《押韻啟應詩篇》

 | | | 轉寄

台語押韻啟應詩篇 68b

作者 Tīⁿ Jî-gio̍k 2007.05.06

68　　 Tāi-pi̍t ê si-koa; kau hō͘ Ga̍k-koaⁿ.

19a　Chú ji̍t-ji̍t pē goán ê tàⁿ, I sī eng-kai o-ló--ê ,
　　　主 日 日 背 阮 的 擔，祂 是 應 該 讚美 的，

19b　　　Chiū-sī kiù goán ê Siōng-tè .
　　　　　就 是 救 阮 的 上 帝。

20a　Siōng-tè sī kā goán kiâⁿ ta̍k-iūⁿ chín-kiù ê Iâ-hô-hoa.
　　　上 帝 是 給 阮 行 逐 樣 拯 救 的 耶 和 華。

20b　　　Ōe thoat-lī sí -bô, sī chāi-tī Chú Iâ-hô-hoa.
　　　　　會 脫 離 死 無，是 在 於 主 耶 和 華。

21a　Chóng-sī Siōng-tè beh phah-phòa I ê tùi-te̍k ê thâu-khak;
　　　總 是 上 帝 要 拍 破 祂 的 對 敵 的 頭 殼；

21b　　　Chiū-sī hit -ê siông-siông hoān-chōe ê lâng ê thâu-khak.
　　　　　就 是 彼 個 常 常 犯 罪 的 人 的 頭 殼 。

22a　Chú kóng, “Góa beh hō͘ peh-sìⁿ tùi Pa-san tò-tńg--lâi ,
　　　主 講，「我 要 使 百 姓 對 巴 珊 倒 轉 來，

22b　　　Tùi chhim-ian hō͘ in tò-tńg--lāi ;
　　　　　對 深 淵 使 伊 倒 轉 來；

23a　Hō͘ lí phah-chhùi te̍k-jîn,
　　　使 你 拍 碎 敵 人，
　　lí ê kha ta̍h tī tùi-te̍k ê huih ê téng-bīn;
　　　你的 腳 踏 在 對 敵 的 血 的 頂 面；

23b　　　Lí ê káu ê chi̍h chī in .”
　　　　　你 的 狗 的 舌 舐 伊。」

24a　Siōng-tè ah , Lí sī góa ê Siōng-tè , góa ê ông;
　　　上 帝 啊，你 是 我 的 上 帝，我 的 王；

24b　　　Lâng í- keng khòaⁿ-kìⁿ Lí kiâⁿ--kè , kiâⁿ ji̍p sèng ê cháu-lông.
　　　　　人 已 經 看 見 你 行 過，行 入 聖 的 走 廊。

25a　Chhiùⁿ-koa--ê kiâⁿ tī thâu-chêng-bīn, chok-ga̍k--ê tè tī āu-bīn,
　　　唱 歌 者 行 在 頭 前 面， 作 樂 者 隨 在 後 面。

25b　　　Iô lin-long-kó͘ ê cha-bó͘-gín-á tī tiong-kan chòe tīn.
　　　　　搖 鈴 瓏 鼓 的 查 某 囝 仔 在 中 間 做 陣。

26a　Tùi Í-sek-lia̍t ê goân-thâu--lâi--ê ,
　　　對 以 色 列 的 源 頭 來 者，

26b　　　Tī ta̍k ê hōe-tiong, tio̍h o -ló Chú Siōng-tè .
　　　　　在 逐 個 會 中 ， 著 讚 美 主 上 帝。

27a　Tī-hia ū koán-hat in ê sió Piān-ngá-bín,
　　　在 彼 有 管 轄 伊 的 小 便 雅 憫，

27b　　　Ū Iû-tāi ê cho̍k-tiúⁿ kap in kui-kûn ê jîn-sîn,
　　　　　有 猶 大 的 族 長 及 伊 歸 群 的 人 臣，

27c　Ū Se-pò͘-lûn ê cho̍k-tiúⁿ,
　　　有 西 布 倫 的 族 長，

27d　　　Ū Ná-hut-tha-lī ê cho̍k-tiúⁿ.
　　　　　有 拿 弗 他 利 的 族 長。

28a　Lí ê Siōng-tè tiāⁿ-tio̍h Lí ê khùi-la̍t pún-sū;
　　　你 的 上 帝 定 著 你 的 氣 力 本 事；

28b　　　Siōng-tè ah , kiû Lí kian-kò͘ Lí kā goán só͘ chiâⁿ ê sū .
　　　　　上 帝 啊，求 你 堅 固 你 給 阮 所 成 的 事。

29a　Ūi-tio̍h Lí Iâ-lō͘-sat-léng ê tiān,
　　　為 著 你 耶 路 撒 冷 的 殿，

29b　　　Lia̍t-ông beh tòa lé -mi̍h kàu Lí bīn-chêng lâi hiàn.
　　　　　列 王 要 帶 禮 物 到 你 面 前 來 獻。

30a　Kiû Lí chek-pī lô͘-úi-tiong ê iá-siù bô tia̍t-sū ,
　　　求 你 責 備 蘆 葦 中 的 野 獸 無 秩 序，

30b　　　Kap kui-kûn ê iá- gû , í -ki̍p lia̍t-pang-tiong ê sió-gû .
　　　　　及 歸 群 的 野 牛，以 及 列 邦 中 的 小 牛。

30c　In chiong gûn-khì ta̍h tī kha-āu-tiⁿ,
　　　伊 將 銀 器 踏 在 腳 後 脛，

30d　　　Siōng-tè kóaⁿ-sòaⁿ ài kau-chiàn ê peh-sìⁿ.
　　　　　上 帝 趕 散 愛 交 戰 的 百 姓。

31a　Tōa-koaⁿ beh tùi Ai-ki̍p lâi ;　　
　　　 大 官 要 對 埃 及 來；

31b　　　Kó͘-si̍t beh kóaⁿ-kín ǹg Siōng-tè chhun-chhiú chhut--lâi .
　　　　　古 實 要 趕 緊 向 上 帝 伸 手 出 來，

32a　Sè-chiūⁿ ê lia̍t-kok ah , lín tio̍h tùi Siōng-tè chhiùⁿ-koa,
　　　世 上 的 列 國 啊，恁 著 對 上 帝 唱 歌，

32b　　　Goān lín gîm-si o -ló Chú Iâ-hô-hoa.
　　　　　願 恁 吟 詩 讚 美 主 耶 和 華。

33a　Chiū-sī o -ló hit-ê chē tī tùi kó͘-chá chiū chûn-chāi,
　　　就 是 讚 美 彼 的 坐 在 對 古 早 就 存 在，

33b　　　Ke̍k-koân ê thiⁿ ê Chú-cháiⁿ.
　　　　　極 高 的 天 的 主 宰。

33c　I hoat-chhut I ê siaⁿ,
　　　祂 發 出 祂 的 聲，

33d　　　Chiū-sī ke̍k-tōa ê siaⁿ.
　　　　　就 是 極 大 的 聲。

34a　Lín tio̍h chiong koân-lêng kui hō͘ Siōng-tè ;
　　　恁 著 將 權 能 歸 給 上 帝；

34b　　　I ê ui-giâm sī tī Í-sek-lia̍t ê téng-bīn--ê ,
　　　　　祂 的威 嚴 是 在 以色 列 的 頂 面 的，
　　　　I ê koân-lêng sī tī kiong-chhong--ê . 　
　　　　祂 的 權 能 是 在 穹 蒼 的。

35a　Siōng-tè ah , Lí tī sèng ê só͘-chāi,
　　　上 帝 啊，你 在 聖 的 所 在，

35b　　　Sī chin-chiàⁿ thang kiaⁿ--ê ,
　　　　　是 真 正 通 驚 的，

35c　Í -sek-lia̍t ê Siōng-tè lîm-chāi,
　　　以色 列 的 上 帝 臨 在，

35d　　　I sī hit-ê chiong khùi-la̍t koân-lêng siúⁿ-sù I ê peh-sìⁿ--ê ;
　　　　　祂是 彼 個 將 氣 力 權 能 賞 賜 祂的 百 姓 的；

（齊聲）SIŌNG-TÈ SĪ ENG-KAI O-LÓ--Ê , SĪ ENG-KAI O-LÓ--Ê .
　　　　　上 帝 是 應 該 讚 美 的，是 應 該 讚 美 的。