声音，咱就会明白，伊是人kap人格神来往ê器具。

因为咱知影，声音kap人生有密切ê关系，tī人生生存中声音四界long2thang好看见。A）无好听ê声音－噪音是现代生活ê 1件siōng大ê缺失，工厂［场］ê机械声、车ê噪音、飞机声，chit种声音是无人欢迎ê。B）美好ê声音－音乐、乐器之声，1 9 9三年2月间，电视上bat绍介用瓶子演奏，虽然仝款是声音，但是经音乐家处理了后变成了美好ê声音。C）表达人格ê声音－tī/teh对话、交谈中，有人格在内。

创世记第一章，上帝创造天地是tùi上帝嘴中ê话。约翰第一章ê道是tī/teh绍介人格ê上帝显现在人间。所以声音犹原是人格ê表现，比如政见ê发表、律师ê辩护、外交家ê演讲、教会the 做礼拜ê时ê证道ê声音等等，lóng thang看出声音tī人世间ê重要性。先知ê灰心kap危难，he是iá未体会tio̍h（kap上帝有人格ê接触）上帝ê实在，因此危机加重a，但是当伊听tio̍h上帝ê声音（虽然是非常微细ê声音）了后，kap上帝有人格ê接触，伊ê状况就完全无仝，chit种改变，是tī chit种微细之声ê功效。

1） 安慰之声－－Tī以利亚chit种处境中，上帝ê声音表示安慰，因为事实上，耶和华是安慰ê主，当时ê以利亚siōng需要ê就是安慰，咱人ê人生状况，有ê时mā会灰心失志，会记ê，ài去听tio̍h chit种安慰ê声音。

2） 帮助之声－－另外，先知tī微细ê声音中，伊体会tio̍h ê是上帝帮助ê声，因为咱ê主上帝是帮助ê上帝，只要属于他ê人，tī人生危难中，ē-tàng听tio̍h伊ê声音，就有可能化解人生ê危难。所以以利亚所听见ê这微细ê声音是帮助ê声音。

3） 改变，重新接受使命ê声音－－十九章十、十四节，咱会知影先知tī-che境况中，sió-khóa带有傲性，tī上帝面前是无适合--ê，因此chit-ê声音，对伊ê品性一定有改变ê作用，然后上帝chiah任命伊koh-khah重大ê使命。上帝hō͘ 人ê新使命往往要求人必须ài修改人ê傲气、自高，是用谦虚恭敬ê心chiah ē-tàng承接上帝新ê委任，这就是主基督强调ê重生之道，chiah有上帝ê恩典ê施与。

结论：活tī杂音真chē ê现代社会，基督徒ài注意听，谨慎去听上帝微细ê声音，好应付人生ê急需。撒母耳听了上帝kā伊hoah三pái了后，回答上帝讲：「请讲，仆人敬听。」