《押韻啟應詩篇》

 | | | 轉寄

台語押韻啟應詩篇 80

作者 Tīⁿ Jî-gio̍k 2007.08.19

80　　A-sat ê si; kau hō͘ Ga̍k-koaⁿ; tiāu ēng “ Chòe kan-chèng ê pek-ha̍p-hoe.”

1a　Í- sek-lia̍t ê bo̍k-chiá ah, chhōa Iok-sek chhin-chhiūⁿ iûⁿ-kûn--ê ,
　　以色 列 的 牧 者 啊，導 約 瑟 親 像 羊 群 者，

1b　　　Kiû Lí àⁿ hī-khang lâi thiaⁿ;
　　　　求 你 俯 耳 孔 來 聽；

1c　Chē tī ki-lō͘-peng ê téng-bīn--ê ,
　　坐 在 基 路 兵 的 頂 面 者，

1d　　　Kiû Lí hoat-chhut kng, hō͘ i kng -iàⁿ-iàⁿ.
　　　　求 你 發 出 光， 使 它光 映 映。

2a　Tī Í -hoat-liân, Piān-ngá-bín, Má-ná-se ê bīn-chêng,
　　在 以 法 蓮， 便 雅 憫， 瑪 拿 西 的 面 前，
　　tián-chhut Lí ê koân-lêng,
　　展 出 你 的 權 能，

2b　　　Lâi kiù goán ê khó͘-chêng.
　　　　來 救 阮 的 苦 情。

3a　Siōng-tè ah, hō͘ goán tò-tńg; hō͘ Lí ê bīn hoat-chhut kng;
　　上 帝 啊，使 阮 倒 返；使 你 的 面 發 出 光；

3b　　　Goán chiū tit-tio̍h kiù bô siū phah-sǹg.
　　　　阮 就 得 著 救 無 受 打 算。

4a　Bān-kun ê Siōng-tè Iâ-hô-hoa ah ,
　　萬 軍 的 上 帝 耶 和 華 啊，

4b　　　Lí ǹg Lí ê peh-sìⁿ ê kî-tó hoat-chhut siū-khì, beh jōa-kú ah?
　　　　你 向 你 的 百 姓 的 祈 禱 發 出 怒 氣，要 偌 久 啊？

5a　Lí ēng ba̍k-sái chòe chia̍h-mi̍h, hō͘ in chia̍h;
　　你 用 目 屎 做 食 物， 使 伊 食；

5b　　　Koh niû chōe-chōe ba̍k-sái hō͘ in lim iáu bô kàu-gia̍h.
　　　　復 量 多 多 目 屎 使 伊 飲 猶 無 到 額。

6a　Lí hō͘ keh-piah-kok in-ūi goán lâi saⁿ-chiⁿ,
　　你 使 隔 壁 國 因 為 阮 來 相 爭，

6b　　　Goán ê tùi-te̍k saⁿ-kap teh chhiò tī chhùi-piⁿ.
　　　　阮 的 對 敵 相 與 在 笑 在 嘴 邊。

7a　Bān-kun ê Siōng-tè ah, hō͘ goán tò-tńg,
　　萬 軍 的 上 帝 啊，使 阮 倒 返，
　　hō͘ Lí ê bīn hoat-chhut kng,
　　使 你 的 面 發 出 光，

7b　　　Goán chiū tit-tio̍h kiù bô siū phah-sńg.
　　　　阮 就 得 著 救 無 受 打 損。

8a　Lí tùi Ai-ki̍p sóa chi̍t-châng phû-tô-chhiū,
　　你 對 埃 及 徙 一 欉 葡 萄 樹，

8b　　　Kóaⁿ-chhut lia̍t-pang, lâi chai i chòe chín-kiù.
　　　　趕 出 列 邦， 來 栽 它 做 拯 救。

9a　Lí tī i ê thâu-chêng piàⁿ-khang thó͘-tōe;
　　你 在 它 的 頭 前 傾 空 土 地；

9b　　　I ê kun tèng chhim, chiū siⁿ-thòaⁿ móa-tōe.
　　　　它 的 根 釘 深 ， 就 生 湠 滿 地。

10a　I ê iáⁿ jia-ba̍t chiah-ê soaⁿ-bóe-liu, 　　
　它的 影 遮 密 諸 些 山 尾 遛，

10b　　　I ê ki chhin-chhiūⁿ chin-hó ê pek-hiuⁿ-chhiū.
　　　　　它 的 枝 親 像 真 好 的 柏 香 樹 。

11a　Hoat-chhut i ê ki , chhun kàu Tōa-hái,
　　　發 出 它 的 枝，伸 到 大 海，

11b　　　I ê tîn thòaⁿ kàu Tōa-hô kau-kài.
　　　　　它 的 籐 湠 到 大 河 交 界。

12a　Lí siáⁿ-sū thiah-húi i ê lî- pa , hō͘ i pháiⁿ--khì,
　　　你 啥 事 拆 毀 它 的 籬 笆，使 它 壞 去，

12b　　　Chhut-chāi it -chhè kè -lō͘-lâng bán--i ?
　　　　出 在 一 切 過 路 人 挽 它？

13a　Chhiū-nâ-lāi chhut-lâi ê soaⁿ-ti chau-that--i ,
　　　樹 林 內 出 來 的 山 豬 蹧 蹋 它，

13b　　　Khòng-iá ê cháu-siù chia̍h i .
　　　　　曠 野 的 走 獸 食 它。

14a　Bān-kun ê Siōng-tè ah, kiû Lí tò-tńg lâi chhun-chhiú,
　　　萬 軍 的 上 帝 啊，求 你 倒 返 來 伸 手，

14b　　　Tùi thiⁿ àⁿ-lo̍h khòaⁿ, chiàu-kò͘ chit châng phû-tô-chhiū,
　　　　　對 天 俯 落 看 ， 照 顧 此 欉 葡 萄 樹，

15a　Pó-hō͘ Lí chiàⁿ-chhiú só͘ chai ê phû-tô - íⁿ,
　　　保 護 你 右 手 所 栽 的 葡 萄 樣，

15b　　　Kap Lí ūi ka-kī só͘ kian-kò͘ ê ki .
　　　　　及 你 為 自 己 所 堅 固 的 枝。

16a　I í- keng siū hé sio, siū to chhò;
　　　它已 經 受 火 燒， 受 刀 剉；

16b　　　Ūi-tio̍h Lí ê bīn ê siū-khì, in chiū bia̍t-bô .
　　　　　為 著 你 的 面 的 怒 氣，伊 就 滅 無。

17a　Goān Lí ê chhiú hōaⁿ tī Lí chiàⁿ-pêng ê jîn-sū ,
　　　願 你 的 手 按 在 你 右 傍 的 人 士，

17b　　　Chiū-sī Lí ūi ka-kī só͘ kian-kò͘ ê jîn-chú. 　　
　　　就 是 你 為 自 己 所 堅 固 的 人 子。

18a　Án-ni , goán chiū tit-tio̍h bô tò-thè lī-khui Lí o͘-pe̍h kiâⁿ;
　　　按 呢，阮 就 得 著 無 倒 退 離 開 你 黑 白 行；

18b　　　Kiû Lí hō͘ goán tit-tio̍h oa̍h-miā.
　　　　　求 你 使 阮 得 著 活 命。

19a　Bān-kun ê Siōng-tè Iâ-hô-hoa ah , hō͘ goán tò-tńg;
　　　萬 軍 的 上 帝 耶 和 華 啊，使 阮 倒 返；

19b　　　Hō͘ Lí ê bīn hoat-chhut kng, goán chiū tit-tio̍h kiù, lâi kui ǹg .
　　　　　使 你 的 面 發 出 光， 阮 就 得 著 救，來 歸 向。