《押韻啟應詩篇》

 | | | 轉寄

台語押韻啟應詩篇 69a

作者 Tīⁿ Jî-gio̍k 2007.05.13

69　　Tāi-pi̍t ê si , kau hō͘ Ga̍k-koaⁿ ; tiāu sī ēng “Pek-ha̍p-hoe” .

1a　Siōng-tè ah , kiû Lí kiù góa,
　　上 帝 啊， 求 你 救 我，

1b　　　In-ūi chiah-ê chúi beh im góa ê sìⁿ-miā bōe oa̍h.
　　　　因 為 諸 些 水 要 淹 我 的 性 命 不 活 。

2a　Góa hām-lo̍h tī chhim ê thô͘-bê-lāi , bô thang khiā-kha ê só͘-chāi;
　　我 陷 落 在 深 的 土 泥 內，無 通 khiā腳 的 所 在；

2b　　　Góa kàu chhim ê chúi-lāi , tōa-chúi im-ba̍t góa chāi lāi .
　　　　我 到 深 的 水 內，大 水 淹 密 我 在 內。

3a　Góa in -ūi góa ê âu-kiò ià-siān kàu beh sí ,
　　我 因 為 我 的 喉 叫 厭 倦 到 要 死，

3b　　　Góa ê nâ-âu iā ta--khì;
　　　　我 的 嚨 喉 也 乾 去；

3c　Góa in -ūi thèng-hāu góa ê Siōng-tè ,
　　我 因 為 等 候 我 的 上 帝，

3d　　　Ba̍k-chiu iā hoe-bê .
　　　　目 珠 也 花 迷。

4a　Bô in-toaⁿ oàn-hūn góa--ê ,
　　無 因 端 怨 恨 我 者，

4b　　　Khah chōe góa ê thâu-mn̂g;
　　　　較 多 我 的 頭 毛；

4c　Lām-sám chòe góa ê tùi-te̍k beh bia̍t góa--ê ,
　　濫 糝 做 我 的 對 敵 欲 滅 我 的，

4d　　　Put-chí kiông-béng ná thih-kǹg;
　　　　不 止 強 猛 若 鐵 鋼；

4e　Liân góa só͘ bô chhiúⁿ--tio̍h-ê ,
　　連 我 所 無 搶 著 的，

4f　　　Góa iā tio̍h hêng, tio̍h chheng-sǹg.
　　　　我 也 著 還， 著 清 算。

5a　Siōng-tè ah , góa ê gû-gōng Lí pún-lâi chiū chai;
　　上 帝 啊，我 的 愚 戇 你 本 來 就 知；

5b　　　Góa ê chōe-kòa bô ún-môa tī Lí ê gán-kài.
　　　　我 的 罪 過 無 隱 瞞 在 你 的 眼 界。

6a　Bān-kun ê Chú Iâ-hô-hoa ah ,
　　萬 君 的 主 耶 和 華 啊，

6b　　 Kiû Lí m̄-thang hō͘ hiah-ê thèng-hāu Lí ê lâng,
求 你 不 通 使 彼 些 等 候 你 的 人， 　　　　
　　　　ūi-tio̍h góa lâi kiàn-siàu;
　　　　為 著 我 來 見 誚；

6c　Í- sek-lia̍t ê Siōng-tè ah ,
　　以色 列 的 上 帝 啊，

6d　　　Kiû Lí m̄-thang hō͘ hiah-ê chhē Lí ê lâng,
　　　　求 你 不 通 使 彼 些 尋 你 的 人，
　　　　ūi-tio̍h góa lâi siū lêng-jio̍k ê pit -iàu.
　　　　為 著 我 來 受 凌 辱 的 必 要。

7a　In-ūi góa ūi-tio̍h Lí ê iân-kò͘ siū lóe-mē,
　　因為 我 為 著 你 的 原 固 受 詈 罵，

7b　　　Góa móa-bīn kiàn-siàu tio̍h khut-kē .
　　　　我 滿 面 見 誚 著 屈 下。

8a　Góa ê hiaⁿ-tī khòaⁿ góa chòe kè -lō͘ ê lâng,
　　我 的 兄 弟 看 我 做 過 路 的 人，

8b　　　Góa ê tông-pau khòaⁿ góa chòe gōa-pang-lâng.
　　　　我 的 同 胞 看 我 做 外 邦 人。

9a　In-ūi góa ūi-tio̍h Lí ê chhù, sim-lāi chhin-chhiūⁿ hé to̍h;
　　因 為 我 為 著 你 的 厝， 心 內 親 像 火 to̍h；

9b　　　Koh lóe-mē Lí ê lâng ê lóe-mē, lóng kàu tī góa chhin-chhiūⁿ soh.
　　　　又 詈 罵 你 的 人 的 詈 罵，攏 到 在 我 親 像 索。

10a　Góa lâu ba̍k-sái, ēng kìm-chia̍h khek-khó͘ góa ê sim;
　　　我 流 目 屎，用 禁 食 刻 苦 我 的 心；

10b　　　Che hoán-tńg chòe góa lêng-jio̍k lâi siong-sim.
　　　　　這 反 轉 做 我 凌 辱 來 傷 心。

11a　Góa ēng môa-pò͘ chòe i- chiûⁿ,
　　　我 用 麻 布 做 衣 裳，

11b　　　Lâng chiū ēng góa chòe chhiàu-tâm lâi phì-siùⁿ.
　　　　　人 就 用 我 做 笑 談 來 譬 相。

12a　Chē tī siâⁿ-mn̂g--ê tâm-lūn góa;
　　　坐 在 城 門 者 談 論 我；

12b　　　Chiú-hàn ēng góa chòe khek.
　　　　　酒 漢 用 我 做 曲。

13a　Chóng-sī góa tī tit-tio̍h Lí chiap-la̍p ê sî ,
　　　總 是 我 在 得 著 你 接 納 的 時，

13b　　　Tùi Iâ-hô-hoa Lí kî-tó chòe tek -ì .
　　　　　對 耶 和 華 你 祈 禱 做 得 意。

13c　Siōng-tè ah , kiû Lí chiàu Lí chû-ài ê hong-sēng,
　　　上 帝 啊， 求 你 照 你 慈 愛 的 豐 盛，

13d　　　Chiàu Lí chín-kiù ê chin-si̍t lâi ìn góa ê khó͘-chêng.
　　　　　照 你 拯 救 的 真 實 來 應 我 的 苦 情。

14a　Kiû Lí kiù góa chhut thô͘-bê- tî ,
　　　求 你 救 我 出 土 泥 池，

14b　　　Hō͘ góa bô tîm--lo̍h-khì;
　　　　　使 我 無 沈 落 去；

14c　Kiû Lí kiù góa thoat-lī oàn-hūn góa ê lâng,
　　　求 你 救 我 脫 離 怨 恨 我 的 人，

14d　　　Hō͘ góa chhut chhim ê chúi-khang.
　　　　　使 我 出 深 的 水 孔 。

15a　Kiû Lí bo̍h-tit iông-ún tōa-chúi im-ba̍t góa;
　　　求 你 莫 得 容 允 大 水 淹 密 我；

15b　　　Bo̍h-tit iông-ún chhim-ian thun góa;
　　　　　莫 得 容 允 深 淵 吞 我；

　　　　Iā bo̍h-tit iông-ún hām-khiⁿ hām góa.
　　　　　也 莫 得 容 允 陷 坑 陷 我。

16a　Iâ-hô-hoa ah, in-ūi Lí ê chû-ài sī hó, kiû Lí ìn góa;
　　　耶 和 華 啊，因為 你 的 慈 愛 是 好，求 你 應 我；

16b　　　Kiû Lí chiàu Lí chû-pi ê hong-sēng oa̍t-kè-lâi khòaⁿ góa.
　　　　　求 你 照 你 慈 悲 的 豐 盛 越 過 來 看 我。

17a　M̄-thang ng-bīn m̄-khòaⁿ Lí ê lô͘-po̍k teh kiû oa̍h,
　　　不 通 掩 面 不 看 你 的 奴 僕 在 求 活，

17b　　　In-ūi góa tī hoān-lān ê tiong-kan ài hoah,
　　　　　因 為 我 在 患 難 的 中 間 愛 喝，
　　　　kiû Lí kín-kín lâi ìn góa.
　　　　　求 你 緊 緊 來 應 我。